Sîrîrî Kaareta Paulo Nîmenukaꞌpî Roma Ponkon Pia 2:1-29
2 Mîrîrî yeꞌnen amîrî nîrî tarumaꞌtî Paapaya eꞌpai man, ankupîꞌpî wenai. Amîrî manniꞌ tiaronkon yakoꞌmenka pîꞌ tîweꞌsen. Taaya eserîke pra nai tiaronkon yakoꞌmenkanen pe siꞌma: —Uurî unkupîꞌpî ton pra wai —taaya eserîke pra nai. Mîrîrî taaya tiaronkon winîkîi, aawarîrî ankupîꞌpî ton pra aweꞌkupîꞌpî kaiꞌma awanî tanne, tîîse inkamoro nîkupîꞌpî warantî ikuꞌsaꞌya. Mîrîrî yeꞌnen aawarîrî rî eesewanmîrî mîrîrî. —Inkamoro tarumaꞌtî Paapaya eꞌpai man —taayaꞌnîkon tanne, amîrî nîrî tarumaꞌtîpai awanî.
2 Tîîse îꞌ pensa Paapaya mîrîrî yeꞌka imakuiꞌpî kuꞌnenan yakoꞌmenka ya, epuꞌtî man yairon pe puꞌkuru awanî.
3 Tîîse amîrî uyonpa, mîrîrî imakuiꞌpî kupîya yeꞌka pe, tiaronkon yakoꞌmenkaya. Inkamoro tarumaꞌtî Paapaya tanne, —Utarumaꞌtîiya pepîn —kaiꞌma eesenumenka. Tîîse —Kaane —tauya, Paapaya atarumaꞌtî nîrî.
4 Morî pe Paapa eꞌtoꞌ kupî pîꞌ nan tîwî? Morî pe awanî wenai utarumaꞌtîiya pepîn, kaiꞌma eesenumenka? Inna, morî mîîkîrî, kaꞌneꞌ pe anîꞌ tarumaꞌtî yuꞌse eꞌkoi pepîn. Moropai mîrîrî wenai anîꞌ esenumenka yuꞌse awanî imakuiꞌpî tînkupîꞌpî winîpai.
5 Tîîse amîrî yewan wanî saꞌme, moropai yuukuya pra aakoꞌmamî. Mîrîrî wenai inîꞌ panpîꞌ aweꞌtarumaꞌtî kupî pe nai, îꞌ pensa Paapa ekoreꞌma imakuiꞌpî kupîtîponkon yarakkîrî weiyu yai. Moropai mîrîrî yai pemonkonyamîꞌ tarumaꞌtîiya yairî.
6 Maasa pra Paapa maimu eꞌmenukasaꞌya taasaꞌ man:—Mîîkîrîya itîrî pe man, îꞌ kaiꞌma anîꞌ nîkupîꞌpî wenairî inyakanmaiya.
7 Tiaronkon morî ituꞌse Paapa eꞌtoꞌ kupî pîꞌ tîîkoꞌmansenon pia itîrîiya, ipatîkarî enen toꞌ koꞌmantoꞌ ton, mîrîrî taataretîꞌkasen pepîn. Moropai morî tapurîtoꞌkon yuwa pîꞌ tîîkoꞌmansenon pia itîrîiya.
8 Tîîse manniꞌkan tîîwarîrîꞌnîkon, ituꞌse tîweꞌtoꞌkon pîꞌ neken tîîkoꞌmansenon tarumaꞌtîiya. Yairon yewanmîrî tîuyaꞌnîkon wenai, imakuiꞌpî kupî pîꞌ toꞌ koꞌmamî. Inkamoro pîꞌ Paapa ekoreꞌma toꞌ nîkupîꞌpî wenai. Mîrîrî yeꞌnen toꞌ tarumaꞌtîiya pe man.
9 Paapaya eꞌtarumaꞌtîntoꞌ tîrî pe man mararî pra tamîꞌnawîronkon manniꞌkan imakuiꞌpî kuꞌnenan ton pe, Judeuyamîꞌ ton pe moropai Judeuyamîꞌ pepîn ton pe nîrî.
10 Tîîse Paapaya manniꞌkan morî kuꞌnenan pia morî tîrî. Inkamoro yapurîiya, moropai tîwanmîn tîrîiya toꞌ pia. Tamîꞌnawîronkon morî kuꞌnenan Judeuyamîꞌ pia moropai Judeuyamîꞌ pepîn pia nîrî itîrîiya. Mîrîrî warantî Paapaya ikupî.
