Sîrîrî Kaareta Paulo Nîmenukaꞌpî Tito Pia 2:1-15
2 Tîîse amîrî Tito, pemonkonyamîꞌ yenupakî yairon esenupantoꞌ pîꞌ.
2 Aꞌyekeꞌtonon panamakî teetînsen pe toꞌ wanî namai, tepuꞌse toꞌ eꞌtoꞌpe, tîponaꞌnîkon tuiꞌsen kupî toꞌya namai. Toꞌ panamakî toꞌ pîꞌ tiaronkon eseurîma namai imakuiꞌpî pe. Tîîse morî pe toꞌ yeseru eꞌtoꞌpe toꞌ panamakî, innape Jesus kuꞌtoꞌpe toꞌya, tiaronkon saꞌnamatoꞌpe toꞌya toꞌ panamakî. Mîrîrî wenai tîponaꞌnîkon tuiꞌsen yapîtanîꞌtoꞌpe toꞌya toꞌ panamakî.
3 Mîrîrî warantî noꞌsantonon panamakî, morî pe toꞌ koꞌmantoꞌpe Paapa nama pîꞌ. Imakuiꞌpî pe toꞌ eseurîma namai tiaronkon pîꞌ, kureꞌne maiꞌ enîrî toꞌya namai. Mîrîrî warantî toꞌ panamakî tiaronkon wîriꞌsanyamîꞌ maasaronkon panpîꞌ yenupatoꞌpe toꞌya, morî pîꞌ toꞌ panamakî.
4 Mîrîrîya wîriꞌsanyamîꞌ maasaronkon panpîꞌ yenupatoꞌpe toꞌya, tînyokon saꞌnamatoꞌpe toꞌya, moropai tînmukukon saꞌnamatoꞌpe toꞌya, toꞌ panamakî. Tîîwarîrîꞌnîkon toꞌ etîꞌnînmatoꞌpe, teserukon tepuꞌse toꞌ koꞌmantoꞌpe, toꞌ panamakî.
5 Tînyokon pîꞌ neken toꞌ atausinpatoꞌpe tiaron pîꞌ pra, tewîꞌkon ta toꞌ esenyakaꞌmatoꞌpe mîrîrî poro tuutîi pra, morî pe eranmîra toꞌ koꞌmantoꞌpe, tînyokon maimu yawîrî toꞌ koꞌmantoꞌpe. Mîrîrî warantî toꞌ koꞌmantoꞌpe, imakuiꞌpî pe tiaronkon eseurîma namai Paapa maimu winîkîi, toꞌ panamakî.
6 Mîrîrî warantî warayoꞌkon, maasaronkon nîrî panamakî tîîwarîrîꞌnîkon toꞌ etîꞌnînmatoꞌpe teserukon tepuꞌse.
7 Amîrî nîrî tamîꞌnawîrî yairon kupî pîꞌ akoꞌmankî, tiaronkonya ayeraꞌmatoꞌpe moropai ankupîꞌpî warantî ikuꞌtoꞌpe toꞌya. Tepuꞌse toꞌ panamakî seruꞌyeꞌ pra.
8 Yairî toꞌ yeurîmakî, “Iseruku mîrîrî”, taa toꞌya namai. Apîꞌ, “Yairon pepîn mîrîrî”, taa toꞌya namai. Yairon pe eeseurîma ya, inkamoro ayeyatonon eppepî eserîke awanî, maasa pra apîꞌ toꞌ eseurîma eserîke pra awanî imakuiꞌpî pe.
9 Moropai tîkaraiwarîkon poitîrîtonon pe tîweꞌsanon panamakî. Tîkaraiwarîkon maimu yawîrî toꞌ eꞌtoꞌpe, tamîꞌnawîrî ituꞌse aweꞌtoꞌ yawîrî toꞌ eꞌtoꞌpe imaimu tîyuꞌpîꞌse toꞌ wanî namai.
10 Toꞌ panamakî tîkaraiwarîkon yemanne yamaꞌrunpa toꞌya namai, tîîse morî pe tîkaraiwarîkon yemanne koꞌmannîꞌtoꞌpe toꞌya. Mîrîrî wenai toꞌ nîkupî eraꞌma tamîꞌnawîronkonya morî pe. Mîrîrî yeꞌnen Paapa, upîikaꞌtînenkon pîꞌ yenupantoꞌ eta toꞌya nîrî morî pe.
11 Mîrîrî warantî innape Jesus kuꞌnenan koꞌmamî eꞌpai awanî maasa pra tamîꞌnawîronkon pemonkonyamîꞌ anpîikaꞌtîpai tîwanî pîꞌ Paapa esekaremekîꞌpî. Jesus Cristo yarimasaiꞌya wenai, epuꞌtî îꞌ kaiꞌma uurîꞌnîkon saꞌnamaꞌpîiya, moropai uurîꞌnîkon pîikaꞌtîꞌpîiya.
12 Mîrîrî yeꞌnen imakuiꞌpî unkupîkon rumakapaiꞌnîkon man. Imakuiꞌpî ankuꞌpai pra eꞌnîpaiꞌnîkon man. Tîîse morî pe koꞌmannîpaiꞌnîkon tîweꞌpanamai, imakuiꞌpî kupîꞌnîkon namai. Yairî Paapa maimu yawîrî koꞌmannîpaiꞌnîkon man.
13 Mîrîrî warantî ikuꞌpaiꞌnîkon, uurîꞌnîkon koꞌmamî tanne Jesus iipî nîmîkî pîꞌ, manniꞌ Jesus unapurîkon, kureꞌnan upîikaꞌtînenkon.
14 Tîîwarîrî aasaꞌmantaꞌpî uurîꞌnîkon yeꞌmapa kaiꞌma tamîꞌnawîron imakuiꞌpî koreꞌtapai, moropai morî pe uurîꞌnîkon ronapa tîmîrî ton pe eꞌnîtoꞌpe, morî kuꞌtoꞌpe taatausinpai.
15 Mîrîrî unekaremekîꞌpî ke toꞌ yenupakî. Tamîꞌnawîronkon pemonkonyamîꞌ yeurîmakî meruntî ke. Toꞌ yakoꞌmenkakî, toꞌ panamakî, toꞌ yenupanen pe eꞌkî, amîrî tîpîinamai pra toꞌ koꞌmamî namai.
