Sîrîrî Kaareta Paulo Nîmenukaꞌpî Roma Ponkon Pia 1:1-32
1 Uurî Pauloya sîrîrî kaareta menuka aapiaꞌnîkon. Uurî wanî Jesus Cristo poitîrî pe. Moropai Paapa nîmenkaꞌpî pe wanî, moropai inaipontîꞌpî pe. Jesus Cristo yekare ekaremeꞌnen pe eꞌtoꞌpe kaiꞌma umenkaꞌpîiya.
2 Pena pata pai sîrîrî eꞌpîikaꞌtîntoꞌ yekare ekaremekîꞌpî Paapaya, mannankan penaronkon tîmaimu ekaremeꞌnenan winîpai. Eeseurîmaꞌpî îꞌ kupî tîuya pîꞌ. Moropai mîrîrî eꞌmenukasaꞌ sîrîrî Paapa maimu yaponseꞌ po.
3 Mîrîrî eeseurîmaꞌpî wanîꞌpî teeseurîmasen pe Paapa munmu pîꞌ, manniꞌ Uyepotorîkon Jesus Cristo pîꞌ. Eesenpoꞌpî warayoꞌ pe manniꞌ Davi nurîꞌtî parîꞌpî pe awanîꞌpî.
4 Moropai kureꞌne tîmeruntîri ke Paapaya ekaremekîꞌpî, tînmu pe puꞌkuru Jesus wanî kaiꞌma. Mîrîrî ikupîꞌpîiya Morî Yekaton Wannî wenai, isaꞌmantaꞌsan koreꞌtapai Jesus eꞌmîꞌsaꞌka yai. Mîîkîrî wanî Uyepotorîkon pe Jesus Cristo.
5 Mîîkîrî wenai morî pe Paapa wanîꞌpî uyarakkîrî. Mîrîrî yeꞌnen uyaipontîꞌpîiya, Cristo poitîrî pe esenyakaꞌmatoꞌpe, anîꞌ tîmenkai pra tamîꞌnawîronkon Judeuyamîꞌ pepîn pîꞌ imaimu ekaremeꞌtoꞌpeuya, mîîkîrî Cristo ton pe. Moropai innape ikuꞌtoꞌpe tiaronkonya innape ikupî tîuyaꞌnîkon wenai Paapa maimu yawîrî toꞌ eꞌtoꞌpe.
6 Inkamoro koreꞌta amîrîꞌnîkon wanî sîrîrî Roma cidaderî ponkon. Moropai ayannosaꞌkon Paapaya wenai, Jesus Cristo pemonkono pe awanîkon.
7 Mîrîrî yeꞌnen tamîꞌnawîronkon amîrîꞌnîkon, Paapa nîsaꞌnamakon moropai inannoꞌsan tîpemonkono pe puꞌkuru awanîkonpa, amîrîꞌnîkon pia imenukauya sîrîrî.
Paapa, uyunkonya moropai Uyepotorîkon Jesus Cristoya aapiaꞌnîkon morî epeꞌmîn tîrî yuꞌse wai. Moropai tîwanmîn tîrî toꞌya yuꞌse wai.
Pauloya Paapa Yapurîtoꞌ Roma Ponkon Wenai
8 Eꞌmaiꞌ pe Uyepotorî Paapa yapurîuya Jesus Cristo nîkupîꞌpî wenai. Maasa pra tamîꞌnawîrî pata ponkonya innape ikuꞌtoꞌyaꞌnîkon yekare etasaꞌ man.
9 Maasa pra Paapaya epuꞌtî aponaꞌnîkon epîrema tîwîrî. Manniꞌ Paapa unapurî tamîꞌnawîrî uyewan ke Jesus Cristo, inmu yekare ekaremekî yeꞌka pe yapurîuya.
10 Esatîuya Paapa pîꞌ îꞌ kaiꞌma amîrîꞌnîkon eraꞌmapîꞌse uutî yuꞌse tîwanî ya, uutî weiyu ton tîîtoꞌpeiya.
11 Maasa pra uurî esenumenkatoꞌ wanî kureꞌne amîrîꞌnîkon aneraꞌmapai. Akoreꞌtaꞌnîkon wanî ya, amîrîꞌnîkon anenupapai wai, mîrîrî ayenupatouꞌyaꞌnîkon wenai, inîꞌ panpîꞌ meruntî ke eenakonpa.
12 Maasa tauya sîrîrî amîrîꞌnîkon pîꞌ tamîꞌnawîrî uurîꞌnîkon tîîse, uurî moropai amîrîꞌnîkon wanî ipîikaꞌtîsaꞌ pe mîrîrî yai. Innape uurîya ikuꞌtoꞌ wenai amîrîꞌnîkon eꞌpîikaꞌtî moropai innape ikuꞌtoꞌyaꞌnîkon wenai uurî eꞌpîikaꞌtî.
