Sîrîrî Kaareta Paulo Nîmenukaꞌpî Roma Ponkon Pia 12:1-21
12 Mîrîrî yeꞌnen uyonpayamîꞌ, kureꞌne Paapaya uꞌnokoꞌmasaꞌkon wenai îꞌ kaiꞌma antîrîkon tîrîyaꞌnîkon iipia tarîpai? Kureꞌne esatîuya sîrîrî. Eturumakatî Paapa pia tamîꞌnawîrî aweꞌtoꞌkon yawîrî. Aakoꞌmamîkon pîkîrî mîîkîrî pîꞌ neken teesenumenkai akoꞌmantî morî pe. Mîrîrî warantî aakoꞌmamîkon ya Paapa wakîri pe awanîkon moropai yairî Paapa yapurîyaꞌnîkon mîrîrî.
2 Sîrîrî pata yeseru pîꞌ tîweꞌsanon pemonkonyamîꞌ warantî pra eꞌtî. Tîîse tîwî Paapaya ayeserukon, eesenumenkatoꞌkon miakanmatoꞌpe eturumakatî. Mîrîrî warantî neken epuꞌtîyaꞌnîkon îꞌ ituꞌse Paapa eꞌtoꞌ wanî, moropai aweꞌtoꞌ yawîron pe awanî epuꞌtîyaꞌnîkon, moropai awakîrikon pe awanî.
3 Morî pe puꞌkuru tîwanî wenai uupia sîrîrî esenyakaꞌmatoꞌ ton tîrîꞌpî Paapaya. Mîrîrî yeꞌnen tauya apîꞌnîkon tamîꞌnawîrî awanîkon tanne. Tiaron yentai keꞌkuꞌtî morî pe kaiꞌma. Tîîse eesenumenkakon yai yairî esenumenkatî. Tiwin pîꞌ siꞌma apîꞌnîkon rî atakoꞌmenkatî. Yairî esenumenkatî ankupîkon ton tîîsaꞌ Paapaya pîꞌ, îꞌ kaiꞌma aweꞌtoꞌkon pîꞌ innape ikuꞌtoꞌyaꞌnîkon yawîrî.
4 Maasa pra tiwin uyesaꞌkon wanî tanne, tuꞌke ipantakon wanî, uyemekon, uꞌpukon kaiꞌma. Tuꞌke toꞌ wanî tanne seꞌ kaisarî toꞌ wanî pepîn. Tiwin pîꞌ eesenyakaꞌmatoꞌ wanî tiaron pe tiwin pîꞌ tîîse.
5 Mîrîrî warantî uurîꞌnîkon wanî tuꞌke eꞌnî tanne. Tiwin uyesaꞌkon wanî Cristo yarakkîrî eꞌnî yeꞌnen. Mîrîrî warantî tiwin eꞌnî tiaronkon pokonpe. Tuꞌke uyesaꞌkon epantakapîꞌsaꞌ esenyakaꞌma tiwin pîꞌ warantî eꞌnî, tiwin uyesaꞌkon tîîse.
6 Mîrîrî yeꞌnen tiwin pîꞌ siꞌma îꞌ kaiꞌma yapiꞌsaꞌ epeꞌmîra yapurî yuwapaiꞌnîkon. Mîrîrî yapisîꞌpî epeꞌmîra Paapaya itîîsaꞌ yeꞌnen ukaisarîꞌnîkon. Mîrîrî Paapa nîtîrîꞌpî wanî ya, itekare ekaremeꞌtoꞌpe, mîrîrî kuꞌpaiꞌnîkon îꞌ kaiꞌma innape ikuꞌsaꞌnîkon yeꞌnen.
7 Tîîse yapurîtoꞌpe awanî ya moriya yapurîpaiꞌnîkon. Tîîse yenupantoꞌpe awanî ya, moriya toꞌ yenupapaiꞌnîkon.
8 Tîîse tiaronkon yausinpatoꞌpe awanî ya, moriya toꞌ yausinpapaiꞌnîkon. Anîꞌya temanne rataika ya tiaronkon pia, moriya mîrîrî kuꞌkî yairî puꞌkuru. Tîîse anîꞌ wanî ya ipîkku pe, tiaronkon esaꞌ pe, inkamoro panamaya yuwakî epuꞌtîiꞌma aka. Anîꞌya tiaronkon pîikaꞌtî ya, moriya toꞌ pîikaꞌtîkî awakîri puꞌkuru taatausinpai.
