Sîrîrî Kaareta Tiago Nîmenukaꞌpî 4:1-17
4 Oꞌnon pata pai tuiꞌsen eekoreꞌmatoꞌkon, eesiyuꞌpîtîtoꞌkon? Ayaꞌnîkon tîîkoꞌmansen mîrîrî. Mîrîrî wenai ituꞌse aweꞌtoꞌkon pîꞌ eesekaꞌnunkakon mîîtoꞌpe.
2 Mîrîrî warantî aakoꞌmamîkon tîîse îꞌ ton pra awanîkon. Tiaron wîîyaꞌnîkon tîîse îꞌ ituꞌse aweꞌtoꞌkon eporîyaꞌnîkon pepîn. Tiaronkon yemanne yuꞌse aweꞌpîtîkon tîîse yapisîyaꞌnîkon eserîke pra awanî. Mîrîrî pîꞌ eekoreꞌmakon moropai eesiyuꞌpîtîkon pîꞌ aakoꞌmamîkon. Aapiaꞌnîkon îꞌ ton pra awanî, maasa pra Paapa pîꞌ esatîyaꞌnîkon pra awanîkon.
3 Esatîyaꞌnîkon, tîîse yapisîyaꞌnîkon pra awanîkon. Amîrîꞌnîkon pe aatausinpakonpa ituꞌse awanîkon yeꞌnen yapisîyaꞌnîkon pepîn. Maasa pra yairî pra esatîyaꞌnîkon.
4 Amîrîꞌnîkon wanî see poro rî wîriꞌsanyamîꞌ pîꞌ tîweꞌsanon warantî. Maasa pra imakuiꞌsan yeseru eraꞌmayaꞌnîkon awakîrikon pe, Paapa pemonkono pe siꞌma. Îri pe awanîkon wenai, Paapa yeyaton pe eenakon. Maasa pra sîrîrî non po tîîkoꞌmansenon yeseru yuꞌse awanîkon. Mîrîrî warantî anîꞌ wanî ya, sîrîrî non po tîîkoꞌmansenon yarakkîrî eꞌpai, Paapa yeyaton pe awanî.
5 Moropai Paapa maimu eꞌmenukasaꞌya taa see warantî: —Morî Yekaton Wannî tîrîꞌpî Paapaya uyewankon yaꞌ. Kureꞌne uurîꞌnîkon yuꞌse awanî moropai uurîꞌnîkon koꞌmannîꞌnen pe awanî imakuiꞌpî kupî namai —taiya. Mîrîrî yeꞌnen —Seꞌ tapairî taasaiꞌya mîrîrî —kîkatî.
6 Moropai uurîꞌnîkon pîikaꞌtî Paapaya. Inîꞌ panpîꞌ umeruntîrikon tîrîiya. Sîrîrî warantî Paapa maimu eꞌmenukasaꞌ:Mîîpankon winîkîi Paapa ekoreꞌmatîîse mîîpankon pepîn pîikaꞌtîiya
taatoꞌ mîrîrî.
7 Mîrîrî yeꞌnen Paapa maꞌre eꞌkuꞌtî. Imaimu yawîrî akoꞌmantî. Meruntî ke eꞌtî Makui winîkîi, moropai eepe aapiapaiꞌnîkon.
8 Aminke pra Paapa pia erepantî, moropai aapiaꞌnîkon aakoꞌmamî. Imakuiꞌpî kuꞌnenan pîꞌ tauya, erepantî tîwî amakuyikon tîkuꞌse. Moropai amîrîꞌnîkon asakîꞌne teesenumenkasanon pîꞌ tauya, ayewankon ke innape ikuꞌtî imakuiꞌpî tîrumakai. Tîwî tiwin eesenumenkatoꞌkon nîsi.
9 Imakuiꞌpî ankupîꞌpîkon pîꞌ teesewankonoꞌmai eꞌtî. Akaruntî. Aatausinpaꞌpîkon raꞌtîtî akaruwatoꞌkon pe. Esewankonoꞌmatî.
10 Paapa maꞌre tîweꞌkuꞌse eꞌtî. Moropai amîrîꞌnîkon yapurîiya.
Tonpayamîꞌ Pîꞌ Teeseurîmasanon Imakuiꞌpî Pe
11 Uyonpayamîꞌ, imakuiꞌpî pe kîseurîmatî ayonpakon winîkîi. Anîꞌ eseurîma ya imakuiꞌpî pe tonpa winîkîi, imakuiꞌpî pe eeseurîma nîrî unkupîkon ton pe Paapa nekaremekîꞌpî winîkîi. Paapa nekaremekîꞌpî yawîrî pra awanîkon ya itentai aweꞌkupîkon. —Morî pe pra man —taayaꞌnîkon Paapa maimu pîꞌ ipuremeꞌsaꞌyaꞌnîkon wenai.
12 Tîîse Paapa neken unkupîkon ton ekaremeꞌnen. Mîîkîrî neken uyesaꞌkon pe uurîꞌnîkon pîikaꞌtîiya, kaane kaꞌrî yenumîiya ituꞌse tîweꞌtoꞌ yawîrî. Tîîse amîrî kanan? Oꞌnon yeꞌka pe ayonpakon esaꞌ pe aweꞌkupîkon Paapa warantî?
13 Aꞌkî, see warantî taawonan: —Sîrîrîpe penane anna wîtî sîrîrî sinpata cidade pona. Miarî tiwin konoꞌ yuwaꞌka annaya esenyakaꞌmai kureꞌne tîniru yapiꞌtoꞌpe —kaiꞌma taawonan.
14 Tîîse îꞌ eꞌkupî penane epuꞌtîyaꞌnîkon pepîn tiwin kin. Maasa pra aakoꞌmantoꞌkon wanî katupuru warantî. Kureꞌne aakoꞌmamî pepîn, tîîse kaꞌneꞌ pe attî.
15 Mîrîrî yeꞌnen see warantî taayaꞌnîkon eꞌpai wanî: —Enen uukoꞌmamî yuꞌse Paapa wanî ya, uukoꞌmamî. Moropai îꞌ kupîuya yuꞌse Paapa wanî ya, ikupîuya —taayaꞌnîkon eꞌpai awanî.
16 Tîîse aawarîrîꞌnîkon eeseurîmakon taatapurîi. Mîrîrî eeseurîmatoꞌkon wanî imakuiꞌpî pe.
17 Mîrîrî yeꞌnen anîꞌya morî kupî pra awanî ya, morî kupî epuꞌtîiꞌma, imakuiꞌpî kupîiya nîrî mîrîrî.
