ESENUPANTOꞌ 35
Oꞌnon yeꞌka pe morî menka uurînîkonya eꞌpainon?
Morî menka uurînîkonya eꞌpainon, maasa pra mîrîrîya uurînîkon kuꞌpî eꞌpainon morî pe moropai mîrîrî wenai uurînîkon wanî eꞌpainon Jeová yonpa pe. Seeni eraꞌmakî, tiaron pensa menka eꞌpai uurînîkonya eꞌpainon oꞌnon pata po koꞌmannîtoꞌ, oꞌnon pata esenyakaꞌman moropai eꞌmaritîmantoꞌ pî. Morî menka uurînîkonya ya, taatausinpai uurînîkon wanî moropai mîrîrî pî Jeová tausinpa.
1. Oꞌnon yeꞌka pe Paapa Maimu imenukasaꞌ yenkamaya eꞌpainon morî menkatoꞌpe?
Îꞌ rî imenkaya irawîrî, epîremakî Jeová pî, eꞌpîikaꞌtîntoꞌ ton esaꞌkî ipî moropai eraꞌmakî îꞌ taa Paapa Maimu imenukasaꞌya manni mîrîrî pî. (Eraꞌmakî Provérbios 2:3-6.) Tiaron pensa îꞌ kupî uurînîkonya eꞌpainon, Jeováya ekaremekî aronne, mîrîrî yeꞌnen imaimu yawîrî eꞌpai uurînîkon wanî.
Tîîse, tiaron pensa îꞌ kupî uurînîkonya eꞌpainon eporî uurînîkonya pra man Paapa Maimu ya. Mîrîrî eꞌkupî ya, Jeováya amîrî “yenupa” eꞌpainon. (Isaías 48:17) Oꞌnon yeꞌka pe? Paapa Maimu ya panamatoꞌ man, mîrîrîya apîikaꞌtî eꞌpainon (princípios/principles). Îꞌ see mîrîrî princípios? Mîrîrî wanî yairon Paapa Maimu yapai, uurînîkon yenupatoꞌpe Jeová esenumenkatoꞌ pî. Îꞌ pensa Jeová esenumenkatoꞌ anepuꞌpai uurînîkon wanî ya, imaimu imenukasaꞌ eraꞌma uurînîkonya eꞌpainon. Jeová esenumenkantoꞌ epuꞌtî uurînîkonya ya, îꞌ imenka uurînîkonya manni, mîrîrî wanî iwakîri pe.
2. Îꞌ pî esenumenka eꞌpainon îꞌ menkaya irawîrî?
Paapa Maimuya taa pî man: “Epuꞌnen pepîn pemonkonya inna taa îꞌ pî rî. Tîîse epuꞌnen panpîꞌ esenumenka morî pe îꞌ kupî irawîrî.” (Provérbios 14:15) Mîrîrî yeꞌnen, îꞌ menka uurînîkonya irawîrî, esenumenka morî pe eꞌpai uurînîkon wanî. Apîꞌrî ekaranmapokî: ‘Îꞌ taasaꞌ Paapa Maimu imenukasaꞌya mîrîrî pî? Mîrîrî menkasauꞌya ya, tîwanmîra wanî? Tiaronkon atakoꞌmenka eꞌpainon mîrîrî pî?’ Esenumenkakî nîrî: ‘Mîrîrî menkasauꞌya ya, mîrîrîya Jeová yausinpa?’ — Deuteronômio 32:29.
Îꞌ wanî yairî, îꞌ wanî yairî pra, Jeová eseurîma eꞌpainon uurînîkon pî. Paapa Maimu imenukasaꞌ epuꞌtî uurînîkonya ya, imaimu yawîrî menka uurînîkonya, moropai tenupantoꞌkon nîrî. Moriya, ituꞌna uurînîkon esenumenkatoꞌ ena morî pe, yairon pe (consciência/conscience). Ituꞌna uurînîkon esenumenkatoꞌ wenai, epuꞌtî uurînîkonya eꞌpainon îꞌ wanî yairî, îꞌ wanî yairî pra. (Romanos 2:14, 15) Ituꞌna uurînîkon esenumenkatoꞌ wanî ya morî pe, îꞌ wanî yairî menka uurînîkonya eꞌpainon.
