Sîrîrî Kaareta Paulo Nîmenukaꞌpî Roma Ponkon Pia 6:1-23
6 Mîrîrî yeꞌnen oꞌnon yeꞌka pe esenumenkan pîꞌ naatî? Îꞌ kupîꞌnîkon eꞌpai nai? Imakuiꞌpî kupî pîꞌ kaꞌrî koꞌmannî, inîꞌ panpîꞌ morî pe Paapa eꞌtoꞌ enatoꞌpe itentai?
2 Kaane, mîrîrî kuꞌpai pra man. Maasa pra uurîꞌnîkon wanî isaꞌmantaꞌpî warantî, imakuiꞌpî kuꞌnen pe pra. Mîrîrî warantî eꞌnîpaiꞌnîkon man imakuiꞌpî kupî namai.
3 Îꞌ kaiꞌma innape awanî epuꞌnen amîrîꞌnîkon, îꞌ pensa uurîꞌnîkon esenpatakona yai tiwin enanîꞌpî Cristo yarakkîrî. Mîrîrî yeꞌnen esenpatakonantoꞌya ekaremekî îꞌ kaiꞌma Cristo saꞌmantasaꞌ warantî uurîꞌnîkon saꞌmantaꞌpî nîrî yarakkîrî.
4 Mîrîrî warantî Cristo esuꞌnaꞌtîꞌpî warantî uurîꞌnîkon esuꞌnaꞌtîꞌpî nîrî yarakkîrî. Moropai Cristo pîmîꞌsaꞌkaꞌpî Paapaya isaꞌmantaꞌsan koreꞌtapai tîmeruntîri ke. Mîrîrî warantî nîrî uurîꞌnîkon eꞌmîꞌsaꞌkaꞌpî, uurîꞌnîkon koꞌmantoꞌpe amenan pe uyeserukon eꞌtoꞌpe.
5 Inna, seruꞌ pepîn uurîꞌnîkon saꞌmantaꞌpî Cristo yarakkîrî, îꞌ kaiꞌma Cristo saꞌmantaꞌpî manniꞌ warantî. Moropai tîîsaꞌmanta tîpo, Cristo eꞌmîꞌsaꞌkaꞌpî warantî uurîꞌnîkon nîrî eꞌmîꞌsaꞌkaꞌpî yarakkîrî.
6 Mîrîrî yeꞌnen inîꞌrî manniꞌ uyeserukon rîꞌpî penaroꞌ uyewankon yaꞌ tîweꞌsen yawîrî pra uurîꞌnîkon enasaꞌ. Pakîꞌnan po Cristo saꞌmantaꞌpî warantî saꞌmantansaꞌ yeꞌnen, inîꞌrî imakuiꞌpî ankuꞌpai pra enansaꞌ. Mîrîrî warantî aataretîꞌkaꞌpî. Mîrîrî yeꞌnen uyentaiꞌnîkon imakuiꞌpî ena pepîn tiwin kin.
7 Maasa pra anîꞌ saꞌmantasaꞌ ya Cristo yarakkîrî, mîîkîrî wanî imakuiꞌpî yentai. Itesaꞌ pe imakuiꞌpî wanî pepîn, yawîrî aakoꞌmamî namai.
8 Isaꞌmantaꞌsan pe eꞌnî yeꞌnen Cristo yarakkîrî, yarakkîrî nîrî koꞌmannî. Innape awanî.
9 Moropai epuꞌtîꞌnîkon man Cristo eꞌmîꞌsaꞌkaꞌpî saꞌmantantoꞌ winîpai. Mîrîrî yeꞌnen inîꞌrî aasaꞌmanta pepîn, saꞌmantantoꞌ yentai eenasaꞌ yeꞌnen.
10 Tîîsaꞌmanta yai, aasaꞌmantaꞌpî tiwin iteꞌka imakuiꞌpî unkupîꞌpîkon yaretîꞌkapa kaiꞌma tamîꞌnawîrî. Moropai aakoꞌmamî tarîpai ipatîkarî Paapa wakîri pe puꞌkuru.
11 Mîrîrî warantî nîrî amîrîꞌnîkon eꞌkupî isaꞌmantaꞌpî warantî awanîkonpa imakuiꞌpî kupîyaꞌnîkon namai, tîîse Paapa wakîri pe awanîkonpa, maasa pra Jesus Cristo yarakkîrî aakoꞌmamîkon yeꞌnen.
12 Mîrîrî yeꞌnen ayentaiꞌnîkon imakuiꞌpî ena kîꞌtîîtî. Ayeserukon rîꞌpî penaroꞌ yawîrî ikupîyaꞌnîkon kaiꞌma keꞌtî.
13 Mîrîrî warantî imakuiꞌpî pataꞌseꞌ ton tîrîyaꞌnîkon eꞌpai pra man, tîîse eturumakatî neken Paapa pia, ituꞌse tîweꞌtoꞌ kuꞌtoꞌpeiya amîrîꞌnîkon yarakkîrî, ipemonkono pe awanîkon yeꞌnen. Maasa pra amîrîꞌnîkon wanîꞌpî pena isaꞌmantaꞌsan pe, tarîpai amîrîꞌnîkon kupîꞌpîiya enen tîîkoꞌmansenon pe. Mîrîrî yeꞌnen iipia eturumakatî tamîꞌnawîrî morî kuꞌnenan pe awanîkonpa.
