Sîrîrî Kaareta Tiago Nîmenukaꞌpî 5:1-20
5 Moropai eseurîma sîrîrî ipîkkukon pîꞌ. Eseurîma etapaiꞌnîkon. Aweꞌtarumaꞌtîkon kupî sîrîrî. Mîrîrî yeꞌnen akaruntî, entaimepîꞌtî teesewankonoꞌmai.
2 Maasa pra ayemannekon eꞌtîꞌka pe man. Aponkon yaku oꞌmaꞌkonya pe man.
3 Ayemannekon ouro pe, prata pe tîweꞌsen karawa pe man. Mîrîrî ayemannekon karawasaꞌ eraꞌmayaꞌnîkon ya, aweꞌtîꞌkakon kupî epuꞌtîyaꞌnîkon. Akaraukon kupî sîrîrî tîweꞌtarumaꞌtîi. Ayemannekon eꞌtîꞌka kupî sîrîrî moropai amîrîꞌnîkon nîrî eꞌtîꞌka kupî sîrîrî. Tuꞌke ayemannekon konekayaꞌnîkon, Cristo iiꞌtoꞌ weiyu aminke pra tîîse.
4 Aꞌkî, apoitîrîtonon teesenyakaꞌmasanon anmîrikon pîꞌ yeꞌmayaꞌnîkon pra awanîkon, inkamoro yenkuꞌtîiꞌma. Toꞌ karau etaꞌpî Paapaya. Mîîkîrî Uyepotorîkon meruntî tamîꞌnawîronkon yentainon.
5 Amîrîꞌnîkon koꞌmanpîtîꞌpî tarî sîrîrî non po tuꞌke ayemannekon pîꞌ, ayaꞌreꞌkon pîꞌ taatausinpai. Îꞌ ituꞌse aweꞌtoꞌkon eporîꞌpîyaꞌnîkon. Aakaiwantanîꞌsaꞌkon Paapaya awîkon kupî tanne.
6 Moropai morîkon pemonkonyamîꞌ wîî meꞌpoꞌpîyaꞌnîkon, awinîkîiꞌnîkon îꞌ kuꞌsaꞌ toꞌya pra tîîse. Inkamoroya îꞌ kupî eserîke pra awanîꞌpî maasa pra toꞌ yentai awanîkon.
Uyepotorîkon Iiꞌtoꞌ Nîmîkî Pîꞌ Koꞌmannî
7 Mîrîrî yeꞌnen, uyonpayamîꞌ, eꞌtarumaꞌtîntoꞌ pîꞌ teesewankonoꞌmai pra eꞌtî. Moropai Cristo iipî nîmîꞌtî teesemiꞌtapai pra, mîî esaꞌya tînpîmîꞌpî yeperu nîmîkî warantî. Inîmîkî pîꞌ aakoꞌmamî konoꞌ renatoꞌpe, moropai inîꞌrî inîmîkîiya tînpîmîꞌpî epetatoꞌpe.
8 Mîrîrî warantî teesemiꞌtapai pra eꞌtî. Ayewankon meruntîtannîꞌtî. Maasa pra Uyepotorîkon iipî kupî sîrîrî.
9 Uyonpayamîꞌ, tîwoꞌmaꞌtai pra eꞌtî. Maasa pra imakuiꞌpî pe eeseurîmakon ya, ayonpa winîkîi atarumaꞌtîkon Paapaya. Aka, mîîkîrî ayesaꞌkon moro man manaꞌta po. Aaipî kupî sîrîrî.
10 Uyonpayamîꞌ, penaronkon tîmaimu ekaremeꞌnen pe Paapa nîmenkaꞌsan pîꞌ esenumenkanpaiꞌnîkon. Kureꞌne toꞌ eꞌtarumaꞌtîꞌpî Paapa maimu ekaremekî tîuyaꞌnîkon wenai. Mîîwîni tîîse mîrîrî pîꞌ toꞌ koꞌmamîꞌpî tîwî tîkuꞌse pra.
