Sîrîrî Kaareta Paulo Nîmenukaꞌpî Roma Ponkon Pia 3:1-31
3 Judeuyamîꞌ pîꞌ tarîpai, oꞌnon yeꞌka pe esenumenkan pîꞌ naatî? Judeuyamîꞌ pepîn yentai pra toꞌ wanî kaiꞌma esenumenkan pîꞌ naatî? Yai pra tîmerekon piꞌpî yaꞌtîsaꞌkon pe toꞌ wanî tanne, îꞌ pe pra rî awanî kaiꞌma eesenumenkakon?
2 Kaane, Paapaya toꞌ yeseru ton tîrîꞌpî mararî pra tiaronkon Judeuyamîꞌ pepîn yentai. Maasa pra pena eꞌmaiꞌ pe Paapaya tîmaimu tîrîꞌpî Judeuyamîꞌ pia, mîrîrî esaꞌ pe toꞌ eꞌtoꞌpe.
3 Tîîse tiaronkon Judeuyamîꞌ wanî pîn mîrîrî yawîrî, innape ikupî toꞌya pra awanîꞌpî. Yawîrî pra toꞌ wanî yeꞌnen, îꞌ taasaꞌ tîuya yawîrî Paapaya ikupî pepîn kaꞌrî?
4 Kaane, ikupîiya. Pemonkonyamîꞌ pîikaꞌtîiya taasaꞌ tîuya yawîrî. Seruꞌyeꞌ pe Paapa wanî pepîn tiwin kin. Tîwîrî Paapa koꞌmamî eꞌpai awanî yairon pe puꞌkuru, teuren tamîꞌnawîronkon wanî tanne seruꞌyeꞌ pe. Aꞌkî, Paapa maimu eꞌmenukasaꞌya taasaꞌ man, tîpîꞌ teeseurîmasen pe:Paapa, amîrî wanî yairon pe puꞌkuru teeseurîmasen pe.Teuren taa toꞌya tanne apîꞌ, yairon pepîn amîrî, taa toꞌya ya,tîîse yairon pe puꞌkuru awanî eesepuꞌtî,
taasaiꞌya man.
5 Imakuiꞌpî unkupîꞌpîkon wenai, utarumatîiyaꞌnîkon pra awanî ya, morî pe Paapa eꞌtoꞌ eeseraꞌma. Mîrîrî yeꞌnen —Utarumaꞌtîiya eꞌpai pra awanî maasa pra imakuiꞌpî unkupîꞌpî wenai morî pe Paapa eꞌtoꞌ eraꞌma pemonkonyamîꞌya —taa toꞌya.
6 Tîîse kaane, mîrîrî warantî awanî pepîn. Yairon pe awanî ya, oꞌnon yeꞌka pe kin pemonkonyamîꞌ yakoꞌmenkaiya eꞌpainon?
7 Tîîse anîꞌya taa ya, seruꞌ uurî eꞌtoꞌya, inîꞌ panpîꞌ morî pe Paapa eꞌtoꞌ moropai yairî aweꞌtoꞌ yenpo, aronne panpîꞌ morî pe eeseraꞌmatoꞌpe. Mîrîrî yeꞌnen îꞌ ton pe Paapaya uurî tarumaꞌtî imakuiꞌpî unkupîꞌpî wenai?
8 Tiaronkon eseurîma anna pîꞌ. Tiaron pe anna yenupa Pauloya. Taa toꞌya see warantî: —Moriya imakuiꞌpî kuꞌpaiꞌnîkon man, mîrîrî kupî wenai morî iiꞌtoꞌpe Paapa winîpai —taa toꞌya. Tîîse îꞌ pe pra rî taa toꞌya. Epuꞌtî toꞌya pepîn. Mîrîrî yeꞌnen inkamoro, mîrîrî warantî eeseurîmaꞌsan eꞌtarumaꞌtî pe man, maasa pra ituꞌse toꞌ eꞌsaꞌ wenai.
