Jesus Cristo Yekare Mateus Nîmenukaꞌpî 7:1-29
7 Jesusya taꞌpî: —Tiaronkon nîkupîꞌpî pîꞌ taatakoꞌmenkai pra eꞌtî, anîꞌ atakoꞌmenka namai ankupîꞌpîkon pîꞌ.
2 Maasa pra tiaronkon pîꞌ aatakoꞌmenkakon warantî tiaron atakoꞌmenka apîꞌnîkon. Tiaronkon pîꞌ ankupîꞌpîkon warantî ikupîiya apîꞌnîkon.
3 Moropai taꞌpîiya inîꞌrî: —Îꞌ waniꞌ awanî yeꞌnen kin ayonpa nîkupîꞌpî, iteseru eraꞌmaya mîrîrî morî pe, ayeseru itentai ankupîꞌpî nura teraꞌmai pra.
4 Tîîse îꞌ ton pe mîrîrî warantî taaya ayonpa pîꞌ. “Maasa ayenu yawon moꞌkatoꞌpeuya”, taaya siꞌmîrikkî pe tîweꞌsen pîꞌ. Tîîse îꞌ waniꞌ awanî yeꞌnen kureꞌnan yei warantî tîweꞌsen ayenu yaꞌ eraꞌmaya pepîn?
5 Amîrîꞌnîkon seruꞌyeꞌkon teesenkuꞌtîsanon aawarîrîꞌnîkon. Eꞌmaiꞌ pe ayeserukon eraꞌmatî, ikonekatî morî pe. Mîrîrî ayeseru tîkonekai ayonpa yeseru konekai attîpa.
6 Moropai taꞌpîiya: —Paapa maimu etatîponkon tîîse innape ikuꞌnenan pepîn, inkamoro yeꞌka pîꞌ kîsekaremeꞌtî. Inkamoro wanî sokoroꞌ pe arinmarakayamîꞌ warantî. Mîrîrî yuꞌse pra tîwanîkon wenai awinîkîiꞌnîkon toꞌ ekoreꞌma. Moropai morî epeꞌke pe tîweꞌsen diamante iteseꞌ yenumî eꞌpai pra awanî porcoyamîꞌ koreꞌta. Maasa pra inkamoroya yakiꞌtapapîtî. Mîrîrî warantî inkamoro Paapa maimu yuꞌsankon pepîn pemonkonyamîꞌ wanî porcoyamîꞌ warantî —taꞌpî Jesusya.
Paapa Pîꞌ Esaꞌtoꞌ Pîꞌ Jesus Eseurîma
7 —Tîîse tauya sîrîrî apîꞌnîkon esatî pîꞌ akoꞌmantî teesetaꞌkai pra, moropai yapisîyaꞌnîkon. Moropai yuwa pîꞌ aakoꞌmantî moropai eporîyaꞌnîkon. Moropai manaꞌta paꞌtî pîꞌ akoꞌmantî moropai wîttî esaꞌya yarakkanmoka.
8 Maasa pra tamîꞌnawîronkon esaꞌnenanya tînesatîꞌpîkon yapisî. Moropai yuwanenanya tînuwakon eporî. Moropai manaꞌta paꞌtînen pia manaꞌta atarakkanmoka.
9 Aꞌkî, anmukukonya tiyu ton esatî ya apîꞌnîkon, inesatîꞌpî pepîn tîꞌ tîrîyaꞌnîkon eꞌpainon iipia, ikei esaꞌsaiꞌya tanne?
10 Moropai tiyoꞌ ton moroꞌ esaꞌsaiꞌya tanne, inesatîꞌpî pepîn îkîi tîrîyaꞌnîkon pepîn iipia? Kaane, inesatîꞌpî tîrîyaꞌnîkon eꞌpainon.
