Sîrîrî Kaareta Tiago Nîmenukaꞌpî 1:1-27
1 Uurî Tiago wanî Paapa poitîrî pe, moropai Uyepotorîkon Jesus Cristo poitîrî pe nîrî. Uurîya kaareta yarima sîrîrî tamîꞌnawîronkon Judeuyamîꞌ pia, pata kaisarî eꞌparaipîkaꞌsan Judeuyamîꞌ pepîn koreꞌtawonkon pia. Umaimu man aapiaꞌnîkon.
Epuꞌnîtoꞌkon
2 Uyonpayamîꞌ, saꞌman erepamî ya aponaꞌnîkon, teesewankonoꞌmai pra eꞌtî, tîîse atausinpatî ipîꞌ.
3 Maasa pra saꞌman yapîtanîpîyaꞌnîkon ya, meruntî ke eenakon. Mîrîrî epuꞌnîtoꞌ yapîtanîpîyaꞌnîkon eꞌpai awanî. Mîrîrî yeꞌnen innape ikupî pîꞌ aakoꞌmamîkon tîwî tîkuꞌse pra. Moropai meruntî ke eenakon, saꞌman yapîtanîꞌnenan pe. Mîrîrî epuꞌtî pîꞌ naatîi.
4 Mîrîrî yeꞌnen saꞌman yapîtanîꞌtî, meruntî ke awanîkonpa, tamîꞌnawîrî morî pe awanîkonpa ituꞌse Paapa eꞌtoꞌ yawîrî.
5 Tîîse anîꞌrî akoreꞌtaꞌnîkon manniꞌ wanî ya, epuꞌnen ton pra, Paapa pîꞌ esatîiya eꞌpai awanî, epuꞌnen tîîtoꞌpeiya. Maasa pra anneꞌ pepîn mîîkîrî. Tîwakîri pe mîîkîrî repaiya teesetaꞌkai pra, takoꞌmenkai pra.
6 Tîîse innape puꞌkuru ikupîiꞌma esatîiya eꞌpai awanî, itîrîiya naka tîkai pra. Innape ikupîiꞌma Paapa pîꞌ esatî anîꞌya pra awanî ya, mîîkîrî wanî ikeꞌne, tuna yaapîtî aꞌsitunya manniꞌ warantî.
7 Mîrîrî warantî tîweꞌsen ya, Paapa winîpainon yapisî tîuya kaiꞌma eesenumenka eꞌpai pra awanî. Maasa pra Îꞌ rî yapisîiya pepîn.
8 Innape ikuꞌnen pepîn esenumenkatoꞌ wanî pepîn tiwin. Ikeꞌne tîweꞌsen îꞌ rî yaapîtî aꞌsitunya warantî eesenumenkatoꞌ wanî. Îꞌ rî kupî tîuya epuꞌtîiya pepîn.
Ipîkkukon Moropai Îꞌ Ton Pînon
9 Uyakon, amîrî îꞌ ton pra saꞌne wanî. Tîîse teesewankonoꞌmai pra eꞌkî. Atausinpakî maasa pra Paapaya ayannosaꞌ tîîpia aakoꞌmamîpa.
10 1:10,11 Ipîkku kanan? Tuꞌke temanne kenan tîîse mîîkîrî saꞌmanta. Parîꞌ yariꞌku yaꞌpiꞌta warantî ipîkku saꞌmanta. Wei teepaꞌkasen aꞌneꞌ moropai yei yariꞌku yaꞌpiꞌtanîpîiya, moropai aweꞌsoroka. Moropai morî pe aweꞌtoꞌ ton pra awanî. Mîrîrî warantî ipîkku eꞌtîꞌka mîrîrî, ituꞌse tîweꞌtoꞌ kupî pîꞌ aakoꞌmamî tanne. Mîrîrî yeꞌnen —Temanne kenan uurî teuren. Tîîse Paapa pia îꞌ pe pra man. Yairon pepîn uurî —kaiꞌma eesenumenka ya, aatausinpa eꞌpai awanî.
11 Eraꞌmakî 1:10
Epuꞌnîtoꞌkon Moropai
Imakuiꞌpî Kupî Emapuꞌtînenan
12 Taatausinpasen mîîkîrî pemonkon meruntî ke tîîkoꞌmansen saꞌman koreꞌta siꞌma. Maasa pra saꞌman yentai tîwanî yeꞌnen, ipatîkarî tîîkoꞌmantoꞌ ton yeporîiya. Mîrîrî Paapa nîtîrî tapurînenan pia, pena taꞌpî tîuya yawîrî.
13 Imakuiꞌpî ankuꞌpai anîꞌ wanî ya, —Sîrîrî esenumenkatoꞌ iipî Paapa winîpai —kîkatî. Maasa pra imakuiꞌpî kupîyaꞌnîkon emapuꞌtî Paapaya pepîn. Morî mîîkîrî. Imakuiꞌpî ankuꞌpai Paapa wanî pepîn. Moropai anîꞌya imakuiꞌpî kupî emapuꞌtînen pepîn mîîkîrî.
