Sîrîrî Kaareta Paulo Nîmenukaꞌpî Roma Ponkon Pia 11:1-36
11 Mîrîrî yeꞌnen ekaranmapouya tarîpai. Paapaya tîpemonkonoyamîꞌ yewanmîrîꞌpî? Kaane, tiwin kin toꞌ yewanmîrîsaiꞌya pra man. Maasa pra uurî pîikaꞌtîꞌpîiya. Uurî wanî inkamoro yonpa pe tîweꞌsen pe. Uurî wanî Abraão nurîꞌtî payanîꞌpî pe tîweꞌsen pe moropai manniꞌ Benjamim nurîꞌtî paarîꞌpî pe wanî.
2 Paapaya manniꞌkan tîpemonkonoyamîꞌ tîmenkaꞌsan yewanmîrîsaꞌ pra man. Inkamoro epuꞌtîꞌpîiya pena maasa pata koneka tîuya pra tîîse. Epuꞌnenan amîrîꞌnîkon îꞌ kaiꞌma Paapa maimu eꞌmenukasaꞌya taasaꞌ. Manniꞌ Elias nurîꞌtî eseurîmaꞌpî Paapa pemonkonoyamîꞌ winîkîi.
3 See warantî taꞌpîiya:—Uyepotorî, inkamoroya amaimu ekaremeꞌnenan tîꞌkaꞌpî moropai inkamoroya ayapurî pe tînpoꞌtîkon yaponseꞌ sorokaꞌpî.Tarîpai uurî neken eꞌnîmîsaꞌ sîrîrî tiwinsarî tarîpai inkamoro wanî uurî anwîpai
—taꞌpîiya.
4 Îꞌ kaiꞌma mîîkîrî maimu yuukuꞌpî Paapaya? Taꞌpîiya see warantî:—Asakîꞌne miaꞌ pona tîîmoꞌtai mil (7.000) kaisarî warayoꞌkon wanî.Inkamoro mannankan ikonekasaꞌ toꞌ napurî pe Baal iteseꞌ yapurînenan pepîn. Tîîse uurî neken yapurî toꞌya
—taꞌpîiya.
5 Mîrîrî warantî aweꞌkuꞌsaꞌ sîrîrî. Tîîse morî pe Paapa eꞌtoꞌ wenai toꞌ wanî arinîke pra tîîse moro toꞌ man Paapa nîmenkaꞌsan tîmîrî ton pe.
6 Ituꞌse tîweꞌtoꞌ wenai Paapaya toꞌ menkasaꞌ îꞌ toꞌ nîkupîꞌpî wenai pra, maasa pra toꞌ nîkupîꞌpî wenai Paapaya toꞌ menkasaꞌ ya, moriya toꞌ esenyakaꞌmatoꞌ yepeꞌ pe itîrî Paapaya eꞌpainon, epeꞌmîra itîrîiya pepîn.
7 Îꞌ taa pe nai mîrîrî pîꞌ? Taꞌnîkon kaꞌrî Israelyamîꞌ tamîꞌnawîronkonya yairî tîweꞌtoꞌkon yuwaꞌpî teesekaꞌnunkai, tînkupîꞌpîkon wenai. Tîîse eposaꞌ toꞌya pra awanîꞌpî. Tuꞌkankon pepîn neken, Paapa nîmenkaꞌsanya eporîꞌpî. Tîîse tiaronkon wanî Paapaya tannotoꞌkon anetapai pra.
8 Inkamoro pîꞌ Paapa maimu eꞌmenukasaꞌya taasaꞌ:Paapaya ayewankon saꞌmannîꞌsaꞌmoropai eesenumenkatoꞌkon nîrî.Mîrîrî yeꞌnen inkamoroya eraꞌma eserîke pra awanî tenukon kemoropai eta toꞌya eserîke pra awanî tîpanakon ke
taꞌpîiya.
