Sîrîrî Kaareta Paulo Nîmenukaꞌpî Roma Ponkon Pia 10:1-21
10 Uyonpayamîꞌ, tamîꞌnawîrî uyewan ke esenumenka îꞌ kaiꞌma Judeuyamîꞌ eꞌpîikaꞌtî yuꞌse esenumenka, moropai esatî pîꞌ uukoꞌmamî Paapa pîꞌ inkamoro ton pe.
2 Maasa pra epuꞌtî pîꞌ wai inkamoro wanî innape Paapa yapurînen pe tîweꞌkuꞌsanon pe teuren. Tîîse innape Paapa yapurîtoꞌ toꞌya wanî pepîn yairon pe, epuꞌtî toꞌya pepîn.
3 Epuꞌtî toꞌya pepîn îꞌ kaiꞌma tarakkîrî morî pe pemonkon kupî Paapaya. Mîrîrî yeꞌnen yuwa toꞌya tîwinîpaiꞌnîkon, morî pe Paapaya tîkupîkon tîrî toꞌya pepîn. Teesenumenkakon yawîrî inkamoroya ikupî, morî pe tîweꞌkuꞌse.
4 Tîîse Cristo wanî Moisésya yenupantoꞌ rîꞌpî yentai tîweꞌsen pe. Mîrîrî yeꞌnen manniꞌkan innape ikuꞌnenan wanî yairî puꞌkuru. Mîrîrî pîkînsaꞌ Paapaya toꞌ yapisî.
5 Pena Moisés nurîꞌtîya imenukaꞌpî tîkaaretarî po. Îꞌ kaiꞌma pemonkonyamîꞌ yapisî tîuya taꞌpî Paapaya yairî Moisésya yenupantoꞌ yawîrî toꞌ wanî wenai. See warantî taꞌpîiya:—Anîꞌya tamîꞌnawîrî mîrîrî Moisésya yenupantoꞌ yawîrî ikupî ya mîîkîrîya tîîkoꞌmantoꞌ ton eporî,mîrîrî yawîrî tîwanî yeꞌnen
—taꞌpîiya.
6 Tîîse innape ikuꞌtoꞌya ekaremekî: anîꞌ nîkupî eserîkan pepîn kuꞌpai pra awanî morî pe eꞌnîtoꞌpe Paapa yarakkîrî. Maasa pra taꞌpîiya see warantî:—Mîrîrî warantî teesenumenkai pra eꞌtî.Anîꞌ enuku pe nai kaꞌ pona Cristo eraꞌmai?
7 Teesekaranmapoi pra eꞌtî.Anîꞌ autî pe nai saꞌmantaꞌsan koreꞌta Cristo pîmîꞌsaꞌkakonpa miarî pai?
—taꞌpîiya.
8 Tamîꞌnawîrî mîrîrî kuꞌpai pra awanî maasa pra mîrîrî pîꞌ pena Moisés eseurîmaꞌpî:—Aꞌkî aminke pra Paapa maimu man aapiaꞌnîkon epuꞌtîkonpa,antakon yaꞌ man. Moropai ayewankon yaꞌ man
—taꞌpîiya. Mîrîrî itekare anna nekaremekîꞌpî manniꞌ.
9 Mîrîrî pîꞌ eeseurîma ya, anta ke taaya ya, Jesus wanî ayepotorî pe moropai innape ikupîya ya ayewan ke îꞌ kaiꞌma Paapaya iꞌmîꞌsaꞌkaꞌpî isaꞌmantaꞌsan koreꞌtapai, aweꞌpîikaꞌtî.
10 Maasa pra uyewankon ke innape ikupîꞌnîkon ya moropai innape Cristo kupî ekaremekîꞌnîkon ya untakon ke, eꞌpîikaꞌtîn.
11 Maasa pra Paapa maimu eꞌmenukasaꞌya taasaꞌ man see warantî:—Anîꞌya innape mîîkîrî kupî ya,mîîkîrî wanî pepîn tîweppeꞌse tîwinîkîi
—taasaiꞌya man.
12 Mîrîrî taiya tamîꞌnawîronkon pîꞌ manniꞌkan Judeuyamîꞌ pîꞌ moropai Judeuyamîꞌ pepîn pîꞌ maasa pra tianperî pîikaꞌtîntoꞌ ton pra awanî yeꞌnen saꞌnîrî toꞌ tîîse. Tamîꞌnawîronkon yepotorî pe tîwanî yeꞌnen, tîpîꞌ tîweꞌpîikaꞌtîtoꞌkon ton esaꞌnenan pîikaꞌtîiya.
