Sîrîrî Kaareta Paulo Nîmenukaꞌpî Roma Ponkon Pia 13:1-14
13 Mîrîrî yeꞌnen tamîꞌnawîronkon eꞌpai awanî ipîkkukon maimu yawîrî. Maasa pra inkamoro wanî tamîꞌnawîrî Paapa nîkupîꞌsan pe mîîtoꞌpe. Moropai intîrîꞌsan pe toꞌ wanî.
2 Tîîse inkamoro maimu yawîrî pra anîꞌ wanî ya, mîîkîrî wanî pepîn Paapa maimu yawîrî maasa pra Paapaya toꞌ tîîsaꞌ tanne. Mîrîrî warantî teesenumenkasen wanî ya, tîîwarîrî rî mîîkîrî esewanmîrî mîrîrî.
3 Mîrîrî yeꞌnen inkamoro imakuiꞌpî kuꞌnenen wanî eranneꞌ pe, mîîkîrî ipîkku pe tîweꞌsen pata esaꞌ pîꞌ. Tîîse manniꞌkan morî kuꞌnenan wanî pepîn eranneꞌ pe ipîꞌ. Mîrîrî yeꞌnen eranneꞌ pe eꞌpai pra awanî ya, moriya morî kuꞌkî moropai mîrîrî kupîya ya, mîîkîrîya ayapurî.
4 Maasa inkamoroya Paapa esenyakaꞌmatoꞌ koneka mîrîrî amîrîꞌnîkon tonpe. Tîîse imakuiꞌpî kupîya ya, eranneꞌ pe eꞌkî maasa pra meruntî ke mîîkîrî wanî amîrî tarumaꞌtîiya. Inkamoro wanî Paapa esenyakaꞌmatoꞌ kuꞌnenan pe. Moropai pemonkon imakuiꞌpî kuꞌnen tarumaꞌtînen pe toꞌ wanî.
5 Mîrîrî warantî ipîkkukon pe tîweꞌsanon maimu yawîrî awanîkon eꞌpai awanî inkamoroya atarumaꞌtîkon namai. Moropai mîrîrî wenai neken pra tîîse eesenumenkatoꞌkon wenai.
6 Mîrîrî yeꞌnen aneꞌmakon yeꞌmatî ipîkkukon esenyakaꞌmatoꞌpe maasa pra Paapa ton pe toꞌ esenyakaꞌma ipoitîrî pe.
7 Mîrîrî yeꞌnen epeꞌmîra aweꞌtoꞌkon yeꞌmatî iipia. Tamîꞌnawîrî epeꞌmîra aweꞌtoꞌkon yeꞌmatî. Inkamoro namatî tamîꞌnawîrî ipîkku pe tîweꞌsanon yapurîtî.
Îꞌ Kaiꞌma Tiaronkon Koneka Yeseru
8 Tiaronkon pia epeꞌmîra tîweꞌse pra eꞌtî. Tîîse kureꞌne epeꞌmîra aweꞌtoꞌkon eꞌpai awanî, îꞌ kaiꞌma, tiaronkon saꞌnamatoꞌyaꞌnîkon ke. Maasa pra anîꞌya tiaronkon saꞌnama ya, mîîkîrî wanî mîrîrî Paapa maimuya taasaꞌ yawîrî.
9 Paapa maimuya taasaꞌ see warantî:—Tiaron noꞌpî yarakkîrî tîweꞌse pra moropai pemonkon kîꞌwîi.Amaꞌyeꞌ pe tîweꞌse pra tiaron yemanne yuꞌse pra
—taasaiꞌya man. Tamîꞌnawîrî mîrîrîkon wanî Paapa maimuya taatoꞌpe. Moropai taꞌpîiya:—Tiaronkon saꞌnamatî, aawarîrî aweꞌsaꞌnama manniꞌ warantî
—taꞌpîiya.
10 Anîꞌya tiaronkon saꞌnama ya, imakuiꞌpî kupîiya pepîn toꞌ winîkîi. Maasa pra eꞌsaꞌnamantoꞌ wanî Paapa maimuya taasaꞌ manniꞌ tamîꞌnawîrî yawîrî.
11 Mîrîrî yeꞌnen mîrîrî yawîrî ikupîyaꞌnîkon eꞌpai awanî. Maasa pra aasîrî eꞌpîikaꞌtîntoꞌ weiyu eseporî kupî sîrîrî. Mîrîrî yeꞌnen pakan eꞌpai man. Maasa pra aminke pra eꞌpîikaꞌtîntoꞌ weiyu wanî sîrîrî pena innape ikupî piaꞌtî yai awanîꞌpî warantî pra.
12 Ewaron pe tîweꞌsen ataretîꞌkasaꞌ sîrîrî. Tarîpai aꞌka pe tîweꞌsen erepansaꞌ sîrîrî. Mîrîrî yeꞌnen ewaron ya siꞌma imakuiꞌpî kupî pîꞌ koꞌmannîtoꞌ yemîꞌpannîpî yuwapai man. Tîîse aꞌka ta siꞌma meruntî ke eꞌnî yuwapaiꞌnîkon man.
13 Tîwîrî koꞌmannîpaiꞌnîkon man aꞌka ta, aꞌka ta tîweꞌsen pemonkon wanî warantî, imakuiꞌpî pe tîweꞌse pra moropai teetînsen pe pra, moropai seꞌ tapairî wîriꞌsanyamîꞌ yarakkîrî tîweꞌse pra, mîrîrî yeꞌka nura tîkuꞌse pra, moropai teekoreꞌmasen pe pra, moropai ikinmuyen pe tîweꞌse pra.
14 Tîîse Jesus Cristo winîpainon yapiꞌtî eeseyaꞌnamakonpa mîrîrî yeꞌka winîkîi, îꞌ kaiꞌma aawarîrîꞌnîkon ituꞌse apunkon eꞌtoꞌ yawîrî tîkuꞌse pra.
