Seeni esenupanto Bíblia pî, asaꞌnamato kuꞌsa meruntî ke innî panpî Jeová pî. Tamîꞌnawîrî wei kaisirî uurînîkon saꞌnamato kupî eꞌpainon Paapa pî kureꞌne. (1 Pedro 2:2) Aakoꞌmamî nikin ipatîkarî Paapa pia amîrî erepansaya, Bíblia pî esenupaya. — Erenkakî João 17:3; Judas 21.

Paapa pî amîrî esenupasaya innî panpî, amîrî fé wanî meruntî ke. Seeni féya apîikaꞌtî îꞌ yuꞌse Paapa eꞌto kuꞌtoꞌpe. (Hebreus 11:1, 6) Féya apîikaꞌtî arrepender ta toꞌpe moropai etinyakamato kupî ­Paapa nîmîtoꞌpe taatausinpai. — Erenkakî Atos 3:19.

Amîrî eseurîma eꞌpainon tiaronkon yarakkîrî îꞌ pî esenupaꞌpî pî. Waakîri pe morî yekarekon tîrî yuꞌse uurînîkon wanî tiaronkon pia. Eesenupanto Bíblia pî, apîikaꞌtî amîrî fé pî eseurîmatoꞌpe Jeová pî. Amîrî esenupa nîrî oꞌnon yeꞌka pe morî yekarekon yenpoya tiaronkon pî Bíblia poi. — Erenkakî Mateus 28:19, 20.

Tuꞌke pemonkonyamîꞌ eseurîma sipiaꞌtî tonpakon pî îꞌ pî toꞌ esenupaꞌpî Bíblia yapai. Tîîse epuꞌtîkî oꞌnon yeꞌka pe eeseurîma. Toꞌ religião wanî seruꞌye pe taa pepîn, eseurîmaꞌkî morîkon pî moropai îꞌ koneka Paapaya pî. Enpanatakî îꞌ kupî amîrîya eraꞌma pemonkonyamîꞌya, îꞌ taa amîrîya manni pepîn. — Erenkakî 2 Timóteo 2:24, 25.

Paapa Maimu pî esenupa mîrîrîya apîikaꞌtî kureꞌne amîrî fé ­eꞌtoꞌpe Paapa pî. Mîrîrî tîpo, amîrî erepamî eꞌpainon innî panpî Jeová pia mîrîrî wanî morî pe puꞌkuru. Amîrî ena eꞌpainon Paapa família pe. — Erenkakî 2 Coríntios 6:18.

Amîrî arenta eꞌpainon espiritualmente pe Paapa Maimu pî esenupa koꞌmannîya. (Hebreus 5:13, 14) Testemunha de Jeová pî esenupanto ton saakî amîrî esenupatoꞌpe Bíblia pî, seeni Paapa kaaretarîya O Que a Bíblia Realmente Ensina?. Innî panpî amîrî esenupasaya Paapa Maimu pî, aakoꞌmamî eꞌpainon taatausinpai innî panpî. — Erenkakî 1 Timóteo 4:15, 16; Tiago 1:25.

Morî yekarekon iipî Jeová piapai, tausinpakoi pe awanî yeꞌnen. Amîrî erepamî eꞌpainon Paapa pia Ipemonkonoyamîꞌ pia erepansaya. (Hebreus 10:24, 25) Ituꞌse Paapa Jeová eꞌto konekasaya, aakoꞌmamî eꞌpainon ipatîkarî. Paapa pia erepansaya mîrîrî wanî morî pe aapia. — Erenkakî 1 Timóteo 1:11; 6:19.