Sîrîrî Kaareta Paulo Nîmenukaꞌpî Roma Ponkon Pia 15:1-33
15 Tîîse uurîꞌnîkon innape ikuꞌnenan manniꞌkan meruntî ke tîweꞌsanon, moriya tiaronkon aꞌtuꞌmîra tîweꞌsanon pîikaꞌtî eꞌpai awanî. Toꞌ yeseru yapîtanîpî eꞌpai awanî toꞌ tîyuꞌpîꞌse pra.
2 Tîwin pîꞌ siꞌma ukaisarîꞌnîkon tiaronkon pîikaꞌtî eꞌpai awanî morî pe toꞌ koꞌmantoꞌpe, inîꞌ panpîꞌ innape ikuꞌtoꞌpe toꞌya. Upîꞌnîkon neken teesenumenkai pra toꞌ pîikaꞌtî eꞌpai awanî.
3 Maasa pra tîîwarîrî Cristo etîꞌnînmasaꞌ pra man. Tîîse Paapa maimu eꞌmenukasaꞌya taasaꞌ man.—Paapa, mîrîrî awinîkîi imakuiꞌpî kuꞌtoꞌ toꞌya yapisîꞌpîuya upona.
—taꞌpîiya.
4 Pena tamîꞌnawîrî aweꞌmenukasaꞌ manniꞌ Paapa maimu po, mîrîrî wanî uyenupanenkon pe. Inîmîkî pîꞌ eꞌnîtoꞌ ton tîrîiya. Moropai atausinpantoꞌ ton tîrîiya. Îꞌ taasaꞌ tîuya kupî Paapaya nîmîkî pîꞌ koꞌmannî. Mîrîrî yeꞌnen tamîꞌnawîrî yapîtanîpî eserîke awanî.
5 Manniꞌ Paapa, tînîmîꞌtoꞌ tîînen moropai atausinpantoꞌ tîînenya tiwin eesenumenkatoꞌkon tîrî yuꞌse wai aapiaꞌnîkon, Jesus Cristo esenumenkatoꞌ yawîrî eesenumenkakonpa.
6 Mîrîrî warantî itîrî Paapaya tapurîkonpa, tamîꞌnawîrî awanîkon tanne tiwin eesenumenkatoꞌkon tîîse, manniꞌ Paapa, Jesus Cristo Uyepotorîkon yun yapurîkonpa.
Paapa Maimu Wanî Judeuyamîꞌ Pepîn Tonpe
7 Mîrîrî yeꞌnen tiaronkon yapiꞌtî akoreꞌtaꞌnîkon toꞌ eꞌtoꞌpe, îꞌ kaiꞌma Cristoya amîrîꞌnîkon yapisîꞌpî warantî. Moropai mîrîrî wenai Paapa yapurî tuꞌkankonya.
8 Maasa pra Cristo eturumakaꞌpî Judeuyamîꞌ pia toꞌ poitîrî warantî, îꞌ kaiꞌma innape puꞌkuru îꞌ taasaꞌ Paapaya ekaremekîpa kaiꞌma. Maasa pra mîrîrî kupîꞌpîiya îꞌ taasaiꞌya yawîrî penaronkon anna tamokon pîꞌ.
9 Moropai Judeuyamîꞌ pepînya Paapa yapurîtoꞌpe nîrî morî pe aweꞌtoꞌ wenai. Paapa maimu eꞌmenukasaꞌya taasaꞌ warantî:Mîrîrî yeꞌnen ayapurî pîꞌ wai kureꞌneJudeuyamîꞌ pepîn koreꞌta siꞌma.Moropai ayapurî pîꞌ waiayapurîtoꞌ eserenkantoꞌ ke
taꞌpîiya:
10 Moropai taꞌpîiya inîꞌrî:Amîrîꞌnîkon Judeuyamîꞌ pepîn, atausinpatî.Paapa yapurînenan pokonpeinmenkaꞌsan ipemonkonoyamîꞌ pokonpe siꞌma
taꞌpîiya.
11 Moropai inîꞌrî taꞌpîiya:Tamîꞌnawîronkon Judeuyamîꞌ pepînyatepotorîkon yapurî eꞌpai awanî.Moropai kureꞌne tamîꞌnawîronkonpemonkonyamîꞌya yapurî eꞌpai awanî.
taꞌpîiya.
