Sîrîrî Kaareta Paulo Nîmenukaꞌpî Roma Ponkon Pia 14:1-23
14 Manniꞌ aꞌtuꞌmîra tîweꞌsen akoreꞌtaꞌnîkon innape Jesus kupî tîuya yeꞌka pe mîîkîrî yapiꞌtî awakîrikon pe. Mîîkîrî yarakkîrî teesiyuꞌpîꞌse pra eꞌtî, îꞌ taiya ya apîꞌnîkon.
2 Aꞌkî, tiaronkonya taa tamîꞌnawîron pîꞌ entamoꞌkan. Tîîse tiaronkon teesenumenkatoꞌkon yaꞌ aꞌtuꞌmînanya taa: —Kaane, tamîꞌnawîron enapî eserîke pra man, ipînsaꞌ neken enapî —taa toꞌya.
3 Mîrîrî yeꞌnen anîꞌya tamîꞌnawîron tenaꞌsen enapî ya, mîîkîrî ipînsaꞌ neken enaꞌnen kupî eꞌpai pra awanî tewanma pe. Mîrîrî yeꞌka ipînsaꞌ tenaꞌsen enaꞌnenya tamîꞌnawîrî enaꞌnen yewanmîrî eserîke pra awanî. Maasa pra Paapaya tîwakîri pe mîîkîrî yapiꞌsaꞌ yeꞌnen.
4 Anîꞌkan amîrîꞌnîkon tiaronkon poitîrî pe tîweꞌsanon pîꞌ eeseurîmakonpa? Maasa pra mîîkîrî esaꞌya neken taa eserîke awanî, morî pe awanî, morî pe pra awanî kaiꞌma. Moropai morî pe awanî taiya maasa pra mîrîrî warantî itesaꞌya ikupî.
5 Tiaronkon esenumenka mîrîrî weiyu wanî tiaron wei yentai kaiꞌma. Moropai tiaronkon esenumenka seꞌ kaisarî wei wanî kaiꞌma. Mîrîrî yeꞌnen yairî tîwanîkon kaiꞌma toꞌ wanî teesenumenkakon yawîrî.
6 Tîîse manniꞌ ipîkku pe mîrîrî weiyu kuꞌnen wanî ya, mîîkîrîya Paapa yapurîtoꞌpe ikupî mîrîrî. Moropai manniꞌ tamîꞌnawîron enaꞌnenya nîrî Paapa yapurîtoꞌpe ikupî mîrîrî. Morî pe puꞌkuru man taiya Paapa pîꞌ. Moropai ipînsaꞌ neken enaꞌnenya Paapa yapurîpa ikupî mîrîrî. Taiya: —Morî pe puꞌkuru man —taiya Paapa pîꞌ.
7 Maasa pra anîꞌ ton pra man tîîwarîrî tîîkoꞌmansen moropai tîîwarîrî tîîsaꞌmantasen ton pra man. Koꞌmannîtoꞌ wanî uyepotorîkon pia.
8 Saꞌmantan ya moriya saꞌmantan mîrîrî uyepotorîkon ton pe. Mîîwîni pra awanî ya, enen eꞌnî ya, saꞌmantan ya awanî Uyepotorîkon tonpe.
9 Maasa pra Yepotorî Wannî pe tîwanîpa kaiꞌma Cristo saꞌmantaꞌpî moropai awennapamîꞌpî. Mîrîrî yeꞌnen isaꞌmantaꞌsan yepotorî pe awanî moropai enenankon yepotorî pe awanî.
10 Tîîse, îꞌ waniꞌ awanî yeꞌnen ayakon yewanmîrîya? Amîrî kanan, îꞌ ton pe ayakon yuꞌse pra awanî? Aꞌkî, tamîꞌnawîrî uurîꞌnîkon eseporî kupî sîrîrî Paapa rawîrî. Mîrîrî yai Paapaya uyakoꞌmenkakon kupî sîrîrî.
11 Maasa pra Paapa maimu eꞌmenukasaꞌya taasaꞌ man:—Innape Uurîya taasaꞌ sîrîrîîꞌ pensa innaꞌpokauya pata pe pra —taꞌpî Uyepotorîkonya.—Urawîrî neken tamîꞌnawîronkon eꞌsekunka pe man unamai.Mîrîrî yai inkamoroya taa kupî sîrîrî tamîꞌnawîrî siꞌma:“Amîrî wanî tamîꞌnawîronkon yakoꞌmenkaton pe”, —taꞌpî Uyepotorîkonya.
taasaiꞌya man.
