Jesus Cristo Yekare Mateus Nîmenukaꞌpî 6:1-34
6 Jesusya taa koꞌmannîpî: —Aka! tîwarî panpîꞌ eꞌtî Paapa yapurî yeseru pîꞌ. Tiaronkonya ayeraꞌmatoꞌkon pe pra neken. Mîrîrî warantî ikupîyaꞌnîkon ya, Paapa, ayunkon kaꞌ pon nîtîrî, iwinîpainon yapisîyaꞌnîkon pepîn.
2 Mîrîrî yeꞌnen anîꞌ tîweꞌtarumaꞌtîsen pia îꞌ rî tîîsaꞌyaꞌnîkon ya, “Mîrîrî kin tîrî pîꞌ wai koo iipia rî”, kîkatî, manniꞌkan seruꞌyeꞌ pe teesenkuꞌtîsanonya ikupî warantî pra. Maasa pra inkamoroya ikuꞌpîtî Judeuyamîꞌ epereꞌtoꞌkon yewîꞌkon kaisarî. Moropai pemonkonyamîꞌ wîtîtoꞌkon, eꞌmakon kaisarî pemonkonyamîꞌya tapurîtoꞌkon pe kaiꞌma. Ayenkuꞌtîuyaꞌnîkon pepîn, maasa Paapa winîpainon yapisî toꞌya pepîn. Maasa pra aasîrî pemonkonyamîꞌ piapai yapisîꞌpî toꞌya.
3 Tîîse amîrîya îꞌ rî tîrî ya, tîweꞌtarumaꞌtîsen pia itîîkî amaꞌ pe, anîꞌ ayonpa pîꞌ teekaremeꞌse pra, îꞌ kuꞌsaꞌya epuꞌtîiya namai.
4 Mîrîrî antîrîꞌpî epuꞌtî anîꞌya eꞌpai pra man. Tîîse ayun, tamîꞌnawîron eraꞌmanenya îꞌ kuꞌsaꞌya eraꞌma. Mîrîrî wenai aapia tîntîrî tîrîiya.
Jesusya Yenupan Epîremantoꞌ Pîꞌ
5 —Eepîremakon ya, manniꞌkan seruꞌyeꞌ pe tîweꞌsanonya ikupî warantî kîꞌkuꞌtîi. Maasa pra inkamoro epîremapîtî Judeuyamîꞌ epereꞌtoꞌkon yewîꞌkon tapîꞌ satippe siꞌma. Moropai toꞌ epîremapîtî eꞌmakon, pemonkonyamîꞌ wîtîtoꞌ, eꞌmakon eraꞌtîtoꞌkon ta pîꞌ siꞌma. Tamîꞌnawîronkon pemonkonyamîꞌya teraꞌmatoꞌkon pe kaiꞌma, mîrîrî kupî toꞌya. Ayenkuꞌtîuyaꞌnîkon pepîn. Inkamoroya tamîꞌnawîrî tînapisîkon yapisîꞌpî pemonkonyamîꞌ winîpai, Paapa winîpai îꞌ yapisî toꞌya pepîn.
6 Tîîse mîrîrî warantî pra amîrîꞌnîkonya ikupî eꞌpai man. Eepîremakon ya, ayewîꞌkon ta ewontî. Moropai ayewîꞌkon manaꞌta yarakkantî, anîꞌya ayeraꞌmakon namai. Moropai epîrematî, manniꞌ anîꞌ neraꞌma pepîn, Paapa pîꞌ. Moropai mîîkîrî tamîꞌnawîrî îꞌ konekayaꞌnîkon eraꞌmanenya tîntîrî tîrî aapiaꞌnîkon.
7 Eepîrematoꞌkon yai, eepîremakon ya, seꞌ tapairî mai tinnaꞌpopîꞌse pra eꞌtî, manniꞌkan Paapa epuꞌnenan pepînya ikupî manniꞌ warantî. Maasa pra inkamoro epîrema kusan pe tiwinan manaꞌpopîtî pîꞌ toꞌ koꞌmamî. Mîrîrî warantî neken Paapaya teepîremantoꞌkon eta kaiꞌma toꞌ esenumenka.