ESENUPAKÎ INÎꞌ PANPÎꞌ
Eraꞌmakî oꞌnon yeꞌka pe Paapa Maimu yenupantoꞌkon moropai ituꞌna uurînîkon esenumenkatoꞌ (consciência), mîrîrîya uurînîkon pîikaꞌtî eꞌpainon morî pe menkatoꞌpe.
3. Paapa Maimu imenukasaꞌ yawîrî eꞌkî
Oꞌnon yeꞌka pe Paapa Maimu yenupantoꞌkonya uurînîkon yenupa eꞌpainon morî menkatoꞌpe? PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Îꞌ see mîrîrî, îꞌ ituꞌse uurînîkon eꞌtoꞌ menka? (livre-arbítrio/free will)
-
Îꞌ waniꞌ awanî yeꞌnen îꞌ ituꞌse uurînîkon eꞌtoꞌ menkatoꞌpe uurînîkonya, Jeováya itîrî?
-
Îꞌ tîrîꞌpî Jeováya uurînîkon eꞌpîikaꞌtîtoꞌpe, morî menkatoꞌpe uurînîkonya?
Paapa Maimu pî esenupantoꞌ epuꞌtîpa inîꞌ panpîꞌ, eraꞌmatî Efésios 5:15, 16 ya. Paapa Maimuya taa pî man “maasa tîkai pra”. Tarîpai eseurîmatî oꞌnon yeꞌka pe mîrîrî taaya eꞌpainon . . .
-
Paapa Maimu imenukasaꞌ eraꞌmapa tîkoꞌnarî.
-
morî pe inyo moropai morî noꞌpî, moropai morî pe yun, morî pe san moropai morî pe munmu eꞌtoꞌpe eꞌpainon.
-
Emurukuntîtoꞌ Pataꞌseꞌ ya attîpa.
4. Ituꞌna amîrî esenumenkatoꞌ kukî morî pe morî menkatoꞌpe
Îꞌ pensa aronne wanî îꞌ taasaꞌ Paapa Maimu imenukasaꞌya manni, saꞌme pra wanî epuꞌtoꞌpe uurînîkonya îꞌ kuꞌtoꞌpe. Tîîse, îꞌ kupî uurînîkonya eꞌpainon, mîrîrî eꞌkupî pra wanî ya? PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Panton ya, îꞌ kupîꞌpî wîriꞌya teesenumenkatoꞌ ke yairî, morî menkatoꞌpe, Jeová esenumenkatoꞌ seꞌ kaisarî?
“Uurî pataꞌpî ya awanî ya, îꞌ kupîya?” kîkai. Îꞌ waniꞌ awanî yeꞌnen? Eraꞌmatî Hebreus 5:14. Tarîpai seeni itoꞌkoꞌ manni pî eseurîmatî:
-
Amîrî pataꞌpî ya imenka tiaronkonya ya, saꞌme pra wanî. Tîîse îꞌ epuꞌtî eꞌpai uurînîkon wanî tiwin pî siꞌma?
-
Panton ya, îꞌ pî esenupa pî nan aweꞌpîikaꞌtîtoꞌ ton pe morî pî esenumenkapa moropai morî menkapa?
Ema taawîrî yenponen panpe (GPS), ituꞌna uurînîkon esenumenkatoꞌya uurînîkon pîikaꞌtî morî menkatoꞌpe uukoꞌmantoꞌkon ya
5. Tiaronkon nîmenkaꞌpî takoꞌmenkai pra eꞌkî
Tîponarî pemonkonyamîꞌ wanî, mîrîrî yeꞌnen îꞌ menka toꞌya pra wanî seꞌ kaisarî. Oꞌnon yeꞌka pe îꞌ menkasaꞌ tiaronkonya pî takoꞌmenkai pra eꞌnîtoꞌpe? Seeni eraꞌmakî:
Panton 1: Wîriꞌya yapîtîꞌpîiya emanon pe tîwanîpa. Mîîkîrî wîtîꞌpî tiaron pataꞌseꞌ ya, tîîse tiaronkon wîriꞌsanyamîꞌya moroni, wakîri pe pra seeni yeseru pî.
Eraꞌmatî Romanos 15:1 moropai 1 Coríntios 10:23, 24. Tarîpai seeni itoꞌkoꞌ manni pî eseurîmatî:
-
Mîrîrî Paapa Maimu imenukasaꞌkon eraꞌma wîriꞌya tîpo, îꞌ menkaiya eꞌpainon? “Yairî pra mîrîrî wanî” taasaꞌ tiaronkonya ya, tîîse îꞌ wani pra wanî aapia. Mîîkîrî esenumenkatoꞌ wanî pepîn amîrî esenumenkatoꞌ seꞌ kaisarî. Mîrîrî yai îꞌ menkaya?
