Sîrîrî Kaareta Paulo Nîmenukaꞌpî Roma Ponkon Pia 7:1-25
7 Tarîpai, îꞌ kaiꞌma tauya sîrîrî? Amîrîꞌnîkon wanî penaronkon atamokon yenupantoꞌ epuꞌnenan pe. Mîrîrî yawîrî eꞌnîpai awanî enen koꞌmannî pîkîrî.
2 See warantî awanî. Wîriꞌ tinyomaꞌpî koꞌmamî eꞌpai awanî tînyo yarakkîrî neken, mîrîrî ayeserukon yawîrî. Îꞌ pensa enen tinyo koꞌmamî pîkîrî yawîrî awanî eꞌpai awanî. Tîîse tînyo saꞌmantaꞌpî tîpo, eeturumaka tiwinsarî inîꞌrî yarakkîrî awanî pepîn.
3 Tîîse mîrîrî warantî pra tinyo saꞌmantasaꞌ pra tîîse, wîriꞌ wanî ya tiaron warayoꞌ yarakkîrî, imakuiꞌpî kupî mîîkîrîya mîrîrî. Tîîse tînyo saꞌmantaꞌpî tîpo, tiaron warayoꞌ yarakkîrî eetinyoma ya, mîrîrî wanî pepîn imakuiꞌpî pe, maasa pra inyo saꞌmantaꞌpî yeꞌnen.
4 Mîrîrî warantî awanî amîrîꞌnîkon yarakkîrî, uyonpayamîꞌ. Maasa pra pena Moisés nurîꞌtîya yenupantoꞌ awanîꞌpîkon. Tîîse Cristoya akuꞌsaꞌkon mîrîrî yentai maasa pra pena Cristo saꞌmantaꞌpî yai, amîrîꞌnîkon saꞌmantaꞌpî nîrî yarakkîrî kaiꞌma. Tarîpai amîrîꞌnîkon wanî Cristo pemonkono pe. Mîrîrî yeꞌnen amîrîꞌnîkon wanî imîrî pe, Cristo manniꞌ Paapa nîmîꞌsaꞌkaꞌpî, mîîkîrî yarakkîrî aakoꞌmantoꞌpe. Moropai aakoꞌmamîkon morî pe ayeserukon Paapa ton pe.
5 Maasa pra pena koꞌmannîꞌpî imakuiꞌpî ituꞌse eꞌnîtoꞌ yawîrî ikupî pîꞌ, Moisés nurîꞌtîya yenupantoꞌ epuꞌtîiꞌma pra. Tîîse mîrîrî epuꞌsaꞌ yai, inîꞌ panpîꞌ imakuiꞌpî ankuꞌpai eꞌnîtoꞌ epuꞌtîꞌpî. Moropai mîrîrî kupîꞌpî wenai epuꞌtîꞌpî mîrîrî miakannoꞌpîiya saꞌmantantoꞌpe.
6 Tîîse tarîpai uurîꞌnîkon wanî imoꞌkasaꞌ pe mîrîrî Moisés nurîꞌtîya yenupantoꞌ winîpai, maasa pra isaꞌmantaꞌsan pe eꞌnîꞌpî, mîrîrîya uurîꞌnîkon yaipontî pepîn inîꞌrî. Tîîse mîrîrî winîpai emoꞌkannîꞌpî, Paapa wakîri pe eꞌnîtoꞌpe. Pena Moisés nurîꞌtîya yenupantoꞌ yawîrî pra tîîse, Morî Yekaton Wannîya upîikaꞌtîkon amenan pe koꞌmantoꞌpe Paapa wakîri pe.
