Sîrîrî Kaareta Paulo Nîmenukaꞌpî Roma Ponkon Pia 4:1-25
4 Îꞌ taa eꞌpainon penaron Abraão anna Judeuyamîꞌ tamo nurîꞌtî pîꞌ? Îꞌ kaiꞌma morî pe eenaꞌpî Paapa yarakkîrî?
2 Abraão eraꞌmaꞌpî Paapaya morî pe, morî inkupîꞌpî wenai pra. Inkupîꞌpî wenai morî pe ikuꞌsaꞌ Paapaya ya, aatapurîꞌpî eꞌpainon teuren tîîse mîrîrî wenai pra.
3 Tîîse Paapa maimu eꞌmenukasaꞌya taasaꞌ:Abraãoya innape Paapa kupîꞌpî. Mîrîrî innape tîkuꞌtoiꞌya wenai morî pe eraꞌmaꞌpî Paapaya.
taasaiꞌya man.
4 Aꞌkî, anîꞌ esenyakaꞌmaꞌpî ya, tepeꞌpî yapisîiya eꞌpai awanî. Mîrîrî itepeꞌpî wanî ese yeꞌka pe rî, epeꞌmîra tîtîsen warantî pra, eesenyakaꞌmaꞌpî yepeꞌpî pe awanî.
5 Îꞌ kupî pîꞌ teesekaꞌnunkai pra tîîse, anîꞌya innape Paapa kupî ya, innape tîkuꞌtoiꞌya wenai Paapaya eraꞌma morî pe, imakuiꞌpî kuꞌsaiꞌya tanne teuren tîîse Paapaya morî pe mîîkîrî kupî.
6 Mîrîrî warantî ekaremekîꞌpî Davi nurîꞌtîya. Eeseurîmaꞌpî manniꞌkan yairî Paapa nîkupîꞌsan yekare pîꞌ. Imakuiꞌpî toꞌ nîkupîꞌpî wenai toꞌ tarumaꞌtîiya pra awanîꞌpî. See warantî taasaiꞌya man:
7 Taatausinpai manniꞌkanimakuiꞌpî toꞌ nîkupîꞌpîkuꞌsaꞌ Paapaya tîîwanmîra.Moropai tîronasaiꞌyaꞌnîkon pîꞌtoꞌ atausinpa.
8 Taatausinpai inkamoro wanî,maasa pra Paapaya toꞌ nîkupîꞌpî imakuiꞌpî wenai,toꞌ tarumaꞌtî pepîn.
taasaiꞌya man.
9 Sîrîrî atausinpantoꞌ pîꞌ Davi nurîꞌtî eseurîmatoꞌ wanî manniꞌkan Judeuyamîꞌ neken ton pe? Kaane, mîrîrî wanî manniꞌkan Judeuyamîꞌ pepîn ton pe nîrî. Maasa pra taꞌpî Paapa maimu eꞌmenukasaꞌya tauya neꞌtîkini:—Abraãoya Paapa kupîꞌpî innape moropai mîrîrî pîkînsaꞌ,morî pe Abraão kupîꞌpî Paapaya.
—taasaiꞌya man.
10 Îꞌ waniꞌ awanî yeꞌnen Abraão eraꞌmaꞌpî Paapaya yairî? Pena Abraãoya tîmere piꞌpî yaꞌtîsaꞌ yeꞌnen, kaꞌrî? Kaane, mîrîrî kuꞌsaiꞌya rawîrî aasîrî Paapaya taasaꞌ Abraão pîꞌ: —Morî pe awanî.
11 Moropai morî pe Paapaya Abraão kuꞌsaꞌ tîpo, tîmere piꞌpî pottî yaꞌtîꞌpî Abraãoya. Mîrîrî inkupîꞌpî wanîꞌpî ekaremeꞌnen pe. Îꞌ kaiꞌma innape ikupîiya wenai, yairî Paapaya ikupîꞌpî ekaremeꞌnen pe, maasa tîmere piꞌpî pottî yaꞌtîsaiꞌya pra tîîse. Mîrîrî warantî Abraão wanî tamîꞌnawîronkon manniꞌkan innape Paapa kuꞌnenan yunkon pe, teuren tîmerekon piꞌpî yaꞌtîtîponkon pepîn. Inkamoro kuꞌsaꞌ Paapaya morî pe innape tîkuꞌtoꞌ toꞌya wenai, Abraão kuꞌsaꞌ tîuya warantî.
12 Moropai awanî manniꞌkan tîmerekon piꞌpî pottî yaꞌtîtîponkon yunkon pe nîrî. Tîîse mîrîrî yaꞌtîsaꞌ toꞌya wenai neken pra, tîîse îꞌ kaiꞌma Abraão yeseru kupî toꞌya wenai toꞌ yunkon pe awanî, innape Paapa kuꞌtoꞌ toꞌya wenai. Pena tîmere piꞌpî pottî yaꞌtî Abraãoya rawîrî innape Paapa kupîꞌpî warantî toꞌ wanî.
Îꞌ Kupî Tîuya Taꞌpî Tîuya Kupî Paapaya
Abraão Nurîꞌtî Yarakkîrî
13 Paapaya taꞌpî Abraão nurîꞌtî pîꞌ pena: —Sîrîrî pata tîrîuya pe wai apata pe moropai apayanyamîꞌ rîꞌsan pata pe nîrî. Mîrîrî taꞌpî Paapaya Abraão pîꞌ Moisés nurîꞌtîya yenupantoꞌ yawîrî awanî wenai pra. Tîîse morî ikuꞌsaꞌ tîuya wenai Paapaya taꞌpî, innape tîmaimu kupîiya yeꞌnen.
