Jesus Cristo Yekare Mateus Nîmenukaꞌpî 5:1-48
5 Arinîkon pemonkonyamîꞌ eraꞌma tîuya pe Jesus enukuꞌpî wîꞌ pona. Moropai eereutaꞌpî. Eereutasaꞌ tanne inenupaꞌsan ipemonkonoyamîꞌ iipîꞌpî iipia aminke pra.
2 Moropai inkamoro yenupa piaꞌtîꞌpîiya. Taꞌpîiya toꞌ pîꞌ:
Morî Pe Eꞌnîtoꞌ Pîꞌ Jesus Eseurîma
3 —Morî pe puꞌkuru mannankan îꞌ ton pra tîweꞌsanon wanî. Mannankan Paapa pia tîntîrîkon ton pra awanî epuꞌnenan.Morî pe toꞌ wanî maasa pra inkamoro esaꞌ pe Paapa wanî moropai ipemonkono pe toꞌ koꞌmamî.
4 Morî pe puꞌkuru mannankan tîkaruwasenon wanî.Imakuiꞌpî pîꞌ toꞌ karau tanne, Paapaya toꞌ pîikaꞌtî taatausinpai toꞌ eꞌtoꞌpe.
5 Morî pe puꞌkuru mannankan moo tîweꞌsanon, tiwinarî teekoreꞌmasanon pepîn wanî.Morî pe toꞌ wanî maasa pra sîrîrî pata tîrî Paapaya toꞌ pataꞌseꞌ ton.
6 Morî pe puꞌkuru mannankan wanî kureꞌne Paapa yeseru ankuꞌpai tîweꞌsanon.Inkamoro wanî mannankan emiꞌne tîweꞌsanon moropai tuna aninnîpai tîweꞌsanon warantî.Maasa pra kureꞌne yairî eꞌpai toꞌ wanî yeꞌnen.Morî pe toꞌ wanî maasa pra inkamoro pia Paapaya teseru kuꞌtoꞌpe toꞌya itîrî toꞌ pia.
7 Morî pe puꞌkuru mannankan pemonkonyamîꞌ saꞌnamanenan wanî,maasa pra toꞌ saꞌnama Paapaya.
8 Morî pe puꞌkuru mannankan imakuiꞌpî ton pra tîweꞌsanon wanî,maasa pra inkamoroya Paapa eraꞌma.
9 Morî pe puꞌkuru mannankan pemonkonyamîꞌ ekoreꞌmaꞌsan manaꞌpokanenan wanî.Maasa pra inkamoro manaꞌpokanenan esatî toꞌya Paapa munkî pe.
10 Morî pe puꞌkuru mannankan tîweꞌtarumaꞌtîsanon wanî.Yairî Paapa yeseru kupî toꞌya wenai toꞌ tarumaꞌtî toꞌya.Inkamoro awanî taatausinpai maasa pra Paapa, tesaꞌkon pia toꞌ koꞌmamî ipemonkono pe,
—taꞌpî Jesusya toꞌ pîꞌ.
11 —Morî pe puꞌkuru amîrîꞌnîkon wanî teuren amuꞌtunpakon toꞌya tanne. Moropai awinîkîiꞌnîkon toꞌ eseurîma seruꞌyeꞌ pe. Moropai tuꞌke imakuiꞌpî kupî toꞌya awinîkîiꞌnîkon upemonkono pe awanîkon wenai.
12 Mîrîrî yeꞌnen taatausinpai puꞌkuru eꞌtî mararî pra. Maasa pra aapiaꞌnîkon tîntîrî ton konekasaꞌ Paapaya man kaꞌ po. Mîrîrî warantî nîrî pena amîrîꞌnîkon rawîronkon Paapa maimu ekaremeꞌnenan profetayamîꞌ nurîꞌsan tarumaꞌtîꞌpî toꞌya, atarumaꞌtîuyaꞌnîkon manniꞌ warantî —taꞌpîiya.
