Sîrîrî Kaareta Paulo Nîmenukaꞌpî Tito Pia 1:1-16
1 Uurî Pauloya sîrîrî kaareta menuka sîrîrî. Paapa poitîrî pe wanî, moropai Jesus Cristo naipontîꞌpî pe wanî. Uyarimaꞌpîiya Paapa nîmoꞌkaꞌsan pia innape Jesus kuꞌtoꞌpe toꞌya, Paapa maimu yairon epuꞌtoꞌpe toꞌya moropai imaimu yawîrî toꞌ koꞌmantoꞌpe uyarimaꞌpîiya.
2 Mîrîrî ton pe uyarimaꞌpîiya. Maasa pra innape ikupî wenai enen koꞌmannî kupî yeꞌnen ipatîkarî. Mîrîrî epuꞌtî pîꞌ man maasa pra pena pata ekonekasaꞌ pra tîîse Paapaya taꞌpî: —Toꞌ koꞌmamî pe man ipatîkarî enen uupia —taꞌpîiya. Paapa mîîkîrî seruꞌyeꞌ pepîn. Mîrîrî yeꞌnen inîmîkî pîꞌ koꞌmannî.
3 Mîrîrî itekare anekaremeꞌpai Paapa enasaꞌ ya, ekaremekî meꞌpoꞌpîiya. Mîrîrî itekare ekaremeꞌse uyarimaꞌpî mîîkîrî Paapa, upîikaꞌtînenkonya.
4 Sîrîrî kaareta yarimauya sîrîrî aapia, Tito. Amîrî wanî unmu pe puꞌkuru maasa pra innape Jesus kuꞌsaꞌya ikupîꞌpîuya warantî.
Apona epîrema sîrîrî. Paapa pîꞌ esatîuya: —Mîîkîrî Tito eraꞌmakî morî pe, tîîwanmîra aweꞌtoꞌpe, moropai tamîꞌnawîron morî pe aweꞌtoꞌ ke irepakî. Mîrîrî warantî tauya Uyunkon Paapa pîꞌ, moropai Jesus Cristo upîikaꞌtînenkon pîꞌ.
Tito Esenyakaꞌmatoꞌ Creta Wono Po
5 Amîrî pokonpe wanî yai, esenyakaꞌmaꞌpî tîîse aretîꞌkauya pra wanîꞌpî. Mîrîrî yeꞌnen amîrî nîmîꞌpîuya Creta po yaretîꞌkapa. Mîrîrî yai taꞌpîuya apîꞌ: —Innape Jesus kuꞌnenan eraꞌmanen pe warayoꞌkon moꞌkakî pata kaisarî Creta wono po —taꞌpîuya. Mîrîrî yeꞌnen manniꞌkan morî pe iteseru tîweꞌsanon taꞌpîuya yawîrî toꞌ moꞌkakî.
6 Innape Jesus kuꞌnenan eraꞌmanen eꞌpai awanî morî pe ipîꞌ anîꞌ eseurîma namai imakuiꞌpî pe iwinîkîi. Tiwin tînoꞌpî kenan eꞌpai awanî, inmukuyamîꞌ eꞌpai awanî innape Jesus kuꞌnenan pe. Moropai anîꞌya “imakuiꞌpî kuꞌnenan mîîkîrî munkîyamîꞌ”, taa eserîke pra awanî. Tîyun, tîsan maimu yawîronkon pe eꞌpai toꞌ wanî, imakuiꞌpî pe anîꞌ eseurîma namai toꞌ pîꞌ.
7 Paapa esenyakaꞌmatoꞌ pîꞌ mîîkîrî wanî. Mîrîrî yeꞌnen morî pe iteseru eꞌpai awanî, ipîꞌ tiaronkon eseurîma namai imakuiꞌpî pe. Mîî pe pra eꞌpai awanî, sokoroꞌ pe pra eꞌpai awanî, teetînsen pe pra eꞌpai awanî. Eekoreꞌma pra eꞌpai awanî, temanne ton yuꞌse tîwanî yeꞌnen tiaronkon yenkuꞌtîiya eꞌpai pra awanî.
