Amîrîya eraꞌmaꞌpî senni kaareta ya, Paapa Maimuya mararî pra panamatoꞌkon man, mîrîrîya amîrî pîikaꞌtî moropai ayewîꞌ taawonkon nîrî. Taatausinpai amîrî yuꞌse Jeová man. Mîîkîrîya taꞌpî man, eꞌmaiꞌpe mîîkîrî yapurîtoꞌ tîrîya ya, ‘tamîꞌnawîrî manniꞌ ituꞌse aweꞌtoꞌkon tîrîiya aapiaꞌnîkon.’ (Mateus 6:33) Kureꞌne Paapa man amîrî yuꞌse itonpa pe aweꞌtoꞌpe. Mîrîrî yeꞌnen, Jeová yonpa pe aweꞌtoꞌ kuꞌkî iniꞌ panpîꞌ. Senni wanî morî pe puꞌkuru îꞌ rî yentai. — Mateus 22:37, 38.

Îꞌ TAA PAAPA MAIMUYA: “Moropai taa Uyepotorîkonya, meruntî puꞌkuru manniꞌya: Uurî wanî pe wai ayunkon pe moropai amîrîꞌnîkon wanî pe man unmukuyamîꞌ pe taiya.” (2 Coríntios 6:18) Paapa man itonpa pe amîrî yuꞌse mararî pra tîwanîkonpe iipia. Mîrîrî yeꞌnen taiya: “Eepîremakon pîꞌ akoꞌmantî tîwîrî, tîrumakai pra”. (1 Tessalonicenses 5:17) Mîîkîrî man kureꞌne amîrî esenumenkatoꞌ, amîrî eꞌtarumaꞌtîntoꞌ wanî manni epuꞌtî yuꞌse. (Filipenses 4:6) Îꞌ pensa amîrî epîremaya ayewîꞌ tawonkon yarakkîrî, inkamoroya eraꞌma inna taaya Paapa pî.

Eseurîma eꞌpai man Paapa yarakkîrî moropai amîrîya mîîkîrî eta eꞌpainon. Oꞌnon yeꞌka pe? Esenupantoꞌ wenai Paapa Maimu pî moropai tiaron kaaretakon eꞌmenukasaꞌ Paapa Maimu wenai nîrî. (Tiago 1:25) Esenumenkakî îꞌ pî amîrî esenupa manni pî. (2 Timóteo 2:7) Paapa etaya eꞌpainon nîrî emurukuntîtoꞌ ta yonpakon pokonpe. — Hebreus 10:25.

Jeová pî eseurîman tiaronkon pemonkonyamîꞌ yarakkîrî, mîrîrîya uurînîkon kupî Jeová yonpa pe. Inîꞌ panpîꞌ eseurîman ya mîrîrî pî, aminke maꞌre uurînîkon ereꞌpamî Paapa Jeová pia. — Mateus 28:19, 20.

Îꞌ KONEKA EꞌPAI AWANÎ:

• Wei kaisarî Paapa Maimu eꞌmenukasaꞌ eraꞌmaya moropai epîrema.

• Amîrî ayewîꞌ taawonkon yarakkîrî eꞌmaiꞌpe Paapa Maimu epuꞌtî mîrîrî tîpo asuꞌminakon.

Îꞌ TAA PAAPA MAIMUYA: “Aminke pra Paapa pia erepantî, moropai aapiaꞌnîkon aakoꞌmamî.” (Tiago 4:8) Ayewîꞌ taawonkon yarakkîrî siꞌma Paapa yapurîtî, mîrîrî tîrumakai pra. (1 Timóteo 3:4) Tîîse, inîꞌ panpîꞌ ikonekakî: Paapa eꞌpai man wei kaisarî aapia. Amîrî eseurîma ya mîîkîrî pî tîkoꞌnarî, amîrî ereutasaꞌ tanne ayewîꞌ ta, amîrî eseurîma ya eꞌma taawîrî siꞌma, aweꞌtun ya moropai aweꞌmîꞌsaꞌkaya ayewîꞌ taawonkon pokonpe, Paapa yonpa pe eena. (Deuteronômio 6:6, 7; 2 Timóteo 3:14, 15) Josué panpe morî pe ikuꞌkî, mîîkîrîya taꞌpî: “Uurî moropai uyewîꞌ taawonkon koꞌmamî Jeová pia.” — Josué 24:15 TNM.

Îꞌ KONEKA EꞌPAI AWANÎ:

• Morî pe ekonekatî ayewîꞌ taawonkon pîikaꞌtîpa tiwin pî siꞌma.