12 Moropai Isaías nurîꞌtîya taꞌpî nîrî:Jessé nurîꞌtî payanîꞌsan yonpa wanî pe man pata esaꞌ pe.Manniꞌkan Judeuyamîꞌ pepîn esaꞌ pe awanî pe man.Inkamoroya inîmîkî koꞌmannîpî
taꞌpîiya.
13 Paapaya, inîmîꞌtoꞌ ton tîînenya aatausinpatoꞌkon ton tîrî yuꞌse wai. Moropai tîîwanmîra aweꞌtoꞌkon ton tîrîiya yuꞌse wai aapiaꞌnîkon, innape ikuꞌnenan pia. Mîrîrî wenai Morî Yekaton Wannî meruntîri yai morî intîrî nîmîkî pîꞌ aakoꞌmamîkon, teesetaꞌkai pra.
Aꞌtuꞌmîra Paulo Esepuꞌtoꞌ
14 Uyonpayamîꞌ ayepuꞌtîkon pîꞌ wai îꞌ kaiꞌma amîrîꞌnîkon wanî morî pe puꞌkuru. Moropai epuꞌnen pe puꞌkuru awanîkon moropai tiaronkon panama epuꞌnen pe awanîkon epuꞌtî pîꞌ wai.
15 Tîîse sîrîrî kaareta menukauya pe kureꞌne teesenumenka yeꞌka pe, aronne sîrîrî eseurîmatoꞌ menukauya. Amîrîꞌnîkon yenpenatanîꞌtoꞌpe eesenupaꞌpîkon pîꞌ. Sîrîrî konekauya maasa pra Paapaya itîîsaꞌ yeꞌnen esenyakaꞌmatoꞌpe. Uwakîri pe ikupîuya.
16 Maasa pra Cristo maimu pe teesenyakaꞌmasen pe wanî manniꞌkan Judeuyamîꞌ pepîn tonpe. Uurî esenyakaꞌma manniꞌ teepîremasen esenyakaꞌma warantî Paapa maimu ekaremekî pîꞌ pemonkonyamîꞌya Paapa yapurîtoꞌpe. Mîrîrî warantî itekare ekaremekîuya inkamoro Judeuyamîꞌ pepîn eꞌtoꞌpe Paapa pia untîrîꞌsan pe toꞌ eꞌtoꞌpe. Moropai tîwakîri pe Paapaya toꞌ yapisî, Morî Yekaton Wannî nîronaꞌsan pe toꞌ wanî wenai.
17 Mîrîrî yeꞌnen Cristo Jesus yarakkîrî wanî yeꞌnen uurî atausinpa kureꞌne. Moropai Paapa ton pe esenyakaꞌma pîꞌ atausinpa.
18 Uurî pe rî eseurîma eserîke pra wai, tîîse Cristo nîkupîꞌpî pîꞌ neken eseurîma, manniꞌ uyarakkîrî inkupîꞌpî wenai. Mîrîrî kupîꞌpîiya uwenai Judeuyamîꞌ pepînya innape Paapa maimu kupîꞌpî. Mîrîrî eꞌsaꞌ man mîrîrî unekaremekîꞌpî eta toꞌya wenai, moropai uyeseru eraꞌma toꞌya wenai.
19 Moropai Morî Yekaton Wannî meruntîri wenai anîꞌ nîkupî eserîkan pepîn kupîuya wenai innape ikupîꞌpî toꞌya. Mîrîrî warantî asarî yeꞌka pe Jerusalém poro moropai Ilírico pata poro asarî yeꞌka pe itekare ekaremekîꞌpîuya. Aweꞌtoꞌ yawîrî Jesus Cristo pîꞌ eseurîmaꞌpî.
20 Kureꞌne esekaꞌnunkaꞌpî tîwîrî Paapa maimu ekaremeꞌtoꞌpeuya manniꞌkan Jesus yekare etatîponoꞌsan pepîn pîꞌ, oꞌnon pata yaꞌ tiaronkon wîtîꞌpî pepîn yaꞌ itekare ekaremeꞌse. Aꞌkî, tewîꞌ koneka anîꞌya pepîn tiaronya tewîꞌ koneka pataꞌseꞌ yaꞌ. Mîrîrî warantî uutî pepîn oꞌnon pata yaꞌ tiaron wîtîꞌpî itekare ekaremeꞌse yaꞌ.