14 Mîrîrî yeꞌnen imakuiꞌpî ankuꞌpai anîꞌ wanî ya, —Sîrîrî esenumenkatoꞌ uwinîpainon —kaꞌkî. Maasa pra imakuiꞌpî ankuꞌpai eesenumenka tîîwarîrî.
15 Mîrîrî pîꞌ eesenumenka koꞌmannîpî ya, imakuiꞌpî kupîiya. Mîrîrî ya imakuiꞌpî kupî pîꞌ aakoꞌmamî, maasa pra imakuiꞌpî enasaꞌ yeꞌnen itentai. Mîrîrî wenai aakoꞌmamî pepîn Paapa pia.
16 Mîrîrî yeꞌnen uyonpayamîꞌ, unsaꞌnamakon, mîrîrî pîꞌ teesenkuꞌtîi pra eꞌtî.
17 Tamîꞌnawîrî morî tekenan Paapa winîpai tuiꞌsen. Mararî mîrikkî imakuiꞌpî ton pîn. Pata weiyu ton konekatîpon mîîkîrî, morî. Moropai pata weiyu moꞌta warantî Paapa wanî pepîn. Teseru miakanmaiya pepîn. Tîîse morî teseru kupî pîꞌ aakoꞌmamî.
18 Tîîwarîrî uurîꞌnîkon kupîꞌpîiya tînmukuyamîꞌ pe yairon tîmaimu ekaremekî tîuya wenai. Mîrîrî kupîꞌpîiya ituꞌse tîwanî yeꞌnen. Tamîꞌnawîronkon tînkonekaꞌsan pemonkonyamîꞌ koreꞌtapai uurîꞌnîkon moꞌkaꞌpîiya tîmîrî pe eꞌnîtoꞌpe.
Etapaiꞌnîkon Moropai Ikuꞌpaiꞌnîkon
19 Uyonpayamîꞌ, unsaꞌnamakon, sîrîrî epuꞌtî. Tiaron eseurîma ya, morî pe etatî eꞌmaiꞌ pe, kaꞌneꞌ pe teeseurîmai pra, kaꞌneꞌ pe teekoreꞌmai pra.
20 Maasa pra teekoreꞌmasaꞌkon ya, morî ituꞌse Paapa eꞌtoꞌ kupîyaꞌnîkon pepîn.
21 Mîrîrî yeꞌnen tamîꞌnawîron îꞌ imakuiꞌpî pe tîweꞌsen rumakatî. Ayewankon yaꞌ tîîkoꞌmansen nura ankupîkon rumakatî. Moropai Paapa maꞌre tîweꞌkuꞌse imaimu yapiꞌtî. Paapa nekaꞌmaꞌpî ayewankon yaꞌ yapiꞌtî, maasa pra mîrîrî wenai aweꞌpîikaꞌtîkon eꞌpainon.
22 Imaimuya taasaꞌ yawîrî ikuꞌtî, eta pe neken pra, teesenkuꞌtîi pra.
23 Maasa pra anîꞌya imaimu eta, tîîse imaimu yawîrî ikupîiya pepîn, mîîkîrî wanî mîrîrî wanamari yai teeseraꞌmasen warantî.
24 Mîîkîrî teeseraꞌma tîpo attî. Moropai kaꞌneꞌ pe oꞌnon yeꞌka pe tîwanîꞌpî kupîiya tîîwanmîra.
25 Tîîse Paapa maimu pîꞌ anîꞌ esenupa ya, moropai mîrîrî yawîrî aakoꞌmamî ya, tîîwanmîra tîkuꞌse pra, mîîkîrî koꞌmamî taatausinpai. Maasa pra Paapa maimu morî tekenan. Imakuiꞌpî yentai eꞌnî emapuꞌtînen.
26 Anîꞌya taa: —Crente uurî —taiya ya, tîîse imakuiꞌpî pe eeseurîma, mîîkîrî esenkuꞌtîsaꞌ mîrîrî. Moropai —Uurî crente —taiya seꞌ tapairî. Îꞌ pe pra rî awanî.
27 Tîîse anîꞌya yun pînon moropai isan pînon pîikaꞌtî ya, moropai inyo saꞌmantaꞌsan pîikaꞌtî ya toꞌ eꞌtarumaꞌtî tanne, mîrîrî yuꞌse Paapa wanî. Moropai sîrîrî non po tîîkoꞌmansenon koꞌmamî warantî pra aakoꞌmamî yuꞌse Paapa wanî, imakuiꞌpî tîkuꞌse pra. Mîrîrî yeꞌnen mîrîrî warantî aakoꞌmamî ya, —Uurî crente —taiya ya, yairî awanî.
