Sîrîrî Kaareta Tiago Nîmenukaꞌpî 3:1-18
3 Uyonpayamîꞌ, uurîꞌnîkon tiaronkon yenupanenanya imakuiꞌpî kupî ya, utarumaꞌtîkon Paapaya tiaronkon tarumaꞌtî tîuya yentai. Mîrîrî epuꞌtî pîꞌ naatîi. Mîrîrî yeꞌnen tiaronkon yenupanenan pe tuꞌke amîrîꞌnîkon eꞌpai pra awanî.
2 Maasa pra tamîꞌnawîronkon uurîꞌnîkonya imakuiꞌpî kupî unukon ke, uyeserukon ke, esenumenkantoꞌ ke, tuꞌke. Tîîse anîꞌya tîwî imakuiꞌpî teeseurîmatoꞌ rumakasaꞌ ya, tamîꞌnawîrî imakuiꞌpî teseru rumakasaiꞌya mîrîrî. Moropai morî pe puꞌkuru awanî.
3 Aꞌkî, uurîꞌnîkonya bridia yekaꞌma sokoroꞌpan kaware mata yaꞌ attîtoꞌpe oꞌnon poro ituꞌse eꞌnîtoꞌ yawîrî.
4 Moropai apoꞌ yen pîꞌ esenumenkanpaiꞌnîkon. Kureꞌnan mîrîrî aꞌsitunya itukka. Tîîse itesaꞌya yarî siꞌmîrikkî naire ke, oꞌnon poro ituꞌse tîweꞌtoꞌ yawîrî.
5 Mîrîrî warantî uurîꞌnîkon wanî. Siꞌmîrikkî pe unukon wanî. Tîîse kureꞌne imakuiꞌpî pîꞌ eseurîman eserîke awanî tiaronkon tîmaꞌtanîꞌse.
Aꞌkî, kureꞌnan yuꞌ aramî siꞌmîrikkî apoꞌ yarîn wenai.
6 Mîrîrî warantî unukon wanî, apoꞌ warantî. Imakuiꞌpî pe puꞌkuru unukon wanî uyawonkon pe. Mîrîrî imakuiꞌpî sorokaiya mîrîrî tamîꞌnawîrî uukoꞌmantoꞌkon yaꞌ. Uyewankon kîꞌpaiya. Mîrîrî imakuiꞌpî Makui winîpai tuiꞌsen.
7 Aꞌkî, tamîꞌnawîronkon oꞌmaꞌkon toronyamîꞌ, îkîiyamîꞌ, moroꞌyamîꞌ esepannîpî pemonkonyamîꞌya tekînkon ton.
8 Tîîse anîꞌya tînu esepannîpî eserîke pra awanî imakuiꞌpî pe teeseurîma namai. Nariꞌ pe awanî. Maiꞌ warantî wîî ton pe awanî. Anîꞌya ikoneka eserîke pra awanî.
9 Unukon ke Paapa, Uyepotorîkon yapurî moropai mîrîrî ke nîrî uyonpakon pîꞌ eseurîman imakuiꞌpî pe. Inkamoro uyonpakon Paapa nîkonekaꞌsan tîwarantî.
10 Untakon yapai umaimukon epaꞌka morî pe moropai imakuiꞌpî pe nîrî. Mîrîrî warantî eꞌpai pra awanî, uyonpayamîꞌ.
11 Aꞌkî, tiwinan yani yapai tuna epaꞌka pepîn morî moropai inîꞌne nîrî.
12 Moropai paruru yeꞌ epeta pepîn laranja pe. Moropai kuwai yeꞌ epeta pepîn paruru pe. Mîrîrî warantî yani inîꞌne pe teepaꞌkasen yapai morî tuna epaꞌka pepîn. Mîrîrî warantî untakon yapai tiwin epaꞌka eꞌpai awanî, morî.
Yairon Epuꞌnen Puꞌkuru
13 Moro nai epuꞌnen akoreꞌtaꞌnîkon? Moriya tauya, morî pe akoꞌmankî, innape epuꞌnen pe awanî epuꞌtoꞌpeuya. Mîî pe pra, morî kupî pîꞌ aakoꞌmamî ya, ayeseru eraꞌmauya. Moropai mîrîrî wenai, epuꞌnen pe awanî epuꞌtîuya.
14 Tîîse mîî pe awanîkon ya, ituꞌse aweꞌtoꞌkon pîꞌ neken eesenumenkakon ya: —Epuꞌnen uurî. Uurîya ayenupakon sîrîrî —kîkatî. Seruꞌyeꞌ pe awanîkon, mîrîrî warantî taayaꞌnîkon ya.
15 Maasa pra mîrîrî esenumenkantoꞌ Paapa winîpainon pepîn. Tîîse sîrîrî non po tîîkoꞌmansenon winîpainon, Makui winîpai tuiꞌsen mîrîrî esenumenkantoꞌ.
16 Maasa pra tiaronkon yentai eꞌpai awanîkon ya, moropai ituꞌse aweꞌtoꞌkon pîꞌ neken eesenumenkakon ya, eekoreꞌmakon, eesiyuꞌpîtîkon. Moropai tamîꞌnawîrî imakuiꞌpî kupîyaꞌnîkon.
17 Tîîse epuꞌnen Paapa winîpainon mîrîrî yeꞌka pepîn. Tekenan morî mîrîrî esenumenkantoꞌ. Moropai ayewankon konekaiya tiaronkon pîꞌ eekoreꞌmakon namai. Eranmîra amîrîꞌnîkon kupîiya. Seꞌ kaisarî tiaronkon kupî emapuꞌtînen, eꞌsentai pra. Tiaronkon maimu yawîrî aakoꞌmamîkon emapuꞌtînen. Tiaronkon saꞌnamayaꞌnîkon emapuꞌtînen. Tiaronkon pîikaꞌtîyaꞌnîkon emapuꞌtînen. Mîrîrî warantî ikupî pîꞌ Paapa winîpainon koꞌmamî, yairî, seruꞌ pe pra.
18 Tiaronkon pîikaꞌtînenan koꞌmamî morî kupî pîꞌ, tiaronkon ekoreꞌma namai. Mîrîrî yeꞌnen arinîke inkamoroya morî kupî piaꞌtî.