13 Uyonpayamîꞌ, epuꞌtîyaꞌnîkon yuꞌse wai, tuꞌke iteꞌka esenumenka amîrîꞌnîkon pia itîîpai, tîîse tîwîrî umanenpanen ton esenpo. Mîrîrî wenai uutî pra wanî. Itîîpai wanîꞌpî amîrîꞌnîkon yenupatoꞌpe. Moropai akoreꞌtawonkonya ikuꞌtoꞌpe innape, îꞌ kaiꞌma manniꞌkan tiaronkon Judeuyamîꞌ pepînya ikupîꞌpî warantî.
14 Maasa pra sîrîrî wanî unkupî tonpe tamîꞌnawîronkon yarakkîrî manniꞌkan eranneꞌkon pîꞌ moropai eranmînon pîꞌ. Moropai epuꞌnenan pîꞌ moropai epuꞌnenan pepîn pîꞌ itekare ekaremeꞌtoꞌpeuya.
15 Mîrîrî yeꞌnen uurî wanî sîrîrî eꞌpîikaꞌtîntoꞌ yekare anekaremeꞌpai amîrîꞌnîkon Roma ponkon pîꞌ nîrî.
Jesus Cristo Yekare Wenai
Innape Ikuꞌnenan Pîikaꞌtî Paapaya
16 Maasa pra uurî eppepî eserîke pra wai Jesus Cristo yekare ekaremekîuya pîꞌ. Maasa pra innape mîrîrî yekare kupî anîꞌya ya, tîmeruntîri ke Paapaya ipîikaꞌtî imakuiꞌpî inkupîꞌpî winîpai. Anna Judeuyamîꞌ, eꞌmaiꞌ pe itekare etatîponkon pîikaꞌtî Paapaya moropai amîrîꞌnîkon Judeuyamîꞌ pepîn pîikaꞌtîiya nîrî mîrîrî yekare etayaꞌnîkon wenai.
17 Maasa pra mîrîrî eꞌpîikaꞌtîntoꞌ yekareya îꞌ kaiꞌma morî pe pemonkon kupî Paapaya ekaremekî. Penaronkon yapisîꞌpîiya innape tîkupî toꞌya wenai. Moropai sîrîrîpe pemonkonyamîꞌ yapisîiya nîrî innape tîkupî toꞌya wenai. Mîrîrî warantî Paapa maimu eꞌmenukasaꞌya taasaꞌ man:Paapa pia morî pe tîweꞌsen koꞌmamî eꞌpai man innape Paapa kupî tîuyaꞌnîkon wenai,
taasaiꞌya man.
Pemonkonyamîꞌ Koꞌmamî
Siꞌkoreꞌta Imakuiꞌpî Kupî Pîꞌ
18 Moropai epuꞌtîꞌnîkon man îꞌ kaiꞌma Paapa ekoreꞌma tamîꞌnawîrî imakuiꞌpî pemonkonyamîꞌ nîkupîꞌpî winîkîi. Moropai mîîkîrî Paapa, kaꞌ ponya toꞌ tarumaꞌtî kureꞌne mîrîrî wenai. Paapa nama toꞌya pepîn tiwin kin. Moropai mîrîrî imakuiꞌpî teserukon wenai tiaronkon tarumaꞌtî toꞌya yairon epuꞌtî toꞌya namai.
19 Pemonkonyamîꞌya Paapa epuꞌtî eꞌpai awanîꞌpî. Maasa pra aronne awanî mîîkîrî epuꞌtoꞌpe toꞌya. Tamîꞌnawîron sîrîrî pata pon konekaꞌpî Paapaya, mîrîrî teraꞌmai pemonkonyamîꞌya tepuꞌtoꞌpe kaiꞌma.
20 Mîrîrî konekaꞌpîiya pata pai, Paapa yeseru eseraꞌma aronne. Meruntî ke puꞌkuru awanî, Paapa pe puꞌkuru awanî esepuꞌtoꞌpe. Anîꞌya eraꞌma pepîn tîîse inkonekaꞌpî winîpai epuꞌtî eꞌpai awanî. Mîrîrî yeꞌnen anîꞌ eꞌwapuꞌtî eserîke pra awanî, —Paapa epuꞌnen pepîn uurî —kaiꞌma.
21 Teuren Paapa epuꞌtî yeꞌka pe yapurî toꞌya pra awanî, tapurî yuꞌse tîîse. Taa toꞌya pra awanî Paapa pîꞌ: —Morî pe puꞌkuru man, Paapa —taa toꞌya pepîn. Tîîse inkamoro esenumenkatoꞌ wanî seꞌ tapairî, pakko pe toꞌ wanî teesenumenkatoꞌkon yaꞌ. Mîrîrî yeꞌnen yairon pîꞌ toꞌ esenumenka eserîke pra awanî.
