“Mîîkîrî Paapaya . . . toꞌ karawatoꞌ yaꞌmananîpî toꞌ yenu parukon inîꞌ toꞌ karau namai. Tarî anîꞌ samanta pepîn. Anîꞌ esewankonoꞌma pepîn. Anîꞌ karau pepîn inîꞌrî. Anîꞌrî neꞌneꞌ moronka pepîn. Maasa pra pena îꞌ kaiꞌma koꞌmannîtoꞌ, mîrîrî esuwaꞌkaꞌpî yeꞌnen –taꞌpîiya.” — Apocalipse 21:3, 4, Amenan pe Paapaya Uyetatoꞌkon.

Amîrî. . .

esenyakamanto morî awaakîri konekaya eꞌpaino. — Isaías 65:21-23.

koꞌmamî eꞌpaino tarî Pata pona paran moropai eꞌtarumaꞌtîntoꞌ tonpra. — Isaías 25:8; 33:24.

koꞌmamî eꞌpaino ipatîkarî ayonpayamîꞌ moropai tîpemonkonoyamîꞌ yarakkîrî taatausinpai. — Salmo 37:11, 29.

Inna, îꞌ wani awanî eꞌnen:

• Îꞌ taa Paapaya manni konekaiya meruntî ke mîîkîrî wanî eꞌnen. Bíbliaya, nikin Paapa Jeová esaꞌtî “meruntî puꞌkuru tamîꞌnawîron yentai tîweꞌsen pe”, îꞌ wani awanî eꞌnen mîîkîrî meruntîri eꞌtîꞌka pepîn. (Apocalipse 15:3) Mîrîrî eꞌnen, mîîkîrîya Pata etinyakama morî pataꞌse pe. Oꞌnon yeꞌka pe taa Bíbliaya, “mîrîrîkon wanî saꞌme pra mîîkîrî Paapa pia”. — Mateus 19:26.

• Îꞌ taa Paapaya manni seeni koneka yuꞌse wanî. Mîîkîrî enpanata samantaꞌsan pemonkonyamîꞌ pî inîꞌrî inkamoro eraꞌma yuꞌse Paapa wanî toꞌ koꞌmantoꞌpe Pata pona. — Jó 14:14, 15.

  Bíbliaya nîrî yenpoika Paapa munmu, Jesusya, priꞌyawonkon pepîn yepiꞌtîpîtîꞌpîiya. Îꞌ wani awanî eꞌnen? Mîrîrî koneka yuꞌse mîîkîrî wanîꞌpî eꞌnen. (Marcos 1:40, 41) Tamîꞌnawîrî konekapîtîꞌpî Jesusya tiyun warantî mîrîrî eꞌnen pemonkonyamîꞌ pîikaꞌtî yuꞌse wanîꞌpî. — João 14:9.

  Mîrîrî eꞌnen, inna taa uurînîkonya Jeová pî moropai Jesus pî, uurînîkon pîikaꞌtî yuꞌse toꞌ wanî eꞌnen, uurînîkon koꞌmantoꞌpe morî pe amenan Pataya. — Salmo 72:12-14; 145:16; 2 Pedro 3:9.