Jesus Eseurîma Pan Pîꞌ Moropai Uweiyukon Pîꞌ
13 Jesusya toꞌ yenupa koꞌmannîpîꞌpî. Taꞌpîiya: —Amîrîꞌnîkon yeseru wanî pan warantî morî pe pemonkonyamîꞌ pîikaꞌtîton pe. Tîîse inîꞌmîra pan enasaꞌ ya, morî pe awanî pepîn. Ipoꞌmîra awanî. Pan pe awanî pepîn. Moropai mîrîrî wanî îꞌ pe pra rî. Moropai mîrîrî papo toꞌya poro pona pemonkonyamîꞌya mîrîrî yakiꞌtapapîtî tuutîkon kaisarî.
14 Moropai tiaron ekaremekîꞌpîiya. Taꞌpîiya: —Amîrîꞌnîkon yeseru wanî pata weiyu warantî tamîꞌnawîronkon neraꞌmaton pe. Aꞌkî, cidade konekasaꞌ wîꞌ po tîweꞌsen eraꞌma tamîꞌnawîronkonya eꞌpainon. Teeseraꞌmasen pepîn eena eserîke pra awanî, kawîne tîwanî yeꞌnen aronne eeseraꞌma koꞌmannîpî.
15 Moropai anîꞌya tîꞌkumaꞌtu yawittanîpî pepîn eꞌpainon waikîraꞌpî yoꞌkoi itîrîpa. Tîîse yawittanîpîiya itaponseꞌ pe tînkonekaꞌpî pona itîrîpa. Tamîꞌnawîronkon wîttî ta tîweꞌsanonya eraꞌmatoꞌpe toꞌ weiyuꞌmatoꞌpeiya.
16 Mîrîrî warantî nîrî amîrîꞌnîkon yeseru eꞌpai awanî aweiyukon warantî. Tiaronkonya ayeserukon eraꞌmatoꞌpe morî pe puꞌkuru. Moropai mîrîrî ayeserukon wenai inkamoroya nîrî Paapa kaꞌ pon yapurîtoꞌpe —taꞌpîiya.
Jesus Eseurîma Moisés Nurîꞌtîya Yenupantoꞌ Pîꞌ
17 Inîꞌrî Jesus eseurîmaꞌpî. Taꞌpîiya: —Moisés nurîꞌtîya ayenupatoꞌkon moropai penaronkon Paapa maimu ekaremeꞌnenan profetayamîꞌ nurîꞌtîya ayenupatoꞌkon yaretîꞌkai uuiꞌsaꞌ kaiꞌma kîsenumenkatî. Mîrîrî yaretîꞌkai uuiꞌsaꞌ pra wai. Tîîse uuipîꞌpî îꞌ taatoꞌpe awanî ekaremeꞌse apîꞌnîkon. Moropai mîrîrî unkupî ekaremeꞌsaiꞌya yawîrî ikuꞌtoꞌpeuya uuipîꞌpî.
18 Maasa yairon pîꞌ tauya etatî. Kaꞌ moropai pata ataretîꞌka pîkîrî, Moisésya yenupantoꞌ ataretîꞌka pepîn. Tîîse tamîꞌnawîrî aakoꞌmamî itonpa emoꞌka pepîn. Tîîse tamîꞌnawîrî taasaiꞌya yawîrî aweꞌkupî eꞌtoꞌ yawîrî tamîꞌnawîron ataretîꞌka pîkîrî.
19 Tîîse anîꞌya Moisésya yenupantoꞌ yawîrî ikupî tanne tîîse tiwin mîrikkî ipuremeꞌsaiꞌya ya, moropai mîrîrî ke tiaron yenupaiya ya, ikupî tîuya manniꞌ warantî. Paapa pia mîîkîrî wanî tiaronkon ipemonkonoyamîꞌ maꞌre awanî. Tîîse anîꞌya Moisésya yenupantoꞌ yawîrî puꞌkuru ikupî ya moropai mîrîrî ke tiaronkon yenupaiya ya innape kupî tîuya manniꞌ warantî, mîîkîrî wanî ipîkku pe puꞌkuru Paapa pia, tiaronkon ipemonkonoyamîꞌ yentai.
