ESENUPANTOꞌ 5
Tîwanmîra eꞌnî apemonkonokon yarakkîrî
‘Tiaronkon saꞌnamatî . . . morî kuꞌtî, tiaronkon winîkîi mîî pe tîweꞌse pra eꞌtî. Tîîse eranmîra eꞌtî, moropai teekoreꞌmasen pe pra eꞌtî.’ — Colossenses 3:12
Eꞌmarimasanya amenan pe tîpemonkonoyamîꞌ ton kupî eꞌpainon. Tiwin kin ayun, asan saꞌnamatoꞌ rumakayaꞌnîkon pepîn. Tarîpai anoꞌpî, anyo wanî morî pe puꞌkuru. Saꞌme wanî apemonkonoyamîꞌ pia, mîrîrî yeꞌnen mîrîrî yapiꞌsî toꞌya pepîn. Tîîse, Paapa Maimu panamatoꞌya apîikaꞌtîkon, morî pe akoꞌmamî eꞌpainon ayewîꞌ tawonkon yarakkîrî moropai tiaronkon ayonpayamîꞌ pokonpe.
1 TÎWANMÎRA EꞌTÎ ANYO YUNTONON YARAKKÎRÎ, ANOꞌPÎ YUNTONON YARAKKÎRÎ
Îꞌ TAA PAAPA MAIMUYA: “Ayunkon asankon namatî.” (Efésios 6:2) Maasaron pe awanîya moropai aꞌyekeꞌton pe enîꞌsaꞌya, noꞌsanton pe enîꞌsaꞌya, morî pe ayuntonon maimu yawîrî awanîkon. Esenumenka eꞌpai man, anyo wanî tîyun ke anoꞌpî wanî tîyun ke, mîrîrî yeꞌnen amîrîꞌnîkonya ayuntonon eraꞌma morî pe. “Eꞌsaꞌnamantoꞌ wanî ikinmuwanî emapuꞌtînen pe pra”, mîrîrî yeꞌnen aranne pe awanîkon eserîke pra man anyo yuntonon pî moropai anoꞌpî yuntonon pî. — 1 Coríntios 13:4; Gálatas 5:26.
Îꞌ KONEKA EꞌPAI AWANÎ:
-
See panpe eseurîmakon eserîke pra man: “Apemonkonoyamîꞌ wanî oꞌmaꞌtikî pe uurî pî.”
-
Epuꞌtî ya eꞌpai man îꞌ pî anyo moropai anoꞌpî esenumenka.
2 SAꞌNÎRÎ SIꞌMA ESENUMENKATÎ Îꞌ KONEKA AMÎRÎꞌNÎKON YUNTONONYA MANNI PÎ
Îꞌ TAA PAAPA MAIMUYA: “Mîrîrî yeꞌnen tîînoꞌpîta yai, warayoꞌya tîsan moropai tîyun rumaka, inîꞌrî toꞌ pia aakoꞌmamî pepîn. Tîîse tînoꞌpî yarakkîrî neken aakoꞌmamî. Inkamoro enasaꞌ mîrîrî, tiwinan pemonkon warantî.” (Mateus 19:5) Amîrî eꞌmarima tîpo ayuntonon taise esenumenka amîrî eraꞌma tîuyaꞌnîkon pî, mîrîrî wenai ayuntonon esewankonoꞌma kureꞌne amîrîꞌnîkon pî, panamatoꞌ tîrîiya yeꞌnen.
Amîrîꞌnîkon eseurîma eꞌpai man mîrîrîkon pî saꞌnîrî siꞌma. Kureꞌne akoreꞌtaꞌnîkon ayuntonon wanî namai. Mîrîrî pî eseurîmakon eꞌpai man saꞌnamatoꞌ pî toꞌ yarakkîrî, yairî sokoroꞌ pe pra eꞌtî. (Tito 3:2) Mîî pe pra, eranmîra, teesemiꞌtapai pra eꞌtî, mîrîrîya amîrîꞌnîkon pîikaꞌtî teekoreꞌmai pra awanîkonpa îꞌ taa toꞌya yapîtanîꞌpîyaꞌnîkon. — Efésios 4:2.
Îꞌ KONEKA EꞌPAI AWANÎ:
-
Amîrî esenumenkaya tiaronkon ayonpayamîꞌ eseurîma yeꞌnen, morî pe toꞌ yarakkîrî eseurîma, aꞌneꞌ pe apuꞌpai wanî pra tanne.
-
Amîrîꞌnîkon esewankonoꞌmaya eseurîmakon amîrîꞌnîkon eseurîma saꞌnîrî siꞌma, ayonpayamîꞌ eseurîma yeꞌnen amîrîꞌnîkon pî, mîrîrî yeꞌnen, aꞌneꞌ pe pra apuꞌpaikon wanî tanne, morî pe eseurîmatî mîrîrî pî, morî pe senni eseurîmatoꞌ konekaꞌtî.