22 Epuꞌnen pe tîwanîkon kaiꞌma taa toꞌya, tîîse pakko pe toꞌ wanî.
23 Mîrîrî yeꞌnen manniꞌ Paapa, tîîsaꞌmantasen pepîn, yapurî eꞌpai tîîse miaꞌ ke ikonekasaꞌ yapurî toꞌya, pemonkon warantî ikonekasaꞌ. Moropai toron tawainunsen warantî ikonekasaꞌ, moropai sîrîrî pata po taasaꞌsenon oꞌmaꞌkon warantî ikonekasaꞌ, moropai manniꞌkan non poro tîroꞌtakon poro taasaꞌsenon warainokon yapurî toꞌya. Mîrîrî warantî inkamoro yapurî toꞌya pakko pe tîwanîkon yeꞌnen.
24 Mîrîrî yeꞌnen Paapaya inkamoro pemonkonyamîꞌ rumakaꞌpî tîwî ituꞌse tîweꞌtoꞌkon nura kupî pîꞌ toꞌ koꞌmantoꞌpe. Moropai inkamoroya kureꞌnan eppeꞌnîtoꞌ kupî tîpunkon rî ke.
25 Inkamoroya yairî Paapa yapurîtoꞌ kuꞌsaꞌ tîwî seruꞌ pe, Paapa nîkonekaꞌpî yapurîkonpa. Tîîse manniꞌ ikonekatîpon yapurî toꞌya pepîn, manniꞌ tapurî yuꞌse tîweꞌsen tîwîrî. Innape man.
26 Mîrîrî yeꞌka imakuiꞌpî kupî pemonkonyamîꞌya wenai Paapaya inkamoro rumakaꞌpî, mararî pra nura eppeꞌnîtoꞌ kupî pîꞌ toꞌ koꞌmantoꞌpe ituꞌse tîweꞌtoꞌkon pîkîrî. Mîrîrîya wîriꞌsanyamîꞌya nura kupîꞌpî, tîwarainokon wîriꞌsanyamîꞌ yarakkîrî toꞌ wanîꞌpî, warayoꞌkon yarakkîrî pra.
27 Moropai warayoꞌkonya wîriꞌsanyamîꞌ yarakkîrî tîweꞌtoꞌkon rumakaꞌpî, tîwarainokon warayoꞌkon yarakkîrî kureꞌnan eppeꞌnîtoꞌ kupîkonpa. Mîrîrî yeꞌnen tînkupîꞌpîkon imakuiꞌpî wenai tîweꞌtarumaꞌtîtoꞌkon yapisî toꞌya.
28 Îꞌ kaiꞌma yairon Paapa anepuꞌpai pra tîweꞌsaꞌkon wenai, tîwî Paapaya toꞌ rumakaꞌpî, yairon pepîn pîꞌ toꞌ esenumenka seꞌ tapairî, manniꞌ ikuꞌpainon pepîn nura kupîkonpa.
29 Inkamoro yewan yaꞌ tuꞌke awanî siꞌkoreꞌta imakuiꞌpî. Mîrîrî kupî pîꞌ toꞌ koꞌmamî. Îꞌ itesaꞌ pe tiaron eꞌtoꞌ yuꞌse toꞌ wanî. Moropai tiaron pîꞌ imakuiꞌpî pe toꞌ esenumenka. Moropai tiaron pîꞌ toꞌ kinmuwa, moropai tiaron wîî toꞌya. Moropai tiaronkon yarakkîrî eseyaton pîꞌ toꞌ wanî. Moropai seruꞌyeꞌ pe toꞌ wanî. Moropai tonpakon wanî toꞌ yewanma pe. Moropai imakuiꞌpî pe tonpakon winîkîi toꞌ eseurîma koꞌmannîpî.
30 Moropai —Imakuiꞌpî mîîkîrî —taa toꞌya tiaronkon winîkîi. Moropai Paapa wanî toꞌ yewanma pe. Moropai tiaronkon muꞌtunpa toꞌya. Moropai mîî pe toꞌ atapurî tiaronkon yentai eꞌpai tîwanîkon pîꞌ. Moropai tuꞌke imakuiꞌpî kupî tîuyaꞌnîkon yeseru ton yuwa toꞌya. Moropai tunkon nama toꞌya pepîn.
31 Îꞌ yairî, îꞌ yairî pra epuꞌtî toꞌya pepîn. Moropai îꞌ taꞌpî tîuyaꞌnîkon yawîrî tîmaimukon kupî toꞌya pepîn. Moropai toꞌ wanî îꞌ kaiꞌma tiaronkon saꞌnama eserîke pra.
32 Inkamoroya îꞌ kaiꞌma Paapaya taꞌpî epuꞌtî mîrîrî. Paapaya taꞌpî: —Anîꞌ koꞌmamî ya, mîrîrî imakuiꞌpî kupî pîꞌ mîîkîrî saꞌmanta pe man —taꞌpîiya. Tîîse mîrîrî epuꞌtîiꞌma ikupî pîꞌ toꞌ koꞌmamî tîrumakai pra. Moropai itentainon panpîꞌ kupî toꞌya. Maasa pra tiaronkon imakuiꞌpî kuꞌnenan pîꞌ taa toꞌya: —Mîrîrî kupîyaꞌnîkon manniꞌ man morî pe, îꞌ waniꞌ pra man —taa toꞌya tiaronkon pîꞌ.