21 Îꞌ kaiꞌma Paapa maimu eꞌmenukasaꞌya taasaꞌ manniꞌ warantî:Manniꞌkan îꞌ pensa ipîꞌ eseurîmanetatîponoꞌsan pepînya eraꞌma kupî sîrîrî.Moropai eta tîuyaꞌnîkon wenaiinnape ikupî toꞌya kupî sîrîrî,
taꞌpîiya.
Paulo Esenumenka Roma Pata Pona Tuutî Pîꞌ
22 Mîrîrî pîꞌ esenyakaꞌma yeꞌnen, tuꞌke iteꞌka aapiaꞌnîkon uutî eserîke pra awanîꞌpî.
23 Tîîse sîrîrî esenyakaꞌmatoꞌ yaretîꞌkasauꞌya wai sîrîrî pata po. Pena tuꞌke konoꞌ kaisarî esenumenka pîꞌ uukoꞌmansaꞌ wai amîrîꞌnîkon aneraꞌmapai wanî pîꞌ.
24 Tarîpai mîrîrî kupîuya pîꞌ esenumenka sîrîrî. Espanha pona uutî pe amîrîꞌnîkon eraꞌmauya pîꞌ esenumenka sîrîrî. Moropai upîikaꞌtîyaꞌnîkon yuꞌse wanî sîrîrî Espanha pona uutîtoꞌ pîꞌ, mararî akoreꞌtaꞌnîkon uukoꞌmamî tîpo.
25 Tîîse sîrîrî uutî sîrîrî Jerusalém pona, Paapa pemonkonoyamîꞌ ton pe miarî.
26 Maasa pra Jesus yapurînenan Macedônia ponkon moropai Acaia ponkonya tîntîrîkon tîrîꞌpî taatausinpai manniꞌkan Jerusalém ponkon tîweꞌtarumaꞌtîsanon pîikaꞌtîtoꞌpe.
27 Maasa pra Judeuyamîꞌ winîpai morî eꞌpîikaꞌtîntoꞌ yapisîꞌpî toꞌya. Mîrîrî yeꞌnen Judeuyamîꞌ pepînya toꞌ pîikaꞌtî eꞌpai awanî nîrî, itesaꞌ pe tîweꞌtoꞌkon ke.
28 Mîrîrî yeꞌnen tamîꞌnawîrî toꞌ nîtîrîꞌpî rumakasauꞌya ya Jerusalém ponkon pia, miarî pai uutî mîrîrî Espanha pata pona. Mîrîrî yai uutî pe amîrîꞌnîkon aneraꞌmapai wanî sîrîrî.
29 Mîrîrî yai amîrîꞌnîkon pia erepansaꞌ yai, epuꞌtî pîꞌ wai kureꞌne morî Cristo nîtîrîꞌpî pîꞌ eseurîma ayarakkîrîꞌnîkon, tamîꞌnawîrî ituꞌse aweꞌtoꞌkon pîkîrî.
30 Esatîuya uyonpayamîꞌ, Uyepotorîkon Jesus Cristo wenai. Moropai kureꞌne etîꞌnînmantoꞌ Morî Yekaton Wannî nîtîrîꞌpî wenai esenyakaꞌman tîmurukun pe. Mîrîrî yeꞌnen upîikaꞌtîtî eepîrematoꞌkon ke upona.
31 Upona epîrematî Jesus epuꞌnenan pepîn Judéia ponkonya uwî namai. Moropai uurî esenyakaꞌmatoꞌ eꞌtoꞌpe Paapa pemonkonoyamîꞌ tonpe miarî.
32 Mîrîrî aapiaꞌnîkon uutî ituꞌse Paapa wanî ya, akoreꞌtaꞌnîkon erepamî kureꞌne taatausinpai. Mîrîrî yai apîikaꞌtîuyaꞌnîkon moropai upîikaꞌtîyaꞌnîkon nîrî.
33 Moropai Paapa, tîwanmîn tîînen wanî aapiaꞌnîkon yuꞌse wai. Mîrîrî wanî eꞌpai man.
