Jesus erepamîꞌpî Betânia pona, aminke pra Jerusalém pia, aasîrî saakîrîrî wei kaisirî itonpa Lázaro samantasa wanîꞌpî. ­Jesus wîtîꞌpî oꞌnon pata Lázaro yuꞌnaꞌtîsa toꞌya eraꞌmai Marta moropai Maria pokonpe, Lázaro yenaruꞌtonon. Kaꞌneꞌpe arinîke ­pemonkonyamîꞌ emurukontîꞌpî. Esenumenkakî oꞌnon yeꞌka pe Marta moropai Maria tausinpaꞌpî, Jesusya Lázaro eꞌmîꞌsaꞌkaꞌpî yeꞌnen inîꞌrî aakoꞌmantoꞌpe? — Erenkakî João 11:21-24, 38-44.

Aasîrî Martaya morîkon yekare epuꞌtîꞌpî samantaꞌsan pî. Jeováya samantaꞌsan eꞌmîꞌsaꞌka inîꞌrî toꞌ ­koꞌmantoꞌpe Pata pona mîrîrî epuꞌtîꞌpî Martaya. — Erenkakî João 11:24.

Non yapai ikupîsa uurînîkon. (1 Coríntios 15:47) Uurînîkon yekaton tonpra man aakoꞌmantoꞌpe uurînîkonya. ­Uurînîkon samantasa tîpo, îꞌ eꞌnîmî pepîn enen pe. Îꞌ pensa uurînîkon samantasaya, ­puꞌpai kaase samanta nîrî, uurînîkon esenumenkatoꞌkon, îꞌ wanî uurînîkon waakîri pe moropai îꞌ wanî uurînîkon waakîri pe pra eꞌtîꞌka nîrî. Mîrîrî yeꞌnen, Lázaro eseurîmasa pra man tîsamantasa pî, îꞌ epuꞌtî pepîn saman­taꞌsanya yeꞌnen. — Erenkakî João 11:11-14.

Paapaya pemonkonyamîꞌ tarumaꞌtî apoꞌ ke toꞌ samantasa tîpo? Bíbliaya taꞌpî man samantaꞌsanya îꞌ epuꞌtî pepîn, Paapaya imakuiꞌsan yenumî apoꞌya taa rîse pemonkonyamîꞌya, tîîse mîrîrî wanî yairon pepîn. Paapa yewanma mîrîrî. — Erenkakî 1 João 4:8.

Seeni panton eraꞌmakî Oꞌnon yeꞌka pe samantaꞌsan wanî?

Samantaꞌsan eseurîma pepîn moropai îꞌ etaa toꞌya pepîn. (Salmo 115:17) Tîîse imakuiꞌsan inserîyamîꞌ eseurîma eꞌpainon pemonkonyamîꞌ yarakkîrî, ­samantaꞌsan pemonkonyamîꞌ ­warantî yuꞌse eꞌpai toꞌ wanî. (2 Pedro 2:4) Uurînîkon eseurîmatoꞌpe samantaꞌsan yarakkîrî yuꞌse pra Jeová man. — Erenkakî Gálatas 5:20.

Arinîkon samantaꞌsan pemonkonyamîꞌ eꞌmîꞌsaꞌka inîꞌrî toꞌ koꞌmantoꞌpe ­Pata pona. Manniꞌkan samantaꞌsan pemonkonyamîꞌ esenupasa pra man Paapa pî moropai imakuiꞌpî kupîtîponkon eꞌmîꞌsaꞌka. — Erenkakî Atos 24:15.

Eꞌmîꞌsaꞌkaꞌsan esenupa eꞌpainon yairon Paapa pî moropai inna pe Jesus kuꞌnenan wanî imaimu yawîrî. (Apocalipse 20:11-13) Samantaꞌsan pemonkonyamîꞌ eꞌmîꞌsaꞌka inîꞌrî toꞌ koꞌmantoꞌpe moropai morî konekasa toꞌya ya, toꞌ koꞌmamî eꞌpainon ipatîkarî Pata pona. — Erenkakî João 11:25, 26.

Paapaya tinmu yarimaꞌpî aasamantatoꞌpe uurînîkon tonpe, mîrîrî yeꞌnen samantaꞌsan eꞌmîꞌsaꞌka eꞌpainon inîꞌrî toꞌ koꞌmantoꞌpe, mîrîrî inîmîkî uurînîkonya. Mîrîrî warantî, eꞌmîꞌsaꞌkantoya uurînîkon yenupa eꞌpainon Paapa saꞌnamato pî moropai morî pe Paapa eꞌto pî. Îꞌ pensa samantaꞌsan ennaꞌposaya toꞌ koꞌmantoꞌpe, anîꞌ puꞌkuru eraꞌma yuꞌse amîrî wanî inîꞌrî? — Erenkakî 1 João 4:10; Romanos 6:23.