11 Amîrîꞌnîkon wanî imakuiꞌpî kuꞌnenan pe teuren. Tîîse anmukukon pia morî tîînenan amîrîꞌnîkon, imakuiꞌpî tîînenan pepîn. Mîrîrî morî tîrîyaꞌnîkon manniꞌ yentai, Paapa kaꞌ ponya manniꞌkan tîpîꞌ esaꞌnenan pia morî tîrî —taꞌpî Jesusya.
12 —Mîrîrî yeꞌnen tiaronkon yarakkîrî morî kuꞌtî, inkamoroya nîrî morî kupî yuꞌse awanîkon yawîrî. Mîrîrî warantî ikuꞌtoꞌpe Moisés nurîꞌtîya yenupantoꞌ wanî mîrîrî. Moropai penaronkon Paapa maimu ekaremeꞌnenan profetayamîꞌya yenupantoꞌ wanî mîrîrî.
Asakîꞌnan Eꞌma
13 Moropai taꞌpî Jesusya: —Eꞌtaꞌka manaꞌta yai ewontî. Maasa pra aweneꞌ manaꞌta moropai aweneꞌ eꞌma, mîrîrî wanî atakaꞌmantoꞌ yaꞌ yaaton pe. Mîrîrî wanî saꞌme pra. Mîrîrî yeꞌnen tuꞌkankon pemonkonyamîꞌ esenkuꞌtîsaꞌ wîtî mîrîrî atakaꞌmantoꞌ yaꞌ.
14 Tîîse manaꞌta eꞌtaꞌka tauya manniꞌ moropai eꞌma siiruru mîrîrî wanî yaaton pe ipatîkarî koꞌmannîtoꞌ pata pona. Mîrîrî wanî saꞌme. Mîrîrî yeꞌnen tuꞌkankon pepîn pemonkonyamîꞌ wîtî mîrîrî eꞌma taawîrî —taꞌpî Jesusya.
Seruꞌyeꞌkon Profetayamîꞌ
15 Moropai Jesusya taꞌpî: —Tîwarî panpîꞌ eꞌtî seruꞌyeꞌ pe yenupatonkon pîꞌ. Inkamoro iipî Paapa pemonkonoyamîꞌ yenkuꞌtîi innape tîmaimukon wanî kaiꞌma toꞌ eꞌtoꞌpe. Tîîse mîrîrî toꞌ yeseru toꞌ nîkupî wanî kaikusiyamîꞌ yeseru warantî nariꞌ uurîꞌnîkon pia.
16 Mîrîrî yeꞌnen amîrîꞌnîkonya epuꞌtî toꞌ nîkupî wenai. Maasa sîrîrî epuꞌtî —taꞌpîiya. —Mîꞌnî yeꞌ epeta pepîn eꞌpainon uva pe. Moropai figo pe mîꞌnî yeꞌ epeta pepîn eꞌpainon.
17 Tîîse tamîꞌnawîron yei morîya morî pe teperu tîrî. Moropai yei pakkoriꞌtasaꞌya teperu tîrî imakuiꞌpî pe.
18 Mîrîrî yeꞌnen yei morîya imakuiꞌpî pe teperu tîrî pepîn. Moropai yei pakkoriꞌtasaꞌya morî pe teperu tîrî pepîn.
19 Mîrîrî yeꞌnen tamîꞌnawîrî yei morî pe pra teperu tîînen yaꞌtî toꞌya. Moropai mîrîrî yenumî apoꞌ yaꞌ aarantoꞌpe.
20 Mîrîrî warantî inkamoro seruꞌyeꞌ pe tîweꞌsanon yeseru epuꞌtîyaꞌnîkon îꞌ toꞌ nîkupî wenai. Mîrîrî warantî toꞌ epuꞌtîyaꞌnîkon —taꞌpî Jesusya.
Anîꞌ Ewomî Pe Nai Paapa Pia
21 Taꞌpî Jesusya: —Tamîꞌnawîronkonya taa kupî sîrîrî upîꞌ: “Anna yepotorî”, taa toꞌya. Tîîse tamîꞌnawîrî inkamoro mîrîrî taatîponoꞌsan wîtî pepîn Paapa pia. Tîîse manniꞌkan neken îꞌ ituꞌse uyun Paapa eꞌtoꞌ manniꞌ yawîrî ikonekanenan, inkamoro neken wîtî iipia, ipemonkono pe.