11 Maasa pra yairî Paapa wanî tamîꞌnawîronkon yarakkîrî, anîꞌ tîmenkai pra.
12 Manniꞌkan Judeuyamîꞌ pepînya Paapa maimu Moisés nurîꞌtîya yenupantoꞌ epuꞌtî pra awanî. Tîîse imakuiꞌpî toꞌ nîkupîꞌpî wenai inkamoro tarumaꞌtî Paapaya, tîmaimu epuꞌtî toꞌya pra tîîse. Moropai Judeuyamîꞌ Paapa maimu Moisés nurîꞌtîya yenupantoꞌ epuꞌnenan teuren. Mîîwîni tîîse yawîrî toꞌ koꞌmamî pepîn, imakuiꞌpî kupî toꞌya. Mîrîrî wenai inkamoro tarumaꞌtî Paapaya, tîmaimu yawîrî pra toꞌ wanî yeꞌnen.
13 Maasa pra Paapa pia inkamoro yeꞌka, eta pe neken etanenan wanî pepîn morî pe. Tîîse manniꞌkan, tîmaimu yawîrî ikuꞌnenan, inkamoro pîꞌ taa Paapaya: —Morîkon amîrîꞌnîkon.
14 Judeuyamîꞌ pepînya Moisés nurîꞌtîya yenupantoꞌ Paapa maimu epuꞌtî pepîn. Tîîse îꞌ pensa teesenumenkakon yawîrî Paapa maimu kupî toꞌya ya, epuꞌtî yeꞌka pe pra inkamoroya teesenumenkatoꞌkon yawîrî morî kupî teuren Moisés nurîꞌtîya yenupantoꞌ Paapa maimu epuꞌtîiꞌma pra.
15 Morî tînkupîkon wenairî eesepuꞌtî toꞌ yewan yaꞌ awanî Paapa yeseru toꞌ nîkupî ton. Maasa pra tewankon yaꞌ toꞌ esenumenkatoꞌya ekaremekî îꞌ wanî yairon pe. Tiaron pensa epuꞌtî toꞌya yairî pra tîwanîkon, moropai tiaron pensa yairî tîwanîkon epuꞌtî toꞌya, toꞌ esenumenkatoꞌ yaꞌ.
16 Maasa awanî pe man sîrîrî warantî. Jesus Cristoya pemonkonyamîꞌ yakoꞌmenka kupî sîrîrî Paapa maimu pe. Mîrîrî weiyu yai tamîꞌnawîron pemonkonyamîꞌ esenumenkatoꞌ anîꞌ nepuꞌtî pepîn yenpo pe man. Mîrîrî ekaremekî manniꞌ itekare unekaremekîya.
Anîꞌ Wanî Judeu Pe Puꞌkuru
17 Amîrîꞌnîkon kanan? Judeuyamîꞌ pe amîrîꞌnîkon wanî. Taayaꞌnîkon: —Moisés nurîꞌtîya yenupantoꞌ epuꞌnenan anna. Moropai mîî pe aatapurîkon Paapa epuꞌnen pe, ipemonkono pe awanîkon yeꞌnen.
18 Ituꞌse Paapa eꞌtoꞌ epuꞌnen pe aatapurîkon. Moropai Moisés nurîꞌtîya yenupantoꞌ pîꞌ esenupaꞌpî pe aatapurîkon. Mîrîrî yeꞌnen yairon epuꞌnen pe awanîkon.
19 Taayaꞌnîkon: —Seruꞌ pepîn anna wanî manniꞌkan epuꞌnenan pepîn yenupanenan pe —taayaꞌnîkon, manniꞌkan enkaruꞌnankon pinunpanenan warantî. Moropai —Anna wanî manniꞌkan ewaron yaꞌ tîweꞌsanon weiyu pe tîweꞌsanon warantî —taayaꞌnîkon.
20 Moropai taayaꞌnîkon: —Anna wanî manniꞌkan pakkokon epuꞌnenan pepîn pîikaꞌtînenan pe, moropai toꞌ yenupanenan pe, epuꞌnen pe toꞌ enatoꞌpe —taayaꞌnîkon. Inna, seruꞌ pepîn epuꞌtî pîꞌ naatîi tamîꞌnawîrî Moisés nurîꞌtîya yenupantoꞌ winîpai tamîꞌnawîrî îꞌ yairî tîweꞌsen.
21 Amîrîꞌnîkon atapurî tiaronkon yenupanen pe awanîkon pîꞌ. Tîîse îꞌ waniꞌ awanî yeꞌnen aawarîrî eesenupakon pepîn? Taayaꞌnîkon tiaronkon pîꞌ amaꞌyeꞌ pe tîweꞌse pra. Mîrîrî taa tîpo, îꞌ ton pe amaꞌyeꞌ pe awanîkon?
