LIÇÃO 9
Oꞌnon yeꞌka pe amîrî família wanî eꞌpainon taatausinpai?
1. Îꞌ wani awanî yeꞌnen warayoꞌ moropai wîriꞌ eꞌmarima eꞌpainon cartórioya?
Paapa Jeová mîîkîrî, tausinpakoi, mîrîrî yeꞌnen famíliayamîꞌ yuꞌse mîîkîrî wanî taatausinpai. (1 Timóteo 1:11, TNM) Mîîkîrîya eꞌmarimanto konekaꞌpî. Eꞌmarimanto kuꞌsa manni catórioya, mîrîrîya yunkon moropai inmukuyamîꞌ pîikaꞌtî taatausinpai toꞌ eꞌtoꞌpe. Cristãoyamîꞌ wanî eꞌpainon, leis yawîrî oꞌnon pata toꞌ koꞌmamî manni cartórioya eꞌmarimanto pî. — Erenkakî Lucas 2:1, 4, 5.
Oꞌnon yeꞌka pe eꞌmarimanto eraꞌma Paapaya? Warayoꞌ moropai wîriꞌ eꞌmarimanto yuꞌse Paapa wanî ipatîkarî. Inyoꞌ moropai inoꞌpî yuꞌse Jeová man leais pe toꞌ eꞌtoꞌpe saꞌnîrî siꞌma. (Hebreus 13:4) Anîꞌya tînoꞌpî moropai tinyoꞌ rumakasaya, mîrîrî wanî Paapa yewanma pe. (Malaquias 2:16) Cristãoyamîꞌ eꞌmarimatoꞌpe inîꞌrî nîmî Jeováya, îꞌ pensa inyoꞌya ou noꞌpîya eseꞌnîto kuꞌsaya tiaron yarakkîrî. — Erenkakî Mateus 19:3-6, 9.
2. Oꞌnon yeꞌka pe warayoꞌya tînoꞌpî kupî eꞌpainon morî pe moropai oꞌnon yeꞌka pe wîriꞌya tinyoꞌ kupî eꞌpainon morî pe?
Jeováya warayoꞌ moropai wîriꞌ konekaꞌpî, saꞌnîrî siꞌma toꞌ eꞌpîikaꞌtîtoꞌpe eꞌmarimantoya. (Gênesis 2:18) Tîpemonkonoyamîꞌ puꞌpai pe tîwanî yeꞌnen, inyoꞌ esenyakama pon ton, yaꞌre ton, îꞌ rî eꞌtoꞌpe tînoꞌpî pia, tinmukuyamîꞌ pia, moropai Paapa pî toꞌ yenupaiya nîrî. Inyoꞌ moropai noꞌpî saꞌnama eꞌpainon mararî pra saꞌnîrî siꞌma respeitar tîkai toꞌ eꞌtoꞌpe. Imakuiꞌpî pe inyoꞌ moropai noꞌpî wanî yeꞌnen, imakuiꞌpî kupîꞌpî toꞌya manni kuꞌtoꞌpe toꞌya tîîwanmîra taatausinpai toꞌ eꞌtoꞌpe eꞌmarimantoya. — Erenkakî Efésios 4:31, 32; 5:22-25, 33; 1 Pedro 3:7.
3. Amîrî tausinpasa pra wanîya eꞌmarimantoya, yairon pe mîrîrî wanî anoꞌpî ou anyoꞌ rumakasaya?
Amîrî moropai anoꞌpî ou anyoꞌ koꞌmamî pra wanîya morî pe eꞌmarimantoya, tamîꞌnawîrî kuꞌtî saꞌnamato yenpotoꞌpe. (1 Coríntios 13:4, 5) Paapa maimuya panama pra man, inyoꞌya tînoꞌpî rumakatoꞌpe ou noꞌpîya tinyo rumakatoꞌpe, morî pe pra toꞌ koꞌmamîya eꞌmarimantoya. — Erenkakî 1 Coríntios 7:10-13.