20 Maasa pra tauya sîrîrî apîꞌnîkon. Morî ayeserukon awanî ya, manniꞌkan Moisés nurîꞌtîya yenupantoꞌ pîꞌ yenupatonkon yeseru kaisarî moropai fariseuyamîꞌ yeseru kaisarî, ipemonkono pe aakoꞌmamîkon pepîn Paapa pia. Tîîse morî panpîꞌ toꞌ yeseru yentai ayeserukon eꞌpai awanî aakoꞌmamîkonpa Paapa pia ipemonkono pe —taꞌpî Jesusya toꞌ pîꞌ.
Jesus Eseurîma Esewanmîrîntoꞌ Pîꞌ
21 Jesusya taꞌpî: —Pena atamokon rîꞌsan pîꞌ îꞌ taꞌpî epuꞌtî pîꞌ naatî? Taꞌpî see warantî:“Pemonkon kîꞌwîtî. Anîꞌya pemonkon wîîsaꞌ ya mîîkîrî yarî eꞌpai awanî ipîkku tîweꞌsen juiz pia”.
22 Tîîse uurîya taa sîrîrî apîꞌnîkon. Anîꞌ ekoreꞌmasaꞌ ya tonpa yarakkîrî mîîkîrî yarî toꞌya eꞌpai awanî ipîkku pe tîweꞌsen juiz pia. Moropai anîꞌya taa ya tonpa winîkîi “Îꞌ epuꞌnen pepîn amîrî”, taiya ya ipîꞌ, mîîkîrî yarî toꞌya ipîkku pe tîweꞌsanon toꞌ yepurukon pia itarumaꞌtîtoꞌpe toꞌya. Moropai anîꞌya tonpa esatî ya, “Imakuiꞌpî amîrî, pakko”, taiya ya, nariꞌ pe awanî. Tîwarî eꞌpai awanî mîîkîrî yenumî Paapaya namai apoꞌ yaꞌ aarantoꞌpe.
23 Mîrîrî yeꞌnen Paapa yapurî pe antîrî tîrîya yai tîîse awenpenata ayonpa awinîkîi ekoreꞌmaꞌpî moro awanî pîꞌ.
24 Mîrîrî tanne, moro antîrî nîmîkî moropai atîkî eꞌmaiꞌ pe ayonpa pia. Yarakkîrî ayeseru konekata. Moropai tamîꞌnawîrî morî pe teekonekai ennaꞌpokî Paapa yapurî pe antîrî tîrîpa.
25 Mîrîrî warantî ayeyatonya ayarî ya juiz pia, kaꞌneꞌ pe ayeserukon konekatî ayeyaton yarakkîrî apîꞌ eeseurîma rawîrî. Mîrîrî kupîya pra awanî ya, ayarîiya ipîkku pe tîweꞌsen pia. Moropai mîîkîrî juizya amîrî rumaka surara yenyaꞌ. Moropai mîîkîrîya ayarakkamo atarakkannîtoꞌ ta.
26 Tauya sîrîrî apîꞌ mîrîrî atarakkannîtoꞌ tapai eepaꞌka pepîn kaꞌneꞌ pe. Tamîꞌnawîrî mîrîrî ankupîꞌpî yeꞌmaya pîkîrî aakoꞌmamî —taꞌpî Jesusya.
Jesus Eseurîma Imakuiꞌpî Pe Unoꞌpîkon Tîrumakai Tiaron Yarakkîrî Eꞌnîtoꞌ Pîꞌ
27 —Îꞌ taasaꞌ toꞌya epuꞌtî pîꞌ naatîi.“Tînoꞌpî ke siꞌma wîriꞌsanyamîꞌ yarakkîrî tîweꞌse pra eꞌtî. Moropai tînyo ke siꞌma tiaron warayoꞌ yarakkîrî tîweꞌse pra eꞌtî”.
28 Tîîse uurîya taa sîrîrî apîꞌnîkon anîꞌya wîriꞌ eraꞌma ya, moropai yarakkîrî eꞌpai tîwanî pîꞌ eesenumenka ya, yarakkîrî mîîkîrî eꞌsaꞌ mîrîrî tewan yaꞌ.
