Sîrîrî Kaareta Paulo Nîmenukaꞌpî Roma Ponkon Pia 16:1-27
16 Apîꞌnîkon manniꞌ uwîrisikon Febe Cesaréia soosirî ta teesenyakaꞌmasen ekaremekîuya.
2 Mîîkîrî yapiꞌtî morî pe maasa pra uwîrisikon pe awanî yeꞌnen. Yapiꞌtî uyepotorîkon Jesus Cristo pemonkono pe awanî yeꞌnen. Morî pe yapiꞌtî Paapa pemonkonoyamîꞌya ikupî warantî. Ipîikaꞌtîtî tamîꞌnawîrî îꞌ ituꞌse aweꞌtoꞌ ke, iipia itîîtî. Maasa pra mîîkîrîya tuꞌke pemonkonyamîꞌ pîikaꞌtîꞌpî mararî pra, moropai upîikaꞌtîꞌpîiya nîrî.
3 Umaimu yarimauya Priscila pia moropai Áquila pia. Maasa pra inkamoro wanî uyonpayamîꞌ pe. Jesus Cristo ton pe esenyakaꞌma yonparîꞌsan pe toꞌ wanî.
4 Inkamoro saꞌmanta yonpaꞌpî uurî pîikaꞌtîkonpa. Mîrîrî yeꞌnen kureꞌne toꞌ pîꞌ morî pe man tauya. Uurîya taa neken pra tîîse tamîꞌnawîronkon Judeuyamîꞌ pepîn Paapa yapurînenanya taa nîrî.
5 Moropai umaimu man tamîꞌnawîronkon manniꞌkan toꞌ pokonpe emurukuntîꞌsan pîꞌ nîrî.Moropai umaimu man Ipêneto manniꞌ eꞌmaiꞌ pe Ásia patapai innape Cristo ikupîtîpon pia.
6 Moropai Maria pia nîrî, manniꞌ kureꞌne amîrîꞌnîkon ton pe eesenyakaꞌmaꞌpî.
7 Moropai Andrônico pia nîrî. Moropai Júnias pia, inkamoro upata yaꞌ tîweꞌsanon Judeuyamîꞌ, upokonpe atarakkannîtoꞌ ta siꞌsan. Inkamoro Jesus naipontîꞌsan epuꞌtîꞌnîkon morî pe. Pena eꞌmaiꞌ pe urawîrî innape Jesus kuꞌnen pe toꞌ enaꞌpî.
8 Moropai Amplíato pia nîrî. Mîîkîrî wanî uwakîri pe puꞌkuru uyepotorî pemonkono pe awanî yeꞌnen.
9 Moropai Urbano uyonpakon esenyakaꞌman yonpa pia.Moropai uwakîri uyonpa Estáquis pia nîrî.
10 Moropai Apeles manniꞌ kureꞌne innape Cristo kupî tîuya wenai tîmoron epuꞌtîtîpon pia.Moropai Aristóbulo pemonkonoyamîꞌ pia umaimu man.
11 Moropai Herodião upata yaꞌ tîweꞌsen Judeu pia.Moropai tamîꞌnawîrî uyonpakon Narciso pemonkonoyamîꞌ innape Jesus kuꞌnenan pia.
12 Umaimu man wîriꞌsanyamîꞌ pia nîrî, Trifena moropai Trifosa manniꞌkan uyepotorîkon tonpe esenyakaꞌmaꞌsan pia.Moropai Pérside mîîkîrî nîrî esenyakaꞌmaꞌpî nîrî toꞌ warantî.
13 Moropai umaimu yarimauya Rufo manniꞌ uyepotorîkon nîmenkaꞌpî tîmîrî pe eesenyakaꞌmatoꞌpe, mîîkîrî pia umaimu man. Moropai isan pia nîrî maasa pra mîîkîrîya kureꞌne tînre warantî ukupîꞌpî mîîtoꞌpe.
14 Moropai Asíncrito, Flegonte. Moropai Hermes moropai Pátrobas moropai Hermas moropai tamîꞌnawîrî manniꞌkan innape Jesus kupîtîponkon toꞌ pia tîweꞌsanon pia umaimu man.
15 Moropai Filólogo moropai Júlia moropai Nereu moropai itakon moropai Olimpas moropai tamîꞌnawîronkon toꞌ pia tîweꞌsanon Paapa pemonkonoyamîꞌ pia umaimu man.
16 Tiaronkon saꞌnamayaꞌnîkon pe toꞌ pîꞌ atapiꞌtî taatausinpai.Tamîꞌnawîronkon Cristo pemonkonoyamîꞌya aapiaꞌnîkon tîmaimukon yarima sîrîrî.
