ESENUPANTOꞌ 34

Oꞌnon yeꞌka pe Jeová saꞌnama uurînîkonya eꞌpainon?

YE'NUNPA

Inîꞌ panpîꞌ erepannî pî nan Paapa pia, imaimu pî esenupasaꞌ yeꞌnen? Inîꞌ panpîꞌ itonpa pe enapai nan? Enpanatakî, Jeová saꞌnama ya, amîrî eraꞌmaiya, amîrî saꞌnamaiya. Tîîse, oꞌnon yeꞌka pe Jeová saꞌnamaya eꞌpainon?

1. Îꞌ kupî uurînîkonya eꞌpainon, Jeová saꞌnamatoꞌpe?

Jeová saꞌnama uurînîkonya yeꞌnen, imaimu yawîrî uurînîkon wanî. (Eraꞌmakî 1 João 5:3.) Ituꞌse uurînîkon wanî ya, Jeová maimu yawîrî eꞌtoꞌ menka uurînîkonya eꞌpainon, uyewankon ke imaimu yawîrî uurînîkon eꞌtoꞌpe ituꞌse tîwanî yeꞌnen. (Romanos 6:17) Seeni kaareta ipantakasaꞌ 3 moropai 4 ya apîikaꞌtî Jeová saꞌnamatoꞌpe inîꞌ panpîꞌ, imaimu yawîrî eꞌtoꞌpe moropai îꞌ wanî iwakîri pe pra, kupî namai.

2. Îꞌ waniꞌ awanî yeꞌnen tiaron pensa saꞌme wanî, Jeová maimu yawîrî eꞌnî uyewankon ke?

“Yairî tîweꞌsanon pia, tuꞌke eꞌtarumaꞌtîntoꞌ man.” (Salmo 34:19) Meruntî ke eꞌpai uurînîkon wanî imakuiꞌpî kupî namai. Tiaron pensa mararî pîrata esaꞌ pe uurînîkon wanî, tiaron pensa imakuiꞌpî eꞌkupî uurînîkon pî moropai eꞌtarumaꞌtîntoꞌ iwaꞌka uurînîkonya. Mîrîrî yai, Jeová maimu yawîrî eꞌtoꞌ, saꞌme wanî uurînîkon pia. Mîrîrî eꞌkupî, maasa pra imakuiꞌpî kuꞌtoꞌ wanî saꞌme pra. Tîîse, mîrîrî yai, Jeová maimu yawîrî aakoꞌmamî ya, imaimu yawîrî awanî ya, mîrîrî eraꞌma Jeováya. Jeováya epuꞌtî mîrîrî kupîya ya, isaꞌnamaya yeꞌnen. Mîrîrî wanî morî pe puꞌkuru iipia, mîrîrî yeꞌnen Jeováya rumaka pepîn, ayeraꞌmaiya. — Hebreus 13:5.

ESENUPAKÎ INÎꞌ PANPÎꞌ

Eraꞌmakî îꞌ waniꞌ awanî yeꞌnen Jeová maimu yawîrî awanî ya, iwakîri pe wanî moropai îꞌ ya amîrî pîikaꞌtî eꞌpainon Jeová yarakkîrî aakoꞌmamîpa teesetaꞌkai pra.

3. Makui eseurîmaꞌpî amîrî pî

Paapa Maimu imenukasaꞌ Jó kaaretarî ya, eraꞌma uurînîkonya îꞌ taꞌpî Makuiya Jó pî moropai Jeová Maimu yawîrî tîweꞌsanon pî. Eraꞌmatî Jó 1:1, 6–2: 10. Mîrîrî tîpo seeni itoꞌkoꞌ manni pî eseurîmatî:

Îꞌ taꞌpî Makuiya î tonpe Jeová maimu yawîrî Jó wanîꞌpî? — Eraꞌmatî Jó 1:9-11 ya.
Îꞌ taa Makuiya tamîꞌnawîronkon pemonkonyamîꞌ pî moropai apî nîrî? — Eraꞌmatî Jó 2:4 ya.