29 Mîrîrî yeꞌnen wîriꞌ eraꞌmaya ya ayenu meruntî winon ke imakuiꞌpî kupîya emapuꞌtîiya. Mîrîrî namai imoꞌkakî, yenunkî imakuiꞌpî kupîya namai. Maasa pra asakîꞌne ayenu tîîse, imakuiꞌpî kuꞌsaꞌya ya, attî apoꞌ yaꞌ ankupîꞌpî wenai. Mîrîrî yeꞌnen morî pe panpîꞌ awanî itenu pra aakoꞌmamî ya imakuiꞌpî tîkuꞌse pra.
30 Moropai ayenya meruntî winonya imakuiꞌpî kupîya emapuꞌtî ya, mîrîrî merenkîꞌkî moropai yenunkî imakuiꞌpî kupîya namai. Maasa pra ayenya merenkîꞌsaꞌya ya, aakoꞌmamî enen ipatîkarî. Mîrîrî wanî morî pe panpîꞌ, asakîꞌne ayenya tîîse apoꞌ yaꞌ attî yentai —taꞌpî Jesusya.
Imakuiꞌpî Pe Awanî
Tînoꞌpî Rumaka Pîꞌ Teesenumenkasen Pia
31 —Taasaꞌ toꞌya man nîrî see warantî:“Anîꞌya tînoꞌpî rumaka ya, irumaka tîuya kaaretarî tîrîiya eꞌpai awanî iipia”,
taa toꞌya.
32 Tîîse uurîya taa sîrîrî apîꞌnîkon, anîꞌya tînoꞌpî rumaka ya tiaron warayoꞌ yarakkîrî aweꞌsaꞌ pra tîîse, mîîkîrîya imakuiꞌpî kupî tînoꞌpîya emapuꞌtî mîrîrî. Maasa pra tiaron warayoꞌ yarakkîrî awanî emapuꞌtîiya aaniyotasaꞌ ya. Moropai manniꞌ warayoꞌ yarakkîrî awanî manniꞌya nîrî imakuiꞌpî kupî —taꞌpî Jesusya.
Seruꞌ Pe Unkupîkon Ton Pepîn Pîꞌ
Eseurîman Eꞌpai Pra Awanî
33 —Epuꞌnenan nîrî amîrîꞌnîkon pena atamokon nurîꞌtî pîꞌ îꞌ kaiꞌma taꞌpî.“Îꞌ taasaꞌyaꞌnîkon ya Paapa pîꞌ, taꞌpîyaꞌnîkon yawîrî ikuꞌtî, seruꞌyeꞌ pe tîweꞌse pra”,
taa toꞌya.
34 Tîîse uurîya taa sîrîrî apîꞌnîkon. Amîrîꞌnîkon esenumenka see warantî. Paapa winîkîi pra tauya ya, îꞌ waniꞌ awanî pepîn îꞌ taꞌpîuya yawîrî pra ikupîuya, taayaꞌnîkon. Tîîse kaꞌ winîkîi teeseurîmai pra eꞌtî. Maasa pra Paapa yaponseꞌ pe awanî mîrîrî mîîtoꞌpe.
35 Moropai pata winîkîi tîkai pra eꞌtî. Maasa pra Paapa puu yaponseꞌ pe awanî mîrîrî mîîtoꞌpe. Moropai Jerusalém cidaderî winîkîi tîkai pra eꞌtî. Maasa pra Paapa pataꞌseꞌ pe awanî mîrîrî mîîtoꞌpe.
36 Moropai apuꞌpai winîkîi tîkai pra eꞌtî. Maasa pra apuꞌpai siꞌpo miakanmaya pepîn eꞌpainon aimutun pe aweꞌtoꞌpe. Moropai aimutun miakanmaya pepîn îrikkutun pe aweꞌtoꞌpe.
37 Mîrîrî yeꞌnen îꞌ winîkîi takai pra eꞌtî, innape amaimukon wanî ekaremekîkonpa. Tîîse amaimukon eꞌpai awanî see warantî: Inna, kaane, kaiꞌma. Maasa pra tuꞌkan îꞌ taatoꞌyaꞌnîkon amaimukon wanî makui winîpai tuiꞌsen pe.
