Ayewîꞌ taawonkon eꞌpai man taatausinpai, tîîse îꞌ rîkon eꞌkupîya esewankonoꞌma eꞌpainon. (Eclesiastes 9:11; Lucas 13:4) Tîîse moro man anna Paapa morî puꞌkuru, anna saꞌnamanen, mîîkîrîya uurînîkon pîikaꞌtî eꞌpainon îꞌ pensa eꞌtarumaꞌtîntoꞌ wanî ya. Senni panamatoꞌ yawîrî amîrî wanî ya, ayewîꞌ taawonkon wanî morî pe nîrî. Îꞌ pensa eꞌtarumaꞌtîntoꞌ wanî tanne, yapîtanîpîyaꞌnîkon.

Îꞌ TAA PAAPA MAIMUYA: ‘Tamîꞌnawîrî kureꞌne eesenumenkatoꞌkon mîrîrî rumakatî Paapa yenyaꞌ, maasa pra mîîkîrîya neken tamîꞌnawîrî ikoneka amîrîꞌnîkon ton pe.’ (1 Pedro 5:7) Enpanatakî Paapaya imakuiꞌpî koneka pra man amîrî tonpe. (Tiago 1:13) Îꞌ pensa amîrî erepamîya Paapa pia, amîrî pîikaꞌtîiya wei kaisarî. (Romanos 8:31) “Ayewan arakkanmokakî iipia.” — Salmo 62:8 TNM.

Paapa Maimu eꞌmenukasaꞌ eraꞌmaya wenai piîkaꞌtîntoꞌ eporîya mîrîrîya. Seeni wenai “mîîkîrîya tamîꞌnawîron uurîꞌnîkon esewankonoꞌmatoꞌ winîpai upîikaꞌtîkon”. (2 Coríntios 1:3, 4; Romanos 15:4) Mîîkîrîya ‘ayewankon ereutanîpî. Moropai morî pe eesenumenkatoꞌkon konekaiyaꞌ. — Filipenses 4:6, 7, 13.

Îꞌ KONEKA EꞌPAI AWANÎ:

• Epîremakî Paapa Jeová pî morî pe amîrî esenumenkatoꞌ eꞌtoꞌpe taatasiꞌsirunpai pra.

• Morî pe esenumenkakî, mîrîrî tîpo morîkon imenkaya.

Îꞌ TAA PAAPA MAIMUYA: “Epuꞌnen pe itewan wanî ya epuꞌtîtoꞌ wanî eporîiya, epuꞌnenanya eta wanî ya, epuꞌtîtoꞌ yuwa toꞌya eꞌpainon.” (Provérbios 18:15 TNM) Morî pe tamîꞌnawîrî yuwakî mîrîrî epuꞌtîpa. Eraꞌmakî îꞌ yuse ayewîꞌ taawonkon wanî. Eseurîmakî toꞌ yarakkîrî. Îꞌ taa toꞌya manni etakî. — Marcos 4:23.

Amîrîya saꞌnama manni saꞌmantasaꞌ ya? Aranne pe pra eꞌkî, oꞌnon yeꞌka pe amîrî wanî ekaremekî. Enpanatakî Jesus nîrî karawaꞌpî. (João 11:35; Eclesiastes 3:4) Morî pe amîrî erîꞌkapî eꞌpai man moropai awetun nîrî, mîrîrîya apîikaꞌtî. (Marcos 6:31) Mîrîrî wenai aweꞌtarumaꞌtîya, mîrîrî yapîtanîꞌpîya eꞌpainon.

Îꞌ KONEKA EꞌPAI AWANÎ:

• Îꞌ imakuiꞌpî eꞌkupî tînîmîꞌse pra, eseurîmakî ayonpayamîꞌ pokonpe, sîrîrî pe rî mîrîrî konekakî. Senni konekaya ya ayewîꞌ taawonkon yarakkîrî morî pe wanî, mîrîrî wenai îꞌ pensa eꞌtarumaꞌtîntoꞌ wanî ya amîrî yuwa toꞌya.

• Tiaronkon yarakkîrî nîrî eseurîmaꞌkî, inkamoro esuwaꞌkaꞌpî eꞌtarumaꞌtîntoꞌ pî nîrî, mîrîrî yeꞌnen inkamoroya amîrî pîikaꞌtî.

Îꞌ TAA PAAPA MAIMUYA: “Yairon ayonpaya asaꞌnama tîkonarî, ayonpa eena morî pe îꞌ pensa eꞌtarumaꞌtîntoꞌ wanî ya.” (Provérbios 17:17 TNM) Ayonpayamîꞌ man amîrî pîikaꞌtî yuꞌse, tîîse îꞌ pe mîrîrî wanî epuꞌtî toꞌya pra man. Moriya, toꞌ pî kaꞌkî îꞌ yuꞌse awanî. (Romanos 10:1) Pîikaꞌtîntoꞌ nîrî yuwakî Paapa Maimu epuꞌnenan pia, inkamoroya apîikaꞌtî. Inkamoroya Paapa saꞌnamatoꞌ tîrî eꞌpainon amîrî tausinpatoꞌpe. — Tiago 5:14.

Paapa pî innape eꞌkoiꞌkon yarakkîrî tîmurunkun pe eꞌkî, inkamoroya apîikaꞌtî eꞌpainon. Tiaronkon nîrî pîikaꞌtî amîrîya eꞌpainon, mîrîrîya amîrî yausinpa. Eseurîmakî toꞌ yarakkîrî innape amîrî eꞌtoꞌ pî Jeová pî moropai îꞌ koneka Paapaya pî nîrî. Esenyakaꞌman pî koꞌmankî tiaronkon pîikaꞌtîpa moropai tiwinsarî amîrî wanî eserîke pra man, tiaronkonya amîrî saꞌnama pî man, amîrî yausinpatoꞌpe. — Provérbios 18:1; 1 Coríntios 15:58.

Îꞌ KONEKA EꞌPAI AWANÎ:

• Eseurîmakî ayonpa yarakkîrî inna taaya yeꞌnen ipî moropai mîîkîrîya apîikaꞌtî.

• Eseurîmakî îꞌ yuꞌse amîrî eꞌtoꞌ pî, yairî eꞌkî mîîkîrî pî.