22 Moropai taayaꞌnîkon tiaronkon pîꞌ seꞌ tapairî tiaron noꞌpî yarakkîrî tîweꞌse pra. Mîrîrî taa tîpo, îꞌ ton pe tiaron noꞌpî yarakkîrî awanîkon? Moropai miaꞌ ke ikonekasaꞌ toꞌ napurî yewanmîrînenan amîrîꞌnîkon. Tîîse îꞌ ton pe inkamoro yeꞌka yapurîtoꞌ toꞌya yemanne yamaꞌrunpayaꞌnîkon mîrîrîkon toꞌ pataꞌseꞌ yapai?
23 Amîrîꞌnîkon atapurî tanne, mîî pe Paapa maimu epuꞌtîyaꞌnîkon pîꞌ. Tîîse amîrîꞌnîkon wanî Paapa yeppeꞌnîꞌnenan pe mararî pra, maasa pra imaimu yawîrî pra awanîkon wenai.
24 Maasa pra Paapa maimu eꞌmenukasaꞌya taasaꞌ man:Imakuiꞌpî amîrîꞌnîkon Judeuyamîꞌ nîkupîꞌpî wenai Judeuyamîꞌ pepîn eseurîma imakuiꞌpî pe Paapa winîkîi
taasaiꞌya man.
25 Paapa pemonkonoyamîꞌ amîrîꞌnîkon Judeuyamîꞌ, amerekon piꞌpî yaꞌtîtoꞌyaꞌnîkon wanî yeꞌnen. Mîrîrî wanî morî pe seruꞌ pepîn, yairî Moisés nurîꞌtîya yenupantoꞌ yawîrî ikupîyaꞌnîkon ya. Tîîse yawîrî pra awanîkon ya, manniꞌ tîmere piꞌpî yaꞌtîtîpon pepîn warantî awanîkon, yaꞌtîtoꞌyaꞌnîkon wanî seꞌ tapairî mîîtoꞌpe.
26 Mannankan Judeuyamîꞌ pepîn wanî, tîmerekon piꞌpî yaꞌtîtîponkon pe pra siꞌma, tîîse Moisés nurîꞌtîya yenupantoꞌ yawîrî ikupî toꞌya ya, moriya Paapaya inkamoro eraꞌma tîpemonkonoyamîꞌ pe, manniꞌkan tîmere piꞌpî yaꞌtîtîponkon warantî.
27 Moropai Judeuyamîꞌ pepînya Paapa maimu yawîrî ikuꞌsaꞌ wenai, amîrîꞌnîkon wanî imakuiꞌpî pe eesepuꞌtî. Maasa pra inkamoro wanî pepîn imere piꞌpî yaꞌtîsaꞌkon pe, moropai Moisés nurîꞌtîya yenupantoꞌ epuꞌtîtîponkon pe pra. Mîîwîni tîîse imaimu yawîrî toꞌ eꞌsaꞌ. Tîîse amîrîꞌnîkon imere piꞌpî yaꞌtîsaꞌkon pe siꞌma, moropai aweꞌmenukasaꞌ epuꞌnen pe siꞌma, yawîrî pra aweꞌsaꞌkon. Mîrîrî yeꞌnen imakuiꞌpî pe awanîkon eesepuꞌtî.
28 Mîrîrî yeꞌnen anîꞌ wanî Judeu pe puꞌkuru seruꞌ pepîn imere piꞌpî yaꞌtîsaꞌ pe yairî? Mannankan Judeuyamîꞌ tîmerekon piꞌpî yaꞌtînenan? Kaane. Mîrîrî neken kuꞌnenan wanî pepîn Judeu pe puꞌkuru.
29 Tîîse yaironkon Judeuyamîꞌ wanî mannankan teeseraꞌmasen ton tîpiꞌpîkon yaꞌtînenan pe pra, tîîse ituꞌna toꞌ yewan yaꞌ etinyakaꞌmaꞌpî pe toꞌ yeseru wanî, inkamoro wanî Judeu pe puꞌkuru. Maasa pra Morî Yekaton Wannî esenyakaꞌmasaꞌ toꞌ yewan miakanma pîꞌ. Manniꞌ Moisés nurîꞌtîya yenupantoꞌya ikupî eserîke pra awanî. Mîrîrî yeꞌnen inkamoro yeꞌka pemonkonyamîꞌ wanî Paapa napurîkon pe, pemonkonyamîꞌ napurîkon pe pra.