Pemonkon Yairon Ton Pra Man Tiwin Kin
9 Mîrîrî yeꞌnen morî pe panpîꞌ uurîꞌnîkon Judeuyamîꞌ eraꞌma Paapaya, manniꞌkan Judeuyamîꞌ pepîn yentai kaiꞌma eesenumenkakon? Kaane, maasa pra aasîrî taꞌpîuya wai, imakuiꞌpî pe tamîꞌnawîronkon wanî, Judeuyamîꞌ moropai Judeuyamîꞌ pepîn.
10 Îꞌ kaiꞌma Paapa maimu eꞌmenukasaꞌya taasaꞌ:Tiwin kin anîꞌ yairon pemonkon ton pra man.
11 Tiwin kin anîꞌ yairon epuꞌnen ton pra man.Tiwin kin anîꞌ ton pra man Paapa yarakkîrî tîîkoꞌmamî yuwanen.
12 Tamîꞌnawîronkon wanî aminke tîweꞌsanon pe Paapa pîꞌ.Mîrîrî wenai tamîꞌnawîronkon wanî îꞌ pe pra rî.Anîꞌ morî kupî yuwanen ton pra man tiwin kin.
13 Inkamoro maimu wanîisaꞌmantaꞌpî pemonkon esaꞌrîꞌpî katasaꞌ warantî.Ikî pe awanî. Seruꞌyeꞌ pe toꞌ maimu wanî imakuiꞌpî pe.Moropai mîrîrî tîmaimukon kepemonkon wîî toꞌya teeseurîmakon ke.Mîrîrî toꞌ eseurîmatoꞌ wanîmanniꞌ îkîiya yeꞌkansaꞌ ya saꞌmantan,manniꞌ kaisarî seruꞌyeꞌ pe yenkuꞌtîntoꞌ toꞌya wanî.
14 Mîrîrî toꞌ mata yapai,mararî pra imakuiꞌpî pe toꞌ eseurîmatoꞌ epaꞌka.Tonpakon mîiꞌma toꞌya tîmaimukon ke.
15 Inkamoroya kaꞌneꞌ pe tiaronkon tarumaꞌtîiwî tîuyaꞌnîkon pîkîrî.
16 Oꞌnon poro toꞌ taasarîꞌpîkontiaronkon tarumaꞌtî toꞌya.
17 Tiwin kin inkamoroyamorî pe eꞌnî tîwanmîra epuꞌtî pepîn.
18 Moropai anîꞌ esenumenka pepîn tiwin kinPaapa nama tîuyaꞌnîkon pîꞌ,
taasaꞌ Paapa maimuya man.
19 Aꞌkî, epuꞌtîꞌnîkon man uurîꞌnîkon Judeuyamîꞌ pia îꞌ kaiꞌma tamîꞌnawîron panamantoꞌ tîrîꞌpî Paapaya Moisés nurîꞌtî wenai. Itîrîꞌpîiya —Inna, morî uurî —taa namai. Tîîse, —Paapa pia imakuiꞌpî uurî —taatoꞌpe, maasa pra tamîꞌnawîronkon pemonkonyamîꞌ wanî imakuiꞌpî pe.
20 Mîrîrî yeꞌnen anîꞌ wanî pepîn morî pe Paapa rawîrî, Moisés nurîꞌtîya yenupantoꞌ yawîrî tîwanî wenai. Tîîse mîrîrîya imakuiꞌpî pe eꞌnîtoꞌ epuꞌtî emapuꞌtî.
Innape Ikuꞌtoꞌ Wenai Yairî Enan Paapa Pia
21 Tîîse yairon pe pemonkon eꞌtoꞌpe Paapaya neken ikupî, Moisés nurîꞌtîya yenupantoꞌ yawîrî eꞌnî wenai pra. Paapaya ikupî ekaremekîꞌpî penaronkon Paapa maimu ekaremeꞌnenan profetayamîꞌ nurîꞌtîya. Tarîpai eesepuꞌtî sîrîrî îꞌ kaiꞌma Paapaya ikupî.
22 Paapaya pemonkon eraꞌma morî pe innape Jesus Cristo kuꞌtoiꞌya wenai. Mîrîrî kupîiya tamîꞌnawîronkonya innape ikupî wenai, anîꞌ menkaiya pepîn. Tamîꞌnawîronkon seꞌ kaisarî toꞌ kupîiya.