14 Tîîse Moisés nurîꞌtîya yenupantoꞌ yawîrî tîweꞌsanon pia neken, —Sîrîrî pata esaꞌ pe awanî pe man —taasaiꞌya pra man. Maasa pra mîrîrî warantî taasaiꞌya ya, innape ikuꞌtoꞌ toꞌya wanî eꞌpainon îꞌ pe pra rî. Moropai îꞌ taatoꞌ Paapaya wanî eꞌpainon îꞌ pe pra.
15 Maasa pra anîꞌya yapisî pepîn Paapa winîpai, mîrîrî Moisés nurîꞌtîya yenupantoꞌ yawîrî pra awanî yeꞌnen. Tîîse uurîꞌnîkon tarumaꞌtî Paapaya pe man. Tîîse mîrîrî Moisés nurîꞌtîya yenupantoꞌ ton pra awanî ya, anîꞌya epuꞌtî pepîn eꞌpainon îꞌ kaiꞌma imakuiꞌpî pe tîwanî. Tîîse moro man. Utarumaꞌtîkon Paapaya pe man.
16 Tîîse innape ikupî wenairî neken Paapaya itîrî uupiaꞌnîkon. Mîrîrî pîkînsaꞌ eesepuꞌtî îꞌ kaiꞌma kaiꞌma epeꞌmîra Paapaya itîrî uupiaꞌnîkon. —Itîrîuya —taꞌpî Paapaya tamîꞌnawîronkon Abraão payannîꞌsan pia. Mîrîrî kupîiya pepîn manniꞌkan neken Judeuyamîꞌ Moisésya yenupantoꞌ esanon pia, tîîse manniꞌkan innape Paapa ikuꞌnenan Abraãoya innape ikupîꞌpî warantî tîweꞌsanon pia nîrî itîrîꞌpîiya. Maasa pra Abraão wanî tamîꞌnawîronkon uurîꞌnîkon innape ikuꞌnenan yunkon pe.
17 Maasa pra Paapa maimu eꞌmenukasaꞌya taasaꞌ:—Abraão, akupîuya pe wai tuꞌkankon pemonkonyamîꞌ tamokon pe
—taꞌpîiya. Abraão nurîꞌtî wanî uyunkon pe, mîrîrî warantî îꞌ taꞌpî tîuya yawîrî ikupîꞌpî Paapaya, manniꞌ Paapa, innape Abraão nîkupîꞌpî, manniꞌ Paapa isaꞌmantaꞌsan pîmîꞌsaꞌkanen, moropai manniꞌ îꞌ teeseraꞌmasen pepîn eseraꞌma emapuꞌtînen.
18 Abraãoya innape ikupî tîuya wenai îꞌ kupîiya nîmîkîꞌpî. Teuren îꞌ pensa ikupîiya epuꞌtî yeꞌka pe pra tîîse inîmîkîꞌpîiya. Mîrîrî wenai tuꞌkankon pemonkonyamîꞌ tamokon pe eenaꞌpî. Îꞌ kaiꞌma Paapa maimu eꞌmenukasaꞌya taꞌpî see warantî:—Apayanyamîꞌ wanî pe man tuꞌke
—taꞌpîiya.
19 Mîrîrî yai Abraão kono po wanîꞌpî eseuwarapo konoꞌ 100 kaisarî. Tîîse mîrîrî warantî siꞌma eesenumenkatoꞌ eꞌpîtîꞌpî îꞌ kaiꞌma aꞌyekeꞌton pe teenasaꞌ pîꞌ, moropai îꞌ kaiꞌma eesenumenkaꞌpî tînoꞌpî Sara pîꞌ, tînre ton yenpoiya pra awanî yeꞌnen. Tîîse innape ikuꞌtoiꞌya wanîꞌpî tîwîrîrî, iiwanmîra eena pra.
20 Mîrîrî yeꞌnen Abraãoya innape ikuꞌtoꞌ tîuya kupî pra awanîꞌpî tîîwanmîra. Moropai —Innape naka Paapaya ikupî pe nai —taiya pra awanîꞌpî. Tîîse innape ikuꞌtoiꞌya wanîꞌpî inîꞌ panpîꞌ meruntî ke. Moropai mîîkîrîya Paapa yapurîꞌpî. —Morî pe Paapa man —taapîtîꞌpîiya.
21 Maasa pra meruntî ke Paapa wanî epuꞌtîꞌpîiya. Moropai tamîꞌnawîrî îꞌ kupî taꞌpî tîuya yawîrî ikupî Paapaya epuꞌtîꞌpîiya. Mîrîrî yeꞌnen inîmîkîꞌpîiya.
22 Mîrîrî yeꞌnen innape ikupî Abraãoya wenai —Morî pe mîîkîrî kupîꞌpî Paapaya —taatoꞌ eꞌmenukasaꞌ man.
23 Mîîkîrî ton pe neken aweꞌmenukasaꞌ pra awanîꞌpî tîîse uurîꞌnîkon ton pe nîrî aweꞌmenukasaꞌ wanîꞌpî.
24 Maasa pra innape Paapa kupîꞌnîkon wenai, manniꞌ Paapa Uyepotorîkon Jesus Cristo pîmîꞌsaꞌkaꞌtîpon kupî innape. Uurîꞌnîkon kupîiya yairî, innape Cristo kupî wenai.
25 Maasa pra Jesus rumakaꞌpî Paapaya aasaꞌmantatoꞌpe umakuyikon unkupîꞌpîkon wenai. Moropai mîîkîrî pîmîꞌsaꞌkaꞌpî Paapaya. Mîrîrî pîkînsaꞌ yairî uurîꞌnîkon kupî Paapaya.