9 Mîrîrî warantî aweꞌsaꞌnamatoꞌ eꞌtoꞌpe yairî morî pe. Imakuiꞌpî yuꞌse tîweꞌse pra eꞌtî tîîse morî kupîyaꞌnîkon yuwatî.
10 Eetîꞌnînmatoꞌkon wenai tiaronkon saꞌnamayaꞌnîkon eꞌpai man, Cristoya asaꞌnamakon warantî, ayonpakon pe puꞌkuru toꞌ tîkuꞌse.
11 Paapa ton pe teesenyakaꞌmai eꞌtî enyaꞌne pe pra. Uyepotorîkon yapurîtî taatausinpai ayewankon yaꞌ.
12 Taatausinpai puꞌkuru inîmîkî pîꞌ akoꞌmantî. Aweꞌtarumatîtoꞌkon yapîtanîꞌtî meruntî ke, teesewankonoꞌmai pra. Tîîse eepîremakon pîꞌ akoꞌmantî tîrumakai pra.
13 Ayonpakon innape ikuꞌnenan pia îꞌ rî itesaꞌ pe aweꞌtoꞌkon yonpa antîîtî, manniꞌkan saꞌne îꞌ ton pînon pia. Moropai tamîꞌnawîronkon aapiaꞌnîkon tuiꞌsanon yapiꞌtî morî pe ayewîꞌkon ta.
14 Manniꞌkan amîrîꞌnîkon pîꞌ tîwoꞌmaꞌtasanon wanî ya, inkamoro pîikaꞌtîtoꞌpe Paapaya esatî Paapa pîꞌ morî tîîtoꞌpeiya toꞌ pia. Mîrîrî morî tîîtoꞌpeiya esatî toꞌ tarumaꞌtîiya namai.
15 Atausinpatî taatausinpasanon pokonpe. Moropai akaruntî manniꞌkan tîkaruwasenon pokonpe.
16 Akoꞌmantî tîmurukun pe tiaronkon pokonpe tiaron yentai mîî pe tîweꞌkuꞌse pra. Tîîse ayonpa pe toꞌ kuꞌtî, ipîkkukon pepîn moropai tîweꞌtarumaꞌtîsanon. Epuꞌnen pe tîweꞌkuꞌse pra eꞌtî.
17 Imakuiꞌpî pe tiaron tîrepai pra eꞌtî. Tîîse morî ke neken irepatî. Morî kupîyaꞌnîkon yuwatî tamîꞌnawîronkon neraꞌma ton pe.
18 Epuꞌtîyaꞌnîkon pîkîrî morî kupîyaꞌnîkon yuwatî, morî pe aakoꞌmamîkonpa tiaronkon pokonpe.
19 Uyonpayamîꞌ tiaronkon pîꞌ eeseꞌmakon tuwai pra eꞌtî. Maasa pra Paapaya inkamoro tarumaꞌtî kupî sîrîrî mîîtoꞌpe. Mîrîrî pîꞌ taasaꞌ Paapa maimu eꞌmenukasaꞌya taasaꞌ man:—Uurî eseꞌma pe wai inkamoro yarakkîrî uyeseru konekauya pe wai
—taꞌpî Paapaya
20 Tîîse mîrîrî taasaꞌ Paapa maimuya manniꞌ yawîrî ikuꞌtî.Mîîkîrî apîꞌnîkon tîwoꞌmaꞌtasen wanî ya emiꞌne,mîîkîrî yaꞌreꞌ ton tîîtî.Moropai tuna aninnîpai awanî ya,mîîkîrî woꞌpatî.Mîrîrî kupîyaꞌnîkon ya yarakkîrî,mararî pra mîîkîrî yeppeꞌnîpîyaꞌnîkon
taasaiꞌya man
21 Ayentaiꞌnîkon imakuiꞌpî ena kîꞌtîîtî. Tîîse imakuiꞌpî yentai awanîkon yuwatî morî kupîyaꞌnîkon wenai.