Moisés Nurîꞌtîya Yenupantoꞌya
Imakuiꞌpî Pe Eꞌnîtoꞌ Yenpo
7 Moriya îꞌ kaiꞌma eesenumenkakon Moisés nurîꞌtîya yenupantoꞌ pîꞌ. Mîrîrî wanî kupîyaꞌnîkon imakuiꞌpî pe? Kaane, mîrîrî wanî pepîn imakuiꞌpî pe. Maasa pra mîrîrî Moisés nurîꞌtîya yenupantoꞌ wenai, imakuiꞌpî pe uurî eꞌtoꞌ epuꞌtîꞌpîuya. Sîrîrî mîrîrî ton pra aweꞌsaꞌ ya, îꞌ kaiꞌma imakuiꞌpî pe eꞌtoꞌ epuꞌtîꞌpîuya eꞌpainon? Mîrîrî wenai epuꞌtîꞌpîuya maasa pra taꞌpîiya:—Tiaronkon ayonpa yemanne yuꞌse pra eꞌkî
—taꞌpîiya upîꞌ.
8 Tîîse mîrîrî etasauꞌya pe, epuꞌtîꞌpîuya imakuiꞌpî pe awanî, tiaron yemanne yuꞌse wanî yeꞌnen. Mîrîrî warantî Moisés nurîꞌtîya yenupantoꞌya uyenumenkaꞌpî. Tîîse mîrîrî Moisés nurîꞌtîya yenupantoꞌ ton pra aweꞌsaꞌ ya, îꞌ kaiꞌma imakuiꞌpî pe eꞌtoꞌ epuꞌtîꞌpîuya pepîn eꞌpainon.
9 Pena uukoꞌmamîꞌpî Paapa wakîri pe kaiꞌma maasa Moisés nurîꞌtîya yenupantoꞌ etauya pra awanî yai. Tîîse etasauꞌya tîpo, epuꞌtîꞌpîuya îꞌ kaiꞌma imakuiꞌpî pe uurî wanî. Maasa pra mîrîrî yawîrî pra wanî yeꞌnen.
10 Moropai Paapa piapai aminke wanî epuꞌtîꞌpîuya. Teuren Moisés nurîꞌtîya yenupantoꞌ tîrîꞌpî Paapaya, yawîrî tîîkoꞌmansen koꞌmantoꞌpe Paapa pia ipatîkarî, upîikaꞌtîiya pra awanîꞌpî. Maasa pra mîrîrî yawîrî uukoꞌmamî eserîke pra awanî yeꞌnen. Mîrîrî wenai iipiapai uukoꞌmamî ipatîkarî epuꞌtîꞌpîuya.
11 Maasa pra imakuiꞌpîya uyenkuꞌtîꞌpî Moisés nurîꞌtîya yenupantoꞌ wenairî. Mîrîrî yawîrî wanî wenai ipatîkarî uukoꞌmamî kaiꞌma esenumenka tanne umoꞌkaꞌpîiya Paapa piapai, yawîrî pra wanî yeꞌnen.
12 Aꞌkî, Moisés nurîꞌtîya yenupantoꞌ wanî morî pe. Moropai yawîrî koꞌmankî taꞌpîiya wanî yairî morî pe koꞌmannîtoꞌpe yawîrî.
13 Mîrîrî taasaiꞌya tanne, mîrîrî morî pe tîweꞌsenya saꞌmantantoꞌ enepîꞌpî uupia? Kaane, tiwin kin mîrîrîya saꞌmantantoꞌ eneꞌsaꞌ pra man, tîîse imakuiꞌpî yuꞌse eꞌtoꞌya eneꞌsaꞌ. Paapa nîtîrîꞌpî unkupî ton kuꞌsauꞌya pra wanî wenai mararî pra imakuiꞌpî pe uyeraꞌma Paapaya epuꞌtîꞌpîuya.