9 Moropai Davi nurîꞌtî eseurîmaꞌpî mîrîrî pîꞌ. Taꞌpîiya:Toꞌ atausinpatoꞌ weiyu yaitoꞌ ena eꞌpai man moraiꞌ yaꞌtoꞌ esenkuꞌtîi,inkamoro eꞌtoꞌpe itarumaꞌtîsaꞌkon pe,
10 toꞌ kuꞌkî, inkamoro yenu eꞌtoꞌpe enkaruꞌnemoropai tîîwarîrî tîweꞌmorikkai toꞌ eꞌtoꞌpetîmoronkon epuꞌtoꞌpe toꞌya tînkupîꞌpîkon wenai
taꞌpîiya.
11 Tarîpai ekaranmapouya. Inkamoro Judeuyamîꞌ atareꞌmosaꞌ yai toꞌ atareꞌmoꞌpî tamîꞌnawîrî îꞌ eporîkonpa pra? Kaane, tîîse inkamoroya imakuiꞌpî kuꞌsaꞌ wenai manniꞌkan Judeuyamîꞌ pepîn eꞌpîikaꞌtîtoꞌkon iipîꞌpî. Mîrîrî pîkînsaꞌ Judeuyamîꞌ kinmuwatoꞌpe tîwinîpai toꞌ eꞌpîikaꞌtîsaꞌ wenai.
12 Judeuyamîꞌ nîkupîꞌpî imakuiꞌpî wenai kureꞌnan morî pe Judeuyamîꞌ pepîn eꞌtoꞌ wanî. Tîîpiaꞌnîkon tîntîrî pe Paapa nîkupîꞌpî yapisî toꞌya pra Judeuyamîꞌ wanî wenai Judeuyamîꞌ pepîn pia itîrîꞌpîiya. Tîîse îꞌ pensa inkamoro Judeuyamîꞌ ennaꞌpo ya, tîîpiaꞌnîkon Paapa nîtîrî yapisî toꞌya ya, îꞌ kaiꞌma morî pe panpîꞌ tamîꞌnawîronkon wanî inîꞌ panpîꞌ itentai, inkamoro wenai.
Yei Panta Moꞌtanîꞌsaꞌ Tiaron Parakon Pona Warainokon
13 Tarîpai eseurîma sîrîrî amîrîꞌnîkon Judeuyamîꞌ pepîn pîꞌ. Maasa pra uurî wanî Paapa naipontîꞌpî pe itekare ekaremeꞌse amîrîꞌnîkon Judeuyamîꞌ pepîn koreꞌta. Mîrîrî esenyakaꞌmatoꞌ pîꞌ atausinpa.
14 Yai pra mîrîrî kupîuya wenai uyonpayamîꞌ ikinmuwa emapuꞌtîuya. Mîrîrî pîkînsaꞌ yai pra tiaronkon eꞌpîikaꞌtî emapuꞌtîuya.
15 Maasa pra Judeuyamîꞌ wanî yewanmîrîsaꞌ pe, mîrîrî pîkînsaꞌ Judeuyamîꞌ pepîn enaꞌpî Paapa yonpa pe. Mîrîrî tîpo oꞌnon yeꞌka pe awanî eꞌpainon, inkamoro yapisî Paapaya yai? Toꞌ wanî eꞌpainon manniꞌ isaꞌmantaꞌsan eꞌmîꞌsaꞌka inîꞌrî enen tîwanîkonpa warantî.
16 Aꞌkî, eꞌmaiꞌnon ikei ekisaꞌ wanî ya morî pe itîîtoꞌpe Paapa pia, moriya tamîꞌnawîron itonpakon nîrî ikeikon wanî morî pe, imîrî ton pe. Moropai yei kara wanî ya morî pe Paapa pia itîîtoꞌpe, moriya ipanta nîrî wanî morî pe, imîrî pe. Mîrîrî warantî Judeuyamîꞌ wanî. Paapa pemonkono pe toꞌ tamokon eꞌsaꞌ wenai toꞌ payanîꞌsan nîrî wanî ipemonkono ton pe.