8 Mîrîrî yeꞌnen tauya sîrîrî, inkamoro warantî pra eꞌtî. Maasa pra Paapa ayunkonya tamîꞌnawîron îꞌ ituꞌse aweꞌtoꞌkon epuꞌtî pîꞌ man, maasa esatîyaꞌnîkon rawîrî epuꞌtî pîꞌ man.
9 Mîrîrî yeꞌnen tauya sîrîrî, epîrematî see warantî:“Paapa anna yunkon, amîrî kaꞌ po tîîkoꞌmansen.Tamîꞌnawîronkonya morî pe puꞌkuru amîrî wanî epuꞌtî yuꞌse wai.
10 Amîrî wanî tamîꞌnawîronkon esaꞌ pe.Asiꞌkî anna pia, anna esaꞌ pe awanîpa.Ituꞌse aweꞌtoꞌ yawîrî ikupî annaya yuꞌse wai,tarîniꞌ sîrîrî non pona, morî pe puꞌkuru kaꞌ po awanî manniꞌ warantî.
11 Sîrîrîpe ituꞌse anna eꞌtoꞌ tîîkî, anna yekkari ton.Itîîkî anna pia îꞌ ton pra anna wanî namai, Paapa.
12 Moropai Paapa, anna nîkupîꞌpî imakuiꞌpî awinîkîi ikuꞌkî aawanmîra,anna wanmîra tamîꞌnawîronkon nîkupîꞌpî imakuiꞌpî anna winîkîi kupî annaya warantî.
13 Moropai anna pîikaꞌtîkî, imakuiꞌpî ena namai anna yentai.Moropai Makui moꞌkakî anna piapai, Paapa.Maasa pra amîrî wanî anna esaꞌ pe.Meruntî ke amîrî wanî tamîꞌnawîronkon yentai ipatîkarî.Morî pe aakoꞌmamî ikîꞌpî ton pra.Mîrîrî warantî awanî pe man”.
Sîrîrî warantî epîrematî —taꞌpî Jesusya.
14 —Aꞌkî, tauya sîrîrî apîꞌnîkon. Anîꞌkan nîkupîꞌpî imakuiꞌpî awinîkîiꞌnîkon kupîyaꞌnîkon ya aawanmîraꞌnîkon, Paapa kaꞌ ponya nîrî tîîwanmîra ikupî, imakuiꞌpî ankupîꞌpîkon.
15 Tîîse aawanmîraꞌnîkon imakuiꞌpî toꞌ nîkupîꞌpî kupîyaꞌnîkon pra awanî ya, mîrîrî warantî nîrî Ayunkonya ankupîꞌpîkon imakuiꞌpî kupî pepîn tîîwanmîra.
Yekkari Wanî Tonpai Pra Epîreman Pîꞌ
Jesus Eseurîma
16 Moropai ayekkarikon tonpai pra eepîremakon ya, yairî maꞌre ayenpatakon tîkuꞌse pra eꞌtî, manniꞌkan teesenkuꞌtîsanonya ikupî manniꞌ warantî. Aꞌkî inkamoroya mîrîrî warantî ikupî maasa pra tamîꞌnawîronkonya tekkarikon tonpai pra teepîremakon eraꞌmatoꞌpe kaiꞌma. Ayenkuꞌtîuyaꞌnîkon pepîn, aasîrî tamîꞌnawîronkon pemonkonyamîꞌ teraꞌmatîponoꞌsan winîpai yapisîꞌpî toꞌya. Inîꞌ panpîꞌ yapisî toꞌya pepîn Paapa piapai.
