Sîrîrî Kaareta Paulo Nîmenukaꞌpî Roma Ponkon Pia 8:1-39
8 Tarîpai inîꞌrî îꞌ ton pra man tiwin kin mannankan Jesus Cristo yarakkîrî tîweꞌsanon saꞌmantatoꞌ ton.
2 Maasa pra Morî Yekaton Wannî Paapa nîtîrîꞌpîya toꞌ moꞌkasaꞌ yeꞌnen saꞌmantantoꞌ yapai. Mîîkîrîya koꞌmannîtoꞌ ton tîrîꞌpî Jesus Cristo yarakkîrî koꞌmannîꞌnîkon wenai. Mîrîrî yeꞌnen uurîꞌnîkon moꞌkaꞌpîiya imakuiꞌpî yapai moropai saꞌmantantoꞌ yapai epuꞌtîꞌnîkon.
3 Mîrîrî Moisés nurîꞌtîya yenupantoꞌ nîmoꞌka eserîkan pepîn aꞌtuꞌmîra eꞌnî wenai. Mîrîrî uyeserukon imakuiꞌpî kupî pîꞌ koꞌmannî emapuꞌtînen moꞌkaꞌpî Paapaya. Imoꞌkaꞌpîiya see warantî. Tiwinan tînmu yarimaꞌpîiya sîrîrî non pona. Aaipîꞌpî pemonkon pe eesenpoꞌpî uurîꞌnîkon warantî. Mîrîrî imakuiꞌpî pe eꞌnîtoꞌ yaretîꞌkapa kaiꞌma aaipîꞌpî.
4 Paapaya mîrîrî kupîꞌpî Moisés yenupanîꞌpî yawîrî eꞌnîtoꞌpeꞌnîkon kaiꞌma. Tîîse yawîrî koꞌmansaꞌ pra awanî. Tîîse koꞌmannîꞌnîkon îꞌ kaiꞌma Morî Yekaton Wannî Paapa nîtîrîꞌpîya uyenupaꞌpîkon yawîrî. Inîꞌrî koꞌmannî pepîn uyeserukon ituꞌse eꞌnîtoꞌ yawîrî.
5 Maasa pra koꞌmannîꞌnîkon ya uyeserukon unkupîkon koꞌmannîpî pîꞌ esenumenkan pîꞌ. Esenumenkantoꞌ wanî mîrîrî pe rî. Tîîse esenumenkan ya îꞌ kaiꞌma Morî Yekaton Wannî nîkupî pîꞌ mîrîrî wanî ituꞌse aweꞌtoꞌ yawîrî.
6 Tîîse îꞌ kaiꞌma ituꞌse eꞌnîtoꞌ yawîrî esenumenkan pîꞌ koꞌmannîꞌnîkon ya, mîrîrî esenumenkaꞌnîꞌpî miakanmaiya saꞌmantantoꞌ ke. Tîîse îꞌ kaiꞌma Morî Yekaton Wannî esenumenka warantî esenumenkan ya, mîrîrî wanî koꞌmannîtoꞌpe moropai tîîwanmîra eꞌnîtoꞌpe.
7 Mîrîrî yeꞌnen ituꞌse tîweꞌtoꞌkon yawîrî teesenumenkasanon pemonkonyamîꞌya Paapa yapurî pra awanî mîrîrî. Tîîse Paapa yeyaton pe toꞌ koꞌmamî mîrîrî, maasa pra teserukon yawîrî toꞌ koꞌmamî yeꞌnen, Paapa maimu yawîrî ikupî toꞌya eserîke pra awanî yeꞌnen.
8 Mîrîrî yeꞌnen ituꞌse tîweꞌtoꞌkon yawîrî toꞌ koꞌmamî wenai Paapa wakîri pe toꞌ wanî pepîn tiwin kin.
9 Tîîse amîrîꞌnîkon koꞌmamî pepîn mîrîrî warantî ayeserukon rîꞌpî kupî pîꞌ. Tîîse aakoꞌmamîkon îꞌ kaiꞌma ituꞌse Morî Yekaton Wannî eꞌtoꞌ yawîrî, innape ayewankon yaꞌ Morî Yekaton Wannî Paapa nîtîrîꞌpî koꞌmamî yeꞌnen. Tîîse anîꞌ wanî ya, manniꞌ Morî Yekaton Wannî Cristo nîtîrîꞌpî ton pra itewan yaꞌ, ipemonkono pe awanî pepîn.
