IPANTAKATO 5
Noéya Paapa etaapî Dilúvio yai. Anîꞌkonya etaapî pepîn?
Noé koꞌmanpîtî yai, mararî pra pemonkonyamîꞌya imakuiꞌpî konekapîtîꞌpî. Gênesis 6:5
Adão moropai Eva wanîꞌpî timukuke, moropai mararî pra pemonkonyamîꞌ epamîꞌpî. Kaꞌ po tiaronkon inserîyamîꞌ wanîꞌpî Makui yarakkîrî. Paapa maimu yawîrî pra toꞌ wanîꞌpî mîîkîrî warantî. Inkamoro inserîyamîꞌ iipîꞌpî Pata pona.
Toꞌ etinyakamapîtîꞌpî warayoꞌkon pe inkamoro noꞌpîtapîtîꞌpî wîriꞌsanyamîꞌ yarakkîrî. Wîriꞌsanyamîꞌ munkuyamîꞌ epîtîꞌpî mararî pra kusankon pe. Toꞌ wanîꞌpî meruntîke moropai iri pe mararî pra nîrî toꞌ wanîꞌpî.
Pemonkonyamîꞌ epamîꞌpî Pata pona. Inkamoroya imakuiꞌpî konekapîtîꞌpî. Bíbliaya taꞌpî toꞌ esenumenkatoꞌ nikin wanîꞌpî morî pe pra.
Noéya Paapa etaapî mîrîrî eꞌnen tî kanawa ton konekaꞌpîiya. Gênesis 6:13, 14, 18, 19, 22; Hebreus 11:7
Noé epîtîꞌpî morî pe. Jeováya taꞌpî mîîkîrîꞌpî imakuiꞌsan pemonkonyamîꞌ tîꞌkauiya Dilúvioya.
Jeováya Noé yeipontîꞌpî kureꞌnan tî kanawa ton konekatoꞌpîiya. Iteseꞌ Arca, Noé Kanawa. Paapaya taꞌpî Noé tîpemonkonoyamîꞌ ewontoꞌpe mîrîrîya. Moropai tamîꞌnawîronkon oꞌmaꞌkon, ewomîꞌpî nîrî.
Noéya Dilúvio iipî ekaremeꞌkî tanne pemonkonyamîꞌpî, tîîse etaasa toꞌya pra man. Noé pî tosiranpîtîꞌpî moropai tiaronkonya Noé yewanmîrîꞌpî.
Tî kanawa areꞌtîꞌka tîpo, Noéya oꞌmaꞌkon yaraꞌtîꞌpî. Moropai Noé ewomîꞌpî tîpemonkonoyamîꞌ yarakkîrî.
