ESENUPANTOꞌ 7
Anmukukon panamatî
“Seeni umaimu wanî eꞌpainon ayewanya; mîrîrî yenupaya eꞌpai man anmukuyamîꞌ pî.” — Deuteronômio 6:6, 7 (TNM)
Paapaya eꞌmarimantoꞌ konekaꞌpî, mîrîrî yeꞌnen tînmukukon eraꞌmatoꞌpe toꞌya taꞌpî. (Colossenses 3:20) Yun, san, amîrîꞌnîkonya anmukukon yenupa eꞌpai man Paapa Jeová esaꞌnamatoꞌpe toꞌya, mîrîrî wenai morî pe toꞌ eena. (2 Timóteo 1:5; 3:15) Amîrîya epuꞌtî eꞌpai man îꞌ wanî toꞌ yewankon ya. Amîrî yeseru nîrî wanî morî pe puꞌkuru. Morî pe wanî aapia, eꞌmaiꞌpe Paapa yenupatoꞌ tîrîya ayewanya. — Romanos 7:22.
1 ERANMÎRA EKÎ ANMUKUYAMÎꞌ ESEURÎMATOꞌPE AMÎRÎ YARAKKÎRÎ
Îꞌ TAA PAAPA MAIMUYA: ‘Tiaron eseurîma ya, morî pe etatî eꞌmaiꞌ pe, kaꞌneꞌ pe teeseurîmai pra.’ (Tiago 1:19) Eranmîra eꞌkî anmukuyamîꞌ eseurîmatoꞌpe amîrî yarakkîrî. Moriya, îꞌ pensa îꞌ wanîya anmukukon eseurîma amîrîꞌnîkon yarakkîrî, amîrîꞌnîkonya toꞌ eta. Ewanmîra amîrî wanî ya, aranne pe pra anmukuyamîꞌ wanî toꞌ eseurîma amîrî yarakkîrî. (Tiago 3:18) Tîîse sokoroꞌ pe amîrî wanî ya, tewankon yarakkama toꞌya, toꞌ eseurîma pepîn. Teesemiꞌtapai pra eꞌtî anmukukon yarakkîrî, aronne toꞌ saꞌnamayaꞌnîkon eꞌpai man. — Mateus 3:17; 1 Coríntios 8:1.
Îꞌ KONEKA EꞌPAI AWANÎ:
-
Îꞌ pensa anmukukon wanîya eseurîma yuꞌse amîrîꞌnîkon yarakkîrî, toꞌ etatî morî pe.
-
Anmukukon yarakkîrî eseurîmatî wei kaisarî. Îꞌ pensa morî pe wanîya moropai îꞌ pensa morî pe pra wanî tanne.
2 Îꞌ TAA TOꞌYA YUꞌSE TOꞌ WANÎ EPUꞌTÎ
Îꞌ TAA PAAPA MAIMUYA: “Anîꞌ wanîya epuꞌnen pe, morî pe eena.” (Provérbios 16:20 TNM) Morî pe anmukukon epuꞌtî eꞌpai amîrîꞌnîkon wanî, îꞌ yuꞌse toꞌ eꞌtoꞌ wanî toꞌ yewanya. Maasaronkon yeseru wanî toꞌ eseurîma teesenumenkai pra eꞌmaiꞌpe. “Eꞌmaiꞌpe yuukuya etaya rawîrî, pakko pe awanî.” (Provérbios 18:13 TNM) Moriya, kaꞌneꞌ pe sokoroꞌ pe teenai pra eꞌkî. — Efésios 4:32.
Îꞌ KONEKA EꞌPAI AWANÎ:
-
Îꞌ wanî pra man îꞌ pî anmukukon eseurîmaya, tîwî toꞌ eseurîma tanne toꞌ etatî, sokoroꞌ pe tîweꞌse pra eꞌtî toꞌ pî.