12 Mîrîrî yeꞌnen tiwin pîꞌ siꞌma ukaisarîꞌnîkon unkupîꞌpîkon ekaremekî kupî sîrîrî Paapa pîꞌ, tiaron pîꞌ pra.
Imakuiꞌpî Yaꞌ Ayakon Ena Kîsemapuꞌtîi
13 Mîrîrî yeꞌnen tiaronkon muꞌtunpatoꞌ uurîꞌnîkonya emîꞌpannîꞌpaiꞌnîkon man. Moropai taayaꞌnîkon eꞌpai awanî: —Îꞌ kupîuya pepîn uyakon mauya namai imakuiꞌpî yaꞌ.
14 Uyepotorîkon yarakkîrî eꞌnî wenai, epuꞌtî pîꞌ wai tenaꞌsen nura ton pra awanî. Tîîse anîꞌ esenumenka ya tenaꞌsen pîꞌ nura pe awanî kaiꞌma, moropai enapîiya, mîîkîrîya imakuiꞌpî kupî mîrîrî tîwinîkîi. Mîrîrî yeꞌnen imakuiꞌpî pe eena tîmîrî pe.
15 Yairî maꞌre ayakon ena emapuꞌtîya anenapî enapîya wenai, ayakon saꞌnamaya yuwaya pepîn mîrîrî, manniꞌ imîrî ton pe Cristo saꞌmantaꞌpî tanne. Mîrîrî warantî ayekkari enapîya wenai ayakon kîꞌmaꞌnîpai.
16 Mîrîrî warantî imakuiꞌpî pe tiaronkon eseurîma kîꞌmapuꞌtîtî awinîkîiꞌnîkon, morî kupîyaꞌnîkon kaiꞌma eesenumenkasaꞌkon tanne.
17 Maasa pra Paapa wanî uyesaꞌkon pe esepuꞌtî uyekkarikon enapî wenai pra, uwukukon enîrî wenai pra, tîîse uyonpakon saꞌnama wenai eesepuꞌtî. Moropai morî pe uyonpakon yarakkîrî koꞌmannî wenai, moropai taatausinpai koꞌmannî wenai Morî Yekaton Wannî nîtîrîꞌpî wenai, mîrîrî warantî Paapa pemonkono pe eꞌnî esepuꞌtî.
18 Anîꞌya mîrîrî warantî Cristo yapurî ya, Paapa wakîri pe awanî. Moropai tonpayamîꞌ nîrî wakîri pe awanî.
19 Mîrîrî yeꞌnen tîwanmîra eꞌnî yuwapaiꞌnîkon. Moropai uyonpakon meruntîriꞌtîpaiꞌnîkon.
20 Manniꞌ Paapa nîpîikaꞌtîꞌpî kîꞌtarumaꞌtîi. Tamîꞌnawîrî yekkari wannî wanî tenaꞌsen pe. Tîîse îꞌ rî enapî wenai imakuiꞌpî yaꞌ uyonpakon ena emapuꞌtî ya, yairî pra awanî mîrîrî.
21 Tîîse morî pe panpîꞌ awanî uyoꞌkon rumaka ya, uwukukon rumaka ya, îꞌ rî rumaka ya, imakuiꞌpî yaꞌ uyonpakon ena namai.
22 Tîîse amîrîꞌnîkon yairî eesenumenkatoꞌkon tenaꞌsen pîꞌ, tenîꞌsen pîꞌ, mîrîrî warantî eesenumenkakon pîꞌ aakoꞌmamîkon tîîse moo, teesiyuꞌpîꞌse pra ayonpakon yarakkîrî. Paapaya neken epuꞌtî mîrîrî. Taatausinpai mîîkîrî wanî teesenumenkatoꞌ yawîrî îꞌ rî kuꞌnen pe, maasa pra yairî tîwanî epuꞌtîiya. —Yairî pra awanî taiꞌse —taiya pepîn.
23 Tîîse manniꞌ aꞌtuꞌmînya tiyoꞌ yanî ya teesenumenkatoꞌ yawîrî pra, imakuiꞌpî kupîiya mîrîrî. Maasa pra —Yairî naka ikupîuya sîrîrî taꞌyeꞌ —taiya. —Mîrîrî yeꞌnen yairî pra awanî taiꞌse —kaiꞌma mîrîrî kupî anîꞌya ya, imakuiꞌpî kupîiya.
