Paapa Reinori wanî tiwin governo pe kaꞌ po. Paapa Reinoya tamîꞌnawîronkon governoyamîꞌ inkama moropai îꞌ yuꞌse Paapa eꞌto kupî kaꞌ po moropai Pata po. Morî itekare man Paapa Reino pî. Seeni Reino wanî governo pe mîrîrî yuꞌse uurînîkon man tamîꞌnawîrî. Pemonkonyamîꞌ koꞌmantoꞌpe tîwanmînya tarî Pata po kupî seeni Reinoya. — Erenkakî Daniel 2:44; Mateus 6:9, 10; 24:14.

Tiwin reino wanî eꞌpainon tiwin rei pe. Jeováya tinmu, Jesus Cristo, imenkaꞌpî Rei pe aweꞌtoꞌpe mîîkîrî Reino pona. — Erenkakî Apocalipse 11:15.

Seeni panton eraꞌmakî Îꞌ see mîrîrî Paapa Reinori?

Paapa munmu yuꞌse uurînîkon man Rei pe, morî pe mîîkîrî wanî yeꞌnen moropai ­iwaakîri pe yairon wanî yeꞌnen. (Mateus 11:28-30) Kaꞌ po siꞌma mîîkîrîya governar ta Pata pî, meruntî ke wanî pemonkonyamîꞌ pîikaꞌtîtoꞌpe kaiꞌma. Tîweꞌmîꞌsaꞌka tîpo, Jesus enuꞌkuꞌpî kaꞌ po, moropai ereutaꞌpî Paapa Jeová meruntî winî moropai inîmîkîꞌpî aakoꞌmamî. (Hebreus 10:12, 13) Mîrîrî tîpo, ­Paapaya ­imeruntîri ton tîrîꞌpî governar ta eꞌsaraꞌtîtoꞌpe. — Erenkakî Lucas 1:31-33.

Paapa Jeováya mararî pemonkonyamîꞌ imenkaꞌpî governar ta toꞌpe toꞌya ­Jesus yarakkîrî kaꞌ po. (Daniel 7:27) Eꞌmaiꞌpe imenkasaꞌkon apóstoloyamîꞌ wanîꞌpî Jesus maimu yawîronkon. Sîrîrî ­tîpose yawîrî tîweꞌsanon warayoꞌkon moropai wîriꞌsanyamîꞌ imenka Jeováya governar ta toꞌpe toꞌya Jesus yarakkîrî. Jesus warantî, inkamoro eꞌmîꞌsaꞌka ­yekaton pe. — Erenkakî João 14:1-3; 1 Coríntios 15:42-44.

 Îꞌ waraapo pemonkonyamîꞌ wîtî kaꞌ pona? Jesusya toꞌ esaꞌtîꞌpî “siꞌmîrikî rebanho pe”. (Lucas 12:32 TNM) Inkamoro wanî 144 mil kaisironkon moropai Pata ­governar ta toꞌya Jesus ­yarakkîrî. — Erenkakî Apocalipse 14:1.

Paapa Reinori sipiaꞌtîꞌpî governar ta toꞌpe 1914 yai. * Rei pe aweꞌkupî yai Jesusya Makui moropai imakuiꞌsan inserîyamîꞌ yenpaꞌkaꞌpî kaꞌ poi tarî Pata pona. Makui ekoremaꞌpî mararî pra moropai imakuiꞌpî konekai iipiaꞌtîꞌpî tamîꞌnawîrî Pata pona. (Apocalipse 12:7-10, 12) Mîrîrî yeꞌnen, pemonkonyamîꞌ tarumaꞌtî pî man mararî pra. Epînto, emiꞌnan, paran moropai non eeserentîkîꞌma manni, mîrîrîya yenpo Jesusya Pata governar ­ta to wanî aminke maꞌre. — Erenkakî Lucas 21:7, 10, 11, 31.

Esenyakamato wenai Paapa Maimu esekaremeꞌkî tamîꞌnawîrî Pata poro, Paapa Reinoya arinîkon pemonkonyamîꞌ emurukontî pî man tamîꞌnawîron Pata ponkon. Mararî pra pemonkonyamîꞌ wanî Jesus maimu yawîrî. Inkamoro eꞌtîꞌka pepîn îꞌ pensa Paapa Reinoya imakuiꞌsan tîꞌkasa pe tarî Pata pai. Pîikaꞌtînto yuꞌse ­tamîꞌnawîronkon wanîya Paapa Reino pî, Jesus maimu yawîrî ­eꞌpai toꞌ wanî. — Erenkakî Apocalipse 7:9, 14, 16, 17.

Mil konoꞌ kaisirî yai, Reinoya Paapa ituꞌse eꞌto koneka pemonkonyamîꞌ tonpe. Tamîꞌnawîrî Pata etinyakama paraíso pe. Mîrîrî tîpo, Jesusya Reino innaꞌpo tiyun pia. (1 Coríntios 15:24-26) Anîꞌ epuꞌtî pî nan eseurîmapa kaiꞌma Paapa Reino pî? — Erenkakî 2 Pedro 3:13.