11 Aꞌkî, tamîꞌnawîronkon anîꞌkan meruntî ke tîîkoꞌmansenon, taatausinpasanon. Mîrîrî epuꞌtî pîꞌ naatîi. Enpenatanpaiꞌnîkon Jó nurîꞌtî yekare pîꞌ. Tîweꞌtarumaꞌtîiꞌma innape Paapa kupî pîꞌ aakoꞌmamîꞌpî tîwî tîkuꞌse pra. Mîrîrî tîpo tîꞌnokoꞌpî pe eraꞌmaꞌpî Paapaya, moropai morî tîrîꞌpîiya Jó pia. Maasa pra Paapa wanî morî pe, pemonkonyamîꞌ saꞌnamanen pe.
12 Uyonpayamîꞌ, tamîꞌnawîrî ayeurîmaꞌpîuyaꞌnîkon yentai ekaremekîuya sîrîrî. Paapa pemonkono pe awanîkon yeꞌnen yairî teeseurîmasanon amîrîꞌnîkon. Mîrîrî yeꞌnen inna taapai awanîkon ya, inna neken kaꞌtî. Moropai kaane taapai awanîkon ya, kaane neken kaꞌtî. Inîꞌ panpîꞌ, —Useruku pepîn, useruku pepîn —kaiꞌma kîkatî. Innape eeseurîmakon epuꞌtî tiaronkonya yuꞌse awanîkon ya, inna, kaane, neken kaꞌtî, juro tîkai pra. Mîrîrî warantî eseurîmatî Paapaya atarumaꞌtîkon namai.
Epîrematî
13 Anîꞌ tîweꞌtarumaꞌtîsen moro nai akoreꞌtaꞌnîkon? Paapa yarakkîrî eeseurîma eꞌpai man. Anîꞌ taatausinpasen moro nai akoreꞌtaꞌnîkon? Paapa yapurîiya eꞌpai man teeserenka pe.
14 Anîꞌ priꞌyawon pepîn moro nai akoreꞌtaꞌnîkon? Soosi esanon yannoiya eꞌpai man. Inkamoro epîrema ipona eꞌpai man moropai ikarapaima toꞌya karaꞌ ke. Mîrîrî warantî ikupî toꞌya Uyepotorîkon eseꞌ yai, mîîkîrî Uyepotorîkonya yepiꞌtîtoꞌpe.
15 Mîrîrî warantî toꞌ epîrema innape Paapa kupîiꞌma moropai mîîkîrî priꞌyawon pepîn esepiꞌtî eserîke awanî. Mîîkîrî yepiꞌtî Uyepotorîkonya. Moropai imakuiꞌpî kuꞌsaiꞌya ya, tîîwanmîra ikupî Paapaya.
16 Mîrîrî yeꞌnen imakuiꞌpî ankupîꞌpîkon ekaremeꞌtî ayonpakon pîꞌ. Moropai epîrematî ayonpakon pona eesepiꞌtîkonpa. Maasa pra morî kuꞌnen epîrema ya, imaimu yawîrî ikupî Paapaya.
17 Mîrîrî warantî Elias nurîꞌtî wanîꞌpî pena. Uurîꞌnîkon warantî awanîꞌpî pemonkon pe. Moropai mîîkîrî epîremaꞌpî konoꞌ rena namai. Kureꞌne eepîremaꞌpî. Moropai konoꞌ rena pra awanîꞌpî eseurîwîꞌne konoꞌ arakkita pairî kaisarî.
18 Mîrîrî tîpo eepîremaꞌpî inîꞌrî konoꞌ iiꞌtoꞌpe. Moropai konoꞌ yarimaꞌpî Paapaya. Moropai inîꞌrî yei enaꞌpî teperu ke tamîꞌnawîrî.
19 5:19,20 Uyonpayamîꞌ, anîꞌ amîrîꞌnîkon koreꞌtawon atarima ya Paapa piapai, moropai inîꞌrî awennaꞌpo emapuꞌtî tiaronya ya, mîîkîrî imakuiꞌpî kuꞌnen pîikaꞌtî mîîkîrîya aasaꞌmanta namai. Moropai imakuiꞌpî inkupîꞌpî moꞌka Paapaya. Mîrîrî pîꞌ enpenatanpaiꞌnîkon.
20 Eraꞌmakî 5:19
