Jeováya * eꞌmaiꞌnon eꞌmarimantoꞌ konekaꞌpî. Paapa Maimuya taꞌpî man wîriꞌ konekaꞌpî Jeováya, mîîkîrî tîrîꞌpîiya Adão pia. Mîrîrî yeꞌnen Adão tausinpaꞌpî kureꞌne moropai mîîkîrîya taꞌpî: “Pîserî wîriꞌ wanî uyeꞌpî rîꞌpî yapai imoꞌkasaꞌ pe moropai upun yapai nîrî imoꞌkasaꞌ pe.” (Gênesis 2:22, 23 TNM) Jeová man sîrîrî tîpoꞌse eꞌmarimasan yuꞌse taatausinpai.

Aweꞌmariꞌma yai, morî pe puꞌkuru wanî eraꞌmaꞌpîya tamîꞌnawîrî, mîrîrî yeꞌnen morî pe amîrî esenumenkaꞌpî. Saꞌnîrî siꞌma toꞌ esaꞌnama kureꞌne, tîîse eꞌtarumaꞌtîntoꞌ wanî toꞌ pia. (1 Coríntios 7:28) Senni kaaretaya tuꞌke paꞌnamatoꞌ man Paapa Maimu wenai, mîrîrî Paapa Maimuya nîrî panamatoꞌkon man, mîrîrî wenai taatausinpai toꞌ wanî. — Tiago 1:25.

Îꞌ TAA PAAPA MAIMUYA: Inyo wanî tîpemonkonoyamîꞌ puꞌpai pe. — Efésios 5:23.

Inyo pe awanî yeꞌnen morî pe anoꞌpî koꞌmannîpîya eꞌpai man, mîrîrî yuꞌse Jeová man. (1 Pedro 3:7) Jeováya wîriꞌ konekaꞌpî amîrî pîikaꞌtîtoꞌpe, mîrîrî yeꞌnen mîîkîrî saꞌnamakî morî pe. (1 Coríntios 11:11) Esaꞌnamatoꞌ yeꞌka pe kureꞌne anoꞌpî saꞌnamakî amîrî yentai. — Efésios 5:25-29.

Inoꞌpî pe amîrî wanî yeꞌnen, esenumenkakî Paapaya esenyakaꞌmantoꞌ tîrîꞌpî anyo tonpe, mîrîrî yeꞌnen mîîkîrî pîikaꞌtîkî. (1 Coríntios 11:3; Efésios 5:33) Anyo maimu yawîrî tîweꞌsen pe eꞌkî, îꞌ taasaiꞌya manni yawîrî kupîya ayewan ke. (Colossenses 3:18) Mîrîrî kupîya ya, morî pe Paapa Jeováya ayeraꞌma moropai anyoya nîrî. — 1 Pedro 3:1-6.

Îꞌ KONEKA EꞌPAI AWANÎ:

• Ekaranmapokî anyo pî moropai anoꞌpî pî, îꞌ konekaya eꞌpainon morî pe aweꞌtoꞌpe. Morî pe etakî moropai yawîrî eꞌkî.

• Teesemiꞌtapai pra eꞌkî. Kaꞌneꞌ pe wanî eserîke pra man taatausinpai aweꞌtoꞌpeꞌnîkon eꞌmarimantoꞌ ya.

Îꞌ TAA PAAPA MAIMUYA: Amîrî esenumenka eꞌpainon îꞌ yuꞌse anyo eꞌtoꞌ pî moropai îꞌ yuꞌse anoꞌpî eꞌtoꞌ pî. (Filipenses 2:3, 4) Anoꞌpî ke, tinyo ke awanîkon yeꞌnen, morî pe eꞌtî toꞌ yarakkîrî. Enpanatatî Paapa Jeová man morî pe tîpemonkonoyamîꞌ yuꞌse tamîꞌnawîronkon yarakkîrî. (2 Timóteo 2:24) Uurînîkon eseurîmaya imakuiꞌpî pe ipî, ‘kasupara panpe wanî. Mîrîrîya tiaronkon yaꞌtî eꞌpainon neꞌneꞌ pe eꞌtoꞌpe. Tîîse, epuꞌnen pe eꞌnî ya eseurîman morî pî, mîrîrîya morî pe toꞌ kupîꞌ. (Provérbios 12:18 TNM) Morî Paapa yekaton wenai eseurîma morî pe, mîrîrîya apîikaꞌtî. — Gálatas 5:22, 23; Colossenses 4:6.

Îꞌ KONEKA EꞌPAI AWANÎ:

• Anyo, anoꞌpî yarakkîrî eseurîma rawîrî epîremakî Paapa pî, sokoroꞌ pe awanîkon namai.

• Esenumenkakî eꞌmaiꞌpe îꞌ taasaꞌya rawîrî moropai oꞌnon yeꞌka pe mîrîrî pî eseurîma.

Îꞌ TAA PAAPA MAIMUYA: Îꞌ pensa anoꞌpîta yai, anioꞌta yai, amîrîꞌnîkon enasaꞌ mîrîrî tiwinan pemonkon panpe. (Mateus 19:5) Tîîse, tiaron pe awanîkon, mîrîrî yeꞌnen tîponarî esenumenkakon. Mîrîrî yeꞌnen esenupakon, tiwin neken amîrîꞌnîkon esenumenkatoꞌ eꞌtoꞌpe. (Filipenses 2:2) Amîrîꞌnîkon esenumenkatoꞌ eꞌpai man tiwin îꞌ rî menkatoꞌpe amîrîꞌnîkonya. Paapa Maimuya taꞌpî man: ‘Morîkon apanamatoꞌkon yuwakî, mîrîrî wenai, morî pe awanî.’ (Provérbios 20:18 TNM) Paapa Maimuya apîikaꞌtîtoꞌ ton yuwakî morîkon menkapa. — Hebreus 12:9.

Îꞌ KONEKA EꞌPAI AWANÎ:

• Îꞌ pî esenumenka wenai, anoꞌpî yarakkîrî eseurîmakî îꞌ rî wanîya.

• Îꞌ rî konekaya wenai eseurîmakî eꞌmaiꞌpe anyo yarakkîrî anoꞌpî yarakkîrî nîrî.