23 Maasa pra Paapa pia tamîꞌnawîronkon pemonkonyamîꞌya imakuiꞌpî kuꞌsaꞌ. Moropai imakuiꞌpî teserukon wenai morî pe ituꞌse Paapa eꞌtoꞌ eposaꞌ toꞌya pra awanîꞌpî.
24 Tîîse morî pe tîweꞌtoꞌ wenai Paapaya toꞌ pîikaꞌtî tînmu Jesus Cristo wenai, îꞌ yeꞌma anîꞌya wenai pra. Jesus Cristo saꞌmantaꞌpî pemonkonyamîꞌ yeꞌmapa. Mîrîrî wenai imakuiꞌpî toꞌ nîkupîꞌpî moꞌkaꞌpîiya. Mîrîrî yeꞌnen —Yairon pe awanîkon —taa Paapaya toꞌ pîꞌ.
25 Tînmu tîrîꞌpîiya aasaꞌmantatoꞌpe. Tîmînî kamoꞌpî Cristoya imakuiꞌpî toꞌ eꞌtoꞌ moꞌkatoꞌpe. Innape ikupî toꞌya wenai Paapaya toꞌ eraꞌma yairon pe. Mîrîrî wenai yairon pe tîwanî ekaremekîꞌpîiya. Maasa pra penaronkon Cristo esenpo rawîrî esiꞌsan nîkupîꞌpî imakuiꞌpî wenai toꞌ tarumaꞌtîsaiꞌya pra man. Inîmîkîꞌpîiya tînmu iipîꞌpî pîkîrî.
26 Tîîse tarîpai îꞌ kaiꞌma yairon pe tîweꞌtoꞌ ekaremekîiya Jesus Cristo nîkupîꞌpî wenai, mîrîrî yairon pe tîweꞌtoꞌ wenai innape Jesus Cristo kuꞌnenan kupîiya yairî toꞌ eꞌtoꞌpe.
27 Mîrîrî yairî Paapaya kuꞌnîsaꞌ wenai atapurîn eꞌpainon? Kaane, tiwin kin atapurîn pepîn. Îꞌ waniꞌ awanî yeꞌnen? Îꞌ yuꞌse Paapa wanî yairî eꞌnîtoꞌpe? Morî unkupîkon wenai, iipia koꞌmannî kaꞌrî? Kaane, mîrîrî wenai pra, tîîse innape Jesus Cristo kuꞌtoꞌ uurîꞌnîkonya wenai, morî pe eꞌnî Paapa yarakkîrî.
28 Mîrîrî warantî eraꞌmaꞌnîkon îꞌ kaiꞌma pemonkon kupî Paapaya morî pe innape Cristo kupîiya wenai, Moisés nurîꞌtîya panamantoꞌ yawîrî aweꞌtoꞌ wenai pra.
29 Anîꞌ kin mîîkîrî Paapa? Manniꞌkan Judeuyamîꞌ neken Yepotorî kaꞌrî? Moropai manniꞌkan Judeuyamîꞌ pepîn Yepotorî nîrî kaꞌrî? Inna, seruꞌ pepîn. Paapa mîîkîrî tamîꞌnawîronkon Yepotorî pe tîweꞌsen.
30 Mîrîrî yeꞌnen Paapa wanî tiwin. Morî pe Judeuyamîꞌ eraꞌmaiya moropai morî pe Judeuyamîꞌ pepîn eraꞌmaiya nîrî, tîîse innape Cristo kupî toꞌya wenai.
31 Tarîpai îꞌ taa pe nai, Moisés nurîꞌtîya yenupantoꞌ pîꞌ? —Tîwî nasi. Inîꞌ anetapai pra wai, maasa pra innape Jesus kuꞌnen uurî tarîpai —taa eꞌpai nai? Kaane, mîrîrî warantî taa eꞌpai pra man. Maasa pra innape Jesus kuꞌnen pe enansaꞌ yeꞌnen, yawîrî koꞌmannî emapuꞌtîiya.
