Anna Konekatîpon wanî epuꞌnen pe panpî uurînîkon yentai. Saꞌnamanen Yun warantî, mîîkîrîya uurînîkon eraꞌma morî pe. Paapaya uurînîkon konekaꞌpî uurînîkon yenupatoꞌpîiya ipatîkarî. (Jeremias 10:23) More panama yunya manni warantî, uurînîkon wanî eꞌpainon Paapa panamato yuꞌse. (Lucas 11:28) Princípios wanî manni Bíbliaya Paapa nîtîrîꞌpî mîrîrî uurînîkon pia. — Erenkakî 2 Timóteo 3:16.

Leisya moropai Jeová princípiosya uurînîkon yenupa morî pe koꞌmantoꞌpe sîrîrîpe. Oꞌnon yeꞌka pe uurînîkon ­koꞌmantoꞌpe ipatîkarî yenpoiya. Paapaya uurînîkon konekaꞌpî, mîrîrî yeꞌnen imaimu yawîrî eꞌtoꞌpenîkon. — Erenkakî Romanos 15:4; Apocalipse 4:11.

Princípios bíblicos wanî yaironkon pe amoꞌta pepîn ipatîkarî aakoꞌmamî. Tîîse leis moꞌta eꞌpainon moropai aweꞌtîꞌka eꞌpainon. (Atos 15:29) Uurînîkon esenumenka eꞌpai wanî epuꞌtîtoꞌpe, oꞌnon yeꞌka pe princípio yawîrî eꞌtoꞌpenîkon. (Hebreus 5:14) Bíbliaya ­yenupa pî man Paapaya uurînîkon koꞌmanto ton tîrîꞌpî. Seeni princípioya uurînîkon pîikaꞌtî aka ta toꞌpe esenyakamato ta, wîttî ta ­moropai îꞌ pensa eseꞌmaꞌtîya esepîrantî namai. — Erenkakî Atos 17:28.

Jesus eseurîmaꞌpî saakîne kaisirî princípios pî. Eꞌmaiꞌnonya ­yenpo îꞌ wani awanî yeꞌnen Paapaya uurînîkon konekaꞌpî. Mîîkîrî eꞌpuꞌtîtoꞌpe, mîîkîrî saꞌnamatoꞌpe moropai imaimu yawîrî eꞌtoꞌpe. Seeni eꞌmaiꞌnon princípio pî enpanata îꞌ pensa tiwin imenkato kupî uurînîkonya. (Tiago 1:5) Mîrîrî kuꞌsa  uurînîkonya Paapa yonpa pe eꞌnî, moropai uurînîkon koꞌmamî ­ipatîkarî taatausinpai. — Erenkakî Mateus 22:36-38.

Ipîkîron princípioya uurînîkon pîikaꞌtî tiaronkon yarakkîrî ­koꞌmantoꞌpe tîwanmînya. (1 Coríntios 13:4-7) Îꞌ pensa pemonkonyamîꞌ saꞌnama uurînîkonya, Paapaya toꞌ saꞌnama manni ­warantî ­ikupî. — Erenkakî Mateus 7:12; 22:39, 40.

Princípios bíblicosya yunkon, sankon moropai inmukuyamîꞌ pîikaꞌtî morî pe inkamoro koꞌmantoꞌpe teekoremai pra. (Colossenses 3:12-14) Paapa Maimuya tiaron princípio yenupa ­inyo pî moropai noꞌpî pî eꞌmarimanto eꞌtoꞌpe ipatîkarî. — Erenkakî Gênesis 2:24.

Seeni princípios bíblicos yawîrî uurînîkon wanîya mîrîrîya uurînîkon pîikaꞌtî, îꞌ yuꞌse eꞌtoꞌpe. Tîwanmîn eꞌtoꞌpe esenumenkatoya moropai yewanya. Eraꞌmakî, poitîrîkon enyaꞌneꞌkon, amaꞌyeꞌkon moropai seruꞌyeꞌkon karaiwarîkon waakîri pepîn mîrîrî. (Colossenses 3:22; Hebreus 13:18) Paapa Maimuya uurînîkon yenupa, îꞌ wanî manni uurînîkon pia mîrîrî pî tausinpatoꞌpe. Paapa eꞌtoꞌpe nîrî uwanîyakon pe pîrata yentai. — Erenkakî Mateus 6:24, 25, 33; 1 Timóteo 6:8-10.

Princípios bíblicos yawîrî uurînîkon esaya, upîikaꞌtîiyanîkon morî pe priꞌyawon pe eꞌtoꞌpe. (Provérbios 14:30; 22:24, 25) Paapa leis yawîrî wanîya eꞌtari pe pra eꞌtoꞌpe, mîrîrîya uurînîkon pîikaꞌtî parankonya awîîkon namai moropai esepîrantî namai. (Romanos 13:13) Maiꞌ awukukon enîrîtoꞌpe amîrîya nîmîsa Jeováya man yuꞌse awanîya, tîîse teetînse pra eꞌkî. (1 Timóteo 5:23; 1 Coríntios 6:10) Paapa princípiosya uurînîkon pîikaꞌtî aka ta toꞌpe, îꞌ kupî uurînîkonya manni pî moropai uurînîkon esenumenkato pî. (2 Timóteo 3:15, 16) Morî pe wanî yaironkon cristãoyamîꞌ pia îꞌ pensa îꞌ ­yenupa Bíbliaya manni yawîrî toꞌ wanî. Mîrîrî kupî toꞌya Jeová ­yapurîtoꞌpe. — Erenkakî Mateus 5:14-16.