Îꞌ pensa more esenposaꞌya taatausinpai more yuntonon wanî, tîîse toꞌ esewankonoꞌma nîrî mîrîrî pî. Tarîpai, yun pe, san pe amîrîꞌnîkon enasaꞌ yeꞌnen, morî pe anmukukon eraꞌmayaꞌnîkon. Mîrîrî wenai aweꞌtunkon pepîn morî pe moropai amîrîꞌnîkon oꞌmaꞌta mîrîrî pî. Mîrîrî yeꞌnen amîrîꞌnîkon moꞌta eꞌpai man morî pe anmukukon eraꞌmatoꞌpe amîrîꞌnîkonya moropai amîrîꞌnîkon eꞌmarimantoꞌ nîrî. Oꞌnon yeꞌka pe Paapa Maimuya amîrîꞌnîkon pîikaꞌtî eꞌpainon?

Îꞌ TAA PAAPA MAIMUYA: “Maasa pra eꞌsaꞌnamantoꞌ wanî teekoreꞌmasen pe pra, morî pe awanî.” Moropai esaꞌnamatoꞌ wanî “uuwarîrîꞌnîkon neken esenumenkan pepîn tîîse tiaronkon pîꞌ nîrî enpenatan. Atatasiꞌsirunpai pra eꞌnî pepîn.” (1 Coríntios 13:4, 5) San pe eꞌnîsaꞌ nai, mîrîrî yeꞌnen morî pe anre eraꞌmaya. Anyo esewankonoꞌma eꞌpai man, mîîkîrî yarakkîrî amîrî eseurîma pra wanî yeꞌnen. Tîwî anyo tîkuꞌse pra eꞌkî, mîîkîrî yarakkîrî eꞌpai amîrî man eseurîmakî. Teesemiꞌtapai pra, amîrî eꞌpai man mîîkîrî yarakkîrî moropai morî pe anre eraꞌmakî anyo yarakkîrî.

Warayoꞌkon, morî pe anoꞌpîkon koꞌmannîpîyaꞌnîkon eꞌpai man. (1 Pedro 3:7) Tarîpai anoꞌpî esenyakaꞌma eꞌpai man kureꞌne, mîrîrî yeꞌnen anoꞌpî apîꞌkaꞌsaꞌ pe wanî moropai mîrîrî pî esewankonoꞌma. Tiaron pensa mîîkîrî ta siꞌsirunpa mîrîrî pî, tîîse moo eꞌpai awanî. Enpanatîtî, morî pe wanî manni soꞌkoro pe pepîn pia, morî pe pra wanî soꞌkoro pe tîweꞌsen pia. (Tiago 1:19) Epuꞌnen pe eꞌkî moropai anoꞌpî pîikaꞌtîkî. — Filipenses 1:9.

Îꞌ KONEKA EꞌPAI AWANÎ:

• Yun: Anoꞌpî pîikaꞌtîkî anmukukon eraꞌmaya maasa anoinna wanî tanne. Seꞌ tapairî tîweꞌse pra eꞌkî îꞌ kon pî rî, anoꞌpî pîikaꞌtîkî, anmu eraꞌmakî mîîkîrî yarakkîrî siꞌma.

• San: Îꞌ pensa anpîikaꞌtîpai anyo wanîya, inna kaꞌkî ipî, mîîkîrîya amîrî pîikaꞌtîtoꞌpe. Îꞌ konekaiya ya awakîri pe pra, amîrî ekoreꞌma eserîke pra man mîîkîrî pî. Morî pe eꞌtoꞌ yarakkîrî yenpo ya oꞌnon yeꞌka pe mîrîrî konekatoꞌpe mîîkîrîya.

Îꞌ TAA PAAPA MAIMUYA: “Inkamoro eenasaꞌ mîrîrî, tiwinan pemonkon warantî.” (Efésios 5:31) Tînmuku ke amîrîꞌnîkon eenasaꞌ man, tîîse Paapa Maimuya taꞌpî man amîrîꞌnîkon eenasaꞌ tiwinan pemonkon panpe. Tamîꞌnawîrî morî pe ikonekaꞌtî aweꞌmariꞌmatoꞌkon eꞌtoꞌpe yairî.