Morî Kupî Yuꞌse Eꞌnî Tanne
Imakuiꞌpî Kupî pîꞌ Koꞌmannîtoꞌ
14 Epuꞌtîꞌnîkon man unkupîkon ton Moisés nurîꞌtîya yenupantoꞌ wanîꞌpî Morî Yekaton Wannî winîpai. Tîîse uurî wanî pemonkon pe. Moropai eturumaka imakuiꞌpî yuꞌse eꞌtoꞌ kuꞌtoꞌpeuya. Mîrîrî yeꞌnen uyentai imakuiꞌpî enasaꞌ, uyesaꞌ pe eenasaꞌ.
15 Mîrîrî yeꞌnen îꞌ kupîuya epuꞌtîuya pra awanî. Maasa pra îꞌ ituꞌse pra eꞌtoꞌ kupîuya uwakîri pe, ituꞌse eꞌtoꞌ kupîuya pra tîîse.
16 Ankuꞌpai eꞌtoꞌ pepîn kupîuya tauya ya, mîrîrî wenai eesepuꞌtî, innape Paapa nîtîrîꞌpî unkupîkon ton wanî yairî.
17 Maasa pra uyeseru yenpoiya yeꞌnen, uurîya mîrîrî kupî pepîn tîîse uyewan yaꞌ tîweꞌsen, imakuiꞌpîya ikupîuya emapuꞌtî.
18 Maasa pra epuꞌtî pîꞌ wai, morî ton pra awanî uyewan yaꞌ, tîîse uyewan yaꞌ wanî uyeseru penaroꞌ. Teuren morî ankuꞌpai esenumenka tanne, tîîse ikupîuya pepîn.
19 Ankuꞌpai pra eꞌtoꞌ, mîrîrî neken kupîuya. Mîrîrî yeꞌnen morî ankuꞌpai esenumenkatoꞌ kupîuya pra awanî tîîse, imakuiꞌpî ankuꞌpai pra esenumenkatoꞌ mîrîrî neken kupîuya. Mîrîrî warantî uyeseru wanî.
20 Tîîse ankuꞌpai pra eꞌtoꞌ kupîuya ya, uurîya ikupî pepîn mîrîrî. Tîîse imakuiꞌpî tîîkoꞌmansen uyewan yaꞌ wenai ikupîuya.
21 Mîrîrî warantî îꞌ esuwaꞌka epuꞌtî pîꞌ wai uyarakkîrî. Îꞌ pensa morî kupî pîꞌ esenumenka tanne, mîrîrî kupîuya pra imakuiꞌpî neken kupîuya.
22 Teuren îꞌ kaiꞌma unkupî ton pe Paapa eseurîmaꞌpî wanî uwakîri pe puꞌkuru.
23 Tîîse tiaron uyeseru eraꞌmauya, mîrîrî uyaꞌ tîîkoꞌmansen. Morî ankuꞌpai wanî tanne ikupîuya pra awanî emapuꞌtînen. Manniꞌ uyaꞌ tîweꞌsenya uyentai imakuiꞌpî ena emapuꞌtî.
24 Mîrîrî pîkînsaꞌ kureꞌne esewankonoꞌmasaꞌ wanî, imakuiꞌpî wanî yeꞌnen. Anîꞌya see umoꞌka eꞌpainon imakuiꞌpî kupî pîꞌ uukoꞌmantoꞌ winîpai, manniꞌ saꞌmantantoꞌ yaꞌ uyaanen winîpai?
25 Tîîse epuꞌtî pîꞌ wai, moro awanî tiwinan, Uyepotorîkon Jesus Cristo. Mîrîrî yeꞌnen tauya Paapa pîꞌ: —Morî pe man, maasa pra Jesus Cristo wenai upîikaꞌtîsaꞌya yeꞌnen —tauya.
Sîrîrî warantî uukoꞌmanpîtî. Esenumenkatoꞌ yaꞌ ituꞌse Paapa eꞌtoꞌ ankuꞌpai eꞌpîtî teuren, tîîse moro awanî uukoꞌmantoꞌ yaꞌ, ituꞌse Paapa eꞌtoꞌ pepîn uyentainon.
