Sîrîrî Kaareta Paulo Nîmenukaꞌpî Roma Ponkon Pia 5:1-21
5 Tarîpai Paapaya uurîꞌnîkon kuꞌsaꞌ yairî innape tîkuꞌtoꞌ uurîꞌnîkon wenai. Teuren pena upîꞌnîkon eekoreꞌmasaꞌ wanîꞌpî tîîse Uyepotorîkon Jesus Cristo wenai, teekoreꞌmai pra eenaꞌpî moropai aminke pra tarakkîrî eꞌnîtoꞌpe ukupîꞌpîiyaꞌnîkon.
2 Moropai tarakkîrî koꞌmannî emapuꞌtîꞌpîiya innape ikupîꞌnîkon wenai. Mîrîrî ya morî yapisî pîꞌ koꞌmannî iwinîpai. Mîrîrî yeꞌnen atausinpansaꞌ sîrîrî, tîwarantî eꞌnîtoꞌpe uurîꞌnîkon kupî Paapaya yeꞌnen. Mîrîrî pîꞌ taꞌnîkon: —Morî pe man, Paapa.
3 Moropai mîrîrî pîꞌ neken pra tîîse atausinpan nîrî tarî eꞌtarumaꞌtîntoꞌ pîꞌ. Maasa pra epuꞌtîꞌnîkon man eꞌtarumaꞌtîntoꞌ wanî yapîtanîpî emapuꞌtînen pe.
4 Mîrîrî yapîtanîꞌsaꞌ yeꞌnen, inîꞌ panpîꞌ morî pe eꞌnî, Paapa wakîri pe. Mîrîrî pîkînsaꞌ inîꞌ panpîꞌ inîmîkî pîꞌ eꞌnîtoꞌkon tîrîiya.
5 Mîrîrî warantî inîmîkîꞌnîkon tanne, Paapaya uurîꞌnîkon yenkuꞌtî pepîn tiwin kin. Maasa pra Paapaya uurîꞌnîkon saꞌnamaꞌpî kureꞌne. Morî Yekaton Wannî tîrîꞌpîiya uyewankon yaꞌ aakoꞌmantoꞌpe. Mîîkîrî koꞌmamî wenai, epuꞌtî îꞌ kaiꞌma Paapaya usaꞌnamakon kureꞌne.
6 Maasa pra pena uyentaiꞌnîkon imakuiꞌpî wanî tanne, Cristo saꞌmantaꞌpî uurîꞌnîkon ton pe. Manniꞌ yai Paapa nîmenkaꞌpî yai, aasaꞌmantaꞌpî imakuiꞌsan, Paapa namanenan pepîn ton pe.
7 Aꞌkî, saꞌme puꞌkuru awanî, manniꞌ yairon kuꞌnen pataꞌseꞌ anîꞌ eturumaka tîîsaꞌmantapa. Yai pra moro naka nai tiaron pemonkon pataꞌseꞌ yaꞌ anîꞌ eturumaka tîîsaꞌmantatoꞌpe morî pe awanî wenai.
8 Tîîse îꞌ kaiꞌma Paapaya usaꞌnamatoꞌkon tîuya ekaremekî sîrîrî. Imakuiꞌsan pe uurîꞌnîkon wanî tîîse, Cristo saꞌmantaꞌpî uurîꞌnîkon pîikaꞌtîpa.
9 Pakîꞌnan po Cristo saꞌmantaꞌpî yai, tîmînî kamoꞌpîiya. Mîrîrî wenai uurîꞌnîkon nîkupîꞌpî yeꞌmasaiꞌya. Mîrîrî yeꞌnen morî pe ukuꞌsaiꞌyaꞌnîkon Paapa yarakkîrî. Kureꞌne upîikaꞌtîiyaꞌnîkon. Moropai epuꞌtîꞌnîkon inîꞌrî Paapa ekoreꞌma pepîn upîꞌnîkon, utarumaꞌtîiyaꞌnîkon pepîn, Cristo nîkupîꞌpî wenai.
10 Teuren pena aminke eꞌnîꞌpî Paapa pîꞌ teeyaton pe eꞌnî yeꞌnen. Tîîse tîîpia eꞌnîtoꞌpe uurîꞌnîkon manaꞌpokaꞌpîiya tînmu saꞌmantaꞌpî wenai. Tarîpai uurîꞌnîkon wanî Paapa piawon pe puꞌkuru. Mîrîrî warantî upîikaꞌtîꞌpîiyaꞌnîkon tînmu saꞌmantatoꞌ wenai, moropai tîwîrî upîikaꞌtîiyaꞌnîkon tîîpia erepannî pîkîrî. Maasa pra enen tînmu koꞌmamî yeꞌnen.
11 Mîrîrî pîꞌ neken pra atausinpan tîîse Paapa pemonkono pe eꞌnî pîꞌ nîrî atausinpan, Uyepotorîkon Jesus Cristo nîkupîꞌpî wenai. Maasa pra mîîkîrîya uurîꞌnîkon kupîꞌpî Paapa wanîyakon pe, iipiawon pe puꞌkuru eꞌnîtoꞌpe.
Adão Yekare Moropai Cristo Yekare
12 Pena eꞌmaiꞌnon warayoꞌ Adão saꞌmantaꞌpî imakuiꞌpî tînkupîꞌpî wenai. Mîrîrî pata pai imakuiꞌpî kuꞌnenan pemonkonyamîꞌ saꞌmanta tînkupîꞌpîkon wenai. Mîrîrî pîkînsaꞌ tîîsaꞌmantasen pe tamîꞌnawîronkon pemonkonyamîꞌ wanî.