17 Oliveira yeꞌ pînsaꞌ imainanpasaꞌ panta waikatî toꞌya. Moropai mîrîrî pataꞌpî yaꞌ tiaron oliveira yeꞌ imainanpasaꞌ pepîn ese yeꞌkarî panta tîrî toꞌya tiaron mainanpasaꞌ pataꞌpî yaꞌ. Aꞌkî tauya amîrîꞌnîkon Judeuyamîꞌ pepîn wanî manniꞌ oliveira yeꞌ ese yeꞌkarî warantî. Tarîpai amîrîꞌnîkon aweꞌpîikaꞌtîtoꞌkon yapiꞌsaꞌyaꞌnîkon inkamoro Judeuyamîꞌ wenai.
18 Mîrîrî yeꞌnen amîrîꞌnîkonya ipanta rîꞌpî yewanmîrî eꞌpai pra awanî. Mîrîrî pîꞌ mîî pe aatapurîkon eꞌpai pra man. Maasa pra amîrîꞌnîkon wanî tarîpai ipanta pe warantî. Ipantaya ikara yapîtanîpî eserîke pra man tîîse ikaraya neken ipanta yapîtanîpî. Mîrîrî yeꞌnen taayaꞌnîkon eserîke pra man: —Anna wanî Judeuyamîꞌ yentai tîweꞌsanon pe —taayaꞌnîkon eserîke pra naatîi.
19 Mîrîrî yeꞌnen taayaꞌnîkon: —Ipanta yaꞌtîsaꞌ toꞌya mîrîrî anna pataꞌseꞌ ton pe, Paapa pemonkono pe anna eꞌtoꞌpe.
20 Inna, seruꞌ pepîn. Tîîse enpenatatî inkamoro yaꞌtîꞌpî Paapaya maasa pra innape ikupî toꞌya pra awanî yeꞌnen. Tîîse amîrîꞌnîkon tîrîꞌpî Paapaya oliveira yeꞌ pîꞌ manniꞌ warantî maasa pra innape ikupîyaꞌnîkon yeꞌnen. Mîrîrî pîꞌ mîî pe taatapurîi pra eꞌtî. Tîîse eranneꞌ pe eꞌtî mîrîrî pîꞌ, Paapaya ayaꞌtîkon namai.
21 Mîrîrî yeꞌnen aka tîwarî eꞌtî. Paapaya Judeuyamîꞌ tîmenkaꞌsan puꞌkuru tarumaꞌtîtoꞌ tîuya kuꞌsaꞌ pra man tîwî. Mîrîrî yeꞌnen amîrîꞌnîkon tarumaꞌtîiya pepîn kaiꞌma kîsenumenkatî.
22 Maasa eraꞌmatî Paapa wanî morî pe seruꞌ pepîn moropai nariꞌ pe nîrî awanî. Mîîkîrî wanî nariꞌ pe manniꞌkan tenaꞌtîꞌsan winîkîi. Tîîse morî pe awanî awinîkîiꞌnîkon tîwîrîrî innape tîkupî pîꞌ aakoꞌmamîkon yeꞌnen. Mîîwîni pra awanî ya amîrîꞌnîkon nîrî yaꞌtîiya.
23 Tîîse îꞌ pensa Judeuyamîꞌya tîwî teserukon kupî ya moropai innape ikupî toꞌya ya toꞌ ennaꞌpo inîꞌrî ipataꞌseꞌkon yaꞌ, Paapaya toꞌ ennaꞌpo emapuꞌtî.
24 Amîrîꞌnîkon Judeuyamîꞌ pepîn wanî manniꞌ oliveira seꞌ tapairon panta yaꞌtîsaꞌ moropai itîîsaꞌ tiaron panta pataꞌpî yaꞌ warantî. Manniꞌ oliveira yeꞌ imainanpasaꞌ pona itîîsaꞌ pe. Judeuyamîꞌ wanî manniꞌ oliveira yeꞌ imainanpasaꞌ warantî. Mîrîrî yeꞌnen Paapaya ikupî saꞌme pra îꞌ kaiꞌma mîrîrî oliveira yeꞌ pîꞌ yannuku tîuya ipanta tenaꞌtîꞌpî.