Tiaron Pîꞌ Eseꞌman Eꞌpai Pra Awanî
38 Jesusya taꞌpî: —Îꞌ taꞌpî toꞌya epuꞌnenan amîrîꞌnîkon:“Anîꞌya ayenu pona apaꞌtî ya, mîîkîrî ayenu yai apaꞌtîtîponya tîmoron epuꞌtî eꞌpai awanî akaisarî. Moropai mîrîrî warantî aye pona apaꞌtîtîponya tîmoron epuꞌtî eꞌpai awanî akaisarî ayeꞌmapa”,
taa Moisés nurîꞌtîya yenupantoꞌ.
39 Tîîse uurîya taa sîrîrî apîꞌnîkon, amîrî winîkîi imakuiꞌpî kuꞌnen pîꞌ teeseꞌmai pra eꞌkî. Anîꞌya ayenpata pona apaꞌtî ya, iratai winî eraꞌtîkî apaꞌtîtoꞌpeiya.
40 Moropai anîꞌya ayarî ya ipîkku tîweꞌsen juiz pia apon ke yeꞌmapa, tîwî apon moꞌkaiya. Tîwî ayaꞌsan nîrî yarîiya îꞌ rî kîꞌkupîi mîîkîrî yarakkîrî.
41 Moropai anîꞌya taa ya apîꞌ: “Uyemanne yaakî aminke puꞌkuru pra tiwin quilómetro kaisarî”, taiya ya, itîîpai pra awanî tanne, tîîse yaakî asakîꞌne quilómetros kaisarî yarîya eꞌpai awanî, tuꞌse awanîꞌpî yentai.
42 Moropai anîꞌ erepamî ya aapia îꞌ rî esaꞌse. Mîîkîrî pia inesatîꞌpî tîîkî. Moropai anîꞌ erepamî ya aapia tîniru esaꞌse, aꞌnokoꞌpî pe eraꞌmakî tîwî tîkuꞌse pra —taꞌpî Jesusya.
Uyeyatonkon Pe Tîweꞌsen Saꞌnama Eꞌpai Awanî
43 —Îꞌ taꞌpî toꞌya epuꞌnenan amîrîꞌnîkon:“Ayonpa awakîrikon puꞌkuru saꞌnama eꞌpai awanî. Moropai ayeyaton kuꞌtî ayewanma pe”,
taa toꞌya.
44 Tîîse uurîya taa sîrîrî apîꞌnîkon, anîꞌ ayeyatonkon pe tîweꞌsen wanî ya, mîîkîrî saꞌnamatî kureꞌne. Moropai epîrematî mîîkîrî atarumaꞌtînenkon pona.
45 Mîrîrî warantî ikupîyaꞌnîkon ya, ayunkon kaꞌ pon munkîyamîꞌ pe awanîkonpa. Maasa pra mîîkîrîya tamîꞌnawîronkon ton pe wei tîrî, morîkon ton pe moropai imakuiꞌsan ton pe. Mîîkîrîya konoꞌ tîrî, morî kuꞌnenan ton pe moropai imakuiꞌpî kuꞌnenan ton pe.
46 Tîîse amîrîꞌnîkonya awakîrikon neken ayonpakon saꞌnama ya tiaronkon tîsaꞌnamai pra. Tîîse îꞌ ton pe mîrîrî warantî siꞌma “Paapa winîpainon yapisîuya”, kaiꞌma eesenumenkakon? Aꞌkî, mîrîrî warantî nîrî imakuiꞌsanya, tîniru yapisî pîꞌ teesenyakaꞌmasanonya ikupî.
47 Moropai eeseurîmakon ya awakîrikon neken ayonpakon yarakkîrî, tiaronkon yarakkîrî teeseurîmai pra, îꞌ pe pra rî awanî. Mîrîrî warantî Paapa epuꞌnenan pepînya nîrî ikupî.
48 Mîrîrî yeꞌnen yairî puꞌkuru eꞌtî eꞌtoꞌ yawîrî. Yairî puꞌkuru ayunkon Paapa, kaꞌ pon awanî manniꞌ warantî awanîkonpa —taꞌpî Jesusya.