10 Tîîse ayewankon yaꞌ Morî Yekaton Wannî koꞌmamî yeꞌnen teuren tîîsaꞌmantasen pe awanîkon tanne, amakuyikon wenai, tîîse Morî Yekaton Wannî Paapa nîtîrîꞌpî wanî tîîkoꞌmansen pe. Maasa pra amîrîꞌnîkon kuꞌsaꞌ tîuya yeꞌnen yairî Paapa piawon pe.
11 Mîîkîrî Morî Yekaton Wannî Paapa winîpainon koꞌmamî ya ayewankon yaꞌ, Paapa, Jesus pîmîꞌsaꞌkaꞌtîpon saꞌmantantoꞌ winîpai, mîîkîrîya morî aakoꞌmantoꞌkon tîrî nîrî, manniꞌ ayewankon yaꞌ tîîkoꞌmansen wenai ikupîiya.
12 Mîrîrî yeꞌnen uyonpayamîꞌ, unkupîkon ton moro man, Paapa poitîrî pe eꞌnî yeꞌnen. Inîꞌrî pena ikupî pîꞌ koꞌmannîꞌpî yawîrî koꞌmannî eꞌpai pra man.
13 Îꞌ waniꞌ awanî yeꞌnen ayeserukon rîꞌpî kupî pîꞌ aakoꞌmamîkon ya, aasaꞌmantakon. Tîîse Morî Yekaton Wannî Paapa nîtîrîꞌpîya apîikaꞌtîkon ya, mîrîrî eesenumenkatoꞌkon ayeserukon winîpai amîrîꞌnîkon saꞌmanta pepîn tîîse enen aakoꞌmamîkon.
14 Maasa pra tamîꞌnawîronkon manniꞌkan Morî Yekaton Wannî Paapa nîtîrîꞌpî pia tîîkoꞌmantoꞌkon rumakatîponkon inkamoro wanî Paapa munkî pe puꞌkuru.
15 Maasa pra Morî Yekaton Wannî Paapa nîtîrîꞌpî amîrîꞌnîkon pia eranneꞌ pe inamakonpa pra tîîse Morî Yekaton Wannî tîrîꞌpîiya tînmuku pe akuꞌtoꞌpeiyaꞌnîkon. Moropai tînmuku pe akuꞌsaꞌkon Morî Yekaton Wannîya pata pai taayaꞌnîkon Paapa pîꞌ: —Paapa, uyun amîrî —taayaꞌnîkon ayunkon pe eenasaꞌ yeꞌnen.
16 Morî Yekaton Wannî Paapa nîtîrîꞌpî koꞌmamî uyewankon yaꞌ wenai, taꞌnîkon: —Uurî tarîpai Paapa munmu. Moropai Morî Yekaton Wannîya nîrî taa: —Amîrî wanî Paapa munmu pe —taiya.
17 Maasa pra uurîꞌnîkon wanî inmukuyamîꞌ pe. Mîrîrî yeꞌnen îꞌ pensa tîpemonkonoyamîꞌ pia morî tîrîiya yai, uurîꞌnîkonya nîrî yapisî. Moropai Cristo eꞌtarumaꞌtîꞌpî warantî tîweꞌtarumaꞌtîi koꞌmannîꞌsaꞌ ya, îꞌ pensa Cristo pia tîntîrî pe tînkonekaꞌpî tîrîiya yai, uurîꞌnîkon nîrî wanî iipia yapiꞌtoꞌpe. Mîrîrî wenai morî yapisîiya kaisarî uurîꞌnîkonya nîrî inapisî yonpa yapisî.
Îꞌ Kaiꞌma Tiwinanoꞌpî Wei Yai Eꞌnî Pe Nai
18 Esenumenka îꞌ kaiꞌma tarî eꞌtarumaꞌtîntoꞌ pîꞌ. Mîrîrî wanî mararî neken taataretîꞌkasen pe. Tîîse maasa panpîꞌ eraꞌmaꞌnîkon kupî sîrîrî kureꞌnan mîrîrî yentainon morî eseraꞌma kupî sîrîrî.