13 Taasaꞌ Paapa maimu eꞌmenukasaꞌya manniꞌ warantî pîikaꞌtîiya.—Manniꞌ uyepotorîkon pîꞌ tîweꞌpîikaꞌtîtoꞌ ton esaꞌnen ya eꞌpîikaꞌtî
—taasaiꞌya man.
14 Yai pra tiaronya taa: —Tîîse oꞌnon yeꞌka pe see innape ikupî yeꞌka pe pra esatî toꞌya eꞌpainon? Moropai oꞌnon yeꞌka pe innape ikupî toꞌya eꞌpainon itekare etatîpon pînon? Moropai oꞌnon yeꞌka pe eta toꞌya eꞌpainon anîꞌya itekare ekaremeꞌsaꞌ pra tîîse?
15 Moropai oꞌnon yeꞌka pe itekare esekaremekî eꞌpainon anîꞌ ekaremeꞌnen yarimasaꞌ pra tîîse? Tîîse mîrîrî ekaremeꞌnen yarimasaꞌ Paapaya. Aꞌkî, Paapa maimu eꞌmenukasaꞌya taasaꞌ man see warantî:—Oꞌnon yeꞌka pe morî pe eeseraꞌma eꞌpainon itekare ekaremeꞌnenya ekaremekî ya
—taasaiꞌya man.
16 Tîîse eta tîuyaꞌnîkon ya, tamîꞌnawîronkonya innape mîrîrî itekare kuꞌsaꞌ pra awanîꞌpî. Mîrîrî pîꞌ pena itekare ekaremeꞌnen Isaías nurîꞌtî eseurîmaꞌpî. Taꞌpîiya see warantî:—Uyepotorî, anîꞌya see innape itekare anna nekaremekîꞌpî kupî eꞌpainon?
—taꞌpîiya.
17 Tîîse innape ikuꞌtoꞌ wanî itekare eta wenai. Moropai itekare wanî manniꞌ ekaremeꞌnenya Cristo yekare ekaremekî wenai.
18 Moriya ekaranmapouya. Inkamoroya kin itekare esekaremekî etasaꞌ pra nai? Kaane, etaꞌpî toꞌya. Paapa maimu eꞌmenukasaꞌya taasaꞌ warantî:Tamîꞌnawîrî pata po tîîkoꞌmansenonpemonkonyamîꞌya imaimu etasaꞌ man
taasaiꞌya man.
19 Inîꞌrî ekaranmapouya. Mîrîrî yekare etasaꞌ Israelyamîꞌya yai epuꞌtî toꞌya pra kin nai? Mîrîrî yuukuꞌpî pena Moisés nurîꞌtîya. Imenukaꞌpîiya see warantî:Paapaya taꞌpî: —Amîrîꞌnîkon kinmuwa kupî sîrîrîtiaronkon pemonkonyamîꞌ amîrîꞌnîkon pepîn pîikaꞌtîuya wenai.Inkamoro pemonkonyamîꞌ epuꞌnenan pepînpakkokon pîikaꞌtîsauꞌya wenaieekoreꞌmakon upîꞌ —taꞌpîiya.
kaiꞌma imenukaꞌpîiya.
20 Moropai pena Isaías nurîꞌtî eseurîmaꞌpî meruntî ke panpîꞌ. Taꞌpîiya:Paapa esenpoꞌpî manniꞌkan tîwanenan pepîn pia,moropai tesaꞌnenan pepîn pia eesekaremekîꞌpî
taꞌpîiya.
21 Tîîse inkamoro Israelyamîꞌ pîꞌ Isaías nurîꞌtî eseurîmaꞌpî. Taꞌpîiya:Wei kaisarî Paapa wanîꞌpî toꞌ anpîikaꞌtîpai teurentîpîikaꞌtîtoꞌkon Paapaya yuꞌse pra yewanmîrîꞌpî toꞌya.Inkamoroya tewankon saꞌmannîꞌsaꞌ wanîꞌpîPaapa maimu aniyuꞌpai pra tîwanîkon yeꞌnen
taꞌpîiya.