Morî Pe Paapa Eꞌtoꞌ Tamîꞌnawîron Pîꞌ
25 Uyonpayamîꞌ, anîꞌ nepuꞌtî pepîn yairon epuꞌtîyaꞌnîkon yuꞌse wai, aawarîrîꞌnîkon epuꞌnen pe awanîkon kaiꞌma eesenumenkakon namai. Maasa pra Israelyamîꞌya innape ikuꞌtoꞌ pepîn koꞌmamî pepîn ipatîkarî. Tîîse toꞌ koꞌmamî tamîꞌnawîrî innape ikupîtonkon Judeuyamîꞌ pepînya innape ikuꞌsaꞌ pîkîrî.
26 Mîrîrî warantî neken tamîꞌnawîrî Israelyamîꞌ eꞌpîikaꞌtî taasaꞌ Paapa maimu eꞌmenukasaꞌya manniꞌ warantî.Pîikaꞌtîton iipî pe man.Moropai mîîkîrîya tamîꞌnawîronkonJacó payanîꞌsan nîkupîꞌpî imakuiꞌpîmoꞌka pe man.
27 Mîrîrî warantî toꞌ yarakkîrî eseta kupî sîrîrî,mîrîrî imakuiꞌpî toꞌ nîkupîꞌpî moꞌkauya yai
taꞌpîiya.
28 Inkamoro Judeuyamîꞌya Paapa maimu yewanmîrîsaꞌ wenai Paapa yeyaton pe toꞌ enaꞌpî, amîrîꞌnîkon Judeuyamîꞌ pepîn wenai. Tîîse Paapaya toꞌ menkasaꞌ wenai toꞌ ena Paapa yonpa pe. Penaronkon tamokon wenai toꞌ enaꞌpî.
29 Maasa pra îꞌ pensa Paapaya îꞌ taꞌpî tîuya teesenumenkatoꞌ miakanma pepîn, manniꞌkan tînmenkaꞌsan tîmîrî ton pe yarakkîrî. Moropai inkamoro kupîiya morî pe.
30 Amîrîꞌnîkon Judeuyamîꞌ pepîn pena Paapa maimu yawîrî pra awanîꞌpîkon. Tîîse tarîpai amîrîꞌnîkon eraꞌmaꞌpî Paapaya tîꞌnokoꞌpî pe, maasa pra Paapa maimu yawîrî pra Judeuyamîꞌ eꞌsaꞌ yeꞌnen.
31 Mîrîrî warantî tîꞌnokoꞌpî pe Paapaya ayeraꞌmaꞌpîkon yeꞌnen, Judeuyamîꞌya nîrî tîꞌnokoꞌmatoꞌkon Paapaya yapisî, inkamoro wanî Paapa maimu yawîrî pra tîîse.
32 Mîrîrî yeꞌnen Paapaya tamîꞌnawîrî toꞌ kuꞌsaꞌ toꞌ eꞌtoꞌpe yarakkansaꞌ warantî tîmaimu yawîrî pra toꞌ eꞌsaꞌ yeꞌnen. Mîrîrî kupîꞌpîiya teetîꞌnokoꞌmatoꞌ yenpopa kaiꞌma tamîꞌnawîronkon ton pe.
33 Ipîkku pe puꞌkuru Paapa wanî epuꞌtî yentai.Moropai îꞌ kaiꞌma kureꞌne epuꞌnen pe awanîekaremekî yentai.Anîꞌya kin teseru konekasaꞌ Paapaya epuꞌtî eꞌpainon?Anîꞌya Paapa esenumenkatoꞌ epuꞌtî eꞌpainon?
34 Anîꞌya kin Paapa esenumenkatoꞌ epuꞌtî eꞌpainon?Anîꞌya kin ipanama eꞌpainon?
35 Anîꞌya kin îꞌ tîrîꞌpî Paapa pia,itepeꞌpî yapisîpa iwinîpai?
36 Tamîꞌnawîron wanî Paapa nîkonekaꞌpî pe. Tamîꞌnawîron koꞌmannîpîiya tîmîrî pe awanî. Morî pe puꞌkuru man Paapa tauya tîwîrîrî.