14 Tarîpai inîꞌrî ayesaꞌkon pe imakuiꞌpî koꞌmamî pepîn, ayentaiꞌnîkon eena pepîn. Maasa pra amîrîꞌnîkon koꞌmamî pepîn Moisésya yenupantoꞌ rîꞌpî kupî pîꞌ, tîîse aakoꞌmamîkon tarîpai morî pe Paapa eꞌtoꞌ yaꞌ.
Paapa Poitîrî Pe Eꞌnî
15 Tauya apîꞌnîkon. Moisésya yenupantoꞌ yawîrî pra enansaꞌ yeꞌnen, imakuiꞌpî kupîꞌnîkon eꞌpainon morî pe Paapa eꞌtoꞌ yaꞌ enansaꞌ yeꞌnen? Kaane, tiwin kin ikupî eserîke pra man.
16 Maasa pra epuꞌnenan amîrîꞌnîkon morî pe. Anîꞌ eturumakasaꞌ ya, tesaꞌkon yenyaꞌ, mîîkîrî koꞌmamî ipoitîrî pe. Tîwîrî itesaꞌya ituꞌse tîweꞌtoꞌ yawîrî ikuꞌtoꞌpeiya yaipontî koꞌmannîpî. Mîrîrî warantî amîrîꞌnîkonya imenka eꞌpai awanî tarîpai. Imakuiꞌpî kupî pîꞌ aakoꞌmamîkon ya, inyakanoꞌpî wanî saꞌmantantoꞌpe. Mîîwîni pra Paapa maimu yawîrî aakoꞌmamîkon ya, amîrîꞌnîkon kupîiya yairon pe puꞌkuru aakoꞌmamîkonpa.
17 Tîîse taa annaya, morî pe puꞌkuru Paapa man. Maasa pra amîrîꞌnîkon wanîꞌpî pena imakuiꞌpî maimu yawîrî tîweꞌsanon pe. Tarîpai amîrîꞌnîkon wanî Paapa maimu yawîrî tîweꞌsanon pe tamîꞌnawîrî ayewankon ke. Maasa pra eesenupaꞌpîkon ipîꞌ mîrîrî yapisîꞌpîyaꞌnîkon.
18 Amîrîꞌnîkon pîikaꞌtîꞌpîiya imakuiꞌpî winîpai amoꞌkakonpa. Moropai amîrîꞌnîkon enaꞌpî Paapa poitîrî pe. Manniꞌ yairon ituꞌse Paapa eꞌtoꞌ kuꞌnen pe eenaꞌpîkon.
19 Eseurîma sîrîrî mîrîrî toꞌ poitîrî pîꞌ, maasa pra mararî neken epuꞌnen pe awanîkon yeꞌnen. Aꞌkî, pena amîrîꞌnîkon wanî imakuiꞌpî poitîrî pe. Eeturumakasaꞌkon wanîꞌpî tamîꞌnawîrî imakuiꞌpî siꞌta kupî pîꞌ aakoꞌmamîkonpa. Tarîpai tauya, eturumakatî Paapa poitîrî pe, aakoꞌmantoꞌkon eꞌtoꞌpe morî pe, Paapa yarakkîrî, imakuiꞌpî ton pra.
20 Pena imakuiꞌpî kupî pîꞌ awanîkon yai, tiwin kin îꞌ pensa ituꞌse Paapa eꞌtoꞌ yawîrî ikuꞌsaꞌyaꞌnîkon pra naatîi.
21 Pena mîrîrî kupî pîꞌ aakoꞌmamîkon yai, îꞌ morî yapisîꞌpîyaꞌnîkon? Yapisîyaꞌnîkon pra naatîi, tîîse eesewankonoꞌmantoꞌkon neken awanîꞌpî tîweppeꞌse. Maasa pra mîrîrî kuꞌsaꞌ miakannoꞌpî wanî mîrîrî saꞌmantantoꞌpe.
22 Tîîse mîrîrî winîpai amîrîꞌnîkon epaꞌkaꞌpî imakuiꞌpî yapai. Tarîpai amîrîꞌnîkon wanî Paapa pemonkono pe puꞌkuru. Mîrîrî yeꞌnen morî eporîyaꞌnîkon. Maasa pra aakoꞌmantoꞌkon yeseru wanî Paapa ton pe îꞌ ankuꞌpai eesepuꞌtîkon. Moropai mîrîrî miakannoꞌpî wanî epuꞌtîyaꞌnîkon ipatîkarî koꞌmannîtoꞌpe.
23 Maasa pra imakuiꞌpî kupî pîꞌ koꞌmannîtoꞌ miakannoꞌpî wanî mîrîrî saꞌmantantoꞌpe. Tîîse uupiaꞌnîkon Paapa nîtîrî epeꞌmîra, manniꞌ Uyepotorîkon Jesus Cristo yarakkîrî koꞌmannî wenai, mîrîrî miakannoꞌpî wanî mîrîrî ipatîkarî enen koꞌmannîtoꞌpe.
