ESENUPANTOꞌ 4
Oꞌnon yeꞌka pe pîrata yekaꞌmayaꞌnîkon
“Îꞌ pensa morî pe eseurîmansaꞌ ya îꞌ pî uurînîkon esenumenkasaꞌ manni wanî eꞌpainon morî pe.” — Provérbios 20:18 (TNM)
Tamîꞌnawîrî uurînîkon man pîrata yuꞌse yewîꞌ tawonkon pîikaꞌtîtoꞌpeꞌnîkon. (Mateus 6:11) Maasa maꞌre pîrata mîrîrî uurînîkon pîikaꞌtînen. (1 Timóteo 6:8) Amîrî inyo amîrî inoꞌpî pîrata pî taise eseurîmakon pepîn saꞌnîrî siꞌma, amîrîꞌnîkon ekoreꞌma eserîke pra man mîrîrî wenai. (Efésios 4:32) Îꞌ pensa amîrîꞌnîkon eseurîmaya oꞌnon yeꞌka pe pîrata yekaꞌmayaꞌnîkon pî, inna taaya anoꞌpî pî anyo pî nîrî.
1 MORÎ PE EꞌKONEKATÎ
Îꞌ TAA PAAPA MAIMUYA: “Aꞌkî, anîꞌ esenumenka ya kawînan ton koneka pîꞌ, eꞌmaiꞌ pe îꞌ warapo kaisarî tîtînirurî wanî eraꞌmaiya eꞌpai awanî. Yaretîꞌka eserîke awanî epuꞌtîuya ikonekaiya. Mîrîrî epuꞌse eesenumenka eꞌpai awanî.” (Lucas 14:28) Morî pe puꞌkuru wanî saꞌnîrî siꞌma amîrîꞌnîkon eseurîmaya oꞌnon yeꞌka pe pîrata yekaꞌmayaꞌnîkon pî. (Mateus 18:19) Saꞌnîrî siꞌma esenumenkatî îꞌ yemayaꞌnîkon moropai îꞌ warapo kaisarî pîrata yekaꞌmayaꞌnîkon eꞌpainon. (Tito 2:3-5) Kureꞌne inîꞌ panpîꞌ pîrata wanîya tamîꞌnawîrî yaretîꞌkayaꞌnîkon eserîke pra wanî. Kureꞌne epeꞌmîra tîweꞌse pra eꞌtî. Amîrîꞌnîkon pîrata rî neken yekaꞌmatî. — Mateus 18:25; Provérbios 21:5.
Îꞌ KONEKA EꞌPAI AWANÎ:
-
Kapoi yaretîꞌka tîpo, pîrata esaꞌ pe wanîkonya, saꞌnîrî siꞌma esenumenkatî oꞌnon yeꞌka pe mîrîrî yekaꞌmayaꞌnîkon eꞌpainon.
-
Îꞌ pensa pîrata etîꞌkaya amîrîꞌnîkon eseurîma kureꞌne mîrîrî tîꞌkayaꞌnîkon namai. Siiniꞌ poro ayaꞌreꞌkon yonpayaꞌnîkon eserîke pra wanî, ayewîꞌkon ta entamoꞌkatî apîratarikon etîꞌka namai.
2 YAIRÎ EꞌTÎ MOROPAI MORÎ PE MÎRÎRÎ IKONEKATÎ
Îꞌ TAA PAAPA MAIMUYA: “Anna esenyakaꞌma yeseru wanî yairî epuꞌtî Paapaya, tîîse mîîkîrîya neken pra, tîîse pemonkonyamîꞌya nîrî epuꞌtî yuꞌse anna wanî.” (2 Coríntios 8:21) Yairî eꞌtî saꞌnîrî siꞌma, moropai eseurîmakî îꞌ warapo kaisarî apîratari yapisîya moropai îꞌ warapo kaisarî nîrî apîratari tîꞌkaya.
Saꞌnîrî siꞌma eseurîmatî, îꞌ rî konekayaꞌnîkonya kureꞌne pîrata pî awanîkonya. (Atos 15:5, 6) Mîrîrî konekayaꞌnîkon ya, tîwanmîn wanî aapiaꞌnîkon. Esenumenkakon pepîn see warantî, “uurî pîratari mîrîrî” “amîrî pîratari mîrîrî”, tîkai pra eꞌtî, tîîse “uurînîkon pîra- tari” mîrîrî kaꞌtî. — 1 Timóteo 5:8.
Îꞌ KONEKA EꞌPAI AWANÎ:
-
Saꞌnîrî siꞌma esenumenkatî îꞌ warapo kaisarî pîrata tîꞌkaya îꞌ pensa rî ayemannekon ton yenna yuꞌse awanîkonya.
-
Pîrata pî neken amîrîꞌnîkon eseurîma eserîke pra man îꞌ pensa eꞌtarumaꞌtîntoꞌ wanîya.
