Morîkon pemonkonyamîꞌ man tamîꞌnawîronkon religiãoyamîꞌya. Paapaya toꞌ eraꞌma moropai toꞌ pî esewankonoꞌma, mîrîrî epuꞌtî morî pe. Tîîse, religião yenkaꞌmasa man imakuiꞌpî kuꞌtoꞌpe. (2 Coríntios 4:3, 4; 11:13-15) Tekarekonya yenpo pî man, moro religiãoyamîꞌ man epînto pîikaꞌtînen, tuꞌke pemonkonyamîꞌ wîînen, imakuiꞌpî kuꞌnen moreyamîꞌ pî moropai aranne pe tiaronkon kuꞌnen. Inna taawonan Paapa pî esewankonoꞌma mîrîrî pî! — Erenkakî Mateus 24:3-5, 11, 12.

Yairon religiãoya Paapa yapurî, seruꞌye religiãoya Paapa nîmî esewankonoꞌmai. Îꞌ yenupa toꞌya manni tonpra man Bíbliaya, oꞌnon yeꞌka pe seruꞌye yenupantoꞌkon Paapa pî moropai samantaꞌsan pî. Tîîse yairon epuꞌtîtoꞌpe pemonkonyamîꞌya yuꞌse Jeová wanî tîpî. — Erenkakî Romanos 6:23; 1 Timóteo 2:3-5.

Paapa esenkuꞌtî pepîn ­seruꞌyeꞌkon religiãoyamîꞌ pî, Makui pataꞌse ­saꞌnama toꞌya yeꞌnen. (Tiago 4:4) Paapa Maimuya tamîꞌnawîronkon seruꞌyeꞌkon religiãoyamîꞌ esaꞌtî “Kureꞌnan, ­Babilônia pe”. Babilônia wanîꞌpî penaron cidaderî pe moro seruꞌye religião iipiaꞌtîꞌpî, Dilúvio tîpo Noé koꞌmanpîtî yai. Amenrî, Paapaya seruꞌyeꞌkon ­religiãoyamîꞌ tîꞌka, pemonkonyamîꞌ ­yenkuꞌtî toꞌya yeꞌnen seruꞌyeꞌkon yenupantoꞌkon pî. — Erenkakî Apocalipse 17:1, 2, 5, 16, 17; 18:8.

Tîîse morîkon itekarekon man. Jeováya morîkon pemonkonyamîꞌ kupî pepîn wanmîra seruꞌyeꞌkon religiãoyamîꞌ koreꞌta toꞌ wanî manni tamîꞌnawîrî pata po. Paapaya yairon yenupa pî man toꞌ pî moropai toꞌ pîikaꞌtîiya seruꞌye religião yapai toꞌ ­epaꞌkatoꞌpe. — Erenkakî João 6:45.

Jeová esewankonoꞌma pemonkonyamîꞌ pî yairon epuꞌtî yuꞌse eꞌkoi moropai morî koneka yuꞌse eꞌkoi. Toꞌ panama mîîkîrîya ­seruꞌye religião rumakatoꞌpe toꞌya. Paapa saꞌnamanenanya ­etinyakamato kupî Paapa nîmîtoꞌpe taatausinpai. — Erenkakî Apocalipse 18:4.

Jesus samantasa tîpo, morîkon pemonkonyamîꞌya Paapa Maimu etaapî apóstoloyamîꞌ eseurîmasa manni pî, inna taa pî toꞌya moropai toꞌ tausinpaꞌpî mîrîrî pî. Toꞌ yenupaꞌpî Jeováya oꞌnon yeꞌka pe koꞌmantoꞌpe morî pe, taatausinpai moropai ­koꞌmanto ipatîkarî inîmîkîtoꞌpe. Yenpoꞌpî toꞌya uurînîkon pî oꞌnon yeꞌka pe Paapa Maimu yawîrî eꞌnîtoꞌpe, îꞌ rî yentai. — Erenkakî 1 Tessalonicenses 1:8, 9; 2:13.

Seruꞌye religião rumakaꞌpî pemonkonyamîꞌya manni, Jeováya toꞌ yapiꞌsî ipemonkonoyamîꞌ koreꞌta. Mîrîrî kuꞌsa amîrîya, amîrî ena eꞌpainon Paapa yonpa pe moropai mararî pra irmãoyamîꞌ ­yonpa pe, Jeová yapurî toꞌya moropai toꞌ koꞌmamî ipatîkarî. — Erenkakî Marcos 10:29, 30; 2 Coríntios 6:17, 18.

Paapaya seruꞌyeꞌkon religiãoyamîꞌ tîꞌka, mîrîrî tîpo ­tîwanmîn neepîiya tamîꞌnawîrî Pata po. Seruꞌyeꞌkon religiãoyamîꞌya ­pemonkonyamîꞌ yenkuꞌtî pepîn tiwin kin moropai toꞌ pantaka toꞌya pepîn. Tamîꞌnawîronkon pemonkonyamîꞌ wanî ­tîmurukon pe tiwinan Paapa yairon yapurîtoꞌpe. — Erenkakî Apocalipse 18:20, 21; 21:3, 4.