4. Inmukuyamîꞌ, îꞌ yuꞌse Paapa wanî amîrînîkon tonpe?
Taatausinpai amîrînîkon yuꞌse Jeová man. Morî panamato tîrîiya oꞌnon yeꞌka pe aakoꞌmantoꞌpe maasaronkon pe awanîkon tanne. Amîrînîkon esenupatoꞌpe nîrî yuꞌse Paapa wanî ayunkon piapai, epuꞌnen pe toꞌ wanî yeꞌnen. (Colossenses 3:20) Jeová, anna Konekatîpon, amîrînîkon yuꞌse mîîkîrî wanî taatausinpai ituꞌse aweꞌto kuꞌtoꞌpe moropai Inmu ituꞌse aweꞌto kuꞌtoꞌpe nîrî. — Erenkakî Mateus 19:13-15; 21:15, 16.
5. Yunkonyamîꞌ, îꞌ koneka amîrînîkonya eꞌpainon taatausinpai anmukuyamîꞌ eꞌtoꞌpe?
Amîrînîkon esenyakama eꞌpainon yaꞌre ton, wîttî ton moropai pon ton tîrîpa kaiꞌma anmukuyamîꞌ pia. (1 Timóteo 5:8) Tîîse toꞌ eꞌtoꞌpe taatausinpai amîrînîkonya nîrî toꞌ yenupa eꞌpainon Paapa saꞌnamatoꞌpe toꞌya moropai ipî toꞌ esenupatoꞌpe. (Efésios 6:4) Yunkonya Paapa saꞌnamanen yenposaya Paapa saꞌnama yuꞌse nîrî anmukuyamîꞌ wanî. Îꞌ pensa yunkonya Paapa Maimu yenupasaya tinmukuyamîꞌ pî, mîrîrîya toꞌ pîikaꞌtî yairî kuꞌtoꞌpe toꞌya. — Erenkakî Provérbios 22:6; 2 Timóteo 3:15.
Taatausinpai anmukuyamîꞌ wanî amîrî ekoremasa pra wanîya toꞌ pî. Îꞌ pensa inmukuyamîꞌya imakuiꞌpî kupî eraꞌma yunkonya, toꞌ panamaiya mîrîrî kupî toꞌya namai. Tamîꞌnawîrî seenikonya anmukuyamîꞌ pîikaꞌtî imakuiꞌpî kupî toꞌya namai taatausinpai toꞌ eꞌtoꞌpe. (Provérbios 22:15) Mîrîrî yeꞌnen toꞌ tekatonkai pra eꞌtî moropai toꞌ paꞌtîi pra eꞌtî, toꞌ esewankonoꞌma namai morî pe toꞌ yenupatî. — Erenkakî Colossenses 3:21.
Testemunhas de Jeováya tuꞌke Paapa kaaretarîkon konekasa man yunkon moropai inmukuyamîꞌ pîikaꞌtîtoꞌpe. Seeni kaaretarîkon imoꞌkasa mîrîrî Bíblia yapai. — Erenkakî 2 Timóteo 3:16, 17.
Awakîri pe nîrî mîrîrîkon wanî
AYEWÎꞌ TAAWONKON WANÎ EꞌPAINON TAATAUSINPAI!
Eꞌmaritîmantoꞌ taatausinpai Paapa pîkînsaꞌ
Asakîꞌne kaisarî ekaranmapoꞌsakon man mîrîrîkonya amîrî eꞌmarimantoꞌ pîikaꞌtî morî pe aweꞌtoꞌpe.
AYEWÎꞌ TAAWONKON WANÎ EꞌPAINON TAATAUSINPAI!
Eꞌmaritîmapîya eꞌtarumaꞌtîntoꞌ yapîtanîpî
Yairî wanî eꞌmarimantoꞌ morî pe ikoneka ya mîrîrî wenai taatausinpantoꞌ wanî, moropai tiaron eꞌmarimantoꞌ wanî imakuiꞌpî pe mîrîrî wenai toꞌ eꞌtarumaꞌtî.