13 Pena maasa Moisés pia tîmaimu rumaka Paapaya pra tîîse, imakuiꞌpî kupî pîꞌ pemonkonyamîꞌ koꞌmamîꞌpî sîrîrî pata po. Tîîse Paapaya taasaꞌ pra man toꞌ pîꞌ: —Moisés pia untîrîꞌpî umaimu yawîrî aweꞌsaꞌkon pra naatîi —taasaiꞌya pra man, maasa itîîsaꞌ tîuya pra tîwanî yeꞌnen.
14 Mîîwîni tîîse tamîꞌnawîronkon pemonkonyamîꞌ wanîꞌpî tîîsaꞌmantasen pe sîrîrî, Adão nurîꞌtî wanîꞌpî pata pai Moisés nurîꞌtî wanîꞌpî pîkîrî, maasa pra imakuiꞌpî kupîꞌpî toꞌya. Paapa maimu yawîrî pra Adão wanîꞌpî warantî pra inkamoro wanîꞌpî tîîse imakuiꞌpî kupîꞌpî toꞌya. Mîîkîrî Adão nurîꞌtî wanîꞌpî manniꞌ aaipî kupî manniꞌ ekaremeꞌnen pe.
15 Tîîse manniꞌ epeꞌmîra Paapa nîtîrî uupiaꞌnîkon, mîrîrî wanî pepîn manniꞌ Adão nurîꞌtî nîkupîꞌpî warantî. Maasa pra epuꞌtîꞌnîkon Adão nîkupîꞌpî wenai tuꞌkankon pemonkonyamîꞌ wanîꞌpî tîîsaꞌmantasanon pe, Adão nurîꞌtî saꞌmantasaꞌ warantî tîweꞌsanon pe. Tîîse inîꞌ panpîꞌ epuꞌtîꞌnîkon morî pe Paapa eꞌtoꞌ wanî mîrîrî warantî pra. Maasa pra tiwinan nîkupîꞌpî wenai, tuꞌkankon pemonkonyamîꞌ pîikaꞌtîꞌpî Paapaya. Morî panpîꞌ itîrîiya epeꞌmîra, tiwinan warayoꞌ wenai. Mîîkîrî wanî Jesus Cristo pe.
16 Moropai awanî tiaron pe Paapa nîtîrî uupiaꞌnîkon, mîîkîrî tiwinan warayoꞌ, Adão nîkupîꞌpî imakuiꞌpî warantî pra. Mîrîrî imakuiꞌpî pîkînsaꞌ Paapaya uyenuntoꞌkon wanîꞌpî. Mîîwîni tîîse Jesus nîkupîꞌpî wenai Paapaya taꞌpî uurîꞌnîkon pîꞌ —Morî pe awanîkon —taꞌpîiya teuren kureꞌne imakuiꞌpî kupî tîpo.
17 Inna seruꞌ pepîn mîîkîrî tiwinan warayoꞌ nîkupîꞌpî imakuiꞌpî wenai tamîꞌnawîronkon pemonkonyamîꞌ enaꞌpî tîsaꞌmantasanon pe. Tîîse itentai innape awanî tiaron warayoꞌ manniꞌ Jesus Cristo nîkupîꞌpî wenai ipatîkarî pemonkonyamîꞌ koꞌmamî enen iipia. Tamîꞌnawîronkon mannankan morî pe Paapa nîkupîꞌsanya îꞌ kaiꞌma tîîkoꞌmantoꞌkon eporî Jesus Cristo wenai amenan pe tîîkoꞌmantoꞌkon yarakkîrî, mîrîrî epeꞌmîra intîrî tenapisîkon wenai.
18 Mîrîrî yeꞌnen mîîkîrî tiwinan nîkupîꞌpî imakuiꞌpîya tamîꞌnawîronkon pemonkonyamîꞌ saꞌmanta emapuꞌtîꞌpî. Tîîse tiwinan nîkupîꞌpî yairon wenai toꞌ eꞌpîikaꞌtîtoꞌkon ton tîrîꞌpîiya inîꞌrî toꞌ saꞌmanta namai. Moropai toꞌ koꞌmantoꞌ ton tîrîꞌpîiya toꞌ pia.
19 Aꞌkî, tiwinan warayoꞌ Paapa maimu yawîron pepîn nîkupîꞌpî wenai, tamîꞌnawîronkon enaꞌpî imakuiꞌsan pe. Mîrîrî warantî nîrî tiwinan warayoꞌ Paapa maimu yawîrî tîweꞌsen nîkupîꞌpî wenai uurîꞌnîkon kupî Paapaya morî pe.
20 Moisésya yenupantoꞌ wanî inîꞌ panpîꞌ imakuiꞌpî pe eꞌnî epuꞌtî emapuꞌtînen pe, yawîrî eꞌnîsaꞌ yeꞌnen. Tîîse îꞌ pensa imakuiꞌpî pe eꞌnî epuꞌtî emapuꞌtîsaiꞌya ya, îꞌ kaiꞌma umakuyikon yentai Paapa wanî epuꞌtî emapuꞌtîiya, epeꞌmîra upîikaꞌtîiyaꞌnîkon wenai.
21 Mîrîrî warantî isaꞌmantaꞌsan pe uurîꞌnîkon wanî unkupîꞌpîkon imakuiꞌpî wenai. Mîrîrî warantî nîrî Paapaya morî pe ukuꞌsaꞌkon wenai uurîꞌnîkon wanî ipatîkarî enen tîîkoꞌmansenon pe Uyepotorîkon Jesus Cristo nîkupîꞌpî wenai.