19 Maasa panpîꞌ tiwinanoꞌpî wei yai Paapaya tînmukuyamîꞌ pe eꞌnî yenpo kupî sîrîrî. Mîrîrî nîmîkî pîꞌ tamîꞌnawîronkon Paapa nîkupîꞌsan sîrîrî pata ponkon koꞌmamî sîrîrî. Moropai oꞌmaꞌkon tarî non po tîweꞌsanon tîîkoꞌmansenonya inîmîkî koꞌmannîpî sîrîrî.
20 Maasa pra sîrîrî pata po Paapa nîkupîꞌpî wanî morî pe pra. Teuren pena morî pe awanîꞌpî. Mîrîrî tîpo imakuiꞌpî pe eenaꞌpî. Tîîse mîrîrî warantî ituꞌse tîwanî yeꞌnen Paapaya ikupîꞌpî tîwîrîrî aweꞌkuꞌsaꞌ pra man mîrîrî warantî.
21 Tîîse Paapaya taꞌpî: —Tiwinanoꞌpî wei yai aataretîꞌka pe man. Inîꞌrî aakoꞌmamî pepîn mîrîrî warantî tîîse eetinyakaꞌma. Mîrîrî yai morî pe eena kupî sîrîrî morî pe Paapa munkîyamîꞌ eena kaisarî morî pe Paapaya ikupî.
22 Epuꞌtîꞌnîkon man sîrîrî tîpo see tamîꞌnawîron Paapa nîkupîꞌpî esekaꞌnunka koꞌmannîpî neꞌneꞌ pe tîweꞌtoꞌ pîꞌ, manniꞌ wîriꞌ esekaꞌnunka koꞌmannîpî tînre yenpo tîuya yai eesenpo pîkîrî aakoꞌmamî warantî.
23 Mîrîrî Paapa nîkupîꞌpî tamîꞌnawîronya neken tîmoron epuꞌtî pepîn tîîse uurîꞌnîkon nîrî manniꞌkan Paapa nîtîrîꞌpî Morî Yekaton Wannî yapisîtîponkonya nîrî tîmoronkon epuꞌtî koꞌmannîpî. Paapaya Morî Yekaton Wannî tîrîꞌpî uurîꞌnîkon pia eꞌmaiꞌ pe. Tîîse mîrîrî yai tamîꞌnawîrî morî pe uurîꞌnîkon kuꞌsaiꞌya pra man. Mîrîrî yeꞌnen tiwin wei ikupî tîuya ekaremeꞌnen pe neken, Paapaya itîrîꞌpî uyewankon yaꞌ. Mîrîrî yeꞌnen îꞌ pensa Paapaya ikupî nîmîkî pîꞌ koꞌmannî sîrîrî. Morî pe tînmukuyamîꞌ kupîiya weiyu yai Paapaya morî pe ukupîkon kupî sîrîrî.
24 Îꞌ waniꞌ awanî yeꞌnen kin iwaikkatoi pe uurîꞌnîkon eꞌpîikaꞌtîsaꞌ sîrîrî, inîmîkî pîꞌ koꞌmannî temapuꞌtîi. Tîîse aapiaꞌnîkon tamîꞌnawîrî aweꞌpîikaꞌtîsaꞌkon kaiꞌma eesenumenkakon mîrîrî? Kaane, maasa eꞌpîikaꞌtînsaꞌ pra man tamîꞌnawîrî mîrîrî yeꞌnen inîmîkî pîꞌ koꞌmannîꞌnîkon sîrîrî. Mîrîrî warantî tamîꞌnawîrî eꞌpîikaꞌtîsan pe eꞌnî ya, inîmîkî pîꞌ koꞌmannî pepîn eꞌpainon.
25 Mîrîrî yeꞌnen inîmîkî pîꞌ koꞌmannîꞌnîkon sîrîrî manniꞌ uurîꞌnîkon neraꞌmaꞌpî pepîn weiyu erepamî nîmîkî pîꞌ koꞌmannîꞌnîkon sîrîrî teesetaꞌkai pra.