Eraꞌmatî Jó 27:5b. Mîrîrî tîpo seeni itoꞌkoꞌ manni pî eseurîmatî:

Oꞌnon yeꞌka pe tînkupîꞌpî wenai Jóya ekaremekîꞌpî, Jeová saꞌnamanen pe tîwanî yeꞌnen?

Jeováya Jó saꞌnamaꞌpî, mîrîrî yeꞌnen irumakasaꞌ pra wanîꞌpî

Uurînîkonya Jeová saꞌnama pî man, mîrîrî yeꞌnen irumakasaꞌ pra man

4. Jeová yewan yausinpakî

Eraꞌmatî Provérbios 27:11. Tarîpai seeni itoꞌkoꞌ manni pî eseurîmatî:

Oꞌnon yeꞌka pe Jeová esepuꞌtî îꞌ pensa yairî tîweꞌsen kuꞌsaꞌya ya moropai imaimu yawîrî awanî ya? Îꞌ waniꞌ awanî yeꞌnen?

5. Jeová tîrumakai pra awanî eꞌpainon

Jeová saꞌnama uurînîkonya yeꞌnen, uurînîkon eseurîma ipî moropai imaimu yawîrî eꞌpai uurînîkon wanî, saꞌme wanî tanne. PANTON eraꞌmatî, mîrîrî tîpo seeni itoꞌkoꞌ manni pî eseurîmatî:

PANTON ERAꞌMATOꞌPE: Innape aweꞌtoꞌ pî eꞌkî maasa sokoroꞌ pe pemonkonyamîꞌ wanî tanne (5:09)

Îꞌ taaya, saꞌme wanî aapia Jeová pî eseurîmapa tiaronkon yarakkîrî?
Panton ya, îꞌ ya Claudio pîikaꞌtîꞌpî aranneꞌ pe aweꞌtoꞌ yentai mîîkîrî eꞌtoꞌpe?

Îꞌ pensa îꞌ saꞌnama Jeováya manni saꞌnama uurînîkonya ya moropai îꞌ wanî manni Jeová itewanma pe, itewanma pe nîrî kuꞌsaꞌ uurînîkonya ya, saꞌme pra wanî imaimu yawîrî eꞌtoꞌpeꞌnîkon. Eraꞌmatî Romanos 12:9. Mîrîrî tîpo seeni itoꞌkoꞌ manni pî eseurîmatî:

Sîrîrî tîpose mararî pra amîrî esenupaꞌpî, mîrîrî yeꞌnen seeni pî ekaremekî: Îꞌ saꞌnamanen Jeová? Îꞌ kon yewanmîrînen Jeová?
Îꞌ ya apîikaꞌtî eꞌpainon îꞌ wanî morî saꞌnamapa moropai îꞌ wanî imakuiꞌpî yewanmîrîpa?

6. Jeová maimu yawîrî eꞌtoꞌ wanî morî pe puꞌkuru

Morî pe puꞌkuru wanî Jeová maimu yawîrî awanî ya. Eraꞌmatî Isaías 48:17, 18. Mîrîrî tîpo seeni itoꞌkoꞌ manni pî eseurîmatî:

Jeováya epuꞌtî îꞌ wanî morî pe panpîꞌ uurînîkon pia. Îꞌ taaya? Mîrîrî wanî yairî inna taa uurînîkonya eꞌpainon? Îꞌ waniꞌ awanî yeꞌnen?
Îꞌ kaima amîrî esenupaꞌpî manni Jeová pî moropai imaimu pî, apîikaꞌtîiya sîrîrî tîpose?

TIARONKONYA TAA: “Îꞌ rî kupîuya morî pe moropai îꞌ rî kupîuya imakuiꞌpî pe pîinama Paapaya pepîn.”