Jeováya Pata tîrîꞌpî pemonkonyamîꞌ pia. Uurînîkon pataꞌse pe aweꞌtoꞌpe. Mîrîrî yeꞌnen, eꞌmaiꞌnon warayoꞌ, Adão moropai wîriꞌ Eva, ikonekasa pra wanîꞌpî kaꞌ po toꞌ koꞌmantoꞌpe — Aasîrî ­Paapaya ­inserîyamîꞌ ikonekaꞌpî yeꞌnen kaꞌ po toꞌ koꞌmantoꞌpe. (Jó 38:4, 7) Paapaya eꞌmaiꞌnon warayoꞌ tîrîꞌpî morî paraísoya esaꞌtî jardim do Éden pe. (Gênesis 2:15-17) Adão moropai inmuku­yamîꞌ koꞌmantoꞌpe ipatîkarî Pata pona yuꞌse Paapa Jeová wanîꞌpî. — Erenkakî Salmo 37:29; Atos 17:26.

Eesipiaꞌtî yai, jardim do Éden nikin wanîꞌpî paraíso pe. Adão moropai Evaya Pata epamîꞌpî tinmukuyamîꞌ ke. Mîrîrî tîpo, tamîꞌnawîrî Pata eraꞌmatoꞌpe toꞌya, moropai etinyakamatoꞌpe paraíso pe. (Gênesis 1:28) Paapaya Pata areꞌtîꞌka pepîn tiwin kin. Pemonkonyamîꞌ pataꞌse pe Pata wanî ipatî­karî. — Erenkakî Salmo 104:5.

Seeni panton eraꞌmakî Îꞌ wani awanî yeꞌnen Paapaya Pata konekaꞌpî?

Adão moropai Eva wanîꞌpî Paapa maimu yawîrî pra, mîrîrî yeꞌnen Jeováya toꞌ yenpaꞌkaꞌpî jardim do Éden yapai. Paraíso nîmîꞌpî toꞌya moropai anîꞌya paraíso neesa pra man inîꞌrî. Mîrîrî pata pai, imakuiꞌsan pemonkonyamîꞌya Pata governar ta mîrîrî. — Erenkakî Gênesis 3:23, 24.

Tîîse Jeováya ituꞌse tîweꞌto nîmîꞌpî? Kaane! Meruntî puꞌkuru mîîkîrî tamîꞌnawîronkon yentainon; îꞌ taasaiya manni konekaiya. (Hebreus 10:23) Pemonkonyamîꞌ koꞌmantoꞌpe ipatîkarî taatausinpai Pata po kupî Paapaya inîꞌrî, oꞌnon yeꞌka pe yuꞌse mîîkîrî wanîꞌpî warantî. — Erenkakî Romanos 8:20, 21.

Paapaya Jesus Cristo imenkaꞌpî Rei pe aweꞌtoꞌpe Pata pî governar ta toꞌpîiya. Îꞌ pensa Jesusya governar ta Pata ennaꞌpo  inîꞌrî Paraíso pe. Epînto ­eseꞌ mîrîrî Armagedom pe, Jesusya inserîyamîꞌ yeipontî tamîꞌnawîronkon tîꞌkai inna taawonan pepîn Paapa pî. Mîrîrî tîpo, Jesusya ­Makui ewaꞌtî mil konoꞌ kaisirî. Paapaya ipemonkonoyamîꞌ tîꞌka pepîn, toꞌ panama Jesusya yeꞌnen moropai toꞌ pîikaꞌtîiya yeꞌnen. Inkamoro koꞌmamî ipatîkarî Paraíso Pata po. — Erenkakî Apocalipse 20:1-3; 21:3, 4.

Îꞌ pensa Paapaya imakuiꞌpî tîꞌka seeni Pata pai? Jesusya taꞌpî îꞌ eꞌkupî manni sîrîrîpe, mîrîrîya yenpo aminke maꞌre aweꞌtîꞌkato wanî. Îꞌ eꞌkupî manni sîrîrîpe mîrîrîya pemonkonyamîꞌ koꞌmanto kupî saꞌme, tîîse uurînîkonya epuꞌtî pî man aminke maꞌre eꞌtîꞌkato wanî yeꞌnen. — Erenkakî 2 Timóteo 3:1; Lucas 21:7-14.

Kaꞌ po siꞌma Jesusya governar ta Pata pona mil konoꞌ kaisirî, mîrîrî yai tamîꞌnawîrî eꞌtarumaꞌtîntoꞌ tîꞌkaiya. (Apocalipse 7:17; 11:15) Paapa saꞌnamanenan imakuiꞌpî rîꞌpî tîꞌka Jesusya ­tamîꞌnawîrî. Jesus wenai, Paapaya paran moropai samantanto areꞌtîꞌka, moropai anîꞌ ena pepîn aikiton pe, moropai noꞌsanton pe. — Erenkakî 1 Coríntios 15:26; Apocalipse 21:4.

Anîꞌ wanîya Paapa maimu yawîrî aakoꞌmamî Paraísoya. (João 17:3) Jesusya discípuloyamîꞌ yeipontîꞌpî morîkon pemonkonyamîꞌ yuwatoꞌpe. Toꞌ yenupatoꞌpe îꞌ yuꞌse Paapa eꞌto kuꞌtoꞌpe toꞌya. Sîrîrîpe, Jeováya mararî pra pemonkonyamîꞌ yenupa pî man, toꞌ koꞌmantoꞌpe ipatîkarî Paraíso Pataya. (Sofonias 2:3) Testemunhas de Jeová Emurukontînto Pataꞌseya, pemonkonyamîꞌ ­esenupa morî inyoꞌkon pe eꞌtoꞌpe, morî yunkon pe eꞌtoꞌpe, morî ­noꞌpîkon pe eꞌtoꞌpe, moropai morî yankon pe eꞌtoꞌpe nîrî. ­Paapa yapurî inmukuyamîꞌya toꞌ yunkon pokonpe moropai toꞌ esenupa morî pe koꞌmantoꞌpe Paapa yenupanto pî. — Erenkakî Apocalipse 15:4.