17 Tîîse amîrîꞌnîkon epîrema ya, ayekkarikon tonpai pra, ayenpatakon ronatî. Moropai apuꞌpaikon yakinatî,
18 tiaronkonya ayekkarikon tonpai pra eepîremakon epuꞌtî namai. Tîîse Ayunkon neken, Paapa anîꞌ neraꞌma pepînya ayepuꞌtîkon ayekkarikon tonpai pra eepîremakon. Moropai mîîkîrîya, amaꞌ pe îꞌ kupîyaꞌnîkon eraꞌmanenya tîntîrî tîrî aapiaꞌnîkon.
Uyemannekon Pîꞌ Jesus Eseurîma
19 Moropai taꞌpîiya: —Tarî non po ipîkku pe awanîkon pîꞌ teesenumenkai pra eꞌtî. Maasa pra tarî mîrîrî ayemannekon, aponkon yaku oꞌmaꞌkonya. Moropai tarî amaꞌyeꞌkonya ayamaꞌrunpakon.
20 Mîrîrî warantî awanî namai, ayemannekon ton konekayaꞌnîkon yuwatî kaꞌ po. Miarî oꞌmaꞌya aponkon yaku pepîn. Miarî ayemannekon karau pepîn, aataretîꞌka pepîn. Moropai miarî amaꞌyeꞌkonya ayamaꞌrunpakon pepîn.
21 Miarî ikonekatî, maasa pra oꞌnon pata po ayemannekon konekasaꞌyaꞌnîkon ya, manniꞌ pata eesenumenkatoꞌkon wanî aakoꞌmamîkon pîꞌ —taꞌpî Jesusya.
22 Jesusya taꞌpî: —Aꞌkî, îꞌ kaiꞌma esenumenkan wenai yairî, yairî pra uyeserukon wanî epuꞌtî, uꞌkumaꞌtuya ituꞌna uweiyuꞌmakon warantî. Yairî esenumenkan ya, anneꞌ pe pra siꞌma esenkuꞌtîn pepîn.
23 Tîîse yairî pra esenumenkan ya, anneꞌ pe eꞌnî yeꞌnen, esenkuꞌtîn mîrîrî. Mîrîrî yeꞌnen uuwarîrîꞌnîkon esenkuꞌtînsaꞌ ya, kureꞌne puꞌkuru esenkuꞌtînsaꞌ mîrîrî, ewaron ta eꞌnî warantî.
24 Moropai inîꞌrî taꞌpî Jesusya: —Anîꞌ wanî eserîke pra man, asakîꞌne tîkaraiwarî ke. Maasa pra tiaron yapurîiya morî pe tiaron yentai. Moropai tiaron muꞌtunpaiya tiaron maimu yawîrî awanî. Tîîse tiaron pîinamaiya pepîn. Mîrîrî warantî Paapa poitîrî pe eꞌnî eserîke pra man, inîꞌ panpîꞌ tîniru yuꞌse esekaꞌnunkan ya —taꞌpî Jesusya.
Tarî Koꞌmannîtoꞌ Pîꞌ Esenumenkantoꞌ
25 —Mîrîrî yeꞌnen tauya sîrîrî apîꞌnîkon, ayekkarikon ton pra awanî pîꞌ teesenumenkai pra eꞌtî, moropai awukukon ton pra awanî pîꞌ. Moropai aponkon ton pra awanî pîꞌ kîsenumenkatî. Maasa pra tauya sîrîrî apîꞌnîkon, ipîkku pe panpîꞌ Paapa nîtîrîꞌpî uukoꞌmannîtoꞌkon wanî uyekkarikon yentai. Moropai intîrîꞌpî uyesaꞌkon wanî ipîkku pe panpîꞌ uponkon yentai. Manniꞌ ipîkku pe tîweꞌsen tîîsaiꞌya ya, imaꞌre tîrîiya nîrî.
