Sîrîrî Kaareta Tiago Nîmenukaꞌpî 2:1-26
2 Uyonpayamîꞌ, tamîꞌnawîronkon pemonkonyamîꞌ yapiꞌtî morî pe eꞌsentai pra. Maasa pra amîrîꞌnîkonya Uyepotorîkon Jesus Cristo kupî innape. Mîîkîrî Jesus morî puꞌkuru, tamîꞌnawîronkon yentainon. Mîîkîrî wenai morî pe tiaronkon yapiꞌtî.
2 Aꞌkî, eepereꞌsaꞌkon koreꞌta ipîkku warayoꞌ ewomî morî pe teepontîi moropai epeꞌke ouro itenya yeperu pokon. Moropai iteꞌmaꞌpî pîꞌ tiaron warayoꞌ ewomî ipoiꞌpî tîpon yaꞌ teepontîi.
3 Moropai mîîkîrî morî pe epontîꞌpî pîꞌ taayaꞌnîkon: —Seeniꞌ pata ereutakî morî yaꞌ —taayaꞌnîkon moropai itaponseꞌ ton yenpoyaꞌnîkon. Tîîse ipoiꞌpî saꞌne ipon pîꞌ taayaꞌnîkon: —Satippe eꞌkî, mîrîrî yeꞌka pe pra non pona ereutakî uyaponseꞌ pia —taayaꞌnîkon.
4 Mîrîrî warantî taayaꞌnîkon ya, seꞌ kaisarî toꞌ kupîyaꞌnîkon pepîn. Eꞌsentai toꞌ kupîyaꞌnîkon. Pemonkonyamîꞌ aakoꞌmenkanen pe aweꞌkuꞌsaꞌkon imakuiꞌpî pe. Amîrîꞌnîkon imakuiꞌpî pe teesenumenkasanon.
5 Etatî uyonpayamîꞌ, inkamoro îꞌ ton pînon tîweꞌtarumaꞌtîsanon menkaꞌpî Paapaya tîmîrî pe. Mîrîrî yeꞌkakon menkaꞌpîiya kureꞌne innape tîkuꞌtoꞌpe toꞌya. Toꞌ menkaꞌpîiya tîpata ponaron pe toꞌ eꞌtoꞌpe. Mîrîrî epuꞌtî pîꞌ naatîi maasa pra pena taꞌpîiya: —Uyapurînenan pia upata tîrîuya, ipatîkarî toꞌ koꞌmantoꞌpe uupia —taꞌpîiya.
6 Tîîse amîrîꞌnîkonya inkamoro tîweꞌtarumaꞌtîsanon yewankonoꞌma. Toꞌ yeppeꞌnîpîyaꞌnîkon. Tîîse anîꞌkanya kin atarumaꞌtîkon, moropai ayarîkon surarayamîꞌ esaꞌ pia? Ipîkkukon, temanne kenankonya atarumaꞌtîkon. Îꞌ ton pînonya aatarumaꞌtîkon pepîn.
7 Moropai Jesus morî winîkîi toꞌ eseurîma imakuiꞌpî pe. Mîîkîrî aponaronkon Jesus pîꞌ toꞌ eseurîma îri pe.
8 Tîîse Paapa nekaremekîꞌpî yawîrî, morî pe tamîꞌnawîronkon yapisîyaꞌnîkon ya seꞌ kaisarî, morî pe awanîkon. Maasa pra Paapa maimu eꞌmenukasaꞌya taa:—Tiaronkon saꞌnamatî aawarîrîꞌnîkon aweꞌsaꞌnamakon manniꞌ warantî
—taꞌpîiya.
9 Tîîse morî ipîkku pe tîweꞌsen wanî rîꞌpî pîꞌ tiaron yentai ikupîyaꞌnîkon ya, imakuiꞌpî kupîyaꞌnîkon mîrîrî. Unkupîkon ton, Paapa nekaremekîꞌpî puremeꞌnenan amîrîꞌnîkon tarîpai.
10 Maasa pra anîꞌ wanî ya, tamîꞌnawîron Paapa nekaremekîꞌpî yawîrî, tîîse tiwin inekaremekîꞌpî yonpa puremeꞌsaiꞌya ya, inekaremekîꞌpî puremeꞌsaiꞌya mîrîrî.
11 Maasa pra Paapa nekaremekîꞌpî:—Tiaron noꞌpî, tiaron niyo yarakkîrî kîsi
—taꞌpîiya. Moropai inîꞌrî mîîkîrî rîya taꞌpî:—Tiaron kîꞌwîi.
Mîrîrî yeꞌnen tiaron noꞌpî yarakkîrî pra tîîse tiaron wîî anîꞌya ya, mîrîrî wenai Paapa nekaremekîꞌpî puremeꞌsaiꞌya mîrîrî.
12 Moropai tiwinanoꞌpî wei yai, uurîꞌnîkon ekaranmapo Cristoya: —Îꞌ ton pe see umaimu yawîrî pra aakoꞌmamîꞌpîkon? —taiya upîꞌnîkon. Mîrîrî namai akoꞌmantî Cristo maimu yawîrî. Moropai morî pe eseurîmatî ituꞌse Cristo eꞌtoꞌ yawîrî. Maasa pra Cristo maimu imakuiꞌpî yentai eꞌnî emapuꞌtînen.
