Paapaya Abraão munkuyamîꞌ menkaꞌpî, mîrîrî tîpo Paapaya toꞌ etinyakamaꞌpî nação pe, moropai leis tîrîꞌpî Paapaya yawîrî toꞌ eꞌtoꞌpe. Toꞌ eseꞌ ton tîrîꞌpî Paapaya “Israel” pe. Yairon Paapa yapurîtoꞌpe toꞌya moropai imaimu yawîrî toꞌ eꞌtoꞌpe. (Romamos 3:2) Mîrîrî yeꞌnen, tamîꞌnawîronkon pata ponkon pemonkonyamîꞌya tuꞌke morîkon yapiꞌsîꞌpî eꞌpainon Israel wenai. — Erenkakî Atos 3:25.

Paapaya israelitayamîꞌ menkaꞌpî toꞌ eseurîmatoꞌpe iteseꞌ pî. Toꞌ pantoniya yenpo, oꞌnon yeꞌka pe pemonkonyamîꞌ pîikaꞌtîꞌpî Paapa leisya îꞌ pensa yawîrî toꞌ wanîꞌpî. (Romanos 15:4) ­Erenkaya eꞌpainon israelitayamîꞌ pî moropai toꞌ wenai esenupa, ­tiaronkonya yairon Paapa epuꞌtîꞌpî eꞌpainon. — Erenkakî Mateus 5:16.

Israelya Paapa pemonkonoyamîꞌ pe tîweꞌto rumakaꞌpî, moropai toꞌ moꞌtînîꞌpî Jeováya yaironkon cristãoyamîꞌ pe. (Mateus 21:43; 23:37, 38) Sîrîrîpe, israelitayamîꞌ, pataꞌpî ya yaironkon cristãoyamîꞌ wanî testemunhas de Jeová pe. — Erenkakî Atos 15:14, 17.

Jesusya discípuloyamîꞌ emurukontîꞌpî ­Paapa Maimu ekare­meꞌse moropai discípuloyamîꞌ ton kuꞌtoꞌpe tamîꞌnawîrî pata poi. (Mateus 10:7, 11; 24:14; 28:19, 20) Aminke maꞌre seeni esenyakamato discípuloyamîꞌ kuꞌtoꞌpe eꞌtîꞌkato man. Eꞌmaiꞌpe iteꞌka Paapa Jeováya tuꞌke pemonkonyamîꞌ emuru­kontîꞌpî tamîꞌnawîrî pata poi yairon Paapa yapurîtoꞌpe toꞌya. (Apocalipse 7:9, 10) ­Yaironkon cristãoyamîꞌ wanî tîmurukon pe tiaronkon pîikaꞌtîtoꞌpe moropai toꞌ ­yausinpatoꞌpe. Toꞌ yenupanto wanî mîrîrî warantîrî tamîꞌnawîrî pata po, ­emurukontîntoꞌkon ta. — Erenkakî Hebreus 10:24, 25.

Mararonkon pemonkonyamîꞌ sipiaꞌtîꞌpî Bíblia pî esenupai, 1870 yai moropai yaironkon bíblicas epuꞌtîꞌpî toꞌya. Jesusya congregação ­emurukontîꞌpî Paapa Maimu ekaremeꞌse epuꞌtîꞌpî toꞌya nîrî. Mîrîrî yeꞌnen, iipiaꞌtîꞌpî toꞌya Paapa Reinori ekaremeꞌse tamîꞌnawîrî pata po. 1931 yai, teseꞌkon ton ­imenkaꞌpî toꞌya Testemunhas de Jeová pe. — Erenkakî Atos 1:8; 2:1, 4, 11; 5:42.

Jesus samantasa tîpo, tuꞌke congregaçãoyamîꞌ pîikaꞌtîꞌpî warayoꞌkonya, toꞌ esaꞌtî corpo governante pe. Tîîse epuꞌtîꞌpî toꞌya Jesus wanî congregação Puꞌpai pe. (Atos 16:4, 5) Mîrîrî warantî sîrîrîpe, Corpo Governanteya Testemunhas de Jeová pîikaꞌtî tamîꞌnawîrî pata po. Testemunhas de Jeová filiais eraꞌma toꞌya, moropai Paapa kaaretarî kupî toꞌya tuꞌke maimukonya. Paapa kaaretarî tîîtoꞌpe esenupanto ton Bíblia pî innî panpî 600 kaisirî maimukonya. Mîrîrî warantî, Corpo Governanteya tiaronkon yausinpa esenupanto Bíblia pî moropai panamato tîrî innî panpî 100 mil congregaçãoyamîꞌ pia tamîꞌnawîrî pata po. ­Congregaçãoya warayoꞌkon man, anciãoyamîꞌ pe toꞌ esaꞌtî. Paapa ­pemonkonoyamîꞌ eraꞌma toꞌya morî pe. — Erenkakî 1 Pedro 5:2, 3.

Testemunhas de Jeová wanî organizadas pe morî Paapa itekare ekaremeꞌtoꞌpe, moropai discípuloyamîꞌ ton kuꞌtoꞌpe. Apóstoloyamîꞌ warantî, Paapa Maimu ekaremeꞌkî toꞌya wîttîkon kaisirî. (Atos 20:20) Toꞌ esenupa nîrî Bíblia pî, yairon saꞌnamanen pemonkonyamîꞌ yarakkîrî. Tîîse Testemunhas de Jeová wanî pepîn ­organização pe nikin. Família pe toꞌ wanî saꞌnamanen ­yunkon yarakkîrî. Irmãoyamîꞌ moropai irmãyamîꞌ pe toꞌ wanî tiaronkon pî toꞌ esewankonoꞌma. (2 Tessalonicenses 1:3) Jeová poitîrîkon wanî nîrî ­organizados pe Paapa yapurîtoꞌpe moropai ­tiaronkon pîikaꞌtîtoꞌpe, família pe toꞌ ena, ­taatausinpai innî panpî Pata po. — Erenkakî 1 Pedro 2:9; Atos 20:35.