26 Maasa esenumenkatî toronyamîꞌ pîꞌ. Toꞌ esenyakaꞌma pepîn tekkarikon ton pîmî pîꞌ. Moropai tekkarikon moꞌka pîꞌ toꞌ esenyakaꞌma pepîn. Moropai tekkarikon yewîꞌ ton koneka toꞌya pepîn. Tîîse Ayunkonya inkamoro koꞌmannîpî mîrîrî. Toꞌ yaꞌreꞌ ton tîrîiya. Amîrîꞌnîkon kanan? Îꞌ kaiꞌma eesenumenkakon? Inkamoro toronyamîꞌ koꞌmannîpî tîuya yentai aakoꞌmannîpîkon Paapaya, maasa pra toronyamîꞌ yentai awanîkon yeꞌnen.
27 Mîrîrî warantî teesenumenka wenai anîꞌya inîꞌ panpîꞌ tîîkoꞌmantoꞌ ton kupî pepîn tarî non po. Mîrîrî yeꞌnen kîsenumenkatî mîrîrî pîꞌ.
28 Tîîse îꞌ ton pe aponkon ton pra awanî pîꞌ eesenumenkakon mîrîrî? Maasa esenumenkatî parîꞌ yariꞌku, konoꞌ waiyi keren pon pîꞌ. Toꞌ esenyakaꞌma pepîn mîrîrî eporîpa moropai tîponkon ton siꞌpîmî toꞌya pepîn.
29 Tîîse tauya sîrîrî apîꞌnîkon, toꞌ yariꞌkukon wanî morî pe puꞌkuru. Toꞌ warantî anîꞌ epontî pepîn. Teuren Salomão nurîꞌtî ipîkku pe tîweꞌsen epontî morî tîpon yaꞌ. Teuren tîîse toꞌ warantî awanî pepîn.
30 Paapaya parîꞌ keren pon yariꞌkutannîpî. Tîîse manniꞌ parîꞌ koꞌmamî pepîn kureꞌne. Sîrîrîpe eeseraꞌma moropai penane awaꞌpiꞌta. Mîrîrî kupî tîuya yentai puꞌkuru Paapaya amîrîꞌnîkon epontî morî pe awanîkonpa. Îꞌ ton pe mararî mîrikkî innape ikupîyaꞌnîkon mîrîrî?
31 Mîrîrî yeꞌnen tauya sîrîrî, mîrîrî aakoꞌmantoꞌkon pîꞌ teesenumenkai pra eꞌtî. Kîkatî aawarîrîꞌnîkon: “Oꞌnon pata uyaꞌreꞌ ton moropai uwuku ton moropai upon ton eporîuya eꞌpainon?” kîkatî.
32 Manniꞌkan Paapa epuꞌnenan pepînya mîrîrî warantî taa koꞌmannîpî maasa pra ituꞌse tîweꞌtoꞌkon pîꞌ toꞌ esenumenka kureꞌne. Mîrîrî warantî pra amîrîꞌnîkon eꞌpai awanî. Maasa pra ayunkon Paapa kaꞌ ponya tamîꞌnawîrî îꞌ ituꞌse aweꞌtoꞌkon epuꞌtî pîꞌ man.
33 Tîîse eꞌmaiꞌ pe Paapa yenyaꞌ eturumakatî, ayepotorîkon pe aweꞌtoꞌpe. Moropai îꞌ ituꞌse Paapa eꞌtoꞌ yawîrî ikuꞌtî. Mîrîrî kupîyaꞌnîkon ya, tamîꞌnawîrî manniꞌ ituꞌse aweꞌtoꞌkon tîrîiya aapiaꞌnîkon.
34 Mîrîrî yeꞌnen penanan wei pîꞌ teesenumenkai pra eꞌtî. Tîîse sîrîrîpan pîꞌ neken esenumenkatî. Maasa pra penanan weiyu yainon ton moro man. Moropai wei kaisarî moro man mîrîrî weiyu yainon ton. Mîrîrî yeꞌnen eerepamî rawîrî kîsenumenkatî mîrîrî pîꞌ —taꞌpî Jesusya.