13 Maasa pra oꞌnokoꞌpî pe tiaronkon eraꞌmasaꞌ pra eꞌnî ya, uurîꞌnîkon nîrî eraꞌma Paapaya pepîn tîꞌnokoꞌpî pe. Tîîse oꞌnokoꞌpî pe uyonpakon eraꞌmasaꞌ ya, mîrîrî wenai eꞌtarumaꞌtîntoꞌ yuwaꞌkaꞌnîkon.
Inna Taatîponkon
14 Uyonpayamîꞌ, îꞌ pe pra rî awanî pemonkonya taa: —Uurî inna taawon —taiya morî kupîiꞌma pra. Morî iteseru ton pra siꞌma mîrîrî inna taatoiꞌya ya neken aweꞌpîikaꞌtî pepîn.
15 2:15,16 See warantî awanî. Ayonpa warayoꞌ, wîriꞌ wanî ya ipon ton pra, itekkari ton pra, moropai ipîꞌ taayaꞌnîkon: —Morî pe akoꞌmankî. Tîîwanmîra eꞌkî. Emiꞌne pra akoꞌmankî. Komiꞌ pe pra akoꞌmankî. Mîrîrî taayaꞌnîkon tanne, ituꞌse mîîkîrî eꞌtoꞌ tîîsaꞌyaꞌnîkon pra awanîkon ya, mîîkîrî pîikaꞌtîyaꞌnîkon pepîn.
16 Eraꞌmakî 2:15
17 Mîrîrî warantî inna taatîponya anîꞌ pîikaꞌtî pepîn. Inna taiya seꞌ tapairî Paapa pemonkono pe pra siꞌma. Mîrîrî warantî inna taatoꞌ neken wanî isaꞌmantaꞌpî warantî.
18 Yai pra anîꞌya taa: —Inna taatîpon mîîkîrî, tîîse tiaron pîꞌ taiya: —Morî teseru kenan mîîkîrî —taiya. Mîrîrî pîꞌ tauya apîꞌnîkon. Oꞌnon yeꞌka pe epuꞌtoꞌpeuya innape ikuꞌnen pe awanî iteseru morî pe pra siꞌma? Epuꞌtîuya eserîke pra. Tîîse aronne epuꞌtîuya innape ikupîiya morî iteseru wenai.
19 Innape tiwin Paapa wanî kuꞌnen amîrî? Morî pe man. Tîîse oꞌmaꞌkon, Makui poitîrîtonon nîrî innape Paapa kuꞌnenan. Moropai mararî pra toꞌ esiꞌnîpî ipîꞌ.
20 Inna taawon neken morî kupîiꞌma pra eꞌpîikaꞌtî pepîn. Pakko amîrî. Inna taatoꞌ neken wanî îꞌ pe pra rî. Mîrîrî epuꞌtîya pra nan?
21 Îꞌ wenai Paapaya Abraão nurîꞌtî utamokon eraꞌmaꞌpî yairon pe? Mîîkîrî Abraãoya tînmu, Isaque, tîrîꞌpî Paapa pia tînpoꞌtî pataꞌseꞌ pona. Mîrîrî kupîꞌpîiya Paapa maimu yawîrî, innape ikupî tîuya yeꞌnen. Mîrîrî kupîiya wenai, morî pe, yairon pe eraꞌmaꞌpî Paapaya.
22 Innape imaimu kupîꞌpî Abraãoya epuꞌtî pîꞌ naatîi inkupîꞌpî wenai. Moropai inkupîꞌpî wenai yairî innape tîkuꞌtoiꞌya epuꞌtîꞌpî Paapaya.
23 Mîrîrî warantî eeseraꞌma pena îꞌ taꞌpî Paapa kaaretarîya yawîrî. Taꞌpîiya:—Innape Paapa kupîꞌpî Abraãoya.Mîrîrî yeꞌnen yairon pe eraꞌmaꞌpî Paapaya
—taꞌpîiya. Taatoꞌ mîrîrî Paapa kaaretarî. Moropai tîwanîyakon pe Abraão esatîꞌpîiya.
24 Mîrîrî yeꞌnen pemonkon eraꞌma Paapaya yairon pe, tîmaimu yawîrî aakoꞌmamî wenai. Tîîse inna taawon morî kupîiꞌma pra, mîîkîrî eraꞌmaiya pepîn yairon pe.
25 Mîrîrî warantî Raabe nurîꞌtî eꞌpîikaꞌtîsaꞌ wanîꞌpî. Pena mîîkîrî Raabe wanîꞌpî eseporo rî tîweꞌsen wîriꞌ. Tîîse Paapa pemonkonoyamîꞌ pata eraꞌmanenan yapisîꞌpîiya tewîꞌ ta morî pe. Toꞌ pîikaꞌtîꞌpîiya tiaron eꞌma ta pîꞌ toꞌ wîtîtoꞌpe taꞌpîiya. Mîrîrî kuꞌsaiꞌya wenai Raabe eraꞌmaꞌpî Paapaya yairon pe.
26 Isaꞌmantaꞌpî wanî itekaton ton pra. Mîrîrî warantî awanî inna taatîpon Paapa maimu yawîrî pra siꞌma. Tîweꞌpîikaꞌtîtoꞌ eporîiya pepîn.
