Tamîꞌnawîron konekaꞌpî yairon Paapaya yeꞌnen. Anîꞌya Paapa konekasa pra man moropai aweꞌtîꞌka pepîn tiwin kin. (1 Timóteo 1:17) Morî itekare wanî manni Bíblia po, mîrîrî iipî Paapa piapai. (1 Timóteo 1:11) Paapaya uurînîkon koꞌmanto ton tîîsa man, mîrîrî yeꞌnen mîîkîrî nikin yapurî uurînîkonya. — Erenkakî Apocalipse 4:11.

Anîꞌya Paapa eraꞌmasa pra man tiwin kin, Yekaton pe mîîkîrî wanî yeꞌnen. Mîrîrîya yenpo tamîꞌnawîrî Pata po koꞌmankoiꞌkon yentainon mîîkîrî Paapa. (João 1:18; 4:24) Tîîse, Paapa epuꞌtî uurînîkonya eꞌpainon îꞌ ikonekaꞌpîiya winîpai. Paapa saꞌnamato, epuꞌnen pe aweꞌto moropai meruntî ke aweꞌto eraꞌma uurînîkonya eꞌpainon tamîꞌnawîrî îꞌ konekaꞌpîsaiya manni wenai. — Erenkakî Romanos 1:20.

Paapa yeseru pî uurînîkon esenupa eꞌpainon, innî panpî îꞌ pensa Bíblia erenka uurînîkonya. Bíbliaya taꞌpî man uurînîkon pî, îꞌ wanî Paapa waakîri pe moropai îꞌ wanî iwaakîri pe pra, oꞌnon yeꞌka pe pemonkonyamîꞌ pîikaꞌtîiya, îꞌ konekaiya îꞌ pensa imaimu yawîrî moropai imaimu yawîrî pra uurînîkon wanîya. — Erenkakî Tiago 5:11.

Jesusya taꞌpî: “Paapa anna yunkon kaꞌ po tîîkoꞌmasen, morî pe tapurîsen pe ayeseꞌ yuꞌse wanî”. (Mateus 6:9 TNM) Mararî pra ­títulos man Paapa pia, oꞌnon yeꞌka pe Konekatîpon, Paapa, ­Yepotorî, tîîse tiwin tîseꞌ kenan mîîkîrî Paapa. Tamîꞌnawîronkon ­maimukonya seeni eseꞌ eseurîmasa man tîponnîrî. Karaiwa pe, taa ­pemonkonyamîꞌya “Jeová”. Tîîse tiaronkonya taa “Javé”. — Erenkakî Salmo 83:18.

Mararî pra Bíblias yapai Paapa eseꞌ imoꞌkaꞌpî man moropai ­inkamasa mîrîrî títulos pe Yepotorî pe moropai Paapa pe nîrî. Tîîse, îꞌ pensa Bíblia imenukaꞌpî Paapa eseꞌ wanîꞌpî Bíbliaya 7 mil iteꞌka. Jesusya pemonkonyamîꞌ yenupapîtîꞌpî Paapa eseꞌ pî.  Jesus epîremaꞌpî Paapa pî: “Ayeseꞌ ekaremeꞌkîꞌpîuya toꞌ pî”. João 17:26, TNM.

Seeni panton eraꞌmakî Tîseꞌ kenan mîîkîrî Paapa?

Jeováya uurînîkon saꞌnama, tîîse îꞌ wani awanî yeꞌnen tamîꞌnawîrî eꞌtarumaꞌtîntoꞌ nîmî mîîkîrîya? ­Mararî pra pemonkonyamîꞌya taa pî man, Paapaya uurînîkon eꞌtarumaꞌtî mîîkîrî iyuwatoꞌpe uurînîkonya, tîîse mîrîrî wanî yairon ­pe pra. — Erenkakî Tiago 1:13.

Uurînîkonya eꞌma imenkatoꞌpe inîmîsa Paapaya man. Uurînîkonya imenka eꞌpainon Paapa poitîrî pe eꞌtoꞌpe. (Josué 24:15) ­Mararî pra pemonkonyamîꞌya imenka imakuiꞌpî kuꞌtoꞌpe tiaronkon pî, mîrîrî yeꞌnen mararî pra ­eꞌtarumaꞌtîntoꞌ man. Jeová esewankonoꞌma seeni eꞌtarumaꞌtîntoꞌ eraꞌmaiya ­yeꞌnen. — Erenkakî Gênesis 6:5, 6.

Jeová mîîkîrî tiwinan Paapa uurînîkon pî esewankonoꞌmankoi. Taatausinpai uurînîkon yuꞌse mîîkîrî wanî. Amenrî eꞌtarumaꞌtîntoꞌ areꞌtîꞌka Paapaya moropai ­imakuiꞌpî kuꞌnenan pemonkonyamîꞌ nîrî. Mîrîrî wanî tanne, Paapaya epuꞌtî pî man, îꞌ wani awanî yeꞌnen ­eꞌtarumaꞌtîntoꞌ nîmîiya. Lição 8 ya, uurînîkon esenupa îꞌ tonpe. — Erenkakî 2 Pedro 2:9; 3:13.

Jeováya saatî pî man uurînîkon pî mîîkîrî pia erepantoꞌpe epîremanto wenai. Mîîkîrî esewankonoꞌma tiwinpîne uurînîkon pî. (Salmo 65:2; 145:18) Imakuiꞌpî anna nîkonekaꞌpî manni mîrîrî ikupî Paapaya tîîwanmîra moropai eraꞌmaiya nîrî îꞌ ­kupî ­uurînîkonya mîîkîrî yapurîtoꞌpe. ­Tamîꞌnawîronkon imakuiꞌsan pe uurînîkon man, tîîse uurînîkon erepamî eꞌpainon Paapa pia. — Erenkakî Tiago 4:8; 5:15.

Uyettapusinkon ton tîrîꞌpî Paapa Jeováya, mîrîrî yeꞌnen mîîkîrî saꞌnama uurînîkonya innî panpî tiaron pemonkon yentai. (Marcos 12:30) Amîrîya Paapa saꞌnama yenpokî, mîîkîrî pî eesenupa innî panpî moropai îꞌ saatîiya manni kupîya, amîrî erepamî innî panpî ­iipia. — Erenkakî 1 Timóteo 2:4; 1 João 5:3.