-
Enpanatakî oꞌnon yeꞌka pe amîrî eꞌtoꞌ wanîꞌpî pî pena maasaron pe wanîꞌpî yai, îꞌ aweꞌpîtîꞌpî amîrî wakîri pe.
3 EꞌMARITÎMASAN SAꞌNÎRÎ SIꞌMA MORÎ PE AMÎRÎꞌNÎKON ESENUMENKATOꞌ KUꞌTÎ
Îꞌ TAA PAAPA MAIMUYA: “Etakî unmu, ayun panamatoꞌ, asan yenupatoꞌ tîrumakai pra eꞌkî.” (Provérbios 1:8 TNM) Yun, san, wanî tînmukukon yentai, mîrîrî yeꞌnen toꞌ panamatoꞌya yuꞌse Jeová man. Toꞌ yenupayaꞌnîkon eꞌpai man amîrîꞌnîkon maimu yawîrî toꞌ eꞌtoꞌpe. (Efésios 6:1-3) Moreyamîꞌya eraꞌma, morî pe pra tîyunkon yeseru wanî. (1 Coríntios 1:10) Saꞌnîrî siꞌma tiaron pe esenumenkatoꞌ wanîꞌ ya, amîrîꞌnîkon eseurîma eserîke pra man, maasa pra amîrîꞌnîkon pia anmukukon wanî tanne. Tînîn pî amaimukon yawîrî pra toꞌ wanî eꞌpainon.
Îꞌ KONEKA EꞌPAI AWANÎ:
-
Eseurîmatî saꞌnîrî siꞌma Anmukukon panamatî pî.
-
Anyo moropai anoꞌpî esenumenkatoꞌ epuꞌkî, îꞌ pensa anmukukon ipanamayaꞌnîkon ya.
4 EꞌMAIꞌPE AMÎRÎꞌNÎKON ESENUMENKA EꞌPAI MAN
Îꞌ TAA PAAPA MAIMUYA: “Morî pe more yenupakî, mîîkîrî asaatoꞌpe morî eꞌma taawîrî.” (Provérbios 22:6 TNM) Morî pe anmukukon yenupatî, tîwî toꞌ tîkuꞌse pra. Eꞌmaiꞌpe amîrîꞌnîkon esenumenka eꞌpainon, anmukukon panamatî, amaimukon yawîrî pra toꞌ wanîya. (Salmo 127:4; Hebreus 12:11) Imakuiꞌpî konekasaꞌ anmukukonya ya, toꞌ panamayaꞌnîkon eꞌpai wanî. Tiaron pensa meruntî ke toꞌ pî eseurîmakon eꞌpainon. Tîîse, eseurîmatî anmukukon yarakkîrî, toꞌya epuꞌtoꞌpe îꞌ tonpe mîrîrî yeꞌka pe koneka toꞌya eserîke pra wanî. (Hebreus 12:6) Moropai nîrî, toꞌ pîikaꞌtîtî Paapa Maimu saꞌnamatoꞌpe moropai epuꞌtîtoꞌpe toꞌya. (Tiago 1:25) Mîrîrîya toꞌ pîikaꞌtî epuꞌtîtoꞌpe îꞌ wanî morî pe moropai îꞌ wanî morî pe pra. — Hebreus 5:14.
Îꞌ KONEKA EꞌPAI AWANÎ:
-
Anmukukon yenupaꞌtî Paapa man enen, mîîkîrî pî inna taa eꞌpai man.
-
Anmukukon pîikaꞌtîtî imakuiꞌpî yuwa toꞌya namai internet ya, mararî pra imakuiꞌpî wanî yeꞌnen. Epuꞌtîtoꞌpe toꞌya, toꞌ pîikaꞌtîtî îꞌ wanî morî pe moropai îꞌ wanî morî pe pra. Toꞌ pîikaꞌtîtî, imakuisan pemonkonyamîꞌya toꞌ yenkuꞌtî namai.
“Morî pe more yenupakî, mîîkîrî asaatoꞌpe morî eꞌma ya.”