26 Mîrîrî warantî Morî Yekaton Wannî Paapa nîtîrîꞌpîya uurîꞌnîkon pîikaꞌtî. Aꞌtuꞌmîra uurîꞌnîkon epuꞌtî tîuya wenai upîikaꞌtîiyaꞌnîkon. Îꞌ kaiꞌma Paapa yarakkîrî eseurîmanpai eꞌnî tanne eseurîman eserîke pra awanî tîîse mîîkîrî Morî Yekaton Wannî eseurîma Paapa yarakkîrî îꞌ ankapai eꞌnîtoꞌ epuꞌtîiya. Mîrîrî ekaremekîiya teesekaꞌnunkai uurîꞌnîkon ton pe. Esatîiya Paapa pîꞌ uurîꞌnîkon ton pe. Mîrîrî warantî uurîꞌnîkon pîikaꞌtîiya.
27 Moropai Paapa wanî pemonkonyamîꞌ yewan eraꞌmanen pe inepuꞌtî pe awanî. Moropai Morî Yekaton Wannî esenumenkatoꞌ epuꞌnen pe nîrî awanî. Mîrîrî yeꞌnen îꞌ kaiꞌma tîpemonkonoyamîꞌ ton pe îꞌ esatîiya epuꞌtîiya. Moropai mîrîrî inesatî wanî ituꞌse tîweꞌtoꞌ yawîrî epuꞌtî Paapaya.
28 Aꞌkî, epuꞌtîꞌnîkon man, tamîꞌnawîrî îꞌ teesuwaꞌkasen manniꞌkan Paapa yapurînenan yarakkîrî mîrîrî pîꞌ Paapa esenyakaꞌma morî pe manniꞌkan kupîpa. Mîrîrî kupîpa kaiꞌma uyarakkîrîꞌnîkon uurîꞌnîkon yannoꞌpîiya. Îꞌ kaiꞌma ituꞌse tîwanî yawîrî ikupîpa kaiꞌma.
29 Maasa pra pena pata pai tîmîrî pe Paapaya menkannîꞌpî moropai upantakaꞌpîiyaꞌnîkon tînmu warantî uurîꞌnîkon enatoꞌpe kaiꞌma mîrîrî kupîꞌpîiya. Moropai mîrîrî kuꞌsaꞌ tîuya tîpo tînmu wanî eꞌmaiꞌ pe uruinankon pe uurîꞌnîkon wanî itaꞌmiꞌsan pe.
30 Mîrîrî warantî uyannoꞌpîiyaꞌnîkon moropai upantakaꞌpîiyaꞌnîkon. Uyannoꞌpîiyaꞌnîkon neken pepîn tîîse ukupîꞌpîiyaꞌnîkon morî pe uurîꞌnîkon eꞌtoꞌpe. Yairî uurîꞌnîkon eꞌtoꞌpe neken pra tîîse tarakkîrî morî yapisî tînmuya yai yarakkîrî uurîꞌnîkonya morî yapiꞌtoꞌpe ikupîꞌpîiya. Mîrîrî warantî eꞌnîtoꞌpe ikupîꞌpî Paapaya.
Uyepotorîkon Jesus Cristo Wenai
Paapaya Usaꞌnamatoꞌkon
31 Tamîꞌnawîron mîrîrî Paapa nîkupîꞌpî pîꞌ îꞌ taꞌnîkon eꞌpainon? Paapaya uurîꞌnîkon pîikaꞌtîsaꞌ tanne, anîꞌ wanî eꞌpainon uyentaiꞌnîkon Paapa yarakkîrî eꞌnî tanne? Îꞌ ton pra man.
32 Mîîkîrî Paapaya taasaꞌ pra man tiwin kin see warantî: —Unmu tiwinan yarimauya pepîn aasaꞌmantatoꞌpe inkamoro ton pe —taasaiꞌya pra man. Tîîse itîrîꞌpîiya iꞌnînma yeꞌka pe pra tamîꞌnawîronkon uurîꞌnîkon ton pe. Mîîkîrî tînmu tîîsaꞌ tîuya pata pai tamîꞌnawîron morî tîrîiya pepîn eꞌpainon uupiaꞌnîkon? Itîrîiya.
