Sîrîrî Kaareta Paulo Nîmenukaꞌpî Tito Pia 3:1-15
3 Innape Jesus kuꞌnenan yenpenatanîꞌkî, tesaꞌkon pe tîweꞌsen manniꞌ ipîkku pe tîweꞌsen maimu yawîrî toꞌ eꞌtoꞌpe morî ankuꞌpai toꞌ eꞌtoꞌpe inkamoro tesaꞌkon ton pe.
2 Toꞌ yenpenatanîꞌkî imakuiꞌpî pe toꞌ eseurîma namai, tiaronkon yarakkîrî, toꞌ esiyuꞌpîtî namai, sokoroꞌ pe toꞌ wanî namai, eranmîra toꞌ eꞌtoꞌpe, morî pe toꞌ eꞌtoꞌpe tiaronkon pokonpe toꞌ yenpenatanîꞌkî.
3 Pena innape Jesus kupî rawîrî pakko pe uurîꞌnîkon wanîꞌpî, anîꞌ anetapai pra eꞌnîꞌpî. Esenkuꞌtînsaꞌ wanîꞌpî, imakuiꞌpî pîꞌ esekaꞌnunkaꞌnîꞌpî, uwakîrikon pe imakuiꞌpî kupîꞌpî uurîꞌnîkonya. Tiaronkon uyonpakon muꞌtunpaꞌpî. Toꞌ yemanne yuꞌse eꞌnî wenai kinmuwanîꞌpî. Tiaronkon wanîꞌpî uyewanmakon pe ipîra moropai uurîꞌnîkon kupîꞌpî tiaronkonya nîrî tewanmakon pe.
4 Tîîse mîrîrî yeꞌka pe eꞌnî tanne, Paapaya upîikaꞌtînenkonya usaꞌnamaꞌpîkon.
5 Moropai upîikaꞌtîꞌpîiyaꞌnîkon, imakuiꞌpî yapai umoꞌkaꞌpîiyaꞌnîkon. Morî unkupîꞌpîkon wenai upîikaꞌtîiya pra awanîꞌpî. Tîîse kureꞌne tîꞌnokoꞌpî pe uurîꞌnîkon eraꞌmaꞌpîiya. Mîrîrî yeꞌnen upîikaꞌtîꞌpîiyaꞌnîkon. Morî Yekaton Wannîya umakuyikon ronaꞌpî moropai uurîꞌnîkon yenpoꞌpîiya enenan pe eꞌnîtoꞌpe Paapa winîkîi. Moropai amenan uyeserukon ton yekaꞌmaꞌpîiya morî pe koꞌmannîtoꞌpe.
6 Mîîkîrî Morî Yekaton Wannî yarimaꞌpî Paapaya upîikaꞌtîtoꞌpeiyaꞌnîkon, Jesus Cristo upîikaꞌtînenkon nîkupîꞌpî wenai.
7 Morî pe tîwanî yeꞌnen, “Yairon pe awanîkon tarîpai”, taasaꞌ Paapaya wanîꞌpî upîꞌnîkon, îꞌ rî morî kupî pra tîîse. Mîrîrî taꞌpîiya enen koꞌmannîtoꞌpe tîîpia ipatîkarî. Mîrîrî nîmîkî pîꞌ koꞌmannî.
8 Ayenkuꞌtîuya pepîn. Innape tauya sîrîrî. Mîrîrî yeꞌnen mîrîrî unekaremekîꞌpî ke toꞌ yenupakî innape Jesus kuꞌnenan pîꞌ, morî kupî pîꞌ toꞌ koꞌmantoꞌpe. Maasa pra mîrîrî unekaremekîꞌpî wanî morî pe puꞌkuru. Moropai tamîꞌnawîronkon pîikaꞌtîiya.
9 Tîîse teesiyuꞌpîꞌse pra akoꞌmankî tiaronkon yarakkîrî, Moisés nurîꞌtîya yenupantoꞌ pîꞌ, utamokon eseꞌkon rîꞌpî pîꞌ. Maasa pra îꞌ pe pra rî esiyuꞌpîꞌnîtoꞌ wanî. Mîrîrî wanî imakuiꞌpî pe. Mîrîrî tîpîinamai pra eꞌkî.
10 Esiyuꞌpîꞌnî emapuꞌtînen moro awanî ya akoreꞌtaꞌnîkon, mîîkîrî yeurîmakî. Moropai amaimu yuukuiya pra awanî ya, inîꞌrî yeurîmakî. Mîrîrî tîpo, yuukuiya pra aakoꞌmamî ya, tîwî nîsi. Inîꞌrî mîîkîrî yarakkîrî kasarîi.
11 Maasa pra imakuiꞌpî kuꞌnen mîîkîrî. Paapa maimu pîinamaiya pepîn. Imakuiꞌpî inkupîꞌpî wenai eesepuꞌtî.
Tiwinanoꞌpî Pe Tito Panamaiya
12 Aapia Ártemas ou Tíquico yarimasauꞌya yai, mattîi Nicópolis po eseponîtoꞌpe. Maasa pra miarî Nicópolis po konoꞌ aniwaꞌkapai wai.
13 Pemonkonyamîꞌ ton pe teeseurîmasen Zenas moropai Apolo pîikaꞌtîkî. Toꞌ ataponka koꞌmannîpî. Mîrîrî yeꞌnen îꞌ yuꞌse toꞌ wanî ya, itîîkî, îꞌ ton pra toꞌ wanî namai.
14 Uyonpakon innape Jesus kuꞌnenanya morî kupî eꞌpai awanî. Tîweꞌtarumaꞌtîsanon pîikaꞌtî toꞌya eꞌpai awanî. Mîrîrî kupî tîuyaꞌnîkon pîꞌ toꞌ esenupa eꞌpai awanî, morî pe tiaronkon pîikaꞌtîtoꞌpe toꞌya, moropai îꞌ ton pra tîwanîkon namai, toꞌ esenyakaꞌma eꞌpai awanî, enyaꞌne pe pra.
15 Tarîpai tauya apîꞌnîkon. Tamîꞌnawîronkon uupiawonkon maimu man aapia. Anna maimu man uyonpayamîꞌ innape Jesus kuꞌnenan pia, aapiawonkon pia. Anna saꞌnamanenan inkamoro.
Moropai epîrema sîrîrî apona. Tauya Paapa pîꞌ: —Tamîꞌnawîrî morî pe aweꞌtoꞌ tîîkî toꞌ pia —tauya Paapa pîꞌ. Mîrîrî neken.
