Jeová man tîpoitîrîtonon yaironkonya tîrumaka yuꞌse pra tiwin kin. (Lucas 1:75) Îꞌ pensa warayoꞌ noꞌpîta ya wîriꞌ ena ya tinyo ke, innata toꞌya saꞌnîrî siꞌma. Morî pe mîrîrî koneka toꞌya ya, taatausinpai toꞌ wanî. Mîrîrî koneka toꞌya pra wanî ya, toꞌ eꞌmarimantoꞌ eꞌtîꞌka moropai toꞌ eꞌtarumaꞌtî.

Sîrîrîpe morî pe pra eꞌmarimantoꞌ man, mararî pra yemannekon wenai toꞌ ekoreꞌma. Mîrîrî yeꞌnen, morî pe eꞌkî aweꞌmariꞌmantoꞌya, asakîꞌne kaisarî panamatoꞌ man mîrîrî yapiꞌkî.

Îꞌ TAA PAAPA MAIMUYA: ‘Mîrîrî warantî amîrîꞌnîkon yenupasaꞌ Paapaya ya, morî kupîyaꞌnîkon tiwin.’ (Filipenses 1:10) Amîrî eꞌmarimantoꞌ wanî morî pe puꞌkuru amîrî tonpe. Mîrîrî yeꞌnen morî pe mîrîrî konekakî.

Inyoya, inoꞌpîya sanîrî siꞌma morî kuꞌpî, toꞌ koꞌmantoꞌpe morî pe taatausinpai, mîrîrî yuꞌse Jeová man. (Efésios 5:31) Imakuiꞌpî koneka warayoꞌya moropai wîriꞌya eserîke pra man saꞌnîrî siꞌma, mîrîrî yuꞌse pra Jeová man. (1 Coríntios 10:24) Warayoꞌya moropai wîriꞌya, morî kuꞌpî eꞌpai man saꞌnîrî siꞌma.

Îꞌ KONEKA EꞌPAI AWANÎ:

• Anoꞌpî yarakkîrî eꞌkî, mîîkîrî pî taaya, mîîkîrî saꞌnama ya moropai saꞌnîrî siꞌma koꞌmantî.

• Apîꞌnîkon rî esenumenkakon eserîke pra man, saꞌnîrî siꞌma awanîkon, uurîya senni koneka tîkai pra saꞌnîrî awanîkon.

Îꞌ TAA PAAPA MAIMUYA: “Anîꞌya wîriꞌ eraꞌma ya, moropai yarakkîrî eꞌpai tîwanî pîꞌ eesenumenka ya, yarakkîrî mîîkîrî eꞌsaꞌ mîrîrî tewan yaꞌ.” (Mateus 5:28) Warayoꞌ moropai wîriꞌ teesenumenkaya nura pî tiaron warayoꞌ yarakkîrî moropai tiaron wîrîꞌ yarakkîrî, imakuiꞌpî kusaꞌ toꞌya mîrîrî tewankonya. Tînoꞌpî moropai tînyo yenkuꞌtîiya mîrîrî.

Jeováya taasaꞌ man morî pe ayewan eraꞌmakî morî konekapa. (Provérbios 4:23; Marcos 7:21-23) Mîrîrî yeꞌnen aka ta eꞌpai amîrî wanî îꞌ eraꞌmaya ya. (Mateus 5:29, 30) Jó yeseru ipatakakî. Tiaron wîriꞌ eraꞌmasaiꞌya pra man tînoꞌpî pe, tiwinkin tînoꞌpî yenkuꞌtîsaiꞌya pra man. (Jó 31:1; Mateus 5:28) Tiwinkin warayoꞌ moropai wîriꞌya, nura eraꞌma eserîke pra man, inkamoro yarakkîrî awanîkon namai.

Îꞌ KONEKA EꞌPAI AWANÎ:

• Tiaronkon pî anoꞌpî saꞌnamaya yenpokî.

• Îꞌ pî anoꞌpî esenumenkatoꞌ eraꞌmakî morî pe. Inyo moropai noꞌpî wakîri pe pra tiaron ayonpakon wanîya, kaꞌneꞌ pe mîîkîrî rumakatî.