33 Anîꞌ kin eseurîma eꞌpainon uurîꞌnîkon Paapa nîmenkaꞌsan winîkîi Paapaya rî taꞌpî anîꞌ eseurîma pepîn toꞌ winîkîi maasa pra yairî puꞌkuru unkupîꞌsan inkamoro.
34 Anîꞌya taa eserîke pra man uurîꞌnîkon pîꞌ: —Imakuiꞌpî kuꞌsaꞌ toꞌya —taiya ya upîꞌnîkon, îꞌ pe pra rî awanî. Îꞌ waniꞌ awanî yeꞌnen? Maasa pra Cristo saꞌmantaꞌpî uurîꞌnîkon ton pe moropai aweꞌmîꞌsaꞌkaꞌpî isaꞌmantaꞌsan koreꞌtapai. Mîîkîrî wanî enen Paapa meruntîri winî eereutasaꞌ. Mîîkîrîya esatî koꞌmannîpî Paapa pîꞌ uurîꞌnîkon ton pe.
35 Mîrîrî yeꞌnen oꞌnon pîkîrî see Cristoya usaꞌnamatoꞌkon kîꞌpî wanî sîrîrî? Eꞌtarumaꞌtîntoꞌ pîkîrî kaꞌrî? Kaane, saꞌman tîweꞌsen uponaꞌnîkon pîkîrî kaꞌrî? Tiaronkon pemonkonyamîꞌya utarumaꞌtîtoꞌkon pîkîrî? Emiꞌne itaꞌreꞌ pra eꞌnî pîkîrî? Îꞌ ton pra itemanne ton pra eꞌnî pîkîrî? Nariꞌ yaꞌ koꞌmannî pîkîrî, saꞌmantantoꞌ uponaꞌnîkon teerepansen pîkîrî kaꞌrî? Kaane, tîwîrîrî uupiaꞌnîkon aakoꞌmamî ipatîkarî.
36 Mîrîrî warantî eꞌtarumaꞌtîntoꞌ pîꞌ Paapa maimu eꞌmenukasaꞌya taasaꞌ man see warantî:Awenai anna, apemonkonoyamîꞌ wanî sîrîrînariꞌ yaꞌ saꞌmantantoꞌ yaꞌ wei kaisarî.Mîrîrî yeꞌnen anna koneka pîꞌ toꞌ manmanniꞌ carneiro aasaꞌmanta ton weiyu yai warantî
taasaiꞌya man.
37 Mîrîrî warantî aweꞌkupî tanne, tamîꞌnawîron mîrîrî yentai eꞌnîtoꞌpe ukupîiyaꞌnîkon, mîîkîrî manniꞌ uurîꞌnîkon saꞌnamatîponya.
38 Aꞌkî epuꞌtî pîꞌ wai seruꞌyeꞌ pe pra. Îꞌya tiwin kin uurîꞌnîkon pantaka pepîn moropai umoꞌkaiyaꞌnîkon eserîke pra awanî Paapa, usaꞌnamatîponkon yenya pai. Saꞌmantantoꞌya moropai enen koꞌmannîtoꞌya moropai kaꞌ po tîîkoꞌmansenon inserîyamîꞌya, moropai tarî ipîkku pe tîweꞌsanonya moropai Makui pemonkonoyamîꞌya moropai sîrîrîpe eeseraꞌma koꞌmannîpî manniꞌya moropai maasa eeseraꞌma kupî manniꞌya uurîꞌnîkon moꞌka eserîke pra man.
39 Moropai kaꞌ kawînan teraꞌmasenya moropai maiwinîkîi tuꞌnakan pe tîweꞌsenya moropai tamîꞌnawîron Paapa nîkupîꞌpîya uurîꞌnîkon pantaka pepîn moropai moꞌkaiya pepîn Paapa yenya pai, kureꞌne usaꞌnamasaiꞌyaꞌnîkon yeꞌnen. Maasa pra uurîꞌnîkon wanî Jesus Cristo Uyepotorîkon pemonkono pe.
