Jesus wanîꞌpî uurînîkon warantî pra, mîîkîrî koꞌmanpîtîꞌpî kaꞌ po eesenpo iraurî Pata pona. (João 8:23) Paapaya Jesus konekaꞌpî eꞌmaiꞌpe moropai tiyun Paapa pîikaꞌtîꞌpîiya tamîꞌnawîron îꞌ rî tiaronkon wanî manni konekapa kaiꞌma. Jeováya mîîkîrî ­konekaꞌpî tiwinsarî, mîrîrî yeꞌnen, esaꞌtî “tiwinan Paapa ­munmu pe”. (João 1:14) Jesus eseurîmaꞌpî Paapa eseꞌ pî, mîrîrî ­yeꞌnen, esaꞌtî “Mai pe” nîrî. — Erenkakî Colossenses 1:15.

Paapaya tinmu yarimaꞌpî kaꞌ poi Pata pona maasaron judia wîriꞌ roꞌtaya iteseꞌ Maria. ­Jesus wanîꞌpî yun tonpra Pata po. ­(Lucas 1:30-35) Mîîkîrî iipîꞌpî Pata pona (1) yairon yenupai ­Paapa pî, (2) Jesus iipîꞌpî nîrî yenpoi oꞌnon yeꞌka pe Paapa yuꞌse eꞌto ikonekatoꞌpe moropai îꞌ pensa uurînîkon eꞌtarumaꞌtî tanne (3) tîmîrî koꞌmanto itîrîpa kaiꞌma tamîꞌnawîronkon pîikaꞌtînto yeꞌmatoꞌpe. — Erenkakî Mateus 20:28.

Tiwin pemonkon wanî atarakkannîtoꞌya kureꞌne yeꞌmatoꞌ yuꞌse eꞌpai wanî mîîkîrî epaꞌkatoꞌpe. (Êxodo 21:29, 30) Pemonkonyamîꞌ enaꞌtoꞌpe aikiton pe, noꞌsanton pe moropai toꞌ samanta yuꞌse pra Paapa wanîꞌpî. Oꞌnon yeꞌka pe mîrîrî epuꞌtî uurînîkonya? Paapaya taꞌpî eꞌmaiꞌnon warayoꞌ, Adão pî, seeni eperu enaasa amîrîya aasamanta, mîrîrî esaꞌtî Bíbliaya manni “imakuiꞌpî pe”. ­Jeová maimu yawîrî Adão esaya, aasamantaꞌpî pepîn eꞌpainon tiwin kin. (Gênesis 2:16, 17; 5:5) Bíbliaya taꞌpî, samantanto “ewomîꞌpî” pata pona Adão ­wenai. Mîrîrî yeꞌnen, Adãoya imakuiꞌpî moropai samantanto tîrîꞌpî tamîꞌnawîrî tinmukuyamîꞌ pia.  ­Samantanto neepîꞌpî Adãoya manni uurînîkon pia, mîrîrî ­moꞌkatoꞌpe pîikaꞌtînen ton yuꞌse eꞌpai uurînîkon wanî. — Erenkakî Romanos 5:12, 15.

Anîꞌya uurînîkon pîikaꞌtî eꞌpainon moropai uurînîkon moꞌka samantanto yapai? Uurînîkon samanta imakuiꞌsan pe eꞌnî ­yeꞌnen. Mîrîrî yeꞌnen anîꞌ moꞌka uurînîkonya pepîn imakuiꞌpî ­yapai moropai samantanto yapai. — Erenkakî Romanos 3:23.

Jesus wanîꞌpî imakuiꞌpî tonpra. Mîrîrî yeꞌnen, aasamanta eserîke pra wanîꞌpî, tîmîrî imakuiꞌpî tonpe — imakuiꞌpî ­kuꞌsaiya pra man tiwin kin. Aasamantaꞌpî tiaronkon imakuiꞌpî tonpe. Paapaya saꞌnamato yenpoꞌpî pemonkonyamîꞌ tonpe, tinmu ­yarimaꞌpîiya aasamantatoꞌpe uurînîkon tonpe. Jesusya saꞌnamato yenpoꞌpî nîrî uurînîkon tonpe, tiyun maimu yawîrî wanîꞌpî moropai aasamantaꞌpî uurînîkon imakuiꞌpî tonpe. — Erenkakî 1 João 4:10; ­Romanos 5:18, 19.

Seeni panton eraꞌmakî Îꞌ wani awanî yeꞌnen Jesus samantaꞌpî?

Pata pona Jesus koꞌmanpîtîꞌpî yai, priꞌyawonkon pepîn ­yepiꞌtîpîtîꞌpîiya, samantaꞌsan eꞌmîꞌsaꞌkapîtîꞌpîiya moropai eꞌtarumaꞌtîntoꞌ pî pemonkonyamîꞌ pîikaꞌtîꞌpîiya. Mîrîrîya yenpo, îꞌ koneka mîîkîrîya ­Paapa maimu yawîrî tîweꞌsanon tonpe. (Mateus 15:30, 31; João 5:28) Jesus samantaꞌpî tîpo, Paapaya mîîkîrî eꞌmîꞌsaꞌkaꞌpî inserî pe meruntî ke. (Efésios 1:20) Jesus ereutaꞌpî Paapa ­meruntî winî Jeováya imeruntîri ton tîrî, pîkîrî inîmîkîꞌpî aakoꞌmamî Rei pe governar ta toꞌpîiya tamîꞌnawîrî Pata po. (Hebreus 10:12, 13) Sîrîrîpe, mîîkîrîya governar ta kaꞌ po, ipoitîrîyamîꞌya “morî itekare”, ekaremeꞌkî tamîꞌnawîrî pata po. — Erenkakî Apocalipse 11:15; Mateus 24:14.

Amenrî Jesusya tîmeruntîri yenkama Rei pe tamîꞌnawîrî eꞌtarumaꞌtîntoꞌ moropai imakuiꞌpî kuꞌnenan tîꞌkatoꞌpe. Inna pe Jesus kuꞌnenan moropai imaimu yawîrî eꞌkoiꞌkon koꞌmamî paraíso Pata po. — Erenkakî Mateus 5:5.