Jesus Cristo Yekare Mateus Nîmenukaꞌpî 3:1-17
3 Mîrîrî yai Jesus arentasaꞌ tanne, João Batista nurîꞌtî erepamîꞌpî keren pona Judéia pata po. Miarî Paapa maimu ekaremeꞌpîtîꞌpî João Batistaya.
2 Taꞌpîiya: —Paapa yeseru yapisî pîꞌ esenumenkatî imakuiꞌpî ayeserukon tîrumakai. Maasa pra aminke pra tamîꞌnawîronkon esaꞌ pe Paapa iiꞌtoꞌ weiyu eseponî pîꞌ man! Tîpemonkonoyamîꞌ pîikaꞌtîiya kupî sîrîrî —taꞌpîiya.
3 Mîîkîrî João pîꞌ pena Paapa maimu ekaremeꞌnen Isaías nurîꞌtî eseurîmaꞌpî. Moropai mîîkîrîya imenukaꞌpî see warantî:Pemonkon entaimepîꞌnî pîꞌ man keren po.Taiya: “Uyepotorîkon erepamî yeꞌmarî ton konekatî.Eꞌma yarakkanmokatî toꞌsarî eerepantoꞌpe”, taiya
taꞌpî Isaíasya. Mîrîrî warantî Joãoya taꞌpî pemonkonyamîꞌ ekonekatoꞌpe Jesus Cristo erepamî rawîrî.
4 Mîîkîrî João pon wanîꞌpî camelo siꞌpotîꞌpî pe. Moropai iworomî wanîꞌpî paaka piꞌpî pe. Mîîkîrî João yaꞌreꞌ wanîꞌpî. Moropai itoꞌ wanîꞌpî kaira pe. Moropai wan wanîꞌpî iwuku pe.
5 Mîrîrî yai Jerusalém po tîîkoꞌmansenon moropai tamîꞌnawîronkon Judéia pata po tîîkoꞌmansenon, moropai iren Jordão rîꞌpîkîrî tîîkoꞌmansenon wîtîpîtîꞌpî João pia imaimu etai.
6 Inkamoroya imakuiꞌpî pe tîweꞌtoꞌkon ekaremekîꞌpî miarî. Moropai inkamoro yenpatakonaꞌpî Joãoya iren Jordão ka.
7 Mîrîrî yai Joãoya mararî pra fariseuyamîꞌ moropai saduceuyamîꞌ iipî eraꞌmaꞌpî tîîpia esenpatakonai. Inkamoro pîꞌ taꞌpî Joãoya: —Amîrîꞌnîkon wanî nariꞌ îkîiyamîꞌ yeꞌkatonkon warantî. Maasa pra imakuiꞌpî pe aweꞌtoꞌkon ayeserukon tîrumakai pra Paapa ekoreꞌmatoꞌ yapai eꞌpîikaꞌtîpai awanîkon. Tîîse mîrîrî warantî aweꞌpîikaꞌtîkon eserîke pra naatîi.
8 Mîrîrî yeꞌnen ayeserukon imakuiꞌpî pe aweꞌtoꞌkon rumakatî. Morî ayeserukon ton yapiꞌtî tamîꞌnawîronkonya ayeseru rîꞌpîkon rumakasaꞌyaꞌnîkon epuꞌtoꞌpe.
9 Moropai kîkatî Paapaya utarumaꞌtîkon pepîn ipemonkono pe anna wanî yeꞌnen, maasa pra Abraão payanyamîꞌ pe anna wanî kîkatî. Îꞌ pe pra rî mîrîrî taayaꞌnîkon manniꞌ wanî. Maasa pra Abraão payanîꞌsan pe Paapaya seeniꞌ tîꞌ, miakanma eꞌpainon ayentakon.
10 Aꞌkî, waꞌka moro man, yei yaꞌtîtoꞌ ton ikara kîꞌpî yapîꞌ. Manniꞌ yei morî pe teperu tîînen pepîn yaꞌtîtoꞌ ton tamîꞌnawîrî. Moropai mîrîrî yenumî toꞌya apoꞌ yaꞌ aarantoꞌpe.
11 Tîîse uurîya amîrîꞌnîkon yenpatakona sîrîrî tuna ke neken, ayeserukon imakuiꞌpî kuꞌtoꞌyaꞌnîkon rumakasaꞌyaꞌnîkon ekaremeꞌnen pe. Tîîse uyeꞌmaꞌpî pîꞌ tiaron iipî. Mîîkîrî wanî uurî yentai meruntî ke. Ipîkku pe awanî yeꞌnen mîîkîrî pisaꞌsaꞌ yewa yeukauya eserîke pra awanî, uyentai awanî yeꞌnen. Mîîkîrîya amîrîꞌnîkon yenpatakona pe man ayesaꞌkon pe Morî Yekaton Wannî eꞌtoꞌpe moropai apoꞌ ke amîrîꞌnîkon yenpatakona pe man. Mîrîrî warantî ikupîiya tamîꞌnawîrî imakuiꞌpî moꞌkapa kaiꞌma.
12 Maasa pra mîîkîrî yenyaꞌ trigo sururukatoꞌ wanî. Mîrîrî ke isururukaiya. Ipiꞌpî koreꞌtapai imenkaiya. Mîrîrî sururukasaꞌ tîuya yaraꞌtîiya itenseꞌ yaꞌ. Mîrîrî piꞌpîrîꞌpî yannukuiya moropai ipoꞌtîiya apoꞌ yaꞌ eesiꞌnîpî neporîton pepîn yaꞌ —taꞌpî Joãoya toꞌ pîꞌ.
Jesus Yenpatakona Joãoya
13 Mîrîrî yai Jesus wîtîꞌpî Galiléia poi iren Jordão ka, João Batistaya tenpatakonatoꞌpe kaiꞌma.
14 Tîîse Joãoya teseru miakanmaꞌpî kaꞌneꞌ pe. Taꞌpîiya: —Uurî neken yenpatakonaya eꞌpai tîîse uyenpatakonakî taaya mîrîrî upîꞌ —taꞌpî Joãoya.
15 Tîîse Jesusya imaimu yuukuꞌpî: —Tîwîrî mîrîrî warantî ikupî eꞌpai awanî. Maasa pra mîrîrî warantî ikupîya yairî ituꞌse Paapa eꞌtoꞌ yawîrî awanî. Moropai —Îꞌ waniꞌ pra man —taꞌpî João Batistaya.
16 Mîrîrî pe rî tenpatakonasaiꞌya tîpo, tuna kapai Jesus eseuꞌka pe, kaꞌ esettapurukaꞌpî. Moropai Jesusya Paapa winîpainon Morî Yekaton Wannî autî eraꞌmaꞌpî tîpona wakuꞌka warantî. Moropai tîpona eereuta eraꞌmaꞌpîiya.
17 Moropai kaꞌ poi Paapa eseurîmatoꞌ etaꞌpîiya. Taꞌpî Paapaya: —Mîserî unmu, uwakîri puꞌkuru. Kureꞌne ipîꞌ uurî atausinpa —taꞌpî Paapaya.