8 Tîîse morî pe pemonkonyamîꞌ teerepansenon tîîpia yapisîiya eꞌpai awanî, morî Paapa yeseru eraꞌma tîuya pîꞌ taatausinpasen pe eꞌpai awanî, imakuiꞌpî eraꞌma tîuya pîꞌ pra. Morî pe aweꞌpanama eꞌpai awanî imakuiꞌpî kupî tîuya namai. Tonpayamîꞌ winîkîi imakuiꞌpî kupîiya pra eꞌpai awanî tîîse ituꞌse Paapa eꞌtoꞌ yawîrî aakoꞌmamî eꞌpai awanî.
9 Innape yairon esenupantoꞌ kupîiya eꞌpai awanî meruntî ke teesenupaꞌpî yawîrî. Mîrîrî warantî tiaronkon meruntîtannîpîiya yairon esenupantoꞌ yenupa tîuya wenai. Moropai Paapa maimu yuꞌsankon pepîn yakoꞌmenkaiya eꞌpai awanî, yairî pra toꞌ eꞌtoꞌ pîꞌ.
10 Maasa pra tuꞌke pemonkonyamîꞌ anîꞌ anetapaiꞌnîkon pepîn seꞌ tapairî toꞌ eseurîmapîtî, tiaronkon yenkuꞌtî toꞌya. Arinîke toꞌ man, Judeuyamîꞌ yeseru yawîrî tîweꞌsanon koreꞌta.
11 Inkamoro tiaronkon yenupaꞌpî, toꞌ koꞌmamî yairî pra. Tiaronkon yewîꞌkon tawonkon yenkuꞌtî toꞌya tamîꞌnawîrî. Toꞌ yenupa toꞌya tîniru yapiꞌtoꞌpe toꞌya tiaronkon tenkuꞌtîi. Mîrîrî wenai tuꞌke tonpakon atarima emapuꞌtî toꞌya Jesus piapai. Mîrîrî yeꞌnen toꞌ pîꞌ taa meꞌpoya eꞌpai awanî, mîrîrî kupî toꞌya namai inîꞌrî.
12 Maasa pra tiwinan toꞌ yonpa ipîkku teeseurîmasen nurîꞌtîya taꞌpî: —Creta ponkon seruꞌyeꞌkon, oꞌmaꞌkon warainokon, enyaꞌneꞌkon, entamoꞌkapai neken toꞌ wanî kureꞌne, teesenyakaꞌmai pra —taꞌpîiya.
13 Iseruku pepîn mîrîrî. Mîrîrî yeꞌnen toꞌ yakoꞌmenkakî meruntî ke, innape Jesus kuꞌtoꞌpe toꞌya yairî.
14 Toꞌ yakoꞌmenkakî tîpantonikon tîpîinamai pra toꞌ eꞌtoꞌpe, Paapa maimu yuꞌsan pepîn nekaremekîꞌpî tîpîinamai pra toꞌ eꞌtoꞌpe.
15 Maasa pra morî pe anîꞌ yewan wanî ya, morî pe aakoꞌmantoꞌ wanî tamîꞌnawîrî. Tîîse nura pe anîꞌ yewan wanî ya, moropai innape Paapa kupîiya pra awanî ya, tamîꞌnawîrî aakoꞌmantoꞌ wanî nîrî nura pe. Nura pe mîîkîrî esenumenkatoꞌ wanî yeꞌnen tamîꞌnawîron eraꞌmaiya nura pe.
16 “Paapa epuꞌnenan anna”, taapîtî toꞌya teuren. Tîîse imakuiꞌpî toꞌ nîkupîꞌpî wenai, tamîꞌnawîronkonya epuꞌtî, Paapa epuꞌtî toꞌya pepîn. Tewanmakon pe Paapa nîkupî kupî toꞌya, Paapa maimu yuuku toꞌya pepîn. Mîrîrî yeꞌnen tiwin kin morî kupî toꞌya pepîn.