Tiwinkanoꞌpî Paulo Esekaremeꞌtoꞌ
17 Uyonpayamîꞌ esatîuya sîrîrî apîꞌnîkon. Aka tîwarî eꞌtî, manniꞌkan amîrîꞌnîkon pantaka yuꞌse tîweꞌsanon pîꞌ. Maasa pra apanamatoꞌkon yairî pra apanamakon toꞌya. Îꞌ kaiꞌma eesenupaꞌpîkon yairî pra toꞌ wanî. Inkamoroya innape ikuꞌtoꞌyaꞌnîkon manenpa toꞌya. Mîrîrî yeꞌnen toꞌ pia pai atarimatî.
18 Maasa pra sîrîrî yeꞌka yapurînenanya Cristo yapurî eserîke pra man. Uyepotorî yapurî toꞌya pepîn. Tîîse toꞌ esenumenka kureꞌne ituꞌse tîweꞌtoꞌkon pîꞌ neken. Morî pe tîweꞌkuꞌse tiaronkon yeurîma toꞌya seruꞌyeꞌ pe. Mîrîrî wenai pakkokon, mararî epuꞌnenan yenkuꞌtî toꞌya.
19 Tîîse amîrîꞌnîkon wanî Paapa maimu yawîrî epuꞌsaꞌ tamîꞌnawîronkonya. Mîrîrî wenai kureꞌne taatausinpai uurî wanî amîrîꞌnîkon pîꞌ. Mîrîrî yeꞌnen epuꞌnen pe awanîkon yuꞌse wai morî winîkîi. Tîîse imakuiꞌpî winîkîi, pakko pe eꞌkuꞌtî.
20 Moropai Paapa tîwanmîn esaꞌya makui kupî sîrîrî amaꞌreꞌnîkon. Maasa pra Paapa wanî itentai. Morî pe uyepotorîkon Jesus Cristo nîtîrî aapiaꞌnîkon wanî.
21 Timóteo, manniꞌ esenyakaꞌma wanîyakonya tîmaimu yarima aapiaꞌnîkon. Moropai upata yawonkon Lúcio, Jasom moropai Sosípatro, inkamoroya nîrî tîmaimukon yarima aapiaꞌnîkon.
22 Uurî Tércioya sîrîrî Paulo kaaretarî menuka sîrîrî. Umaimu yarimauya tamîꞌnawîronkon innape Cristo kuꞌnenan pia.
23 Moropai Gaio upataꞌseꞌ ton tîrîtîpon, manniꞌ oꞌnon pata Paapa pemonkonoyamîꞌ pokonpe emurukuntî pataꞌseꞌ ton tîrî tîponya tîmaimu yarima aapiaꞌnîkon. Moropai Erasto manniꞌ esenyakaꞌmaꞌpî nîrî mîrîrî cidade po mîîkîrîya tîmaimu yarima. Moropai uyonpakon Quartoya tîmaimu yarima aapiaꞌnîkon.
Tiwin Konoꞌpî Pe Teepîrema Pe
Paapa Yapurîtoꞌ Pauloya
24 [Morî epeꞌmîn tîrî Uyepotorîkon Jesus Cristoya yuꞌse wai, tamîꞌnawîrî amîrîꞌnîkon pia.]
25 Paapa yapurîꞌnîkon imaimu unekaremekîꞌpî wenai. Maasa pra mîrîrî Jesus Cristo pîꞌ teeseurîmasen pe awanî. Paapaya amîrîꞌnîkon koneka meruntî ke awanîkonpa, innape ikuꞌtoꞌyaꞌnîkon pîꞌ. Mîrîrî wanî yairon pe Paapa maimuya taasaꞌ yawîrî, manniꞌ penaronkon nepuꞌtîꞌpî pepîn esonomîꞌpî.
26 Tarîpai mîrîrî yairon wanî ekaremeꞌsaꞌ pe maasa pra penaronkon Paapa maimu ekaremeꞌnenan profetayamîꞌya ekaremekîꞌpî. Mîrîrî menukaꞌpî toꞌya. Mîrîrî kupîꞌpî toꞌya îꞌ taꞌpî Paapaya yawîrî. Mîrîrî esepuꞌtîꞌpî tarîpai tamîꞌnawîrî pata po, mîrîrî kuꞌtoꞌpe pemonkonyamîꞌya innape moropai yawîrî toꞌ eꞌtoꞌpe.
27 Manniꞌ Paapa tiwinanoꞌpî tamîꞌnawîron epuꞌnen mîîkîrî wanî tapurîsen pe ipatîkarî. Uyepotorîkon Jesus Cristo wenai yapurîꞌnîkon. Mîrîrî warantî eꞌpai man. Moropai Uyepotorîkon Jesus Cristo eꞌtoꞌ wanî yuꞌse wai aapiaꞌnîkon tamîꞌnawîrî awanîkon tanne. Mîrîrî warantî ituꞌse wai.