22 Îꞌ pensa mîrîrî taa toꞌya weiyu erepamî yai, tuꞌkankon pemonkonyamîꞌya taa kupî sîrîrî. “Anna yepotorî, anna eseurîmaꞌpî Paapa maimu ekaremekî pîꞌ ayeseꞌ wenai tiaronkon pîꞌ. Moropai amîrî anna yepotorî eseꞌ pîꞌ pemonkonyamîꞌ yaꞌ ewomîꞌsan imariwaꞌyamîꞌ yenpaꞌkaꞌpî annaya tuꞌke. Moropai tuꞌke iteꞌka anîꞌ nîkupî eserîkan pepîn kuꞌpîtîꞌpî annaya ayeseꞌ pîꞌ”, taa toꞌya kupî sîrîrî.
23 Inkamoro maimu yuukuuya kupî sîrîrî see warantî: “Anîꞌkan pe awanîkon epuꞌtîuya pra wai. Atarimatî uupiapai. Umaimu yuꞌnenan pepîn amîrîꞌnîkon. Imakuiꞌpî kupî pîꞌ tîîkoꞌmansenon amîrîꞌnîkon”, tauya toꞌ pîꞌ —taꞌpî Jesusya.
Asakîꞌnankonya Tewîꞌkon Koneka
24 Tamîꞌnawîrî mîrîrî taa yaretîꞌka tîuya pe, Jesusya taꞌpî: —Mîrîrî yeꞌnen oꞌnon yeꞌka pe umaimu etanen neken pepîn tîîse ikuꞌnen wanî? Mîîkîrî wanî epuꞌnen pe puꞌkuru. Awanî manniꞌ warayoꞌ epuꞌnen pe tîweꞌsen warantî. Mîîkîrîya tewîꞌ ton konekaꞌpî saꞌman po eesenumî namai.
25 Tewîꞌ konekasaiꞌya tanne, konoꞌ renaꞌpî mararî pra. Tuna kumaꞌpî kureꞌne ipona eerepamîꞌpî. Moropai aꞌsitun erepamîꞌpî ipona yenumîpa kaiꞌma. Tîîse yenumîiya pra awanî maasa pra saꞌman pona ikonekasaꞌ pe awanî yeꞌnen.
26 Tîîse manniꞌ umaimu etanen tîîse ikuꞌnen pepîn pemonkon wanî, manniꞌ yairî pra teesenumenkasen warantî. Yairî pra teesenumenka yeꞌnen, tewîꞌ ton konekaꞌpîiya saꞌman pepîn kasapan pona.
27 Tewîꞌ konekasaiꞌya tanne, konoꞌ renaꞌpî mararî pra. Tuna kumaꞌpî kureꞌne ipona. Moropai aꞌsitun erepamîꞌpî meruntî ke ipona. Aapîtatoꞌ ton pra awanî yeꞌnen yenumîꞌpîiya tamîꞌnawîrî. Îꞌ eꞌnîmî pra awanîꞌpî —taꞌpî Jesusya.
Meruntî Ke Jesus Maimu Wanî
28 Mîrîrî warantî teeseurîmatoꞌ yaretîꞌka Jesusya tanne tuꞌkankon pemonkonyamîꞌ esenumenkaꞌpî mararî pra teesewankonoꞌmai tenupatoiꞌyaꞌnîkon pîꞌ.
29 Maasa pra mîîkîrî yeseru eraꞌmaꞌpî toꞌya Moisés nurîꞌtîya yenupantoꞌ pîꞌ yenupatonkon warantî pra. Tîîse epuꞌnen pe tenupatoiꞌyaꞌnîkon epuꞌtîꞌpî toꞌya, meruntî ke tîweꞌtoꞌ ke tenupaiyaꞌnîkon epuꞌtîꞌpî toꞌya.