Tînyo ke awanî yeꞌnen, tenkî kaꞌkî ipî tamîꞌnawîrî îꞌ kon konekaiya yeꞌnen amîrî pîikaꞌtîtoꞌpe. Mîrîrî wanî merîsin yeꞌka pe, mîrîrîya ipîikaꞌtî. (Efésios 4:29) Tînoꞌpî ke awanî yeꞌnen anoꞌpî pî kaꞌkî mîîkîrî saꞌnamaya, morî pe îꞌ kon konekaiya yeꞌnen amîrî tonpe moropai anmukukon tonpe nîrî. — 1 Pedro 3:7.

“Mîrîrî yeꞌnen anîꞌya ituꞌse tîweꞌtoꞌ yawîrî ikupî eꞌpai pra man. Tîîse tiaronkon pîikaꞌtîtoꞌpe ikupî eꞌpai man.” (1 Coríntios 10:24) Wei kaisarî morî konekaya eꞌpainon anoꞌpî tonpe moropai anyo tonpe. Saꞌnîrî siꞌma tîmurukun pe eꞌtî, eseurîmatî morî pe man, taaya anyo pî anoꞌpî pî moropai îꞌ taayaꞌnîkon manni etatî morî pe. Tarîpai, tînoꞌpî ke, tînyo ke amîrîꞌnîkon eenasaꞌ man, mîrîrî yeꞌnen eseꞌnîtoꞌ konekayakon eꞌpai man, saꞌnîrî siꞌma esenumenkakon mîrîrî pî. Paapa Maimuya taꞌpî man: “Ayarakkîrî eꞌpai pra wai — tîkai pra. Tîîse saꞌnîrî tîweꞌtoꞌkon mîꞌpannîpî eꞌpai awanî, ituꞌse tîwanîkon ya.” (1 Coríntios 7:3-5) See panpe eseurîmakon eꞌpai man yairî senni eseꞌnîtoꞌ pî. Mîrîrî yeꞌnen teesemiꞌtapai pra eꞌtî, anyo pî, anoꞌpî pî, morî pe eꞌtî, mîrîrîya amîrîꞌnîkon eꞌmarimantoꞌ kupî meruntî ke.

Îꞌ KONEKA EꞌPAI AWANÎ:

• Saꞌnîrî amîrîꞌnîkon koꞌmamî eꞌpai man, eseurîmaꞌtî morî pe îꞌ kon pî rî.

• Moropai îꞌ pensa kaareta imenukaꞌkî anoꞌpî tonpe, anyo tonpe, îꞌ rî anyo neraꞌma ton, anoꞌpî neraꞌma ton tîîkî. Senni aweꞌtîrî ton weenai yenpoya anyo saꞌnamaya, anoꞌpî saꞌnamaya nîrî.

Îꞌ TAA PAAPA MAIMUYA: “Moropai more pe awanîꞌpî pata pai sîrîrî Paapa maimu eꞌmenukasaꞌ pîꞌ eesenupaꞌpî. Mîrîrî epuꞌtîya wenai epuꞌnen pe akupîiya.” (2 Timóteo 3:15) Esenumenkakî oꞌnon yeꞌka pe maasa more pe anre wanî tanne yenupatoꞌpe amîrîya. Maasa aroꞌtaya anre wanî tanne amîrî etaiya morî pe, amîrî eseurîmatoꞌ epuꞌtîiya. Maasa eꞌmenukasaꞌ pî amîrî eseurîmaya, mîîkîrîya epuꞌtî pepîn, tîîse mîîkîrî arentasaꞌya aweꞌmenukasaꞌ manni wanî iwakîri pe.

Anre esenposaꞌ tanne Paapa Maimu pî eseurîma mîîkîrîya etatoꞌpe. Epîremakî Jeová pî, mîîkîrîya eta eꞌpainon. (Efésios 6:4) Îꞌ pensa tîmurukun pe siꞌma amîrîꞌnîkon suꞌminaya, eseurîmaꞌtî Paapaya tamîꞌnawîrî ikonekasaꞌ manni pî. (Atos 4:24; Salmo 78:3, 4) Anmukukonya eraꞌma Paapa Jeová saꞌnamayaꞌnîkon, mîrîrîya mî- îkîrî yenupa mîîkîrîya Paapa nîrî saꞌnamatoꞌpe.

Îꞌ KONEKA EꞌPAI AWANÎ:

• Amîrîꞌnîkon epîrematoꞌ wenai epuꞌnen pe awanîkonpa Paapa pî esaꞌtî, anmukukon pîikaꞌtîkonpa.

• Anmukukon yarakkîrî eseurîmatî maasa more pe wanî tanne mîîkîrî esenupatoꞌpe.