Paapa mîîkîrî tamîꞌnawîronkon pemonkonyamîꞌ yanna ipî toꞌ epîrematoꞌpe. (Salmo 65:2) Tîîse ­tamîꞌnawîronkon epîremantoꞌkon etaaiya pepîn moropai yuukuiya pepîn. Seeni eraꞌmakî, tînoꞌpî tarumaꞌtînen warayoꞌ epîremanto etaa Paapaya pepîn. (1 Pedro 3:7) Îꞌ pensa israelitayamîꞌ koꞌmanpîtîꞌpî imakuiꞌpî ­konekapîtîꞌpî toꞌya, mîrîrî yeꞌnen, Paapaya toꞌ epîremantoꞌkon etaasa pra man. Tîîse imakuiꞌpî kuꞌnen mîîkîrî pemonkon mîrîrî rumakasaiya Paapaya mîîkîrî epîremanto ­etaa. Mîrîrîya yenpo Paapa yarakkîrî eseurîmatoꞌpe wanî morî pe puꞌkuru. — Erenkakî Atos 3:19.

Seeni panton eraꞌmakî Tamîꞌnawîron epîremato etaanen Paapa?

Îꞌ pensa uurînîkon epîremaya Jeová pî, anna yunkon pe mîîkîrî wanî yenpo annaya. Mîrîrî yeꞌnen mîîkîrî pî nikin epîremantoꞌpe. Paapa Jeová mîîkîrî tiwinan yairon, anna Konekatîpon. (Mateus 4:10; 6:9) Paapa pî uurînîkon epîrema Jesus eseꞌya, maasa pra mîîkîrî samantaꞌpî yeꞌnen unkupîꞌpîkon imakuiꞌpî wenai. (João 14:6) Seꞌ tapairî mai tinnaꞌpo yuꞌse pra Jeová man uurînîkon epîremaya mîîkîrî pî moropai imenukasaꞌkon epîremanto nîrî. Uurînîkon yewanya epîremantoꞌpe yuꞌse mîîkîrî wanî. — Erenkakî Mateus 6:7; Filipenses 4:6, 7.

Îꞌ pensa uurînîkon epîremaya esenumenkatoya Paapaya etaa. (1 Samuel 1:12, 13) Paapa pî epîrematoꞌpenîkon tamîꞌnawîrî weiyu yai, îꞌ pensa akurantaya, aweetunya, awentamoꞌkaya moropai îꞌ pensa atarumaꞌtîya. — Erenkakî 1 Pedro 5:7; Mateus 15:36.

Saꞌme wanî Paapa pia erepantoꞌpe. Seeni pata ponkon pemonkonyamîꞌya inna taa pepîn Paapa pî. Toꞌ siranmatî Paapa pî mîîkîrîya tîwanmîn neepî pepîn seeni Pata po taa toꞌya. (2 Timóteo 3:1, 4; 2 Pedro 3:3, 13) Mîrîrî yeꞌnen, irmãoyamîꞌ yarakkîrî eꞌnîtoꞌpe inkamoroya uurînîkon pîikaꞌtî. Uurînîkon yarakkîrî nîrî eꞌpai toꞌ wanî. — Erenkakî Hebreus 10:24, 25.

 Paapa saꞌnamanenan yonpakon pe awanî moropai uurînîkon pîikaꞌtî toꞌya, ­Paapa pia erepantoꞌpe. Testemunhas de Jeová emurukontîntoꞌkon wanî morî pe puꞌkuru. Seeni emurukontîntoꞌkon ta anna tausinpasa man tiaronkonya Paapa yapurî ­eraꞌma uurînîkonya yeꞌnen. — Erenkakî Romanos 1:11, 12.

Amîrî erepamî eꞌpainon Paapa pia, Imaimu pî esenupa manni pî esenumenka. Esenumenkakî îꞌ konekaꞌpî Paapaya, îꞌ konekaiya moropai mîîkîrî panamatoꞌkon pî. Esenumenkatoya moropai epîremantoya uurînîkon pîikaꞌtî epuꞌtîtoꞌpe, oꞌnon yeꞌka pe kureꞌne Paapa saꞌnamato wanî moropai epuꞌnen pe eꞌto wanî. — Erenkakî 1 Timóteo 4:15, 16.

Amîrî erepamî eꞌpainon Paapa pia mîîkîrî pî inna taasa amîrîya. Meruntî ke amîrî fé eꞌtoꞌpe Paapa pî, tamîꞌnawîrî wei kaisirî Bíblia ­erenka moropai mîîkîrî pî esenupan pî ­koꞌmannî. — Erenkakî Mateus 4:4; Hebreus 11:1, 6.

Jeová esewankonoꞌma mîîkîrî saꞌnamanen pî. Paapaya uurînîkon pîikaꞌtî ­ipatîkarî koꞌmanto yapiꞌtoꞌpe moropai meruntî ke uurînîkon fé eꞌtoꞌpe. (Salmo 91:1, 2, 7-10) Mîîkîrîya uurînîkon panama imakuiꞌpî kupî uurînîkonya namai, neꞌneꞌ pe awanî ­namai moropai esewankonoꞌma namai. Jeováya uurînîkon ­yenupa ­morî pe koꞌmantoꞌpenîkon sîrîrîpe. — Erenkakî Tiago 1:25; 4:4, 8.