Panton 2: Paapa Maimuya taa pî man îꞌ wani pra wanî maiꞌ enîrî mararî, mîrîrî epuꞌtî tiwin warayoꞌya, tîîse menka mîîkîrîya maiꞌ enîꞌtoꞌpe pra tiwin kin. Tiaron yonpaya mîîkîrî yanna ipokonpe entamoꞌkatoꞌpe. Erepansaꞌ tîpo eraꞌmaiya tiaronkonya maiꞌ enîrî pî man.
Eraꞌmatî Eclesiastes 7:16 moropai Romanos 14:1, 10. Tarîpai seeni itoꞌkoꞌ manni pî eseurîmatî:
-
Mîrîrî Paapa Maimu imenukasaꞌkon eraꞌma warayoꞌya tîpo, îꞌ menkaiya eꞌpainon? Tiaron pensa tiaron pemonkon esenumenkatoꞌ wanî pepîn amîrî esenumenkatoꞌ panpe moropai îꞌ kuꞌsaꞌ mîîkîrîya, mîrîrî wanî pepîn amîrî esenumenkatoꞌ panpe. Mîrîrî yai, îꞌ kupîya?
Îꞌ kupîya eꞌpainon morî menkatoꞌpe?
1. Jeová pî epîremakî, eꞌpîikaꞌtîntoꞌ esaꞌkî ipî apîikaꞌtîtoꞌpeiya morî menkatoꞌpe amîrîya. — Tiago 1:5.
2. Esenupakî. Paapa Maimu imenukasaꞌ pî esenupakî, tiaronkon kaaretakon Paapa Maimu pî eꞌmenukasaꞌ manni esenupakî nîrî eꞌpîikaꞌtîntoꞌ eporîpa. Epuꞌnenan Paapa poitîrîtonon yarakkîrî eseurîmakî nîrî.
3. Esenumenkakî îꞌ menkaya manni pî, maasa pra mîrîrîya ayakaꞌma eꞌpainon moropai tiaronkon yakaꞌma eꞌpainon nîrî.
TIARONKONYA TAA: “Uurî koꞌmantoꞌ esaꞌ pe uurî, uurî ituꞌse eꞌtoꞌ kupîuya. Îꞌ taa tiaronkonya upî, îꞌ pe pra rî mîrîrî wanî uupia.”
-
Îꞌ waniꞌ awanî yeꞌnen Jeová esenumenkatoꞌ pî moropai tiaronkon pemonkonyamîꞌ esenumenkatoꞌ pî esenumenka eꞌpai uurînîkon wanî?
Îꞌ PÎ ESENUPA PÎ NAN?
Morî pe menkatoꞌpe uurînîkonya, Jeová esenumenkatoꞌ pî esenupa eꞌpai uurînîkon wanî moropai esenumenka eꞌpai uurînîkon wanî îꞌ taa tiaronkonya mîrîrî pî.
Enpanatapaiꞌnîkon
-
Oꞌnon yeꞌka pe morî menkaya eꞌpainon Jeová yausinpatoꞌpe?
-
Oꞌnon yeꞌka pe ituꞌna amîrî esenumenkatoꞌ kupî eꞌpainon yairî, morî menkatoꞌpe amîrîya?
-
Oꞌnon yeꞌka pe tiaronkon esenumenkatoꞌ pî amîrî nîrî esenumenka eꞌpainon?
INÎꞌ PANPÎꞌ ESENUPAPAI NAN?
Oꞌnon yeꞌka pe morî menkaya eꞌpainon, inîꞌ panpîꞌ Paapa yonpa pe enapa?
“Îꞌ wanî Jeová wakîri pe menkakî” (A Sentinela, 15 abril kapoi pî, 2011 konoꞌ pî)
Esenupakî oꞌnon yeꞌka pe Jeováya uurînîkon panama.
Eraꞌmakî îꞌ ya warayoꞌ pîikaꞌtîꞌpî morî menkatoꞌpeiya.
Îꞌ kupî uurînîkonya eꞌpainon, îꞌ pensa îꞌ kuꞌtoꞌpe uurînîkonya Paapa Maimu ekaremeꞌsaꞌ pra wanî ya?
